హరివరాసనం విశ్వమోహనమ్
హరిదధీశ్వరం ఆరాధ్యపాదుకమ్ ।
అరివిమర్దనం నిత్యనర్తనమ్
హరిహరాత్మజం దేవమాశ్రయే ॥ 1 ॥

శరణకీర్తనం భక్తమానసమ్
భరణలోలుపం నర్తనాలసమ్ ।
అరుణభాసురం భూతనాయకమ్
హరిహరాత్మజం దేవమాశ్రయే ॥ 2 ॥

ప్రణయసత్యకం ప్రాణనాయకమ్
ప్రణతకల్పకం సుప్రభాఞ్చితమ్ ।
ప్రణవమన్దిరం కీర్తనప్రియమ్
హరిహరాత్మజం దేవమాశ్రయే ॥ 3 ॥

తురగవాహనం సున్దరాననమ్
వరగదాయుధం వేదవర్ణితమ్ ।
గురుకృపాకరం కీర్తనప్రియమ్
హరిహరాత్మజం దేవమాశ్రయే ॥ 4 ॥

త్రిభువనార్చితం దేవతాత్మకమ్
త్రినయనప్రభుం దివ్యదేశికమ్ ।
త్రిదశపూజితం చిన్తితప్రదమ్
హరిహరాత్మజం దేవమాశ్రయే ॥ 5 ॥

భవభయాపహం భావుకావకమ్
భువనమోహనం భూతిభూషణమ్ ।
ధవళవాహనం దివ్యవారణమ్
హరిహరాత్మజం దేవమాశ్రయే ॥ 6 ॥

కళమృదుస్మితం సున్దరాననమ్
కళభకోమలం గాత్రమోహనమ్ ।
కళభకేసరీవాజివాహనమ్
హరిహరాత్మజం దేవమాశ్రయే ॥ 7 ॥

శ్రితజనప్రియం చిన్తితప్రదమ్
శ్రుతివిభూషణం సాధుజీవనమ్ ।
శ్రుతిమనోహరం గీతలాలసమ్
హరిహరాత్మజం దేవమాశ్రయే ॥ 8 ॥

శరణం అయ్యప్పా స్వామి శరణం అయ్యప్పా ।
శరణం అయ్యప్పా స్వామి శరణం అయ్యప్పా ॥