શ્રુતીનામુત્તરં ભાગં વેગવત્યાશ્ચ દક્ષિણમ્ ।
કામાદધિવસન્ જીયાત્ કશ્ચિદદ્ભુત કેસરી ॥ 1 ॥

તપનેંદ્વગ્નિનયનઃ તાપાનપચિનોતુ નઃ ।
તાપનીયરહસ્યાનાં સારઃ કામાસિકા હરિઃ ॥ 2 ॥

આકંઠમાદિપુરુષં
કંઠીરવમુપરિ કુંઠિતારાતિમ્ ।
વેગોપકંઠસંગાત્
વિમુક્તવૈકુંઠબહુમતિમુપાસે ॥ 3 ॥

બંધુમખિલસ્ય જંતોઃ
બંધુરપર્યંકબંધરમણીયમ્ ।
વિષમવિલોચનમીડે
વેગવતીપુળિનકેળિનરસિંહમ્ ॥ 4 ॥

સ્વસ્થાનેષુ મરુદ્ગણાન્ નિયમયન્ સ્વાધીનસર્વેંદ્રિયઃ
પર્યંકસ્થિરધારણા પ્રકટિતપ્રત્યઙ્મુખાવસ્થિતિઃ ।
પ્રાયેણ પ્રણિપેદુષઃ પ્રભુરસૌ યોગં નિજં શિક્ષયન્
કામાનાતનુતાદશેષજગતાં કામાસિકા કેસરી ॥ 5 ॥

વિકસ્વરનખસ્વરુક્ષતહિરણ્યવક્ષઃસ્થલી-
-નિરર્ગલવિનિર્ગલદ્રુધિરસિંધુસંધ્યાયિતાઃ ।
અવંતુ મદનાસિકામનુજપંચવક્ત્રસ્ય માં
અહંપ્રથમિકામિથઃ પ્રકટિતાહવા બાહવઃ ॥ 6 ॥

સટાપટલભીષણે સરભસાટ્ટહાસોદ્ભટે
સ્ફુરત્ ક્રુધિપરિસ્ફુટ ભ્રુકુટિકેઽપિ વક્ત્રે કૃતે ।
કૃપાકપટકેસરિન્ દનુજડિંભદત્તસ્તના
સરોજસદૃશા દૃશા વ્યતિવિષજ્ય તે વ્યજ્યતે ॥ 7 ॥

ત્વયિ રક્ષતિ રક્ષકૈઃ કિમન્યૈ-
-સ્ત્વયિ ચારક્ષતિ રક્ષકૈઃ કિમન્યૈઃ ।
ઇતિ નિશ્ચિતધીઃ શ્રયામિ નિત્યં
નૃહરે વેગવતીતટાશ્રયં ત્વામ્ ॥ 8 ॥

ઇત્થં સ્તુતઃ સકૃદિહાષ્ટભિરેષ પદ્યૈઃ
શ્રીવેંકટેશરચિતૈસ્ત્રિદશેંદ્રવંદ્યઃ ।
દુર્દાંતઘોરદુરિતદ્વિરદેંદ્રભેદી
કામાસિકાનરહરિર્વિતનોતુ કામાન્ ॥ 9 ॥

ઇતિ શ્રીવેદાંતદેશિકકૃતં કામાસિકાષ્ટકમ્ ।