1. ශ්රී බාල ගණපතිඃ
කරස්ථ කදලීචූතපනසේක්ෂුකමෝදකම් ।
බාලසූර්යනිභං වංදේ දේවං බාලගණාධිපම් ॥ 1 ॥

2. ශ්රී තරුණ ගණපතිඃ
පාශාංකුශාපූපකපිත්ථජංබූ-
-ස්වදංතශාලීක්ෂුමපි ස්වහස්තෛඃ ।
ධත්තේ සදා යස්තරුණාරුණාභඃ
පායාත් ස යුෂ්මාංස්තරුණෝ ගණේශඃ ॥ 2 ॥

3. ශ්රී භක්ත ගණපතිඃ
නාරිකේළාම්රකදලීගුඩපායසධාරිණම් ।
ශරච්චංද්රාභවපුෂං භජේ භක්තගණාධිපම් ॥ 3 ॥

4. ශ්රී වීර ගණපතිඃ
වේතාලශක්තිශරකාර්මුකචක්රඛඩ්ග-
-ඛට්වාංගමුද්ගරගදාංකුශනාගපාශාන් ।
ශූලං ච කුංතපරශුං ධ්වජමුද්වහංතං
වීරං ගණේශමරුණං සතතං ස්මරාමි ॥ 4 ॥

5. ශ්රී ශක්ති ගණපතිඃ
ආලිංග්ය දේවීං හරිතාංගයෂ්ටිං
පරස්පරාශ්ලිෂ්ටකටිප්රදේශම් ।
සංධ්යාරුණං පාශසෘණී වහංතං
භයාපහං ශක්තිගණේශමීඩේ ॥ 5 ॥

6. ශ්රී ද්විජ ගණපතිඃ
යං පුස්තකාක්ෂ ගුණදංඩකමංඩලු ශ්රී-
-විද්යෝතමානකරභූෂණමිංදුවර්ණම් ।
ස්තංබේරමානනචතුෂ්ටයශෝභමානං
ත්වාං යඃ ස්මරේත් ද්විජගණාධිපතේ ස ධන්යඃ ॥ 6 ॥

7. ශ්රී සිද්ධ ගණපතිඃ
පක්වචූතඵලපුෂ්පමංජරී-
-රික්ෂුදංඩතිලමෝදකෛඃ සහ ।
උද්වහන් පරශුමස්තු තේ නමඃ
ශ්රීසමෘද්ධියුත හේමපිංගළ ॥ 7 ॥

8. ශ්රී උච්ඡිෂ්ට ගණපතිඃ
නීලාබ්ජදාඩිමීවීණාශාලීගුංජාක්ෂසූත්රකම් ।
දධදුච්ඡිෂ්ටනාමායං ගණේශඃ පාතු මේචකඃ ॥ 8 ॥

9. ශ්රී විඝ්න ගණපතිඃ
ශංඛේක්ෂුචාපකුසුමේෂුකුඨාරපාශ-
-චක්රස්වදංතසෘණිමංජරිකාශරාද්යෛඃ ।
පාණිශ්රිතෛඃ පරිසමීහිතභූෂණශ්රී-
-විඝ්නේශ්වරෝ විජයතේ තපනීයගෞරඃ ॥ 9 ॥

10. ශ්රී ක්ෂිප්ර ගණපතිඃ
දංතකල්පලතාපාශරත්නකුංභාංකුශෝජ්ජ්වලම් ।
බංධූකකමනීයාභං ධ්යායේත් ක්ෂිප්රගණාධිපම් ॥ 10 ॥

11. ශ්රී හේරංබ ගණපතිඃ
අභයවරදහස්තඃ පාශදංතාක්ෂමාලා-
-සෘණිපරශු දධානෝ මුද්ගරං මෝදකං ච ।
ඵලමධිගතසිංහඃ පංචමාතංගවක්ත්රෝ
ගණපතිරතිගෞරඃ පාතු හේරංබනාමා ॥ 11 ॥

