1. ଶ୍ରୀ ବାଲ ଗଣପତିଃ
କରସ୍ଥ କଦଲୀଚୂତପନସେକ୍ଷୁକମୋଦକମ୍ ।
ବାଲସୂର୍ୟନିଭଂ ଵଂଦେ ଦେଵଂ ବାଲଗଣାଧିପମ୍ ॥ 1 ॥

2. ଶ୍ରୀ ତରୁଣ ଗଣପତିଃ
ପାଶାଂକୁଶାପୂପକପିତ୍ଥଜଂବୂ-
-ସ୍ଵଦଂତଶାଲୀକ୍ଷୁମପି ସ୍ଵହସ୍ତୈଃ ।
ଧତ୍ତେ ସଦା ୟସ୍ତରୁଣାରୁଣାଭଃ
ପାୟାତ୍ ସ ୟୁଷ୍ମାଂସ୍ତରୁଣୋ ଗଣେଶଃ ॥ 2 ॥

3. ଶ୍ରୀ ଭକ୍ତ ଗଣପତିଃ
ନାରିକେଳାମ୍ରକଦଲୀଗୁଡପାୟସଧାରିଣମ୍ ।
ଶରଚ୍ଚଂଦ୍ରାଭଵପୁଷଂ ଭଜେ ଭକ୍ତଗଣାଧିପମ୍ ॥ 3 ॥

4. ଶ୍ରୀ ଵୀର ଗଣପତିଃ
ଵେତାଲଶକ୍ତିଶରକାର୍ମୁକଚକ୍ରଖଡ୍ଗ-
-ଖଟ୍ଵାଂଗମୁଦ୍ଗରଗଦାଂକୁଶନାଗପାଶାନ୍ ।
ଶୂଲଂ ଚ କୁଂତପରଶୁଂ ଧ୍ଵଜମୁଦ୍ଵହଂତଂ
ଵୀରଂ ଗଣେଶମରୁଣଂ ସତତଂ ସ୍ମରାମି ॥ 4 ॥

5. ଶ୍ରୀ ଶକ୍ତି ଗଣପତିଃ
ଆଲିଂଗ୍ୟ ଦେଵୀଂ ହରିତାଂଗୟଷ୍ଟିଂ
ପରସ୍ପରାଶ୍ଲିଷ୍ଟକଟିପ୍ରଦେଶମ୍ ।
ସଂଧ୍ୟାରୁଣଂ ପାଶସୃଣୀ ଵହଂତଂ
ଭୟାପହଂ ଶକ୍ତିଗଣେଶମୀଡେ ॥ 5 ॥

6. ଶ୍ରୀ ଦ୍ଵିଜ ଗଣପତିଃ
ୟଂ ପୁସ୍ତକାକ୍ଷ ଗୁଣଦଂଡକମଂଡଲୁ ଶ୍ରୀ-
-ଵିଦ୍ୟୋତମାନକରଭୂଷଣମିଂଦୁଵର୍ଣମ୍ ।
ସ୍ତଂବେରମାନନଚତୁଷ୍ଟୟଶୋଭମାନଂ
ତ୍ଵାଂ ୟଃ ସ୍ମରେତ୍ ଦ୍ଵିଜଗଣାଧିପତେ ସ ଧନ୍ୟଃ ॥ 6 ॥

7. ଶ୍ରୀ ସିଦ୍ଧ ଗଣପତିଃ
ପକ୍ଵଚୂତଫଲପୁଷ୍ପମଂଜରୀ-
-ରିକ୍ଷୁଦଂଡତିଲମୋଦକୈଃ ସହ ।
ଉଦ୍ଵହନ୍ ପରଶୁମସ୍ତୁ ତେ ନମଃ
ଶ୍ରୀସମୃଦ୍ଧିୟୁତ ହେମପିଂଗଳ ॥ 7 ॥

8. ଶ୍ରୀ ଉଚ୍ଛିଷ୍ଟ ଗଣପତିଃ
ନୀଲାବ୍ଜଦାଡିମୀଵୀଣାଶାଲୀଗୁଂଜାକ୍ଷସୂତ୍ରକମ୍ ।
ଦଧଦୁଚ୍ଛିଷ୍ଟନାମାୟଂ ଗଣେଶଃ ପାତୁ ମେଚକଃ ॥ 8 ॥

