ಅಥ ಶಿವಕಚಮ್
ಅಸ್ಯ ಶ್ರೀ ಶಿವಕವಚ ಸ್ತೋತ್ರ ಮಹಾಮನ್ತ್ರಸ್ಯ ।
ಋಷಭ-ಯೋಗೀಶ್ವರ ಋಷಿಃ ।
ಅನುಷ್ಟುಪ್ ಛನ್ದಃ ।
ಶ್ರೀ-ಸಾಮ್ಬಸದಾಶಿವೋ ದೇವತಾ ।
ಓಂ ಬೀಜಮ್ ।
ನಮಃ ಶಕ್ತಿಃ ।
ಶಿವಾಯೇತಿ ಕೀಲಕಮ್ ।
ಸಾಮ್ಬಸದಾಶಿವಪ್ರೀತ್ಯರ್ಥೇ ಜಪೇ ವಿನಿಯೋಗಃ ॥

ಕರನ್ಯಾಸಃ
ಓಂ ಸದಾಶಿವಾಯ ಅಙ್ಗುಷ್ಠಾಭ್ಯಾಂ ನಮಃ ।
ನಂ ಗಙ್ಗಾಧರಾಯ ತರ್ಜನೀಭ್ಯಾಂ ನಮಃ ।
ಮಂ ಮೃತ್ಯುಞ್ಜಯಾಯ ಮಧ್ಯಮಾಭ್ಯಾಂ ನಮಃ ।
ಶಿಂ ಶೂಲಪಾಣಯೇ ಅನಾಮಿಕಾಭ್ಯಾಂ ನಮಃ ।
ವಾಂ ಪಿನಾಕಪಾಣಯೇ ಕನಿಷ್ಠಿಕಾಭ್ಯಾಂ ನಮಃ ।
ಯಂ ಉಮಾಪತಯೇ ಕರತಲಕರಪೃಷ್ಠಾಭ್ಯಾಂ ನಮಃ ।

ಹೃದಯಾದಿ ಅಙ್ಗನ್ಯಾಸಃ
ಓಂ ಸದಾಶಿವಾಯ ಹೃದಯಾಯ ನಮಃ ।
ನಂ ಗಙ್ಗಾಧರಾಯ ಶಿರಸೇ ಸ್ವಾಹಾ ।
ಮಂ ಮೃತ್ಯುಞ್ಜಯಾಯ ಶಿಖಾಯೈ ವಷಟ್ ।
ಶಿಂ ಶೂಲಪಾಣಯೇ ಕವಚಾಯ ಹುಮ್ ।
ವಾಂ ಪಿನಾಕಪಾಣಯೇ ನೇತ್ರತ್ರಯಾಯ ವೌಷಟ್ ।
ಯಂ ಉಮಾಪತಯೇ ಅಸ್ತ್ರಾಯ ಫಟ್ ।
ಭೂರ್ಭುವಸ್ಸುವರೋಮಿತಿ ದಿಗ್ಬನ್ಧಃ ॥

ಧ್ಯಾನಮ್
ವಜ್ರದಂಷ್ಟ್ರಂ ತ್ರಿನಯನಂ ಕಾಲಕಣ್ಠ ಮರಿನ್ದಮಮ್ ।
ಸಹಸ್ರಕರ-ಮತ್ಯುಗ್ರಂ ವನ್ದೇ ಶಮ್ಭುಂ ಉಮಾಪತಿಮ್ ॥
ರುದ್ರಾಕ್ಷ-ಕಙ್ಕಣ-ಲಸತ್ಕರ-ದಣ್ಡಯುಗ್ಮಃ ಪಾಲಾನ್ತರಾ-ಲಸಿತ-ಭಸ್ಮಧೃತ-ತ್ರಿಪುಣ್ಡ್ರಃ ।
ಪಞ್ಚಾಕ್ಷರಂ ಪರಿಪಠನ್ ವರಮನ್ತ್ರರಾಜಂ ಧ್ಯಾಯನ್ ಸದಾ ಪಶುಪತಿಂ ಶರಣಂ ವ್ರಜೇಥಾಃ ॥

ಅತಃ ಪರಂ ಸರ್ವಪುರಾಣ-ಗುಹ್ಯಂ ನಿಃಶೇಷ-ಪಾಪೌಘಹರಂ ಪವಿತ್ರಮ್ ।
ಜಯಪ್ರದಂ ಸರ್ವ-ವಿಪತ್ಪ್ರಮೋಚನಂ ವಕ್ಷ್ಯಾಮಿ ಶೈವಂ ಕವಚಂ ಹಿತಾಯ ತೇ ॥