12. ශ්රී ලක්ෂ්මී ගණපතිඃ
බිභ්රාණඃ ශුකබීජපූරකමිලන්මාණික්යකුංභාකුශාන්
පාශං කල්පලතාං ච ඛඩ්ගවිලසජ්ජ්යෝතිඃ සුධානිර්ඣරඃ ।
ශ්යාමේනාත්තසරෝරුහේණ සහිතං දේවීද්වයං චාංතිකේ
ගෞරාංගෝ වරදානහස්තසහිතෝ ලක්ෂ්මීගණේශෝऽවතාත් ॥ 12 ॥

13. ශ්රී මහා ගණපතිඃ
හස්තීංද්රානනමිංදුචූඩමරුණච්ඡායං ත්රිනේත්රං රසා-
-දාශ්ලිෂ්ටං ප්රියයා සපද්මකරයා ස්වාංකස්ථයා සංතතම් ।
බීජාපූරගදේක්ෂුකාර්මුකලසච්චක්රාබ්ජපාශෝත්පල-
-ව්රීහ්යග්රස්වවිෂාණරත්නකලශාන් හස්තෛර්වහංතං භජේ ॥ 13 ॥

14. ශ්රී විජය ගණපතිඃ
පාශාංකුශස්වදංතාම්රඵලවානාඛුවාහනඃ ।
විඝ්නං නිහංතු නඃ සර්වං රක්තවර්ණෝ විනායකඃ ॥ 14 ॥

15. ශ්රී නෘත්ත ගණපතිඃ
පාශාංකුශාපූපකුඨාරදංත-
-චංචත්කරාක්ලුප්තවරාංගුලීකම් ।
පීතප්රභං කල්පතරෝරධස්ථං
භජාමි නෘත්තෝපපදං ගණේශම් ॥ 15 ॥

16. ශ්රී ඌර්ධ්ව ගණපතිඃ
කල්හාරශාලිකමලේක්ෂුකචාපබාණ-
-දංතප්රරෝහකගදී කනකෝජ්ජ්වලාංගඃ ।
ආලිංගනෝද්යතකරෝ හරිතාංගයෂ්ට්යා
දේව්යා කරෝතු ශුභමූර්ධ්වගණාධිපෝ මේ ॥ 16 ॥

17. ශ්රී ඒකාක්ෂර ගණපතිඃ
රක්තෝ රක්තාංගරාගාංකුශකුසුමයුතස්තුංදිලශ්චංද්රමෞළිඃ
නේත්රෛර්යුක්තස්ත්රිභිර්වාමනකරචරණෝ බීජපූරං දධානඃ ।
හස්තාග්රාක්ලුප්ත පාශාංකුශරදවරදෝ නාගවක්ත්රෝऽහිභූෂෝ
දේවඃ පද්මාසනස්ථෝ භවතු සුඛකරෝ භූතයේ විඝ්නරාජඃ ॥ 17 ॥

18. ශ්රී වර ගණපතිඃ
සිංදූරාභමිභානනං ත්රිනයනං හස්තේ ච පාශාංකුශෞ
බිභ්රාණං මධුමත්කපාලමනිශං සාධ්විංදුමෞළිං භජේ ।
පුෂ්ට්යාශ්ලිෂ්ටතනුං ධ්වජාග්රකරයා පද්මෝල්ලසද්ධස්තයා
තද්යෝන්යාහිත පාණිමාත්තවසුමත්පාත්රෝල්ලසත්පුෂ්කරම් ॥ 18 ॥

19. ශ්රී ත්ර්යක්ෂර ගණපතිඃ
ගජේංද්රවදනං සාක්ෂාච්චලත්කර්ණසුචාමරං
හේමවර්ණං චතුර්බාහුං පාශාංකුශධරං වරම් ।
ස්වදංතං දක්ෂිණේ හස්තේ සව්යේ ත්වාම්රපලං තථා
පුෂ්කරෛර්මෝදකං චෛව ධාරයංතමනුස්මරේත් ॥ 19 ॥

