ජගත්ප්රතිෂ්ඨාහේතුර්යඃ ධර්මඃ ශ්රුත්යංතකීර්තිතඃ ।
තස්යාපි ශාස්තා යෝ දේවස්තං සදා සමුපාශ්රයේ ॥ 1 ॥

ශ්රීශංකරාචාර්යෛඃ ශිවාවතාරෛඃ
ධර්මප්රචාරාය සමස්තකාලේ ।
සුස්ථාපිතං ශෘංගමහීධ්රවර්යේ
පීඨං යතීංද්රාඃ පරිභූෂයංති ॥ 2 ॥

තේෂ්වේව කර්මංදිවරේෂු විද්යා-
-තපෝධනේෂු ප්රථිතානුභාවඃ ।
විද්යාසුතීර්ථෝऽභිනවෝऽද්ය යෝගී
ශාස්තාරමාලෝකයිතුං ප්රතස්ථේ ॥ 3 ॥

ධර්මස්ය ගෝප්තා යතිපුංගවෝऽයං
ධර්මස්ය ශාස්තාරමවෛක්ෂතේති ।
යුක්තං තදේතද්යුභයෝස්තයෝර්හි
සම්මේලනං ලෝකහිතාය නූනම් ॥ 4 ॥

කාලේऽස්මින් කලිමලදූෂිතේऽපි ධර්මඃ
ශ්රෞතෝऽයං න ඛලු විලෝපමාප තත්ර ।
හේතුඃ ඛල්වයමිහ නූනමේව නාන්යඃ
ශාස්තාऽස්තේ සකලජනෛකවංද්යපාදඃ ॥ 5 ॥

ජ්ඤානං ෂඩාස්යවරතාතකෘපෛකලභ්යං
මෝක්ෂස්තු තාර්ක්ෂ්යවරවාහදයෛකලභ්යඃ ।
ජ්ඤානං ච මෝක්ෂ උභයං තු විනා ශ්රමේණ
ප්රාප්යං ජනෛඃ හරිහරාත්මජසත්ප්රසාදාත් ॥ 6 ॥

යමනියමාදිසමේතෛඃ යතචිත්තෛර්යෝගිභිඃ සදා ධ්යේයම් ।
ශාස්තාරං හෘදි කලයේ ධාතාරං සර්වලෝකස්ය ॥ 7 ॥

ශබරගිරිනිවාසඃ සර්වලෝකෛකපූජ්යඃ
නතජනසුඛකාරී නම්රහෘත්තාපහාරී ।
ත්රිදශදිතිජසේව්යඃ ස්වර්ගමෝක්ෂප්රදාතා
හරිහරසුතදේවඃ සංතතං ශං තනෝතු ॥ 8 ॥

ඉති ශෘංගේරි ජගද්ගුරු ශ්රී ශ්රී භාරතීතීර්ථ මහාස්වාමිභිඃ විරචිතං ධර්මශාස්තා ස්තෝත්රම් ।