ওং অস্য শ্রী স্বর্ণাকর্ষণ ভৈরব স্তোত্র মহামংত্রস্য ব্রহ্ম ঋষিঃ অনুষ্টুপ্ ছংদঃ শ্রী স্বর্ণাকর্ষণ ভৈরবো দেবতা হ্রীং বীজং ক্লীং শক্তিঃ সঃ কীলকং মম দারিদ্র্য নাশার্থে পাঠে বিনিযোগঃ ॥

ঋষ্যাদি ন্যাসঃ ।
ব্রহ্মর্ষযে নমঃ শিরসি ।
অনুষ্টুপ্ ছংদসে নমঃ মুখে ।
স্বর্ণাকর্ষণ ভৈরবায নমঃ হৃদি ।
হ্রীং বীজায নমঃ গুহ্যে ।
ক্লীং শক্তযে নমঃ পাদযোঃ ।
সঃ কীলকায নমঃ নাভৌ ।
বিনিযোগায নমঃ সর্বাংগে ।
হ্রাং হ্রীং হ্রূং ইতি কর ষডংগন্যাসঃ ॥

ধ্যানম্ ।
পারিজাতদ্রুম কাংতারে স্থিতে মাণিক্যমংডপে ।
সিংহাসনগতং বংদে ভৈরবং স্বর্ণদাযকম্ ॥

গাংগেয পাত্রং ডমরূং ত্রিশূলং
বরং করঃ সংদধতং ত্রিনেত্রম্ ।
দেব্যাযুতং তপ্ত সুবর্ণবর্ণ
স্বর্ণাকর্ষণভৈরবমাশ্রযামি ॥

মংত্রঃ ।
ওং ঐং হ্রীং শ্রীং ঐং শ্রীং আপদুদ্ধারণায হ্রাং হ্রীং হ্রূং অজামলবধ্যায লোকেশ্বরায স্বর্ণাকর্ষণভৈরবায মম দারিদ্র্য বিদ্বেষণায মহাভৈরবায নমঃ শ্রীং হ্রীং ঐম্ ।

স্তোত্রম্ ।
নমস্তেঽস্তু ভৈরবায ব্রহ্মবিষ্ণুশিবাত্মনে ।
নমস্ত্রৈলোক্যবংদ্যায বরদায পরাত্মনে ॥ 1 ॥

রত্নসিংহাসনস্থায দিব্যাভরণশোভিনে ।
দিব্যমাল্যবিভূষায নমস্তে দিব্যমূর্তযে ॥ 2 ॥

নমস্তেঽনেকহস্তায হ্যনেকশিরসে নমঃ ।
নমস্তেঽনেকনেত্রায হ্যনেকবিভবে নমঃ ॥ 3 ॥

নমস্তেঽনেককংঠায হ্যনেকাংশায তে নমঃ ।
নমোস্ত্বনেকৈশ্বর্যায হ্যনেকদিব্যতেজসে ॥ 4 ॥

অনেকাযুধযুক্তায হ্যনেকসুরসেবিনে ।
অনেকগুণযুক্তায মহাদেবায তে নমঃ ॥ 5 ॥

নমো দারিদ্র্যকালায মহাসংপত্প্রদাযিনে ।
শ্রীভৈরবীপ্রযুক্তায ত্রিলোকেশায তে নমঃ ॥ 6 ॥

দিগংবর নমস্তুভ্যং দিগীশায নমো নমঃ ।
নমোঽস্তু দৈত্যকালায পাপকালায তে নমঃ ॥ 7 ॥

সর্বজ্ঞায নমস্তুভ্যং নমস্তে দিব্যচক্ষুষে ।
অজিতায নমস্তুভ্যং জিতামিত্রায তে নমঃ ॥ 8 ॥

নমস্তে রুদ্রপুত্রায গণনাথায তে নমঃ ।
নমস্তে বীরবীরায মহাবীরায তে নমঃ ॥ 9 ॥

নমোঽস্ত্বনংতবীর্যায মহাঘোরায তে নমঃ ।
নমস্তে ঘোরঘোরায বিশ্বঘোরায তে নমঃ ॥ 10 ॥

নমঃ উগ্রায শাংতায ভক্তেভ্যঃ শাংতিদাযিনে ।
গুরবে সর্বলোকানাং নমঃ প্রণব রূপিণে ॥ 11 ॥

নমস্তে বাগ্ভবাখ্যায দীর্ঘকামায তে নমঃ ।
নমস্তে কামরাজায যোষিত্কামায তে নমঃ ॥ 12 ॥

দীর্ঘমাযাস্বরূপায মহামাযাপতে নমঃ ।
সৃষ্টিমাযাস্বরূপায বিসর্গায সম্যাযিনে ॥ 13 ॥

রুদ্রলোকেশপূজ্যায হ্যাপদুদ্ধারণায চ ।
নমোঽজামলবদ্ধায সুবর্ণাকর্ষণায তে ॥ 14 ॥

নমো নমো ভৈরবায মহাদারিদ্র্যনাশিনে ।
উন্মূলনকর্মঠায হ্যলক্ষ্ম্যা সর্বদা নমঃ ॥ 15 ॥

