ಬುಧೋ ಬುಧಾರ್ಚಿತಃ ಸೌಮ್ಯಃ ಸೌಮ್ಯಚಿತ್ತಃ ಶುಭಪ್ರದಃ ।
ದೃಢವ್ರತೋ ದೃಢಫಲಃ ಶ್ರುತಿಜಾಲಪ್ರಬೋಧಕಃ ॥ 1 ॥

ಸತ್ಯವಾಸಃ ಸತ್ಯವಚಾಃ ಶ್ರೇಯಸಾಂ ಪತಿರವ್ಯಯಃ ।
ಸೋಮಜಃ ಸುಖದಃ ಶ್ರೀಮಾನ್ ಸೋಮವಂಶಪ್ರದೀಪಕಃ ॥ 2 ॥

ವೇದವಿದ್ವೇದತತ್ತ್ವಜ್ಞೋ ವೇದಾನ್ತಜ್ಞಾನಭಾಸ್ವರಃ ।
ವಿದ್ಯಾವಿಚಕ್ಷಣ ವಿಭುರ್ವಿದ್ವತ್ಪ್ರೀತಿಕರೋ ಋಜಃ ॥ 3 ॥

ವಿಶ್ವಾನುಕೂಲಸಞ್ಚಾರೋ ವಿಶೇಷವಿನಯಾನ್ವಿತಃ ।
ವಿವಿಧಾಗಮಸಾರಜ್ಞೋ ವೀರ್ಯವಾನ್ ವಿಗತಜ್ವರಃ ॥ 4 ॥

ತ್ರಿವರ್ಗಫಲದೋಽನನ್ತಃ ತ್ರಿದಶಾಧಿಪಪೂಜಿತಃ ।
ಬುದ್ಧಿಮಾನ್ ಬಹುಶಾಸ್ತ್ರಜ್ಞೋ ಬಲೀ ಬನ್ಧವಿಮೋಚಕಃ ॥ 5 ॥

ವಕ್ರಾತಿವಕ್ರಗಮನೋ ವಾಸವೋ ವಸುಧಾಧಿಪಃ ।
ಪ್ರಸನ್ನವದನೋ ವನ್ದ್ಯೋ ವರೇಣ್ಯೋ ವಾಗ್ವಿಲಕ್ಷಣಃ ॥ 6 ॥

ಸತ್ಯವಾನ್ ಸತ್ಯಸಙ್ಕಲ್ಪಃ ಸತ್ಯಬನ್ಧುಃ ಸದಾದರಃ ।
ಸರ್ವರೋಗಪ್ರಶಮನಃ ಸರ್ವಮೃತ್ಯುನಿವಾರಕಃ ॥ 7 ॥

ವಾಣಿಜ್ಯನಿಪುಣೋ ವಶ್ಯೋ ವಾತಾಙ್ಗೋ ವಾತರೋಗಹೃತ್ ।
ಸ್ಥೂಲಃ ಸ್ಥೈರ್ಯಗುಣಾಧ್ಯಕ್ಷಃ ಸ್ಥೂಲಸೂಕ್ಷ್ಮಾದಿಕಾರಣಃ ॥ 8 ॥

ಅಪ್ರಕಾಶಃ ಪ್ರಕಾಶಾತ್ಮಾ ಘನೋ ಗಗನಭೂಷಣಃ ।
ವಿಧಿಸ್ತುತ್ಯೋ ವಿಶಾಲಾಕ್ಷೋ ವಿದ್ವಜ್ಜನಮನೋಹರಃ ॥ 9 ॥

ಚಾರುಶೀಲಃ ಸ್ವಪ್ರಕಾಶಃ ಚಪಲಶ್ಚ ಜಿತೇನ್ದ್ರಿಯಃ ।
ಉದಙ್ಮುಖೋ ಮಖಾಸಕ್ತೋ ಮಗಧಾಧಿಪತಿರ್ಹರಃ ॥ 10 ॥

ಸೌಮ್ಯವತ್ಸರಸಞ್ಜಾತಃ ಸೋಮಪ್ರಿಯಕರಃ ಸುಖೀ ।
ಸಿಂಹಾಧಿರೂಢಃ ಸರ್ವಜ್ಞಃ ಶಿಖಿವರ್ಣಃ ಶಿವಙ್ಕರಃ ॥ 11 ॥

ಪೀತಾಮ್ಬರೋ ಪೀತವಪುಃ ಪೀತಚ್ಛತ್ರಧ್ವಜಾಙ್ಕಿತಃ ।
ಖಡ್ಗಚರ್ಮಧರಃ ಕಾರ್ಯಕರ್ತಾ ಕಲುಷಹಾರಕಃ ॥ 12 ॥

ಆತ್ರೇಯಗೋತ್ರಜೋಽತ್ಯನ್ತವಿನಯೋ ವಿಶ್ವಪಾವನಃ ।
ಚಾಮ್ಪೇಯಪುಷ್ಪಸಙ್ಕಾಶಃ ಚಾರಣಃ ಚಾರುಭೂಷಣಃ ॥ 13 ॥

ವೀತರಾಗೋ ವೀತಭಯೋ ವಿಶುದ್ಧಕನಕಪ್ರಭಃ ।
ಬನ್ಧುಪ್ರಿಯೋ ಬನ್ಧಮುಕ್ತೋ ಬಾಣಮಣ್ಡಲಸಂಶ್ರಿತಃ ॥ 14 ॥

ಅರ್ಕೇಶಾನಪ್ರದೇಶಸ್ಥಃ ತರ್ಕಶಾಸ್ತ್ರವಿಶಾರದಃ ।
ಪ್ರಶಾನ್ತಃ ಪ್ರೀತಿಸಂಯುಕ್ತಃ ಪ್ರಿಯಕೃತ್ ಪ್ರಿಯಭಾಷಣಃ ॥ 15 ॥

ಮೇಧಾವೀ ಮಾಧವಾಸಕ್ತೋ ಮಿಥುನಾಧಿಪತಿಃ ಸುಧೀಃ ।
ಕನ್ಯಾರಾಶಿಪ್ರಿಯಃ ಕಾಮಪ್ರದೋ ಘನಫಲಾಶ್ರಯಃ ॥ 16 ॥

ಬುಧಸ್ಯೈವಂ ಪ್ರಕಾರೇಣ ನಾಮ್ನಾಮಷ್ಟೋತ್ತರಂ ಶತಮ್ ।
ಸಮ್ಪೂಜ್ಯ ವಿಧಿವತ್ಕರ್ತಾ ಸರ್ವಾನ್ಕಾಮಾನವಾಪ್ನುಯಾತ್ ॥ 17 ॥

ಇತಿ ಶ್ರೀ ಬುಧ ಅಷ್ಟೋತ್ತರಶತನಾಮ ಸ್ತೋತ್ರಮ್ ।