പാർവത്യുവാച ।
മംത്രാണാം പരമം മംത്രം ഗുഹ്യാനാം ഗുഹ്യമേവ ച ।
ബ്രൂഹി മേ നാരസിംഹസ്യ തത്ത്വം മംത്രസ്യ ദുര്ലഭമ് ॥

ശംകര ഉവാച ।
വൃത്തോത്ഫുല്ലവിശാലാക്ഷം വിപക്ഷക്ഷയദീക്ഷിതമ് ।
നിനാദത്രസ്തവിശ്വാംഡം വിഷ്ണുമുഗ്രം നമാമ്യഹമ് ॥ 1 ॥

സർവൈരവധ്യതാം പ്രാപ്തം സബലൌഘം ദിതേഃ സുതമ് ।
നഖാഗ്രൈഃ ശകലീചക്രേ യസ്തം വീരം നമാമ്യഹമ് ॥ 2 ॥

പദാവഷ്ടബ്ധപാതാളം മൂര്ധാഽഽവിഷ്ടത്രിവിഷ്ടപമ് ।
ഭുജപ്രവിഷ്ടാഷ്ടദിശം മഹാവിഷ്ണും നമാമ്യഹമ് ॥ 3 ॥

ജ്യോതീംഷ്യര്കേംദുനക്ഷത്രജ്വലനാദീന്യനുക്രമാത് ।
ജ്വലംതി തേജസാ യസ്യ തം ജ്വലംതം നമാമ്യഹമ് ॥ 4 ॥

സർവേംദ്രിയൈരപി വിനാ സർവം സർവത്ര സർവദാ ।
യോ ജാനാതി നമാമ്യാദ്യം തമഹം സർവതോമുഖമ് ॥ 5 ॥

നരവത് സിംഹവച്ചൈവ യസ്യ രൂപം മഹാത്മനഃ ।
മഹാസടം മഹാദംഷ്ട്രം തം നൃസിംഹം നമാമ്യഹമ് ॥ 6 ॥

യന്നാമസ്മരണാദ്ഭീതാഃ ഭൂതവേതാളരാക്ഷസാഃ ।
രോഗാദ്യാശ്ച പ്രണശ്യംതി ഭീഷണം തം നമാമ്യഹമ് ॥ 7 ॥

സർവേഽപി യം സമാശ്രിത്യ സകലം ഭദ്രമശ്നുതേ ।
ശ്രിയാ ച ഭദ്രയാ ജുഷ്ടോ യസ്തം ഭദ്രം നമാമ്യഹമ് ॥ 8 ॥

സാക്ഷാത് സ്വകാലേ സംപ്രാപ്തം മൃത്യും ശത്രുഗണാന്വിതമ് ।
ഭക്താനാം നാശയേദ്യസ്തു മൃത്യുമൃത്യും നമാമ്യഹമ് ॥ 9 ॥

നമസ്കാരാത്മകം യസ്മൈ വിധായാത്മനിവേദനമ് ।
ത്യക്തദുഃഖോഽഖിലാന് കാമാനശ്നംതം തം നമാമ്യഹമ് ॥ 10 ॥

ദാസഭൂതാഃ സ്വതഃ സർവേ ഹ്യാത്മാനഃ പരമാത്മനഃ ।
അതോഽഹമപി തേ ദാസഃ ഇതി മത്വാ നമാമ്യഹമ് ॥ 11 ॥

ശംകരേണാദരാത് പ്രോക്തം പദാനാം തത്ത്വമുത്തമമ് ।
ത്രിസംധ്യം യഃ പഠേത്തസ്യ ശ്രീവിദ്യാഽഽയുശ്ച വര്ധതേ ॥ 12 ॥

ഇതി ശ്രീശംകരകൃത ശ്രീ നൃസിംഹ മംത്രരാജപദ സ്തോത്രമ് ।