9. ଶ୍ରୀ ଵିଘ୍ନ ଗଣପତିଃ
ଶଂଖେକ୍ଷୁଚାପକୁସୁମେଷୁକୁଠାରପାଶ-
-ଚକ୍ରସ୍ଵଦଂତସୃଣିମଂଜରିକାଶରାଦ୍ୟୈଃ ।
ପାଣିଶ୍ରିତୈଃ ପରିସମୀହିତଭୂଷଣଶ୍ରୀ-
-ଵିଘ୍ନେଶ୍ଵରୋ ଵିଜୟତେ ତପନୀୟଗୌରଃ ॥ 9 ॥

10. ଶ୍ରୀ କ୍ଷିପ୍ର ଗଣପତିଃ
ଦଂତକଲ୍ପଲତାପାଶରତ୍ନକୁଂଭାଂକୁଶୋଜ୍ଜ୍ଵଲମ୍ ।
ବଂଧୂକକମନୀୟାଭଂ ଧ୍ୟାୟେତ୍ କ୍ଷିପ୍ରଗଣାଧିପମ୍ ॥ 10 ॥

11. ଶ୍ରୀ ହେରଂବ ଗଣପତିଃ
ଅଭୟଵରଦହସ୍ତଃ ପାଶଦଂତାକ୍ଷମାଲା-
-ସୃଣିପରଶୁ ଦଧାନୋ ମୁଦ୍ଗରଂ ମୋଦକଂ ଚ ।
ଫଲମଧିଗତସିଂହଃ ପଂଚମାତଂଗଵକ୍ତ୍ରୋ
ଗଣପତିରତିଗୌରଃ ପାତୁ ହେରଂବନାମା ॥ 11 ॥

12. ଶ୍ରୀ ଲକ୍ଷ୍ମୀ ଗଣପତିଃ
ବିଭ୍ରାଣଃ ଶୁକବୀଜପୂରକମିଲନ୍ମାଣିକ୍ୟକୁଂଭାକୁଶାନ୍
ପାଶଂ କଲ୍ପଲତାଂ ଚ ଖଡ୍ଗଵିଲସଜ୍ଜ୍ୟୋତିଃ ସୁଧାନିର୍ଝରଃ ।
ଶ୍ୟାମେନାତ୍ତସରୋରୁହେଣ ସହିତଂ ଦେଵୀଦ୍ଵୟଂ ଚାଂତିକେ
ଗୌରାଂଗୋ ଵରଦାନହସ୍ତସହିତୋ ଲକ୍ଷ୍ମୀଗଣେଶୋଽଵତାତ୍ ॥ 12 ॥

13. ଶ୍ରୀ ମହା ଗଣପତିଃ
ହସ୍ତୀଂଦ୍ରାନନମିଂଦୁଚୂଡମରୁଣଚ୍ଛାୟଂ ତ୍ରିନେତ୍ରଂ ରସା-
-ଦାଶ୍ଲିଷ୍ଟଂ ପ୍ରିୟୟା ସପଦ୍ମକରୟା ସ୍ଵାଂକସ୍ଥୟା ସଂତତମ୍ ।
ବୀଜାପୂରଗଦେକ୍ଷୁକାର୍ମୁକଲସଚ୍ଚକ୍ରାବ୍ଜପାଶୋତ୍ପଲ-
-ଵ୍ରୀହ୍ୟଗ୍ରସ୍ଵଵିଷାଣରତ୍ନକଲଶାନ୍ ହସ୍ତୈର୍ଵହଂତଂ ଭଜେ ॥ 13 ॥

14. ଶ୍ରୀ ଵିଜୟ ଗଣପତିଃ
ପାଶାଂକୁଶସ୍ଵଦଂତାମ୍ରଫଲଵାନାଖୁଵାହନଃ ।
ଵିଘ୍ନଂ ନିହଂତୁ ନଃ ସର୍ଵଂ ରକ୍ତଵର୍ଣୋ ଵିନାୟକଃ ॥ 14 ॥