নমো লোকত্রযেশায স্বানংদনিহিতায তে ।
নমঃ শ্রীবীজরূপায সর্বকামপ্রদাযিনে ॥ 16 ॥

নমো মহাভৈরবায শ্রীরূপায নমো নমঃ ।
ধনাধ্যক্ষ নমস্তুভ্যং শরণ্যায নমো নমঃ ॥ 17 ॥

নমঃ প্রসন্নরূপায হ্যাদিদেবায তে নমঃ ।
নমস্তে মংত্ররূপায নমস্তে রত্নরূপিণে ॥ 18 ॥

নমস্তে স্বর্ণরূপায সুবর্ণায নমো নমঃ ।
নমঃ সুবর্ণবর্ণায মহাপুণ্যায তে নমঃ ॥ 19 ॥

নমঃ শুদ্ধায বুদ্ধায নমঃ সংসারতারিণে ।
নমো দেবায গুহ্যায প্রবলায নমো নমঃ ॥ 20 ॥

নমস্তে বলরূপায পরেষাং বলনাশিনে ।
নমস্তে স্বর্গসংস্থায নমো ভূর্লোকবাসিনে ॥ 21 ॥

নমঃ পাতালবাসায নিরাধারায তে নমঃ ।
নমো নমঃ স্বতংত্রায হ্যনংতায নমো নমঃ ॥ 22 ॥

দ্বিভুজায নমস্তুভ্যং ভুজত্রযসুশোভিনে ।
নমোঽণিমাদিসিদ্ধায স্বর্ণহস্তায তে নমঃ ॥ 23 ॥

পূর্ণচংদ্রপ্রতীকাশবদনাংভোজশোভিনে ।
নমস্তে স্বর্ণরূপায স্বর্ণালংকারশোভিনে ॥ 24 ॥

নমঃ স্বর্ণাকর্ষণায স্বর্ণাভায চ তে নমঃ ।
নমস্তে স্বর্ণকংঠায স্বর্ণালংকারধারিণে ॥ 25 ॥

স্বর্ণসিংহাসনস্থায স্বর্ণপাদায তে নমঃ ।
নমঃ স্বর্ণাভপারায স্বর্ণকাংচীসুশোভিনে ॥ 26 ॥

নমস্তে স্বর্ণজংঘায ভক্তকামদুঘাত্মনে ।
নমস্তে স্বর্ণভক্তানাং কল্পবৃক্ষস্বরূপিণে ॥ 27 ॥

চিংতামণিস্বরূপায নমো ব্রহ্মাদিসেবিনে ।
কল্পদ্রুমাধঃসংস্থায বহুস্বর্ণপ্রদাযিনে ॥ 28 ॥

নমো হেমাদিকর্ষায ভৈরবায নমো নমঃ ।
স্তবেনানেন সংতুষ্টো ভব লোকেশভৈরব ॥ 29 ॥

পশ্য মাং করুণাবিষ্ট শরণাগতবত্সল ।
শ্রীভৈরব ধনাধ্যক্ষ শরণং ত্বাং ভজাম্যহম্ ।
প্রসীদ সকলান্ কামান্ প্রযচ্ছ মম সর্বদা ॥ 30 ॥

ফলশ্রুতিঃ
শ্রীমহাভৈরবস্যেদং স্তোত্রসূক্তং সুদুর্লভম্ ।
মংত্রাত্মকং মহাপুণ্যং সর্বৈশ্বর্যপ্রদাযকম্ ॥ 31 ॥

যঃ পঠেন্নিত্যমেকাগ্রং পাতকৈঃ স বিমুচ্যতে ।
লভতে চামলালক্ষ্মীমষ্টৈশ্বর্যমবাপ্নুযাত্ ॥ 32 ॥

চিংতামণিমবাপ্নোতি ধেনু কল্পতরুং ধৃবম্ ।
স্বর্ণরাশিমবাপ্নোতি সিদ্ধিমেব স মানবঃ ॥ 33 ॥

সংধ্যাযাং যঃ পঠেত্ স্তোত্রং দশাবৃত্যা নরোত্তমৈঃ ।
স্বপ্নে শ্রীভৈরবস্তস্য সাক্ষাদ্ভূত্বা জগদ্গুরুঃ ॥ 34 ॥

স্বর্ণরাশি দদাত্যেব তত্‍ক্ষণান্নাস্তি সংশযঃ ।
সর্বদা যঃ পঠেত্ স্তোত্রং ভৈরবস্য মহাত্মনঃ ॥ 35 ॥

লোকত্রযং বশীকুর্যাদচলাং শ্রিযমবাপ্নুযাত্ ।
ন ভযং লভতে ক্বাপি বিঘ্নভূতাদিসংভব ॥ 36 ॥

ম্রিযংতে শত্রবোঽবশ্যমলক্ষ্মীনাশমাপ্নুযাত্ ।
অক্ষযং লভতে সৌখ্যং সর্বদা মানবোত্তমঃ ॥ 37 ॥

অষ্টপংচাশতাণঢ্যো মংত্ররাজঃ প্রকীর্তিতঃ ।
দারিদ্র্যদুঃখশমনং স্বর্ণাকর্ষণকারকঃ ॥ 38 ॥

য যেন সংজপেত্ ধীমান্ স্তোত্রং বা প্রপঠেত্ সদা ।
মহাভৈরবসাযুজ্যং স্বাংতকালে ভবেদ্ধ্রুবম্ ॥ 39 ॥

ইতি রুদ্রযামল তংত্রে স্বর্ণাকর্ষণ ভৈরব স্তোত্রম্ ॥