𑌪𑌾𑌰𑍍𑌵𑌤𑍍𑌯𑍁𑌵𑌾𑌚 ।
𑌮𑌂𑌤𑍍𑌰𑌾𑌣𑌾𑌂 𑌪𑌰𑌮𑌂 𑌮𑌂𑌤𑍍𑌰𑌂 𑌗𑍁𑌹𑍍𑌯𑌾𑌨𑌾𑌂 𑌗𑍁𑌹𑍍𑌯𑌮𑍇𑌵 𑌚 ।
𑌬𑍍𑌰𑍂𑌹𑌿 𑌮𑍇 𑌨𑌾𑌰𑌸𑌿𑌂𑌹𑌸𑍍𑌯 𑌤𑌤𑍍𑌤𑍍𑌵𑌂 𑌮𑌂𑌤𑍍𑌰𑌸𑍍𑌯 𑌦𑍁𑌰𑍍𑌲𑌭𑌮𑍍 ॥

𑌶𑌂𑌕𑌰 𑌉𑌵𑌾𑌚 ।
𑌵𑍃𑌤𑍍𑌤𑍋𑌤𑍍𑌫𑍁𑌲𑍍𑌲𑌵𑌿𑌶𑌾𑌲𑌾𑌕𑍍𑌷𑌂 𑌵𑌿𑌪𑌕𑍍𑌷𑌕𑍍𑌷𑌯𑌦𑍀𑌕𑍍𑌷𑌿𑌤𑌮𑍍 ।
𑌨𑌿𑌨𑌾𑌦𑌤𑍍𑌰𑌸𑍍𑌤𑌵𑌿𑌶𑍍𑌵𑌾𑌂𑌡𑌂 𑌵𑌿𑌷𑍍𑌣𑍁𑌮𑍁𑌗𑍍𑌰𑌂 𑌨𑌮𑌾𑌮𑍍𑌯𑌹𑌮𑍍 ॥ 1 ॥

𑌸𑌰𑍍𑌵𑍈𑌰𑌵𑌧𑍍𑌯𑌤𑌾𑌂 𑌪𑍍𑌰𑌾𑌪𑍍𑌤𑌂 𑌸𑌬𑌲𑍌𑌘𑌂 𑌦𑌿𑌤𑍇𑌃 𑌸𑍁𑌤𑌮𑍍 ।
𑌨𑌖𑌾𑌗𑍍𑌰𑍈𑌃 𑌶𑌕𑌲𑍀𑌚𑌕𑍍𑌰𑍇 𑌯𑌸𑍍𑌤𑌂 𑌵𑍀𑌰𑌂 𑌨𑌮𑌾𑌮𑍍𑌯𑌹𑌮𑍍 ॥ 2 ॥

𑌪𑌦𑌾𑌵𑌷𑍍𑌟𑌬𑍍𑌧𑌪𑌾𑌤𑌾𑌳𑌂 𑌮𑍂𑌰𑍍𑌧𑌾𑌽𑌽𑌵𑌿𑌷𑍍𑌟𑌤𑍍𑌰𑌿𑌵𑌿𑌷𑍍𑌟𑌪𑌮𑍍 ।
𑌭𑍁𑌜𑌪𑍍𑌰𑌵𑌿𑌷𑍍𑌟𑌾𑌷𑍍𑌟𑌦𑌿𑌶𑌂 𑌮𑌹𑌾𑌵𑌿𑌷𑍍𑌣𑍁𑌂 𑌨𑌮𑌾𑌮𑍍𑌯𑌹𑌮𑍍 ॥ 3 ॥

𑌜𑍍𑌯𑍋𑌤𑍀𑌂𑌷𑍍𑌯𑌰𑍍𑌕𑍇𑌂𑌦𑍁𑌨𑌕𑍍𑌷𑌤𑍍𑌰𑌜𑍍𑌵𑌲𑌨𑌾𑌦𑍀𑌨𑍍𑌯𑌨𑍁𑌕𑍍𑌰𑌮𑌾𑌤𑍍 ।
𑌜𑍍𑌵𑌲𑌂𑌤𑌿 𑌤𑍇𑌜𑌸𑌾 𑌯𑌸𑍍𑌯 𑌤𑌂 𑌜𑍍𑌵𑌲𑌂𑌤𑌂 𑌨𑌮𑌾𑌮𑍍𑌯𑌹𑌮𑍍 ॥ 4 ॥

𑌸𑌰𑍍𑌵𑍇𑌂𑌦𑍍𑌰𑌿𑌯𑍈𑌰𑌪𑌿 𑌵𑌿𑌨𑌾 𑌸𑌰𑍍𑌵𑌂 𑌸𑌰𑍍𑌵𑌤𑍍𑌰 𑌸𑌰𑍍𑌵𑌦𑌾 ।
𑌯𑍋 𑌜𑌾𑌨𑌾𑌤𑌿 𑌨𑌮𑌾𑌮𑍍𑌯𑌾𑌦𑍍𑌯𑌂 𑌤𑌮𑌹𑌂 𑌸𑌰𑍍𑌵𑌤𑍋𑌮𑍁𑌖𑌮𑍍 ॥ 5 ॥

𑌨𑌰𑌵𑌤𑍍 𑌸𑌿𑌂𑌹𑌵𑌚𑍍𑌚𑍈𑌵 𑌯𑌸𑍍𑌯 𑌰𑍂𑌪𑌂 𑌮𑌹𑌾𑌤𑍍𑌮𑌨𑌃 ।
𑌮𑌹𑌾𑌸𑌟𑌂 𑌮𑌹𑌾𑌦𑌂𑌷𑍍𑌟𑍍𑌰𑌂 𑌤𑌂 𑌨𑍃𑌸𑌿𑌂𑌹𑌂 𑌨𑌮𑌾𑌮𑍍𑌯𑌹𑌮𑍍 ॥ 6 ॥

