1. ശ്രീ ബാല ഗണപതിഃ
കരസ്ഥ കദലീചൂതപനസേക്ഷുകമോദകമ് ।
ബാലസൂര്യനിഭം വംദേ ദേവം ബാലഗണാധിപമ് ॥ 1 ॥

2. ശ്രീ തരുണ ഗണപതിഃ
പാശാംകുശാപൂപകപിത്ഥജംബൂ-
-സ്വദംതശാലീക്ഷുമപി സ്വഹസ്തൈഃ ।
ധത്തേ സദാ യസ്തരുണാരുണാഭഃ
പായാത് സ യുഷ്മാംസ്തരുണോ ഗണേശഃ ॥ 2 ॥

3. ശ്രീ ഭക്ത ഗണപതിഃ
നാരികേളാമ്രകദലീഗുഡപായസധാരിണമ് ।
ശരച്ചംദ്രാഭവപുഷം ഭജേ ഭക്തഗണാധിപമ് ॥ 3 ॥

4. ശ്രീ വീര ഗണപതിഃ
വേതാലശക്തിശരകാര്മുകചക്രഖഡ്ഗ-
-ഖട്വാംഗമുദ്ഗരഗദാംകുശനാഗപാശാന് ।
ശൂലം ച കുംതപരശും ധ്വജമുദ്വഹംതം
വീരം ഗണേശമരുണം സതതം സ്മരാമി ॥ 4 ॥

5. ശ്രീ ശക്തി ഗണപതിഃ
ആലിംഗ്യ ദേവീം ഹരിതാംഗയഷ്ടിം
പരസ്പരാശ്ലിഷ്ടകടിപ്രദേശമ് ।
സംധ്യാരുണം പാശസൃണീ വഹംതം
ഭയാപഹം ശക്തിഗണേശമീഡേ ॥ 5 ॥

6. ശ്രീ ദ്വിജ ഗണപതിഃ
യം പുസ്തകാക്ഷ ഗുണദംഡകമംഡലു ശ്രീ-
-വിദ്യോതമാനകരഭൂഷണമിംദുവര്ണമ് ।
സ്തംബേരമാനനചതുഷ്ടയശോഭമാനം
ത്വാം യഃ സ്മരേത് ദ്വിജഗണാധിപതേ സ ധന്യഃ ॥ 6 ॥

7. ശ്രീ സിദ്ധ ഗണപതിഃ
പക്വചൂതഫലപുഷ്പമംജരീ-
-രിക്ഷുദംഡതിലമോദകൈഃ സഹ ।
ഉദ്വഹന് പരശുമസ്തു തേ നമഃ
ശ്രീസമൃദ്ധിയുത ഹേമപിംഗള ॥ 7 ॥

8. ശ്രീ ഉച്ഛിഷ്ട ഗണപതിഃ
നീലാബ്ജദാഡിമീവീണാശാലീഗുംജാക്ഷസൂത്രകമ് ।
ദധദുച്ഛിഷ്ടനാമായം ഗണേശഃ പാതു മേചകഃ ॥ 8 ॥

9. ശ്രീ വിഘ്ന ഗണപതിഃ
ശംഖേക്ഷുചാപകുസുമേഷുകുഠാരപാശ-
-ചക്രസ്വദംതസൃണിമംജരികാശരാദ്യൈഃ ।
പാണിശ്രിതൈഃ പരിസമീഹിതഭൂഷണശ്രീ-
-വിഘ്നേശ്വരോ വിജയതേ തപനീയഗൌരഃ ॥ 9 ॥

10. ശ്രീ ക്ഷിപ്ര ഗണപതിഃ
ദംതകല്പലതാപാശരത്നകുംഭാംകുശോജ്ജ്വലമ് ।
ബംധൂകകമനീയാഭം ധ്യായേത് ക്ഷിപ്രഗണാധിപമ് ॥ 10 ॥

11. ശ്രീ ഹേരംബ ഗണപതിഃ
അഭയവരദഹസ്തഃ പാശദംതാക്ഷമാലാ-
-സൃണിപരശു ദധാനോ മുദ്ഗരം മോദകം ച ।
ഫലമധിഗതസിംഹഃ പംചമാതംഗവക്ത്രോ
ഗണപതിരതിഗൌരഃ പാതു ഹേരംബനാമാ ॥ 11 ॥