ಪಞ್ಚಪೂಜಾ
ಲಂ ಪೃಥಿವ್ಯಾತ್ಮನೇ ಗನ್ಧಂ ಸಮರ್ಪಯಾಮಿ ।
ಹಂ ಆಕಾಶಾತ್ಮನೇ ಪುಷ್ಪೈಃ ಪೂಜಯಾಮಿ ।
ಯಂ ವಾಯ್ವಾತ್ಮನೇ ಧೂಪಂ ಆಘ್ರಾಪಯಾಮಿ ।
ರಂ ಅಗ್ನ್ಯಾತ್ಮನೇ ದೀಪಂ ದರ್ಶಯಾಮಿ ।
ವಂ ಅಮೃತಾತ್ಮನೇ ಅಮೃತಂ ಮಹಾ-ನೈವೇದ್ಯಂ ನಿವೇದಯಾಮಿ ।
ಸಂ ಸರ್ವಾತ್ಮನೇ ಸರ್ವೋಪಚಾರ-ಪೂಜಾಂ ಸಮರ್ಪಯಾಮಿ ॥

ಮನ್ತ್ರಃ

ಋಷಭ ಉವಾಚ ।
ನಮಸ್ಕೃತ್ಯ ಮಹಾದೇವಂ ವಿಶ್ವ-ವ್ಯಾಪಿನ-ಮೀಶ್ವರಮ್ ।
ವಕ್ಷ್ಯೇ ಶಿವಮಯಂ ವರ್ಮ ಸರ್ವರಕ್ಷಾಕರಂ ನೃಣಾಮ್ ॥ 1 ॥

ಶುಚೌ ದೇಶೇ ಸಮಾಸೀನೋ ಯಥಾವತ್ಕಲ್ಪಿತಾಸನಃ ।
ಜಿತೇನ್ದ್ರಿಯೋ ಜಿತಪ್ರಾಣ-ಶ್ಚಿನ್ತಯೇಚ್ಛಿವಮವ್ಯಯಮ್ ॥ 2 ॥

ಹೃತ್ಪುಣ್ಡರೀಕಾನ್ತರಸನ್ನಿವಿಷ್ಟಂ
ಸ್ವತೇಜಸಾ ವ್ಯಾಪ್ತ-ನಭೋಽವಕಾಶಮ್ ।
ಅತೀನ್ದ್ರಿಯಂ ಸೂಕ್ಷ್ಮಮನನ್ತಮಾದ್ಯಂ
ಧ್ಯಾಯೇತ್ಪರಾನನ್ದಮಯಂ ಮಹೇಶಮ್ ॥ 3 ॥

ಧ್ಯಾನಾವಧೂತಾಖಿಲಕರ್ಮಬನ್ಧ-
-ಶ್ಚಿರಂ ಚಿದಾನನ್ದನಿಮಗ್ನಚೇತಾಃ ।
ಷಡಕ್ಷರನ್ಯಾಸಸಮಾಹಿತಾತ್ಮಾ
ಶೈವೇನ ಕುರ್ಯಾತ್ಕವಚೇನ ರಕ್ಷಾಮ್ ॥ 4 ॥

ಮಾಂ ಪಾತು ದೇವೋಽಖಿಲದೇವತಾತ್ಮಾ
ಸಂಸಾರಕೂಪೇ ಪತಿತಂ ಗಭೀರೇ ।
ತನ್ನಾಮ ದಿವ್ಯಂ ವರಮನ್ತ್ರಮೂಲಂ
ಧುನೋತು ಮೇ ಸರ್ವಮಘಂ ಹೃದಿಸ್ಥಮ್ ॥ 5 ॥

ಸರ್ವತ್ರ ಮಾಂ ರಕ್ಷತು ವಿಶ್ವಮೂರ್ತಿ-
-ರ್ಜ್ಯೋತಿ-ರ್ಮಯಾನನ್ದಘನಶ್ಚಿದಾತ್ಮಾ ।
ಅಣೋರಣೀಯಾನುರುಶಕ್ತಿರೇಕಃ
ಸ ಈಶ್ವರಃ ಪಾತು ಭಯಾದಶೇಷಾತ್ ॥ 6 ॥

