ಅಸ್ಯ ಶ್ರೀ ಚನ್ದ್ರ ಕವಚಸ್ಯ । ಗೌತಮ ಋಷಿಃ । ಅನುಷ್ಟುಪ್ ಛನ್ದಃ । ಶ್ರೀ ಚನ್ದ್ರೋ ದೇವತಾ । ಚನ್ದ್ರ ಪ್ರೀತ್ಯರ್ಥೇ ಜಪೇ ವಿನಿಯೋಗಃ ॥

ಧ್ಯಾನಂ

ಸಮಂ ಚತುರ್ಭುಜಂ ವನ್ದೇ ಕೇಯೂರ ಮಕುಟೋಜ್ವಲಮ್ ।
ವಾಸುದೇವಸ್ಯ ನಯನಂ ಶಙ್ಕರಸ್ಯ ಚ ಭೂಷಣಮ್ ॥

ಏವಂ ಧ್ಯಾತ್ವಾ ಜಪೇನ್ನಿತ್ಯಂ ಶಶಿನಃ ಕವಚಂ ಶುಭಮ್ ॥

ಅಥ ಚನ್ದ್ರ ಕವಚಮ್

ಶಶೀ ಪಾತು ಶಿರೋದೇಶಂ ಭಾಲಂ ಪಾತು ಕಲಾನಿಧಿಃ ।
ಚಕ್ಷುಷೀ ಚನ್ದ್ರಮಾಃ ಪಾತು ಶ್ರುತೀ ಪಾತು ನಿಶಾಪತಿಃ ॥ 1 ॥

ಪ್ರಾಣಂ ಕ್ಷಪಕರಃ ಪಾತು ಮುಖಂ ಕುಮುದಬಾನ್ಧವಃ ।
ಪಾತು ಕಣ್ಠಂ ಚ ಮೇ ಸೋಮಃ ಸ್ಕನ್ಧೇ ಜೈವಾತೃಕಸ್ತಥಾ ॥ 2 ॥

ಕರೌ ಸುಧಾಕರಃ ಪಾತು ವಕ್ಷಃ ಪಾತು ನಿಶಾಕರಃ ।
ಹೃದಯಂ ಪಾತು ಮೇ ಚನ್ದ್ರೋ ನಾಭಿಂ ಶಙ್ಕರಭೂಷಣಃ ॥ 3 ॥

ಮಧ್ಯಂ ಪಾತು ಸುರಶ್ರೇಷ್ಠಃ ಕಟಿಂ ಪಾತು ಸುಧಾಕರಃ ।
ಊರೂ ತಾರಾಪತಿಃ ಪಾತು ಮೃಗಾಙ್ಕೋ ಜಾನುನೀ ಸದಾ ॥ 4 ॥

ಅಬ್ಧಿಜಃ ಪಾತು ಮೇ ಜಙ್ಘೇ ಪಾತು ಪಾದೌ ವಿಧುಃ ಸದಾ ।
ಸರ್ವಾಣ್ಯನ್ಯಾನಿ ಚಾಙ್ಗಾನಿ ಪಾತು ಚನ್ದ್ರೋಖಿಲಂ ವಪುಃ ॥ 5 ॥

ಫಲಶ್ರುತಿಃ
ಏತದ್ಧಿ ಕವಚಂ ದಿವ್ಯಂ ಭುಕ್ತಿ ಮುಕ್ತಿ ಪ್ರದಾಯಕಮ್ ।
ಯಃ ಪಠೇಚ್ಛೃಣುಯಾದ್ವಾಪಿ ಸರ್ವತ್ರ ವಿಜಯೀ ಭವೇತ್ ॥ 6 ॥

॥ ಇತಿ ಶ್ರೀಚನ್ದ್ರ ಕವಚಂ ಸಮ್ಪೂರ್ಣಮ್ ॥