20. ශ්රී ක්ෂිප්රප්රසාද ගණපතිඃ
ධෘතපාශාංකුශකල්පලතා ස්වරදශ්ච බීජපූරයුතඃ
ශශිශකලකලිතමෞළිස්ත්රිලෝචනෝऽරුණශ්ච ගජවදනඃ ।
භාසුරභූෂණදීප්තෝ බෘහදුදරඃ පද්මවිෂ්ටරෝල්ලසිතඃ
විඝ්නපයෝධරපවනඃ කරධෘතකමලඃ සදාස්තු මේ භූත්යෛ ॥ 20 ॥

21. ශ්රී හරිද්රා ගණපතිඃ
හරිද්රාභං චතුර්බාහුං කරීංද්රවදනං ප්රභුම් ।
පාශාංකුශධරං දේවං මෝදකං දංතමේව ච ।
භක්තාභයප්රදාතාරං වංදේ විඝ්නවිනාශනම් ॥ 21 ॥

22. ශ්රී ඒකදංත ගණපතිඃ
ලංබෝදරං ශ්යාමතනුං ගණේශං
කුඨාරමක්ෂස්රජමූර්ධ්වගාත්රම් ।
සලඩ්ඩුකං දංතමධඃ කරාභ්යාං
වාමේතරාභ්යාං ච දධානමීඩේ ॥ 22 ॥

23. ශ්රී සෘෂ්ටි ගණපතිඃ
පාශාංකුශස්වදංතාම්රඵලවානාඛුවාහනඃ ।
විඝ්නං නිහංතු නඃ ශෝණඃ සෘෂ්ටිදක්ෂෝ විනායකඃ ॥ 23 ॥

24. ශ්රී උද්දංඩ ගණපතිඃ
කල්හාරාංබුජබීජපූරකගදාදංතේක්ෂුචාපං සුමං
බිභ්රාණෝ මණිකුංභශාලිකලශෞ පාශං සෘණිං චාබ්ජකම් ।
ගෞරාංග්යා රුචිරාරවිංදකරයා දේව්යා සමාලිංගතඃ
ශෝණාංගඃ ශුභමාතනෝතු භජතාමුද්දංඩවිඝ්නේශ්වරඃ ॥ 24 ॥

25. ශ්රී ඍණමෝචක ගණපතිඃ
පාශාංකුශෞ දංතජංබු දධානඃ ස්ඵාටිකප්රභඃ ।
රක්තාංශුකෝ ගණපතිර්මුදේ ස්යාදෘණමෝචකඃ ॥ 25 ॥

26. ශ්රී ඪුංඪි ගණපතිඃ
අක්ෂමාලාං කුඨාරං ච රත්නපාත්රං ස්වදංතකම් ।
ධත්තේ කරෛර්විඝ්නරාජෝ ඪුංඪිනාමා මුදේऽස්තු නඃ ॥ 26 ॥

27. ශ්රී ද්විමුඛ ගණපතිඃ
ස්වදංතපාශාංකුශරත්නපාත්රං
කරෛර්දධානෝ හරිනීලගාත්රඃ ।
රක්තාංශුකෝ රත්නකිරීටමාලී
භූත්යෛ සදා මේ ද්විමුඛෝ ගණේශඃ ॥ 27 ॥

28. ශ්රී ත්රිමුඛ ගණපතිඃ
ශ්රීමත්තීක්ෂ්ණශිඛාංකුශාක්ෂවරදාන් දක්ෂේ දධානඃ කරෛඃ
පාශං චාමෘතපූර්ණකුංභමභයං වාමේ දධානෝ මුදා ।
පීඨේ ස්වර්ණමයාරවිංදවිලසත්සත්කර්ණිකාභාසුරේ
ස්වාසීනස්ත්රිමුඛඃ පලාශරුචිරෝ නාගානනඃ පාතු නඃ ॥ 28 ॥