ಯೋ ಭೂಸ್ವರೂಪೇಣ ಬಿಭರ್ತಿ ವಿಶ್ವಂ
ಪಾಯಾತ್ಸ ಭೂಮೇರ್ಗಿರಿಶೋಽಷ್ಟಮೂರ್ತಿಃ ।
ಯೋಽಪಾಂ ಸ್ವರೂಪೇಣ ನೃಣಾಂ ಕರೋತಿ
ಸಞ್ಜೀವನಂ ಸೋಽವತು ಮಾಂ ಜಲೇಭ್ಯಃ ॥ 7 ॥

ಕಲ್ಪಾವಸಾನೇ ಭುವನಾನಿ ದಗ್ಧ್ವಾ
ಸರ್ವಾಣಿ ಯೋ ನೃತ್ಯತಿ ಭೂರಿಲೀಲಃ ।
ಸ ಕಾಲರುದ್ರೋಽವತು ಮಾಂ ದವಾಗ್ನೇ-
-ರ್ವಾತ್ಯಾದಿಭೀತೇ-ರಖಿಲಾಚ್ಚ ತಾಪಾತ್ ॥ 8 ॥

ಪ್ರದೀಪ್ತ-ವಿದ್ಯುತ್ಕನಕಾವಭಾಸೋ
ವಿದ್ಯಾವರಾಭೀತಿ-ಕುಠಾರಪಾಣಿಃ ।
ಚತುರ್ಮುಖಸ್ತತ್ಪುರುಷಸ್ತ್ರಿನೇತ್ರಃ
ಪ್ರಾಚ್ಯಾಂ ಸ್ಥಿತೋ ರಕ್ಷತು ಮಾಮಜಸ್ರಮ್ ॥ 9 ॥

ಕುಠಾರ ಖೇಟಾಙ್ಕುಶಪಾಶಶೂಲ
ಕಪಾಲಪಾಶಾಕ್ಷ ಗುಣಾನ್ದಧಾನಃ ।
ಚತುರ್ಮುಖೋ ನೀಲ-ರುಚಿಸ್ತ್ರಿನೇತ್ರಃ
ಪಾಯಾದಘೋರೋ ದಿಶಿ ದಕ್ಷಿಣಸ್ಯಾಮ್ ॥ 10 ॥

ಕುನ್ದೇನ್ದು-ಶಙ್ಖ-ಸ್ಫಟಿಕಾವಭಾಸೋ
ವೇದಾಕ್ಷಮಾಲಾ-ವರದಾಭಯಾಙ್ಕಃ ।
ತ್ರ್ಯಕ್ಷಶ್ಚತುರ್ವಕ್ತ್ರ ಉರುಪ್ರಭಾವಃ
ಸದ್ಯೋಽಧಿಜಾತೋಽವತು ಮಾಂ ಪ್ರತೀಚ್ಯಾಮ್ ॥ 11 ॥

ವರಾಕ್ಷ-ಮಾಲಾಭಯಟಙ್ಕ-ಹಸ್ತಃ
ಸರೋಜ-ಕಿಞ್ಜಲ್ಕಸಮಾನವರ್ಣಃ ।
ತ್ರಿಲೋಚನ-ಶ್ಚಾರುಚತುರ್ಮುಖೋ ಮಾಂ
ಪಾಯಾದುದೀಚ್ಯಾಂ ದಿಶಿ ವಾಮದೇವಃ ॥ 12 ॥

ವೇದಾಭಯೇಷ್ಟಾಙ್ಕುಶಟಙ್ಕಪಾಶ-
-ಕಪಾಲಢಕ್ಕಾಕ್ಷರ-ಶೂಲಪಾಣಿಃ ।
ಸಿತದ್ಯುತಿಃ ಪಞ್ಚಮುಖೋಽವತಾನ್ಮಾ-
-ಮೀಶಾನ ಊರ್ಧ್ವಂ ಪರಮಪ್ರಕಾಶಃ ॥ 13 ॥

ಮೂರ್ಧಾನಮವ್ಯಾನ್ಮಮ ಚನ್ದ್ರಮೌಳಿಃ
ಫಾಲಂ ಮಮಾವ್ಯಾದಥ ಫಾಲನೇತ್ರಃ ।
ನೇತ್ರೇ ಮಮಾವ್ಯಾದ್ಭಗನೇತ್ರಹಾರೀ
ನಾಸಾಂ ಸದಾ ರಕ್ಷತು ವಿಶ್ವನಾಥಃ ॥ 14 ॥

