ജഗത്പ്രതിഷ്ഠാഹേതുര്യഃ ധര്മഃ ശ്രുത്യംതകീര്തിതഃ ।
തസ്യാപി ശാസ്താ യോ ദേവസ്തം സദാ സമുപാശ്രയേ ॥ 1 ॥

ശ്രീശംകരാചാര്യൈഃ ശിവാവതാരൈഃ
ധര്മപ്രചാരായ സമസ്തകാലേ ।
സുസ്ഥാപിതം ശൃംഗമഹീധ്രവര്യേ
പീഠം യതീംദ്രാഃ പരിഭൂഷയംതി ॥ 2 ॥

തേഷ്വേവ കര്മംദിവരേഷു വിദ്യാ-
-തപോധനേഷു പ്രഥിതാനുഭാവഃ ।
വിദ്യാസുതീര്ഥോഽഭിനവോഽദ്യ യോഗീ
ശാസ്താരമാലോകയിതും പ്രതസ്ഥേ ॥ 3 ॥

ധര്മസ്യ ഗോപ്താ യതിപുംഗവോഽയം
ധര്മസ്യ ശാസ്താരമവൈക്ഷതേതി ।
യുക്തം തദേതദ്യുഭയോസ്തയോര്ഹി
സമ്മേലനം ലോകഹിതായ നൂനമ് ॥ 4 ॥

കാലേഽസ്മിന് കലിമലദൂഷിതേഽപി ധര്മഃ
ശ്രൌതോഽയം ന ഖലു വിലോപമാപ തത്ര ।
ഹേതുഃ ഖല്വയമിഹ നൂനമേവ നാന്യഃ
ശാസ്താഽസ്തേ സകലജനൈകവംദ്യപാദഃ ॥ 5 ॥

ജ്ഞാനം ഷഡാസ്യവരതാതകൃപൈകലഭ്യം
മോക്ഷസ്തു താര്ക്ഷ്യവരവാഹദയൈകലഭ്യഃ ।
ജ്ഞാനം ച മോക്ഷ ഉഭയം തു വിനാ ശ്രമേണ
പ്രാപ്യം ജനൈഃ ഹരിഹരാത്മജസത്പ്രസാദാത് ॥ 6 ॥

യമനിയമാദിസമേതൈഃ യതചിത്തൈര്യോഗിഭിഃ സദാ ധ്യേയമ് ।
ശാസ്താരം ഹൃദി കലയേ ധാതാരം സർവലോകസ്യ ॥ 7 ॥

ശബരഗിരിനിവാസഃ സർവലോകൈകപൂജ്യഃ
നതജനസുഖകാരീ നമ്രഹൃത്താപഹാരീ ।
ത്രിദശദിതിജസേവ്യഃ സ്വര്ഗമോക്ഷപ്രദാതാ
ഹരിഹരസുതദേവഃ സംതതം ശം തനോതു ॥ 8 ॥

ഇതി ശൃംഗേരി ജഗദ്ഗുരു ശ്രീ ശ്രീ ഭാരതീതീര്ഥ മഹാസ്വാമിഭിഃ വിരചിതം ധര്മശാസ്താ സ്തോത്രമ് ।