শিষ্য উবাচ
অখংডে সচ্চিদানংদে নির্বিকল্পৈকরূপিণি ।
স্থিতেঽদ্বিতীযভাবেঽপি কথং পূজা বিধীযতে ॥ 1 ॥

পূর্ণস্যাবাহনং কুত্র সর্বাধারস্য চাসনম্ ।
স্বচ্ছস্য পাদ্যমর্ঘ্যং চ শুদ্ধস্যাচমনং কুতঃ ॥ 2 ॥

নির্মলস্য কুতঃ স্নানং বাসো বিশ্বোদরস্য চ ।
অগোত্রস্য ত্ববর্ণস্য কুতস্তস্যোপবীতকম্ ॥ 3 ॥

নির্লেপস্য কুতো গংধঃ পুষ্পং নির্বাসনস্য চ ।
নির্বিশেষস্য কা ভূষা কোঽলংকারো নিরাকৃতেঃ ॥ 4 ॥

নিরংজনস্য কিং ধূপৈর্দীপৈর্বা সর্বসাক্ষিণঃ ।
নিজানংদৈকতৃপ্তস্য নৈবেদ্যং কিং ভবেদিহ ॥ 5 ॥

বিশ্বানংদযিতুস্তস্য কিং তাংবূলং প্রকল্পতে ।
স্বযংপ্রকাশচিদ্রূপো যোঽসাবর্কাদিভাসকঃ ॥ 6 ॥

গীযতে শ্রুতিভিস্তস্য নীরাজনবিধিঃ কুতঃ ।
প্রদক্ষিণমনংতস্য প্রণামোঽদ্বযবস্তুনঃ ॥ 7 ॥

বেদবাচামবেদ্যস্য কিং বা স্তোত্রং বিধীযতে ।
অংতর্বহিঃ সংস্থিতস্য উদ্বাসনবিধিঃ কুতঃ ॥ 8 ॥

শ্রী গুরুরুবাচ
আরাধযামি মণিসংনিভমাত্মলিংগম্
মাযাপুরীহৃদযপংকজসংনিবিষ্টম্ ।
শ্রদ্ধানদীবিমলচিত্তজলাভিষেকৈ-
র্নিত্যং সমাধিকুসুমৈর্নপুনর্ভবায ॥ 9 ॥

অযমেকোঽবশিষ্টোঽস্মীত্যেবমাবাহযেচ্ছিবম্ ।
আসনং কল্পযেত্পশ্চাত্স্বপ্রতিষ্ঠাত্মচিংতনম্ ॥ 10 ॥

পুণ্যপাপরজঃসংগো মম নাস্তীতি বেদনম্ ।
পাদ্যং সমর্পযেদ্বিদ্বন্সর্বকল্মষনাশনম্ ॥ 11 ॥

অনাদিকল্পবিধৃতমূলাজ্ঞানজলাংজলিম্ ।
বিসৃজেদাত্মলিংগস্য তদেবার্ঘ্যসমর্পণম্ ॥ 12 ॥

ব্রহ্মানংদাব্ধিকল্লোলকণকোট্যংশলেশকম্ ।
পিবংতীংদ্রাদয ইতি ধ্যানমাচমনং মতম্ ॥ 13 ॥

ব্রহ্মানংদজলেনৈব লোকাঃ সর্বে পরিপ্লুতাঃ ।
অচ্ছেদ্যোঽযমিতি ধ্যানমভিষেচনমাত্মনঃ ॥ 14 ॥

নিরাবরণচৈতন্যং প্রকাশোঽস্মীতি চিংতনম্ ।
আত্মলিংগস্য সদ্বস্ত্রমিত্যেবং চিংতযেন্মুনিঃ ॥ 15 ॥

ত্রিগুণাত্মাশেষলোকমালিকাসূত্রমস্ম্যহম্ ।
ইতি নিশ্চযমেবাত্র হ্যুপবীতং পরং মতম্ ॥ 16 ॥

