පාර්වත්යුවාච ।
මංත්රාණාං පරමං මංත්රං ගුහ්යානාං ගුහ්යමේව ච ।
බ්රූහි මේ නාරසිංහස්ය තත්ත්වං මංත්රස්ය දුර්ලභම් ॥

ශංකර උවාච ।
වෘත්තෝත්ඵුල්ලවිශාලාක්ෂං විපක්ෂක්ෂයදීක්ෂිතම් ।
නිනාදත්රස්තවිශ්වාංඩං විෂ්ණුමුග්රං නමාම්යහම් ॥ 1 ॥

සර්වෛරවධ්යතාං ප්රාප්තං සබලෞඝං දිතේඃ සුතම් ।
නඛාග්රෛඃ ශකලීචක්රේ යස්තං වීරං නමාම්යහම් ॥ 2 ॥

පදාවෂ්ටබ්ධපාතාළං මූර්ධාऽऽවිෂ්ටත්රිවිෂ්ටපම් ।
භුජප්රවිෂ්ටාෂ්ටදිශං මහාවිෂ්ණුං නමාම්යහම් ॥ 3 ॥

ජ්යෝතීංෂ්යර්කේංදුනක්ෂත්රජ්වලනාදීන්යනුක්රමාත් ।
ජ්වලංති තේජසා යස්ය තං ජ්වලංතං නමාම්යහම් ॥ 4 ॥

සර්වේංද්රියෛරපි විනා සර්වං සර්වත්ර සර්වදා ।
යෝ ජානාති නමාම්යාද්යං තමහං සර්වතෝමුඛම් ॥ 5 ॥

නරවත් සිංහවච්චෛව යස්ය රූපං මහාත්මනඃ ।
මහාසටං මහාදංෂ්ට්රං තං නෘසිංහං නමාම්යහම් ॥ 6 ॥

යන්නාමස්මරණාද්භීතාඃ භූතවේතාළරාක්ෂසාඃ ।
රෝගාද්යාශ්ච ප්රණශ්යංති භීෂණං තං නමාම්යහම් ॥ 7 ॥

සර්වේऽපි යං සමාශ්රිත්ය සකලං භද්රමශ්නුතේ ।
ශ්රියා ච භද්රයා ජුෂ්ටෝ යස්තං භද්රං නමාම්යහම් ॥ 8 ॥

සාක්ෂාත් ස්වකාලේ සංප්රාප්තං මෘත්යුං ශත්රුගණාන්විතම් ।
භක්තානාං නාශයේද්යස්තු මෘත්යුමෘත්යුං නමාම්යහම් ॥ 9 ॥

නමස්කාරාත්මකං යස්මෛ විධායාත්මනිවේදනම් ।
ත්යක්තදුඃඛෝऽඛිලාන් කාමානශ්නංතං තං නමාම්යහම් ॥ 10 ॥

දාසභූතාඃ ස්වතඃ සර්වේ හ්යාත්මානඃ පරමාත්මනඃ ।
අතෝऽහමපි තේ දාසඃ ඉති මත්වා නමාම්යහම් ॥ 11 ॥

ශංකරේණාදරාත් ප්රෝක්තං පදානාං තත්ත්වමුත්තමම් ।
ත්රිසංධ්යං යඃ පඨේත්තස්ය ශ්රීවිද්යාऽऽයුශ්ච වර්ධතේ ॥ 12 ॥

ඉති ශ්රීශංකරකෘත ශ්රී නෘසිංහ මංත්රරාජපද ස්තෝත්රම් ।