પાર્વત્યુવાચ ।
મંત્રાણાં પરમં મંત્રં ગુહ્યાનાં ગુહ્યમેવ ચ ।
બ્રૂહિ મે નારસિંહસ્ય તત્ત્વં મંત્રસ્ય દુર્લભમ્ ॥

શંકર ઉવાચ ।
વૃત્તોત્ફુલ્લવિશાલાક્ષં વિપક્ષક્ષયદીક્ષિતમ્ ।
નિનાદત્રસ્તવિશ્વાંડં વિષ્ણુમુગ્રં નમામ્યહમ્ ॥ 1 ॥

સર્વૈરવધ્યતાં પ્રાપ્તં સબલૌઘં દિતેઃ સુતમ્ ।
નખાગ્રૈઃ શકલીચક્રે યસ્તં વીરં નમામ્યહમ્ ॥ 2 ॥

પદાવષ્ટબ્ધપાતાળં મૂર્ધાઽઽવિષ્ટત્રિવિષ્ટપમ્ ।
ભુજપ્રવિષ્ટાષ્ટદિશં મહાવિષ્ણું નમામ્યહમ્ ॥ 3 ॥

જ્યોતીંષ્યર્કેંદુનક્ષત્રજ્વલનાદીન્યનુક્રમાત્ ।
જ્વલંતિ તેજસા યસ્ય તં જ્વલંતં નમામ્યહમ્ ॥ 4 ॥

સર્વેંદ્રિયૈરપિ વિના સર્વં સર્વત્ર સર્વદા ।
યો જાનાતિ નમામ્યાદ્યં તમહં સર્વતોમુખમ્ ॥ 5 ॥

નરવત્ સિંહવચ્ચૈવ યસ્ય રૂપં મહાત્મનઃ ।
મહાસટં મહાદંષ્ટ્રં તં નૃસિંહં નમામ્યહમ્ ॥ 6 ॥

યન્નામસ્મરણાદ્ભીતાઃ ભૂતવેતાળરાક્ષસાઃ ।
રોગાદ્યાશ્ચ પ્રણશ્યંતિ ભીષણં તં નમામ્યહમ્ ॥ 7 ॥

સર્વેઽપિ યં સમાશ્રિત્ય સકલં ભદ્રમશ્નુતે ।
શ્રિયા ચ ભદ્રયા જુષ્ટો યસ્તં ભદ્રં નમામ્યહમ્ ॥ 8 ॥

સાક્ષાત્ સ્વકાલે સંપ્રાપ્તં મૃત્યું શત્રુગણાન્વિતમ્ ।
ભક્તાનાં નાશયેદ્યસ્તુ મૃત્યુમૃત્યું નમામ્યહમ્ ॥ 9 ॥

નમસ્કારાત્મકં યસ્મૈ વિધાયાત્મનિવેદનમ્ ।
ત્યક્તદુઃખોઽખિલાન્ કામાનશ્નંતં તં નમામ્યહમ્ ॥ 10 ॥

દાસભૂતાઃ સ્વતઃ સર્વે હ્યાત્માનઃ પરમાત્મનઃ ।
અતોઽહમપિ તે દાસઃ ઇતિ મત્વા નમામ્યહમ્ ॥ 11 ॥

શંકરેણાદરાત્ પ્રોક્તં પદાનાં તત્ત્વમુત્તમમ્ ।
ત્રિસંધ્યં યઃ પઠેત્તસ્ય શ્રીવિદ્યાઽઽયુશ્ચ વર્ધતે ॥ 12 ॥

ઇતિ શ્રીશંકરકૃત શ્રી નૃસિંહ મંત્રરાજપદ સ્તોત્રમ્ ।