12. ശ്രീ ലക്ഷ്മീ ഗണപതിഃ
ബിഭ്രാണഃ ശുകബീജപൂരകമിലന്മാണിക്യകുംഭാകുശാന്
പാശം കല്പലതാം ച ഖഡ്ഗവിലസജ്ജ്യോതിഃ സുധാനിര്ഝരഃ ।
ശ്യാമേനാത്തസരോരുഹേണ സഹിതം ദേവീദ്വയം ചാംതികേ
ഗൌരാംഗോ വരദാനഹസ്തസഹിതോ ലക്ഷ്മീഗണേശോഽവതാത് ॥ 12 ॥

13. ശ്രീ മഹാ ഗണപതിഃ
ഹസ്തീംദ്രാനനമിംദുചൂഡമരുണച്ഛായം ത്രിനേത്രം രസാ-
-ദാശ്ലിഷ്ടം പ്രിയയാ സപദ്മകരയാ സ്വാംകസ്ഥയാ സംതതമ് ।
ബീജാപൂരഗദേക്ഷുകാര്മുകലസച്ചക്രാബ്ജപാശോത്പല-
-വ്രീഹ്യഗ്രസ്വവിഷാണരത്നകലശാന് ഹസ്തൈർവഹംതം ഭജേ ॥ 13 ॥

14. ശ്രീ വിജയ ഗണപതിഃ
പാശാംകുശസ്വദംതാമ്രഫലവാനാഖുവാഹനഃ ।
വിഘ്നം നിഹംതു നഃ സർവം രക്തവര്ണോ വിനായകഃ ॥ 14 ॥

15. ശ്രീ നൃത്ത ഗണപതിഃ
പാശാംകുശാപൂപകുഠാരദംത-
-ചംചത്കരാക്ലുപ്തവരാംഗുലീകമ് ।
പീതപ്രഭം കല്പതരോരധസ്ഥം
ഭജാമി നൃത്തോപപദം ഗണേശമ് ॥ 15 ॥

16. ശ്രീ ഊര്ധ്വ ഗണപതിഃ
കല്ഹാരശാലികമലേക്ഷുകചാപബാണ-
-ദംതപ്രരോഹകഗദീ കനകോജ്ജ്വലാംഗഃ ।
ആലിംഗനോദ്യതകരോ ഹരിതാംഗയഷ്ട്യാ
ദേവ്യാ കരോതു ശുഭമൂര്ധ്വഗണാധിപോ മേ ॥ 16 ॥

17. ശ്രീ ഏകാക്ഷര ഗണപതിഃ
രക്തോ രക്താംഗരാഗാംകുശകുസുമയുതസ്തുംദിലശ്ചംദ്രമൌളിഃ
നേത്രൈര്യുക്തസ്ത്രിഭിർവാമനകരചരണോ ബീജപൂരം ദധാനഃ ।
ഹസ്താഗ്രാക്ലുപ്ത പാശാംകുശരദവരദോ നാഗവക്ത്രോഽഹിഭൂഷോ
ദേവഃ പദ്മാസനസ്ഥോ ഭവതു സുഖകരോ ഭൂതയേ വിഘ്നരാജഃ ॥ 17 ॥

18. ശ്രീ വര ഗണപതിഃ
സിംദൂരാഭമിഭാനനം ത്രിനയനം ഹസ്തേ ച പാശാംകുശൌ
ബിഭ്രാണം മധുമത്കപാലമനിശം സാധ്വിംദുമൌളിം ഭജേ ।
പുഷ്ട്യാശ്ലിഷ്ടതനും ധ്വജാഗ്രകരയാ പദ്മോല്ലസദ്ധസ്തയാ
തദ്യോന്യാഹിത പാണിമാത്തവസുമത്പാത്രോല്ലസത്പുഷ്കരമ് ॥ 18 ॥

19. ശ്രീ ത്ര്യക്ഷര ഗണപതിഃ
ഗജേംദ്രവദനം സാക്ഷാച്ചലത്കര്ണസുചാമരം
ഹേമവര്ണം ചതുര്ബാഹും പാശാംകുശധരം വരമ് ।
സ്വദംതം ദക്ഷിണേ ഹസ്തേ സവ്യേ ത്വാമ്രപലം തഥാ
പുഷ്കരൈര്മോദകം ചൈവ ധാരയംതമനുസ്മരേത് ॥ 19 ॥