ಪಾಯಾಚ್ಛ್ರುತೀ ಮೇ ಶ್ರುತಿಗೀತಕೀರ್ತಿಃ
ಕಪೋಲಮವ್ಯಾತ್ಸತತಂ ಕಪಾಲೀ ।
ವಕ್ತ್ರಂ ಸದಾ ರಕ್ಷತು ಪಞ್ಚವಕ್ತ್ರೋ
ಜಿಹ್ವಾಂ ಸದಾ ರಕ್ಷತು ವೇದಜಿಹ್ವಃ ॥ 15 ॥

ಕಣ್ಠಂ ಗಿರೀಶೋಽವತು ನೀಲಕಣ್ಠಃ
ಪಾಣಿದ್ವಯಂ ಪಾತು ಪಿನಾಕಪಾಣಿಃ ।
ದೋರ್ಮೂಲಮವ್ಯಾನ್ಮಮ ಧರ್ಮಬಾಹುಃ
ವಕ್ಷಃಸ್ಥಲಂ ದಕ್ಷಮಖಾನ್ತಕೋಽವ್ಯಾತ್ ॥ 16 ॥

ಮಮೋದರಂ ಪಾತು ಗಿರೀನ್ದ್ರಧನ್ವಾ
ಮಧ್ಯಂ ಮಮಾವ್ಯಾನ್ಮದನಾನ್ತಕಾರೀ ।
ಹೇರಮ್ಬತಾತೋ ಮಮ ಪಾತು ನಾಭಿಂ
ಪಾಯಾತ್ಕಟಿಂ ಧೂರ್ಜಟಿರೀಶ್ವರೋ ಮೇ ॥ 17 ॥
[ಸ್ಮರಾರಿ-ರವ್ಯಾನ್ಮಮ ಗುಹ್ಯದೇಶಮ್
ಪೃಷ್ಟಂ ಸದಾ ರಕ್ಷತು ಪಾರ್ವತೀಶಃ ।]

ಊರುದ್ವಯಂ ಪಾತು ಕುಬೇರಮಿತ್ರೋ
ಜಾನುದ್ವಯಂ ಮೇ ಜಗದೀಶ್ವರೋಽವ್ಯಾತ್ ।
ಜಙ್ಘಾಯುಗಂ ಪುಙ್ಗವಕೇತುರವ್ಯಾ-
-ತ್ಪಾದೌ ಮಮಾವ್ಯಾತ್ಸುರವನ್ದ್ಯಪಾದಃ ॥ 18 ॥

ಮಹೇಶ್ವರಃ ಪಾತು ದಿನಾದಿಯಾಮೇ
ಮಾಂ ಮಧ್ಯಯಾಮೇಽವತು ವಾಮದೇವಃ ।
ತ್ರಿಲೋಚನಃ ಪಾತು ತೃತೀಯಯಾಮೇ
ವೃಷಧ್ವಜಃ ಪಾತು ದಿನಾನ್ತ್ಯಯಾಮೇ ॥ 19 ॥

ಪಾಯಾನ್ನಿಶಾದೌ ಶಶಿಶೇಖರೋ ಮಾಂ
ಗಙ್ಗಾಧರೋ ರಕ್ಷತು ಮಾಂ ನಿಶೀಥೇ ।
ಗೌರೀಪತಿಃ ಪಾತು ನಿಶಾವಸಾನೇ
ಮೃತ್ಯುಞ್ಜಯೋ ರಕ್ಷತು ಸರ್ವಕಾಲಮ್ ॥ 20 ॥

ಅನ್ತಃಸ್ಥಿತಂ ರಕ್ಷತು ಶಙ್ಕರೋ ಮಾಂ
ಸ್ಥಾಣುಃ ಸದಾ ಪಾತು ಬಹಿಃಸ್ಥಿತಂ ಮಾಮ್ ।
ತದನ್ತರೇ ಪಾತು ಪತಿಃ ಪಶೂನಾಂ
ಸದಾಶಿವೋ ರಕ್ಷತು ಮಾಂ ಸಮನ್ತಾತ್ ॥ 21 ॥

ತಿಷ್ಠನ್ತ-ಮವ್ಯಾದ್ಭುವನೈಕನಾಥಃ
ಪಾಯಾದ್ವ್ರಜನ್ತಂ ಪ್ರಮಥಾಧಿನಾಥಃ ।
ವೇದಾನ್ತವೇದ್ಯೋಽವತು ಮಾಂ ನಿಷಣ್ಣಂ
ಮಾಮವ್ಯಯಃ ಪಾತು ಶಿವಃ ಶಯಾನಮ್ ॥ 22 ॥