15. ଶ୍ରୀ ନୃତ୍ତ ଗଣପତିଃ
ପାଶାଂକୁଶାପୂପକୁଠାରଦଂତ-
-ଚଂଚତ୍କରାକ୍ଲୁପ୍ତଵରାଂଗୁଲୀକମ୍ ।
ପୀତପ୍ରଭଂ କଲ୍ପତରୋରଧସ୍ଥଂ
ଭଜାମି ନୃତ୍ତୋପପଦଂ ଗଣେଶମ୍ ॥ 15 ॥

16. ଶ୍ରୀ ଊର୍ଧ୍ଵ ଗଣପତିଃ
କଲ୍ହାରଶାଲିକମଲେକ୍ଷୁକଚାପବାଣ-
-ଦଂତପ୍ରରୋହକଗଦୀ କନକୋଜ୍ଜ୍ଵଲାଂଗଃ ।
ଆଲିଂଗନୋଦ୍ୟତକରୋ ହରିତାଂଗୟଷ୍ଟ୍ୟା
ଦେଵ୍ୟା କରୋତୁ ଶୁଭମୂର୍ଧ୍ଵଗଣାଧିପୋ ମେ ॥ 16 ॥

17. ଶ୍ରୀ ଏକାକ୍ଷର ଗଣପତିଃ
ରକ୍ତୋ ରକ୍ତାଂଗରାଗାଂକୁଶକୁସୁମୟୁତସ୍ତୁଂଦିଲଶ୍ଚଂଦ୍ରମୌଳିଃ
ନେତ୍ରୈର୍ୟୁକ୍ତସ୍ତ୍ରିଭିର୍ଵାମନକରଚରଣୋ ବୀଜପୂରଂ ଦଧାନଃ ।
ହସ୍ତାଗ୍ରାକ୍ଲୁପ୍ତ ପାଶାଂକୁଶରଦଵରଦୋ ନାଗଵକ୍ତ୍ରୋଽହିଭୂଷୋ
ଦେଵଃ ପଦ୍ମାସନସ୍ଥୋ ଭଵତୁ ସୁଖକରୋ ଭୂତୟେ ଵିଘ୍ନରାଜଃ ॥ 17 ॥

18. ଶ୍ରୀ ଵର ଗଣପତିଃ
ସିଂଦୂରାଭମିଭାନନଂ ତ୍ରିନୟନଂ ହସ୍ତେ ଚ ପାଶାଂକୁଶୌ
ବିଭ୍ରାଣଂ ମଧୁମତ୍କପାଲମନିଶଂ ସାଧ୍ଵିଂଦୁମୌଳିଂ ଭଜେ ।
ପୁଷ୍ଟ୍ୟାଶ୍ଲିଷ୍ଟତନୁଂ ଧ୍ଵଜାଗ୍ରକରୟା ପଦ୍ମୋଲ୍ଲସଦ୍ଧସ୍ତୟା
ତଦ୍ୟୋନ୍ୟାହିତ ପାଣିମାତ୍ତଵସୁମତ୍ପାତ୍ରୋଲ୍ଲସତ୍ପୁଷ୍କରମ୍ ॥ 18 ॥

19. ଶ୍ରୀ ତ୍ର୍ୟକ୍ଷର ଗଣପତିଃ
ଗଜେଂଦ୍ରଵଦନଂ ସାକ୍ଷାଚ୍ଚଲତ୍କର୍ଣସୁଚାମରଂ
ହେମଵର୍ଣଂ ଚତୁର୍ବାହୁଂ ପାଶାଂକୁଶଧରଂ ଵରମ୍ ।
ସ୍ଵଦଂତଂ ଦକ୍ଷିଣେ ହସ୍ତେ ସଵ୍ୟେ ତ୍ଵାମ୍ରପଲଂ ତଥା
ପୁଷ୍କରୈର୍ମୋଦକଂ ଚୈଵ ଧାରୟଂତମନୁସ୍ମରେତ୍ ॥ 19 ॥