20. ശ്രീ ക്ഷിപ്രപ്രസാദ ഗണപതിഃ
ധൃതപാശാംകുശകല്പലതാ സ്വരദശ്ച ബീജപൂരയുതഃ
ശശിശകലകലിതമൌളിസ്ത്രിലോചനോഽരുണശ്ച ഗജവദനഃ ।
ഭാസുരഭൂഷണദീപ്തോ ബൃഹദുദരഃ പദ്മവിഷ്ടരോല്ലസിതഃ
വിഘ്നപയോധരപവനഃ കരധൃതകമലഃ സദാസ്തു മേ ഭൂത്യൈ ॥ 20 ॥

21. ശ്രീ ഹരിദ്രാ ഗണപതിഃ
ഹരിദ്രാഭം ചതുര്ബാഹും കരീംദ്രവദനം പ്രഭുമ് ।
പാശാംകുശധരം ദേവം മോദകം ദംതമേവ ച ।
ഭക്താഭയപ്രദാതാരം വംദേ വിഘ്നവിനാശനമ് ॥ 21 ॥

22. ശ്രീ ഏകദംത ഗണപതിഃ
ലംബോദരം ശ്യാമതനും ഗണേശം
കുഠാരമക്ഷസ്രജമൂര്ധ്വഗാത്രമ് ।
സലഡ്ഡുകം ദംതമധഃ കരാഭ്യാം
വാമേതരാഭ്യാം ച ദധാനമീഡേ ॥ 22 ॥

23. ശ്രീ സൃഷ്ടി ഗണപതിഃ
പാശാംകുശസ്വദംതാമ്രഫലവാനാഖുവാഹനഃ ।
വിഘ്നം നിഹംതു നഃ ശോണഃ സൃഷ്ടിദക്ഷോ വിനായകഃ ॥ 23 ॥

24. ശ്രീ ഉദ്ദംഡ ഗണപതിഃ
കല്ഹാരാംബുജബീജപൂരകഗദാദംതേക്ഷുചാപം സുമം
ബിഭ്രാണോ മണികുംഭശാലികലശൌ പാശം സൃണിം ചാബ്ജകമ് ।
ഗൌരാംഗ്യാ രുചിരാരവിംദകരയാ ദേവ്യാ സമാലിംഗതഃ
ശോണാംഗഃ ശുഭമാതനോതു ഭജതാമുദ്ദംഡവിഘ്നേശ്വരഃ ॥ 24 ॥

25. ശ്രീ ഋണമോചക ഗണപതിഃ
പാശാംകുശൌ ദംതജംബു ദധാനഃ സ്ഫാടികപ്രഭഃ ।
രക്താംശുകോ ഗണപതിര്മുദേ സ്യാദൃണമോചകഃ ॥ 25 ॥

26. ശ്രീ ഢുംഢി ഗണപതിഃ
അക്ഷമാലാം കുഠാരം ച രത്നപാത്രം സ്വദംതകമ് ।
ധത്തേ കരൈർവിഘ്നരാജോ ഢുംഢിനാമാ മുദേഽസ്തു നഃ ॥ 26 ॥

27. ശ്രീ ദ്വിമുഖ ഗണപതിഃ
സ്വദംതപാശാംകുശരത്നപാത്രം
കരൈര്ദധാനോ ഹരിനീലഗാത്രഃ ।
രക്താംശുകോ രത്നകിരീടമാലീ
ഭൂത്യൈ സദാ മേ ദ്വിമുഖോ ഗണേശഃ ॥ 27 ॥

28. ശ്രീ ത്രിമുഖ ഗണപതിഃ
ശ്രീമത്തീക്ഷ്ണശിഖാംകുശാക്ഷവരദാന് ദക്ഷേ ദധാനഃ കരൈഃ
പാശം ചാമൃതപൂര്ണകുംഭമഭയം വാമേ ദധാനോ മുദാ ।
പീഠേ സ്വര്ണമയാരവിംദവിലസത്സത്കര്ണികാഭാസുരേ
സ്വാസീനസ്ത്രിമുഖഃ പലാശരുചിരോ നാഗാനനഃ പാതു നഃ ॥ 28 ॥