29. ශ්රී සිංහ ගණපතිඃ
වීණාං කල්පලතාමරිං ච වරදං දක්ෂේ විදත්තේ කරෛ-
-ර්වාමේ තාමරසං ච රත්නකලශං සන්මංජරීං චාභයම් ।
ශුංඩාදංඩලසන්මෘගේංද්රවදනඃ ශංඛේංදුගෞරඃ ශුභෝ
දීව්යද්රත්නනිභාංශුකෝ ගණපතිඃ පායාදපායත් ස නඃ ॥ 29 ॥

30. ශ්රී යෝග ගණපතිඃ
යෝගාරූඪෝ යෝගපට්ටාභිරාමෝ
බාලාර්කාභශ්චේංද්රනීලාංශුකාඪ්යඃ ।
පාශේක්ෂ්වක්ෂාන් යෝගදංඩං දධානෝ
පායාන්නිත්යං යෝගවිඝ්නේශ්වරෝ නඃ ॥ 30 ॥

31. ශ්රී දුර්ගා ගණපතිඃ
තප්තකාංචනසංකාශශ්චාෂ්ටහස්තෝ මහත්තනුඃ
දීප්තාංකුශං ශරං චාක්ෂං දංතු දක්ෂේ වහන් කරෛඃ ।
වාමේ පාශං කාර්මුකං ච ලතාං ජංබු දධත්කරෛඃ
රක්තාංශුකඃ සදා භූයාද්දුර්ගාගණපතිර්මුදේ ॥ 31 ॥

32. ශ්රී සංකෂ්ටහර ගණපතිඃ
බාලාර්කාරුණකාංතිර්වාමේ බාලාං වහන්නංකේ
ලසදිංදීවරහස්තාං ගෞරාංගීං රත්නශෝභාඪ්යාම් ।
දක්ෂේऽංකුශවරදානං වාමේ පාශං ච පායසං පාත්රං
නීලාංශුකලසමානඃ පීඨේ පද්මාරුණේ තිෂ්ඨන් ॥ 32 ॥
සංකටහරණඃ පායාත් සංකටපූගාද්ගජානනෝ නිත්යම් ।

ශ්රී වල්ලභ ගණපති
බීජාපූර ගදේක්ෂුකාර්මුකභුජාචක්රාබ්ජ පාශෝත්පල
ව්රීහ්යග්රස්වවිෂාණ රත්නකලශ ප්රෝද්යත්කරාංභෝරුහඃ ।
ධ්යේයෝ වල්ලභයා ච පද්මකරයාශ්ලිෂ්ටෝ ජ්වලද්භූෂයා
විශ්වෝත්පත්තිවිනාශසංස්ථිතිකරෝ විඝ්නෝ විශිෂ්ටාර්ථදඃ ॥

ශ්රී සිද්ධිදේවී
පීතවර්ණාං ද්විනේත්රාං තාමේකවක්ත්රාංබුජද්වයාං
නවරත්නකිරීටාං ච පීතාංබරසුධාරිණීම් ।
වාමහස්තේ මහාපද්මං දක්ෂේ ලංබකරාන්විතාං
ජාජීචංපකමාලාං ච ත්රිභංගීං ලලිතාංගිකාම් ॥
ගණේශදක්ෂිණේ භාගේ ගුරුඃ සිද්ධිං තු භාවයේත් ॥

ශ්රී බුද්ධිදේවී
ද්විහස්තාං ච ද්විනේත්රාං තාමේකවක්ත්රාං ත්රිභංගිකාං
මුක්තාමණිකිරීටාං ච දක්ෂේ හස්තේ මහෝත්පලම් ।
වාමේ ප්රලංබහස්තාං ච දිව්යාංබරසුධාරිණීං
ශ්යාමවර්ණනිභාං භාස්වත්සර්වාභරණභූෂිතාම් ॥
පාරිජාතෝත්පලාමාල්යාං ගණේශෝ වාමපාර්ශ්වකේ
ධ්යාත්වා බුද්ධිං සුරූපාං සමර්චයේද්දේශිකෝත්තමඃ ॥