20. ଶ୍ରୀ କ୍ଷିପ୍ରପ୍ରସାଦ ଗଣପତିଃ
ଧୃତପାଶାଂକୁଶକଲ୍ପଲତା ସ୍ଵରଦଶ୍ଚ ବୀଜପୂରୟୁତଃ
ଶଶିଶକଲକଲିତମୌଳିସ୍ତ୍ରିଲୋଚନୋଽରୁଣଶ୍ଚ ଗଜଵଦନଃ ।
ଭାସୁରଭୂଷଣଦୀପ୍ତୋ ବୃହଦୁଦରଃ ପଦ୍ମଵିଷ୍ଟରୋଲ୍ଲସିତଃ
ଵିଘ୍ନପୟୋଧରପଵନଃ କରଧୃତକମଲଃ ସଦାସ୍ତୁ ମେ ଭୂତ୍ୟୈ ॥ 20 ॥

21. ଶ୍ରୀ ହରିଦ୍ରା ଗଣପତିଃ
ହରିଦ୍ରାଭଂ ଚତୁର୍ବାହୁଂ କରୀଂଦ୍ରଵଦନଂ ପ୍ରଭୁମ୍ ।
ପାଶାଂକୁଶଧରଂ ଦେଵଂ ମୋଦକଂ ଦଂତମେଵ ଚ ।
ଭକ୍ତାଭୟପ୍ରଦାତାରଂ ଵଂଦେ ଵିଘ୍ନଵିନାଶନମ୍ ॥ 21 ॥

22. ଶ୍ରୀ ଏକଦଂତ ଗଣପତିଃ
ଲଂବୋଦରଂ ଶ୍ୟାମତନୁଂ ଗଣେଶଂ
କୁଠାରମକ୍ଷସ୍ରଜମୂର୍ଧ୍ଵଗାତ୍ରମ୍ ।
ସଲଡ୍ଡୁକଂ ଦଂତମଧଃ କରାଭ୍ୟାଂ
ଵାମେତରାଭ୍ୟାଂ ଚ ଦଧାନମୀଡେ ॥ 22 ॥

23. ଶ୍ରୀ ସୃଷ୍ଟି ଗଣପତିଃ
ପାଶାଂକୁଶସ୍ଵଦଂତାମ୍ରଫଲଵାନାଖୁଵାହନଃ ।
ଵିଘ୍ନଂ ନିହଂତୁ ନଃ ଶୋଣଃ ସୃଷ୍ଟିଦକ୍ଷୋ ଵିନାୟକଃ ॥ 23 ॥

24. ଶ୍ରୀ ଉଦ୍ଦଂଡ ଗଣପତିଃ
କଲ୍ହାରାଂବୁଜବୀଜପୂରକଗଦାଦଂତେକ୍ଷୁଚାପଂ ସୁମଂ
ବିଭ୍ରାଣୋ ମଣିକୁଂଭଶାଲିକଲଶୌ ପାଶଂ ସୃଣିଂ ଚାବ୍ଜକମ୍ ।
ଗୌରାଂଗ୍ୟା ରୁଚିରାରଵିଂଦକରୟା ଦେଵ୍ୟା ସମାଲିଂଗତଃ
ଶୋଣାଂଗଃ ଶୁଭମାତନୋତୁ ଭଜତାମୁଦ୍ଦଂଡଵିଘ୍ନେଶ୍ଵରଃ ॥ 24 ॥

25. ଶ୍ରୀ ଋଣମୋଚକ ଗଣପତିଃ
ପାଶାଂକୁଶୌ ଦଂତଜଂବୁ ଦଧାନଃ ସ୍ଫାଟିକପ୍ରଭଃ ।
ରକ୍ତାଂଶୁକୋ ଗଣପତିର୍ମୁଦେ ସ୍ୟାଦୃଣମୋଚକଃ ॥ 25 ॥

26. ଶ୍ରୀ ଢୁଂଢି ଗଣପତିଃ
ଅକ୍ଷମାଲାଂ କୁଠାରଂ ଚ ରତ୍ନପାତ୍ରଂ ସ୍ଵଦଂତକମ୍ ।
ଧତ୍ତେ କରୈର୍ଵିଘ୍ନରାଜୋ ଢୁଂଢିନାମା ମୁଦେଽସ୍ତୁ ନଃ ॥ 26 ॥