29. ശ്രീ സിംഹ ഗണപതിഃ
വീണാം കല്പലതാമരിം ച വരദം ദക്ഷേ വിദത്തേ കരൈ-
-ർവാമേ താമരസം ച രത്നകലശം സന്മംജരീം ചാഭയമ് ।
ശുംഡാദംഡലസന്മൃഗേംദ്രവദനഃ ശംഖേംദുഗൌരഃ ശുഭോ
ദീവ്യദ്രത്നനിഭാംശുകോ ഗണപതിഃ പായാദപായത് സ നഃ ॥ 29 ॥

30. ശ്രീ യോഗ ഗണപതിഃ
യോഗാരൂഢോ യോഗപട്ടാഭിരാമോ
ബാലാര്കാഭശ്ചേംദ്രനീലാംശുകാഢ്യഃ ।
പാശേക്ഷ്വക്ഷാന് യോഗദംഡം ദധാനോ
പായാന്നിത്യം യോഗവിഘ്നേശ്വരോ നഃ ॥ 30 ॥

31. ശ്രീ ദുര്ഗാ ഗണപതിഃ
തപ്തകാംചനസംകാശശ്ചാഷ്ടഹസ്തോ മഹത്തനുഃ
ദീപ്താംകുശം ശരം ചാക്ഷം ദംതു ദക്ഷേ വഹന് കരൈഃ ।
വാമേ പാശം കാര്മുകം ച ലതാം ജംബു ദധത്കരൈഃ
രക്താംശുകഃ സദാ ഭൂയാദ്ദുര്ഗാഗണപതിര്മുദേ ॥ 31 ॥

32. ശ്രീ സംകഷ്ടഹര ഗണപതിഃ
ബാലാര്കാരുണകാംതിർവാമേ ബാലാം വഹന്നംകേ
ലസദിംദീവരഹസ്താം ഗൌരാംഗീം രത്നശോഭാഢ്യാമ് ।
ദക്ഷേഽംകുശവരദാനം വാമേ പാശം ച പായസം പാത്രം
നീലാംശുകലസമാനഃ പീഠേ പദ്മാരുണേ തിഷ്ഠന് ॥ 32 ॥
സംകടഹരണഃ പായാത് സംകടപൂഗാദ്ഗജാനനോ നിത്യമ് ।

ശ്രീ വല്ലഭ ഗണപതി
ബീജാപൂര ഗദേക്ഷുകാര്മുകഭുജാചക്രാബ്ജ പാശോത്പല
വ്രീഹ്യഗ്രസ്വവിഷാണ രത്നകലശ പ്രോദ്യത്കരാംഭോരുഹഃ ।
ധ്യേയോ വല്ലഭയാ ച പദ്മകരയാശ്ലിഷ്ടോ ജ്വലദ്ഭൂഷയാ
വിശ്വോത്പത്തിവിനാശസംസ്ഥിതികരോ വിഘ്നോ വിശിഷ്ടാര്ഥദഃ ॥

ശ്രീ സിദ്ധിദേവീ
പീതവര്ണാം ദ്വിനേത്രാം താമേകവക്ത്രാംബുജദ്വയാം
നവരത്നകിരീടാം ച പീതാംബരസുധാരിണീമ് ।
വാമഹസ്തേ മഹാപദ്മം ദക്ഷേ ലംബകരാന്വിതാം
ജാജീചംപകമാലാം ച ത്രിഭംഗീം ലലിതാംഗികാമ് ॥
ഗണേശദക്ഷിണേ ഭാഗേ ഗുരുഃ സിദ്ധിം തു ഭാവയേത് ॥

ശ്രീ ബുദ്ധിദേവീ
ദ്വിഹസ്താം ച ദ്വിനേത്രാം താമേകവക്ത്രാം ത്രിഭംഗികാം
മുക്താമണികിരീടാം ച ദക്ഷേ ഹസ്തേ മഹോത്പലമ് ।
വാമേ പ്രലംബഹസ്താം ച ദിവ്യാംബരസുധാരിണീം
ശ്യാമവര്ണനിഭാം ഭാസ്വത്സർവാഭരണഭൂഷിതാമ് ॥
പാരിജാതോത്പലാമാല്യാം ഗണേശോ വാമപാര്ശ്വകേ
ധ്യാത്വാ ബുദ്ധിം സുരൂപാം സമര്ചയേദ്ദേശികോത്തമഃ ॥