ಮಾರ್ಗೇಷು ಮಾಂ ರಕ್ಷತು ನೀಲಕಣ್ಠಃ
ಶೈಲಾದಿ-ದುರ್ಗೇಷು ಪುರತ್ರಯಾರಿಃ ।
ಅರಣ್ಯವಾಸಾದಿ-ಮಹಾಪ್ರವಾಸೇ
ಪಾಯಾನ್ಮೃಗವ್ಯಾಧ ಉದಾರಶಕ್ತಿಃ ॥ 23 ॥

ಕಲ್ಪಾನ್ತ-ಕಾಲೋಗ್ರ-ಪಟುಪ್ರಕೋಪಃ [ಕಟೋಪ]
ಸ್ಫುಟಾಟ್ಟ-ಹಾಸೋಚ್ಚಲಿತಾಣ್ಡ-ಕೋಶಃ ।
ಘೋರಾರಿ-ಸೇನಾರ್ಣವದುರ್ನಿವಾರ-
-ಮಹಾಭಯಾದ್ರಕ್ಷತು ವೀರಭದ್ರಃ ॥ 24 ॥

ಪತ್ತ್ಯಶ್ವಮಾತಙ್ಗ-ರಥಾವರೂಧಿನೀ- [ಘಟಾವರೂಥ]
-ಸಹಸ್ರ-ಲಕ್ಷಾಯುತ-ಕೋಟಿಭೀಷಣಮ್ ।
ಅಕ್ಷೌಹಿಣೀನಾಂ ಶತಮಾತತಾಯಿನಾಂ
ಛಿನ್ದ್ಯಾನ್ಮೃಡೋ ಘೋರಕುಠಾರಧಾರಯಾ ॥ 25 ॥

ನಿಹನ್ತು ದಸ್ಯೂನ್ಪ್ರಳಯಾನಲಾರ್ಚಿ-
-ರ್ಜ್ವಲತ್ತ್ರಿಶೂಲಂ ತ್ರಿಪುರಾನ್ತಕಸ್ಯ ।
ಶಾರ್ದೂಲ-ಸಿಂಹರ್ಕ್ಷವೃಕಾದಿ-ಹಿಂಸ್ರಾನ್
ಸನ್ತ್ರಾಸಯತ್ವೀಶ-ಧನುಃ ಪಿನಾಕಃ ॥ 26 ॥

ದುಸ್ಸ್ವಪ್ನ ದುಶ್ಶಕುನ ದುರ್ಗತಿ ದೌರ್ಮನಸ್ಯ
ದುರ್ಭಿಕ್ಷ ದುರ್ವ್ಯಸನ ದುಸ್ಸಹ ದುರ್ಯಶಾಂಸಿ ।
ಉತ್ಪಾತ-ತಾಪ-ವಿಷಭೀತಿ-ಮಸದ್ಗ್ರಹಾರ್ತಿಂ
ವ್ಯಾಧೀಂಶ್ಚ ನಾಶಯತು ಮೇ ಜಗತಾಮಧೀಶಃ ॥ 27 ॥

