ഹരിര്ഹരതി പാപാനി ദുഷ്ടചിത്തൈരപി സ്മൃതഃ ।
അനിച്ഛയാഽപി സംസ്പൃഷ്ടോ ദഹത്യേവ ഹി പാവകഃ ॥ 1 ॥

സ ഗംഗാ സ ഗയാ സേതുഃ സ കാശീ സ ച പുഷ്കരമ് ।
ജിഹ്വാഗ്രേ വര്തതേ യസ്യ ഹരിരിത്യക്ഷരദ്വയമ് ॥ 2 ॥

വാരാണസ്യാം കുരുക്ഷേത്രേ നൈമിശാരണ്യ ഏവ ച ।
യത്കൃതം തേന യേനോക്തം ഹരിരിത്യക്ഷരദ്വയമ് ॥ 3 ॥

പൃഥിവ്യാം യാനി തീര്ഥാനി പുണ്യാന്യായതനാനി ച ।
താനി സർവാണ്യശേഷാണി ഹരിരിത്യക്ഷരദ്വയമ് ॥ 4 ॥

ഗവാം കോടിസഹസ്രാണി ഹേമകന്യാസഹസ്രകമ് ।
ദത്തം സ്യാത്തേന യേനോക്തം ഹരിരിത്യക്ഷരദ്വയമ് ॥ 5 ॥

ഋഗ്വേദോഽഥ യജുർവേദഃ സാമവേദോഽപ്യഥർവണഃ ।
അധീതസ്തേന യേനോക്തം ഹരിരിത്യക്ഷരദ്വയമ് ॥ 6 ॥

അശ്വമേധൈര്മഹായജ്ഞൈര്നരമേധൈസ്തഥൈവ ച ।
ഇഷ്ടം സ്യാത്തേന യേനോക്തം ഹരിരിത്യക്ഷരദ്വയമ് ॥ 7 ॥

പ്രാണഃ പ്രയാണ പാഥേയം സംസാരവ്യാധിനാശനമ് ।
ദുഃഖാത്യംത പരിത്രാണം ഹരിരിത്യക്ഷരദ്വയമ് ॥ 8 ॥

ബദ്ധഃ പരികരസ്തേന മോക്ഷായ ഗമനം പ്രതി ।
സകൃദുച്ചാരിതം യേന ഹരിരിത്യക്ഷരദ്വയമ് ॥ 9 ॥

ഹര്യഷ്ടകമിദം പുണ്യം പ്രാതരുത്ഥായ യഃ പഠേത് ।
ആയുഷ്യം ബലമാരോഗ്യം യശോ വൃദ്ധിഃ ശ്രിയാവഹമ് ॥ 10 ॥

പ്രഹ്ലാദേന കൃതം സ്തോത്രം ദുഃഖസാഗരശോഷണമ് ।
യഃ പഠേത്സ നരോ യാതി തദ്വിഷ്ണോഃ പരമം പദമ് ॥ 11 ॥

ഇതി പ്രഹ്ലാദകൃത ശ്രീ ഹര്യഷ്ടകമ് ।