27. ଶ୍ରୀ ଦ୍ଵିମୁଖ ଗଣପତିଃ
ସ୍ଵଦଂତପାଶାଂକୁଶରତ୍ନପାତ୍ରଂ
କରୈର୍ଦଧାନୋ ହରିନୀଲଗାତ୍ରଃ ।
ରକ୍ତାଂଶୁକୋ ରତ୍ନକିରୀଟମାଲୀ
ଭୂତ୍ୟୈ ସଦା ମେ ଦ୍ଵିମୁଖୋ ଗଣେଶଃ ॥ 27 ॥

28. ଶ୍ରୀ ତ୍ରିମୁଖ ଗଣପତିଃ
ଶ୍ରୀମତ୍ତୀକ୍ଷ୍ଣଶିଖାଂକୁଶାକ୍ଷଵରଦାନ୍ ଦକ୍ଷେ ଦଧାନଃ କରୈଃ
ପାଶଂ ଚାମୃତପୂର୍ଣକୁଂଭମଭୟଂ ଵାମେ ଦଧାନୋ ମୁଦା ।
ପୀଠେ ସ୍ଵର୍ଣମୟାରଵିଂଦଵିଲସତ୍ସତ୍କର୍ଣିକାଭାସୁରେ
ସ୍ଵାସୀନସ୍ତ୍ରିମୁଖଃ ପଲାଶରୁଚିରୋ ନାଗାନନଃ ପାତୁ ନଃ ॥ 28 ॥

29. ଶ୍ରୀ ସିଂହ ଗଣପତିଃ
ଵୀଣାଂ କଲ୍ପଲତାମରିଂ ଚ ଵରଦଂ ଦକ୍ଷେ ଵିଦତ୍ତେ କରୈ-
-ର୍ଵାମେ ତାମରସଂ ଚ ରତ୍ନକଲଶଂ ସନ୍ମଂଜରୀଂ ଚାଭୟମ୍ ।
ଶୁଂଡାଦଂଡଲସନ୍ମୃଗେଂଦ୍ରଵଦନଃ ଶଂଖେଂଦୁଗୌରଃ ଶୁଭୋ
ଦୀଵ୍ୟଦ୍ରତ୍ନନିଭାଂଶୁକୋ ଗଣପତିଃ ପାୟାଦପାୟତ୍ ସ ନଃ ॥ 29 ॥

30. ଶ୍ରୀ ୟୋଗ ଗଣପତିଃ
ୟୋଗାରୂଢୋ ୟୋଗପଟ୍ଟାଭିରାମୋ
ବାଲାର୍କାଭଶ୍ଚେଂଦ୍ରନୀଲାଂଶୁକାଢ୍ୟଃ ।
ପାଶେକ୍ଷ୍ଵକ୍ଷାନ୍ ୟୋଗଦଂଡଂ ଦଧାନୋ
ପାୟାନ୍ନିତ୍ୟଂ ୟୋଗଵିଘ୍ନେଶ୍ଵରୋ ନଃ ॥ 30 ॥

31. ଶ୍ରୀ ଦୁର୍ଗା ଗଣପତିଃ
ତପ୍ତକାଂଚନସଂକାଶଶ୍ଚାଷ୍ଟହସ୍ତୋ ମହତ୍ତନୁଃ
ଦୀପ୍ତାଂକୁଶଂ ଶରଂ ଚାକ୍ଷଂ ଦଂତୁ ଦକ୍ଷେ ଵହନ୍ କରୈଃ ।
ଵାମେ ପାଶଂ କାର୍ମୁକଂ ଚ ଲତାଂ ଜଂବୁ ଦଧତ୍କରୈଃ
ରକ୍ତାଂଶୁକଃ ସଦା ଭୂୟାଦ୍ଦୁର୍ଗାଗଣପତିର୍ମୁଦେ ॥ 31 ॥