ಓಂ ನಮೋ ಭಗವತೇ ಸದಾಶಿವಾಯ
ಸಕಲ-ತತ್ತ್ವಾತ್ಮಕಾಯ
ಸರ್ವ-ಮನ್ತ್ರ-ಸ್ವರೂಪಾಯ
ಸರ್ವ-ಯನ್ತ್ರಾಧಿಷ್ಠಿತಾಯ
ಸರ್ವ-ತನ್ತ್ರ-ಸ್ವರೂಪಾಯ
ಸರ್ವ-ತತ್ತ್ವ-ವಿದೂರಾಯ
ಬ್ರಹ್ಮ-ರುದ್ರಾವತಾರಿಣೇ-ನೀಲಕಣ್ಠಾಯ
ಪಾರ್ವತೀ-ಮನೋಹರಪ್ರಿಯಾಯ
ಸೋಮ-ಸೂರ್ಯಾಗ್ನಿ-ಲೋಚನಾಯ
ಭಸ್ಮೋದ್ಧೂಳಿತ-ವಿಗ್ರಹಾಯ
ಮಹಾಮಣಿ-ಮುಕುಟ-ಧಾರಣಾಯ
ಮಾಣಿಕ್ಯ-ಭೂಷಣಾಯ
ಸೃಷ್ಟಿಸ್ಥಿತಿ-ಪ್ರಳಯಕಾಲ-ರೌದ್ರಾವತಾರಾಯ
ದಕ್ಷಾಧ್ವರ-ಧ್ವಂಸಕಾಯ
ಮಹಾಕಾಲ-ಭೇದನಾಯ
ಮೂಲಧಾರೈಕ-ನಿಲಯಾಯ
ತತ್ವಾತೀತಾಯ
ಗಙ್ಗಾಧರಾಯ
ಸರ್ವ-ದೇವಾದಿ-ದೇವಾಯ
ಷಡಾಶ್ರಯಾಯ
ವೇದಾನ್ತ-ಸಾರಾಯ
ತ್ರಿವರ್ಗ-ಸಾಧನಾಯ
ಅನನ್ತಕೋಟಿ-ಬ್ರಹ್ಮಾಣ್ಡ-ನಾಯಕಾಯ
ಅನನ್ತ-ವಾಸುಕಿ-ತಕ್ಷಕ-ಕರ್ಕೋಟಕ-ಶಙ್ಖ-ಕುಲಿಕ-ಪದ್ಮ-ಮಹಾಪದ್ಮೇತಿ-ಅಷ್ಟ-ಮಹಾ-ನಾಗ-ಕುಲಭೂಷಣಾಯ
ಪ್ರಣವಸ್ವರೂಪಾಯ
ಚಿದಾಕಾಶಾಯ
ಆಕಾಶ-ದಿಕ್-ಸ್ವರೂಪಾಯ
ಗ್ರಹ-ನಕ್ಷತ್ರ-ಮಾಲಿನೇ
ಸಕಲಾಯ
ಕಳಙ್ಕ-ರಹಿತಾಯ
ಸಕಲ-ಲೋಕೈಕ-ಕರ್ತ್ರೇ
ಸಕಲ-ಲೋಕೈಕ-ಭರ್ತ್ರೇ
ಸಕಲ-ಲೋಕೈಕ-ಸಂಹರ್ತ್ರೇ
ಸಕಲ-ಲೋಕೈಕ-ಗುರವೇ
ಸಕಲ-ಲೋಕೈಕ-ಸಾಕ್ಷಿಣೇ
ಸಕಲ-ನಿಗಮಗುಹ್ಯಾಯ
ಸಕಲ-ವೇದಾನ್ತ-ಪಾರಗಾಯ
ಸಕಲ-ಲೋಕೈಕ-ವರಪ್ರದಾಯ
ಸಕಲ-ಲೋಕೈಕ-ಶಙ್ಕರಾಯ
ಸಕಲ-ದುರಿತಾರ್ತಿ-ಭಞ್ಜನಾಯ
ಸಕಲ-ಜಗದಭಯಙ್ಕರಾಯ
ಶಶಾಙ್ಕ-ಶೇಖರಾಯ
ಶಾಶ್ವತ-ನಿಜಾವಾಸಾಯ
ನಿರಾಕಾರಾಯ
ನಿರಾಭಾಸಾಯ
ನಿರಾಮಯಾಯ
ನಿರ್ಮಲಾಯ
ನಿರ್ಲೋಭಾಯ
ನಿರ್ಮದಾಯ
ನಿಶ್ಚಿನ್ತಾಯ
ನಿರಹಙ್ಕಾರಾಯ
ನಿರಙ್ಕುಶಾಯ
ನಿಷ್ಕಳಙ್ಕಾಯ
ನಿರ್ಗುಣಾಯ
ನಿಷ್ಕಾಮಾಯ
ನಿರೂಪಪ್ಲವಾಯ
ನಿರವಧ್ಯಾಯ
ನಿರನ್ತರಾಯ
ನಿರುಪದ್ರವಾಯ
ನಿರವದ್ಯಾಯ
ನಿರನ್ತರಾಯ
ನಿಷ್ಕಾರಣಾಯ
ನಿರಾತಙ್ಕಾಯ
ನಿಷ್ಪ್ರಪಞ್ಚಾಯ
ನಿಸ್ಸಙ್ಗಾಯ
ನಿರ್ದ್ವನ್ದ್ವಾಯ
ನಿರಾಧಾರಾಯ
ನೀರಾಗಾಯ
ನಿಶ್ಕ್ರೋಧಯ
ನಿರ್ಲೋಭಯ
ನಿಷ್ಪಾಪಾಯ
ನಿರ್ವಿಕಲ್ಪಾಯ
ನಿರ್ಭೇದಾಯ
ನಿಷ್ಕ್ರಿಯಾಯ
ನಿಸ್ತುಲಾಯ
ನಿಶ್ಶಂಶಯಾಯ
ನಿರಞ್ಜನಾಯ
ನಿರುಪಮ-ವಿಭವಾಯ
ನಿತ್ಯ-ಶುದ್ಧ-ಬುದ್ಧ-ಮುಕ್ತ-ಪರಿಪೂರ್ಣ-ಸಚ್ಚಿದಾನನ್ದಾದ್ವಯಾಯ
ಪರಮ-ಶಾನ್ತ-ಸ್ವರೂಪಾಯ
