રુચિરુવાચ ।
અર્ચિતાનામમૂર્તાનાં પિતૄણાં દીપ્તતેજસામ્ ।
નમસ્યામિ સદા તેષાં ધ્યાનિનાં દિવ્યચક્ષુષામ્ ॥ 1 ॥

ઇંદ્રાદીનાં ચ નેતારો દક્ષમારીચયોસ્તથા ।
સપ્તર્ષીણાં તથાન્યેષાં તાન્નમસ્યામિ કામદાન્ ॥ 2 ॥

મન્વાદીનાં ચ નેતારઃ સૂર્યાચંદ્રમસોસ્તથા ।
તાન્નમસ્યામ્યહં સર્વાન્ પિતૄનપ્યુદધાવપિ ॥ 3 ॥

નક્ષત્રાણાં ગ્રહાણાં ચ વાય્વગ્ન્યોર્નભસસ્તથા ।
દ્યાવાપૃથિવ્યોશ્ચ તથા નમસ્યામિ કૃતાંજલિઃ ॥ 4 ॥

દેવર્ષીણાં જનિતૄંશ્ચ સર્વલોક નમસ્કૃતાન્ ।
અક્ષય્યસ્ય સદા દાતૄન્ નમસ્યેહં કૃતાંજલિઃ ॥ 5 ॥

પ્રજાપતેઃ કશ્યપાય સોમાય વરુણાય ચ ।
યોગેશ્વરેભ્યશ્ચ સદા નમસ્યામિ કૃતાંજલિઃ ॥ 6 ॥

નમો ગણેભ્યઃ સપ્તભ્યસ્તથા લોકેષુ સપ્તસુ ।
સ્વયંભુવે નમસ્યામિ બ્રહ્મણે યોગચક્ષુષે ॥ 7 ॥

સોમાધારાન્ પિતૃગણાન્ યોગમૂર્તિધરાંસ્તથા ।
નમસ્યામિ તથા સોમં પિતરં જગતામહમ્ ॥ 8 ॥

અગ્નિરૂપાંસ્તથૈવાન્યાન્ નમસ્યામિ પિતૄનહમ્ ।
અગ્નિસોમમયં વિશ્વં યત એતદશેષતઃ ॥ 9 ॥

યે ચ તેજસિ યે ચૈતે સોમસૂર્યાગ્નિમૂર્તયઃ ।
જગત્સ્વરૂપિણશ્ચૈવ તથા બ્રહ્મસ્વરૂપિણઃ ॥ 10 ॥

તેભ્યોઽખિલેભ્યો યોગિભ્યઃ પિતૃભ્યો યતમાનસઃ ।
નમો નમો નમસ્તેઽસ્તુ પ્રસીદંતુ સ્વધાભુજઃ ॥ 11 ॥

ઇતિ શ્રી ગરુડપુરાણે ઊનનવતિતમોઽધ્યાયે રુચિકૃત દ્વિતીય પિતૃ સ્તોત્રમ્ ।