32. ଶ୍ରୀ ସଂକଷ୍ଟହର ଗଣପତିଃ
ବାଲାର୍କାରୁଣକାଂତିର୍ଵାମେ ବାଲାଂ ଵହନ୍ନଂକେ
ଲସଦିଂଦୀଵରହସ୍ତାଂ ଗୌରାଂଗୀଂ ରତ୍ନଶୋଭାଢ୍ୟାମ୍ ।
ଦକ୍ଷେଽଂକୁଶଵରଦାନଂ ଵାମେ ପାଶଂ ଚ ପାୟସଂ ପାତ୍ରଂ
ନୀଲାଂଶୁକଲସମାନଃ ପୀଠେ ପଦ୍ମାରୁଣେ ତିଷ୍ଠନ୍ ॥ 32 ॥
ସଂକଟହରଣଃ ପାୟାତ୍ ସଂକଟପୂଗାଦ୍ଗଜାନନୋ ନିତ୍ୟମ୍ ।

ଶ୍ରୀ ଵଲ୍ଲଭ ଗଣପତି
ବୀଜାପୂର ଗଦେକ୍ଷୁକାର୍ମୁକଭୁଜାଚକ୍ରାବ୍ଜ ପାଶୋତ୍ପଲ
ଵ୍ରୀହ୍ୟଗ୍ରସ୍ଵଵିଷାଣ ରତ୍ନକଲଶ ପ୍ରୋଦ୍ୟତ୍କରାଂଭୋରୁହଃ ।
ଧ୍ୟେୟୋ ଵଲ୍ଲଭୟା ଚ ପଦ୍ମକରୟାଶ୍ଲିଷ୍ଟୋ ଜ୍ଵଲଦ୍ଭୂଷୟା
ଵିଶ୍ଵୋତ୍ପତ୍ତିଵିନାଶସଂସ୍ଥିତିକରୋ ଵିଘ୍ନୋ ଵିଶିଷ୍ଟାର୍ଥଦଃ ॥

ଶ୍ରୀ ସିଦ୍ଧିଦେଵୀ
ପୀତଵର୍ଣାଂ ଦ୍ଵିନେତ୍ରାଂ ତାମେକଵକ୍ତ୍ରାଂବୁଜଦ୍ଵୟାଂ
ନଵରତ୍ନକିରୀଟାଂ ଚ ପୀତାଂବରସୁଧାରିଣୀମ୍ ।
ଵାମହସ୍ତେ ମହାପଦ୍ମଂ ଦକ୍ଷେ ଲଂବକରାନ୍ଵିତାଂ
ଜାଜୀଚଂପକମାଲାଂ ଚ ତ୍ରିଭଂଗୀଂ ଲଲିତାଂଗିକାମ୍ ॥
ଗଣେଶଦକ୍ଷିଣେ ଭାଗେ ଗୁରୁଃ ସିଦ୍ଧିଂ ତୁ ଭାଵୟେତ୍ ॥

ଶ୍ରୀ ବୁଦ୍ଧିଦେଵୀ
ଦ୍ଵିହସ୍ତାଂ ଚ ଦ୍ଵିନେତ୍ରାଂ ତାମେକଵକ୍ତ୍ରାଂ ତ୍ରିଭଂଗିକାଂ
ମୁକ୍ତାମଣିକିରୀଟାଂ ଚ ଦକ୍ଷେ ହସ୍ତେ ମହୋତ୍ପଲମ୍ ।
ଵାମେ ପ୍ରଲଂବହସ୍ତାଂ ଚ ଦିଵ୍ୟାଂବରସୁଧାରିଣୀଂ
ଶ୍ୟାମଵର୍ଣନିଭାଂ ଭାସ୍ଵତ୍ସର୍ଵାଭରଣଭୂଷିତାମ୍ ॥
ପାରିଜାତୋତ୍ପଲାମାଲ୍ୟାଂ ଗଣେଶୋ ଵାମପାର୍ଶ୍ଵକେ
ଧ୍ୟାତ୍ଵା ବୁଦ୍ଧିଂ ସୁରୂପାଂ ସମର୍ଚୟେଦ୍ଦେଶିକୋତ୍ତମଃ ॥