ಪರಮ-ಶಾನ್ತ-ಪ್ರಕಾಶಾಯ
ತೇಜೋರೂಪಾಯ
ತೇಜೋಮಯಾಯ
ತೇಜೋಽಧಿಪತಯೇ
ಜಯ ಜಯ ರುದ್ರ ಮಹಾರುದ್ರ
ಮಹಾ-ರೌದ್ರ
ಭದ್ರಾವತಾರ
ಮಹಾ-ಭೈರವ
ಕಾಲ-ಭೈರವ
ಕಲ್ಪಾನ್ತ-ಭೈರವ
ಕಪಾಲ-ಮಾಲಾಧರ
ಖಟ್ವಾಙ್ಗ-ಚರ್ಮ-ಖಡ್ಗ-ಧರ
ಪಾಶಾಙ್ಕುಶ-ಡಮರೂಶೂಲ-ಚಾಪ-ಬಾಣ-ಗದಾ-ಶಕ್ತಿ-ಭಿನ್ದಿ-
ಪಾಲ-ತೋಮರ-ಮುಸಲ-ಭುಶುಣ್ಡೀ-ಮುದ್ಗರ-ಪಾಶ-ಪರಿಘ-ಶತಘ್ನೀ-ಚಕ್ರಾದ್ಯಾಯುಧ-ಭೀಷಣಾಕಾರ
ಸಹಸ್ರ-ಮುಖ
ದಂಷ್ಟ್ರಾಕರಾಲ-ವದನ
ವಿಕಟಾಟ್ಟಹಾಸ
ವಿಸ್ಫಾತಿತ-ಬ್ರಹ್ಮಾಣ್ಡ-ಮಣ್ಡಲ-ನಾಗೇನ್ದ್ರಕುಣ್ಡಲ
ನಾಗೇನ್ದ್ರಹಾರ
ನಾಗೇನ್ದ್ರವಲಯ
ನಾಗೇನ್ದ್ರಚರ್ಮಧರ
ನಾಗೇನ್ದ್ರನಿಕೇತನ
ಮೃತ್ಯುಞ್ಜಯ
ತ್ರ್ಯಮ್ಬಕ
ತ್ರಿಪುರಾನ್ತಕ
ವಿಶ್ವರೂಪ
ವಿರೂಪಾಕ್ಷ
ವಿಶ್ವೇಶ್ವರ
ವೃಷಭವಾಹನ
ವಿಷವಿಭೂಷಣ
ವಿಶ್ವತೋಮುಖ
ಸರ್ವತೋಮುಖ
ಮಾಂ ರಕ್ಷ ರಕ್ಷ
ಜ್ವಲ ಜ್ವಲ
ಪ್ರಜ್ವಲ ಪ್ರಜ್ವಲ
ಮಹಾಮೃತ್ಯುಭಯಂ ಶಮಯ ಶಮಯ
ಅಪಮೃತ್ಯುಭಯಂ ನಾಶಯ ನಾಶಯ
ರೋಗಭಯಂ ಉತ್ಸಾದಯ ಉತ್ಸಾದಯ
ವಿಷಸರ್ಪಭಯಂ ಶಮಯ ಶಮಯ
ಚೋರಾನ್ ಮಾರಯ ಮಾರಯ
ಮಮ ಶತ್ರೂನ್ ಉಚ್ಚಾಟಯ ಉಚ್ಚಾಟಯ
ತ್ರಿಶೂಲೇನ ವಿದಾರಯ ವಿದಾರಯ
ಕುಠಾರೇಣ ಭಿನ್ಧಿ ಭಿನ್ಧಿ
ಖಡ್ಗೇನ ಛಿನ್ದ್ದಿ ಛಿನ್ದ್ದಿ
ಖಟ್ವಾಙ್ಗೇನ ವಿಪೋಧಯ ವಿಪೋಧಯ
ಮಮ ಪಾಪಂ ಶೋಧಯ ಶೋಧಯ
ಮುಸಲೇನ ನಿಷ್ಪೇಷಯ ನಿಷ್ಪೇಷಯ
ಬಾಣೈಃ ಸನ್ತಾಡಯ ಸನ್ತಾಡಯ
ಯಕ್ಷ ರಕ್ಷಾಂಸಿ ಭೀಷಯ ಭೀಷಯ
ಅಶೇಷ ಭೂತಾನ್ ವಿದ್ರಾವಯ ವಿದ್ರಾವಯ
ಕೂಷ್ಮಾಣ್ಡ-ಭೂತ-ಬೇತಾಳ-ಮಾರೀಗಣ-ಬ್ರಹ್ಮರಾಕ್ಷಸ-ಗಣಾನ್ ಸನ್ತ್ರಾಸಯ ಸನ್ತ್ರಾಸಯ
ಮಮ ಅಭಯಂ ಕುರು ಕುರು
[ಮಮ ಪಾಪಂ ಶೋಧಯ ಶೋಧಯ]
ನರಕ-ಮಹಾಭಯಾನ್ ಮಾಂ ಉದ್ಧರ ಉದ್ಧರ
ವಿತ್ರಸ್ತಂ ಮಾಂ ಆಶ್ವಾಸಯ ಆಶ್ವಾಸಯ
ಅಮೃತ-ಕಟಾಕ್ಷ-ವೀಕ್ಷಣೇನ ಮಾಂ ಆಲೋಕಯ ಆಲೋಕಯ
ಸಞ್ಜೀವಯ ಸಞ್ಜೀವಯ
ಕ್ಷುತ್ತೃಷ್ಣಾರ್ತಂ ಮಾಂ ಆಪ್ಯಾಯಯ ಆಪ್ಯಾಯಯ
ದುಃಖಾತುರಂ ಮಾಂ ಆನನ್ದಯ ಆನನ್ದಯ
ಶಿವಕವಚೇನ ಮಾಂ ಆಚ್ಛಾದಯ ಆಚ್ಛಾದಯ
ಹರ ಹರ
ಹರ ಹರ
ಮೃತ್ಯುಞ್ಜಯ
ತ್ರ್ಯಮ್ಬಕ
ಸದಾಶಿವ
ಪರಮಶಿವ
ನಮಸ್ತೇ ನಮಸ್ತೇ ನಮಸ್ತೇ ನಮಃ ॥