অনেকবাসনামিশ্রপ্রপংচোঽযং ধৃতো মযা ।
নান্যেনেত্যনুসংধানমাত্মনশ্চংদনং ভবেত্ ॥ 17 ॥

রজঃসত্ত্বতমোবৃত্তিত্যাগরূপৈস্তিলাক্ষতৈঃ ।
আত্মলিংগং যজেন্নিত্যং জীবন্মুক্তিপ্রসিদ্ধযে ॥ 18 ॥

ঈশ্বরো গুরুরাত্মেতি ভেদত্রযবিবর্জিতৈঃ ।
বিল্বপত্রৈরদ্বিতীযৈরাত্মলিংগং যজেচ্ছিবম্ ॥ 19 ॥

সমস্তবাসনাত্যাগং ধূপং তস্য বিচিংতযেত্ ।
জ্যোতির্মযাত্মবিজ্ঞানং দীপং সংদর্শযেদ্বুধঃ ॥ 20 ॥

নৈবেদ্যমাত্মলিংগস্য ব্রহ্মাংডাখ্যং মহোদনম্ ।
পিবানংদরসং স্বাদু মৃত্যুরস্যোপসেচনম্ ॥ 21 ॥

অজ্ঞানোচ্ছিষ্টকরস্য ক্ষালনং জ্ঞানবারিণা ।
বিশুদ্ধস্যাত্মলিংগস্য হস্তপ্রক্ষালনং স্মরেত্ ॥ 22 ॥

রাগাদিগুণশূন্যস্য শিবস্য পরমাত্মনঃ ।
সরাগবিষযাভ্যাসত্যাগস্তাংবূলচর্বণম্ ॥ 23 ॥

অজ্ঞানধ্বাংতবিধ্বংসপ্রচংডমতিভাস্করম্ ।
আত্মনো ব্রহ্মতাজ্ঞানং নীরাজনমিহাত্মনঃ ॥ 24 ॥

বিবিধব্রহ্মসংদৃষ্টির্মালিকাভিরলংকৃতম্ ।
পূর্ণানংদাত্মতাদৃষ্টিং পুষ্পাংজলিমনুস্মরেত্ ॥ 25 ॥

পরিভ্রমংতি ব্রহ্মাংডসহস্রাণি মযীশ্বরে ।
কূটস্থাচলরূপোঽহমিতি ধ্যানং প্রদক্ষিণম্ ॥ 26 ॥

বিশ্ববংদ্যোঽহমেবাস্মি নাস্তি বংদ্যো মদন্যতঃ ।
ইত্যালোচনমেবাত্র স্বাত্মলিংগস্য বংদনম্ ॥ 27 ॥

আত্মনঃ সত্ক্রিযা প্রোক্তা কর্তব্যাভাবভাবনা ।
নামরূপব্যতীতাত্মচিংতনং নামকীর্তনম্ ॥ 28 ॥

শ্রবণং তস্য দেবস্য শ্রোতব্যাভাবচিংতনম্ ।
মননং ত্বাত্মলিংগস্য মংতব্যাভাবচিংতনম্ ॥ 29 ॥

ধ্যাতব্যাভাববিজ্ঞানং নিদিধ্যাসনমাত্মনঃ ।
সমস্তভ্রাংতিবিক্ষেপরাহিত্যেনাত্মনিষ্ঠতা ॥ 30 ॥

সমাধিরাত্মনো নাম নান্যচ্চিত্তস্য বিভ্রমঃ ।
তত্রৈব বহ্মণি সদা চিত্তবিশ্রাংতিরিষ্যতে ॥ 31 ॥

এবং বেদাংতকল্পোক্তস্বাত্মলিংগপ্রপূজনম্ ।
কুর্বন্না মরণং বাপি ক্ষণং বা সুসমাহিতঃ ॥ 32 ॥

সর্বদুর্বাসনাজালং পদপাংসুমিব ত্যজেত্ ।
বিধূযাজ্ঞানদুঃখৌঘং মোক্ষানংদং সমশ্নুতে ॥ 33 ॥