𑌯𑌨𑍍𑌨𑌾𑌮𑌸𑍍𑌮𑌰𑌣𑌾𑌦𑍍𑌭𑍀𑌤𑌾𑌃 𑌭𑍂𑌤𑌵𑍇𑌤𑌾𑌳𑌰𑌾𑌕𑍍𑌷𑌸𑌾𑌃 ।
𑌰𑍋𑌗𑌾𑌦𑍍𑌯𑌾𑌶𑍍𑌚 𑌪𑍍𑌰𑌣𑌶𑍍𑌯𑌂𑌤𑌿 𑌭𑍀𑌷𑌣𑌂 𑌤𑌂 𑌨𑌮𑌾𑌮𑍍𑌯𑌹𑌮𑍍 ॥ 𑍭 ॥

𑌸𑌰𑍍𑌵𑍇𑌽𑌪𑌿 𑌯𑌂 𑌸𑌮𑌾𑌶𑍍𑌰𑌿𑌤𑍍𑌯 𑌸𑌕𑌲𑌂 𑌭𑌦𑍍𑌰𑌮𑌶𑍍𑌨𑍁𑌤𑍇 ।
𑌶𑍍𑌰𑌿𑌯𑌾 𑌚 𑌭𑌦𑍍𑌰𑌯𑌾 𑌜𑍁𑌷𑍍𑌟𑍋 𑌯𑌸𑍍𑌤𑌂 𑌭𑌦𑍍𑌰𑌂 𑌨𑌮𑌾𑌮𑍍𑌯𑌹𑌮𑍍 ॥ 𑍮 ॥

𑌸𑌾𑌕𑍍𑌷𑌾𑌤𑍍 𑌸𑍍𑌵𑌕𑌾𑌲𑍇 𑌸𑌂𑌪𑍍𑌰𑌾𑌪𑍍𑌤𑌂 𑌮𑍃𑌤𑍍𑌯𑍁𑌂 𑌶𑌤𑍍𑌰𑍁𑌗𑌣𑌾𑌨𑍍𑌵𑌿𑌤𑌮𑍍 ।
𑌭𑌕𑍍𑌤𑌾𑌨𑌾𑌂 𑌨𑌾𑌶𑌯𑍇𑌦𑍍𑌯𑌸𑍍𑌤𑍁 𑌮𑍃𑌤𑍍𑌯𑍁𑌮𑍃𑌤𑍍𑌯𑍁𑌂 𑌨𑌮𑌾𑌮𑍍𑌯𑌹𑌮𑍍 ॥ 𑍯 ॥

𑌨𑌮𑌸𑍍𑌕𑌾𑌰𑌾𑌤𑍍𑌮𑌕𑌂 𑌯𑌸𑍍𑌮𑍈 𑌵𑌿𑌧𑌾𑌯𑌾𑌤𑍍𑌮𑌨𑌿𑌵𑍇𑌦𑌨𑌮𑍍 ।
𑌤𑍍𑌯𑌕𑍍𑌤𑌦𑍁𑌃𑌖𑍋𑌽𑌖𑌿𑌲𑌾𑌨𑍍 𑌕𑌾𑌮𑌾𑌨𑌶𑍍𑌨𑌂𑌤𑌂 𑌤𑌂 𑌨𑌮𑌾𑌮𑍍𑌯𑌹𑌮𑍍 ॥ 10 ॥

𑌦𑌾𑌸𑌭𑍂𑌤𑌾𑌃 𑌸𑍍𑌵𑌤𑌃 𑌸𑌰𑍍𑌵𑍇 𑌹𑍍𑌯𑌾𑌤𑍍𑌮𑌾𑌨𑌃 𑌪𑌰𑌮𑌾𑌤𑍍𑌮𑌨𑌃 ।
𑌅𑌤𑍋𑌽𑌹𑌮𑌪𑌿 𑌤𑍇 𑌦𑌾𑌸𑌃 𑌇𑌤𑌿 𑌮𑌤𑍍𑌵𑌾 𑌨𑌮𑌾𑌮𑍍𑌯𑌹𑌮𑍍 ॥ 11 ॥

𑌶𑌂𑌕𑌰𑍇𑌣𑌾𑌦𑌰𑌾𑌤𑍍 𑌪𑍍𑌰𑍋𑌕𑍍𑌤𑌂 𑌪𑌦𑌾𑌨𑌾𑌂 𑌤𑌤𑍍𑌤𑍍𑌵𑌮𑍁𑌤𑍍𑌤𑌮𑌮𑍍 ।
𑌤𑍍𑌰𑌿𑌸𑌂𑌧𑍍𑌯𑌂 𑌯𑌃 𑌪𑌠𑍇𑌤𑍍𑌤𑌸𑍍𑌯 𑌶𑍍𑌰𑍀𑌵𑌿𑌦𑍍𑌯𑌾𑌽𑌽𑌯𑍁𑌶𑍍𑌚 𑌵𑌰𑍍𑌧𑌤𑍇 ॥ 12 ॥

𑌇𑌤𑌿 𑌶𑍍𑌰𑍀𑌶𑌂𑌕𑌰𑌕𑍃𑌤 𑌶𑍍𑌰𑍀 𑌨𑍃𑌸𑌿𑌂𑌹 𑌮𑌂𑌤𑍍𑌰𑌰𑌾𑌜𑌪𑌦 𑌸𑍍𑌤𑍋𑌤𑍍𑌰𑌮𑍍 ।