ಪೂರ್ವವತ್ - ಹೃದಯಾದಿ ನ್ಯಾಸಃ ।
ಪಞ್ಚಪೂಜಾ ॥
ಭೂರ್ಭುವಸ್ಸುವರೋಮಿತಿ ದಿಗ್ವಿಮೋಕಃ ॥

ಫಲಶ್ರುತಿಃ

ಋಷಭ ಉವಾಚ ।
ಇತ್ಯೇತತ್ಕವಚಂ ಶೈವಂ ವರದಂ ವ್ಯಾಹೃತಂ ಮಯಾ ।
ಸರ್ವ-ಬಾಧಾ-ಪ್ರಶಮನಂ ರಹಸ್ಯಂ ಸರ್ವದೇಹಿನಾಮ್ ॥ 1 ॥

ಯಃ ಸದಾ ಧಾರಯೇನ್ಮರ್ತ್ಯಃ ಶೈವಂ ಕವಚಮುತ್ತಮಮ್ ।
ನ ತಸ್ಯ ಜಾಯತೇ ಕ್ವಾಪಿ ಭಯಂ ಶಮ್ಭೋರನುಗ್ರಹಾತ್ ॥ 2 ॥

ಕ್ಷೀಣಾಯು-ರ್ಮೃತ್ಯುಮಾಪನ್ನೋ ಮಹಾರೋಗಹತೋಽಪಿ ವಾ ।
ಸದ್ಯಃ ಸುಖಮವಾಪ್ನೋತಿ ದೀರ್ಘಮಾಯುಶ್ಚ ವಿನ್ದತಿ ॥ 3 ॥

ಸರ್ವದಾರಿದ್ರ್ಯಶಮನಂ ಸೌಮಾಙ್ಗಲ್ಯ-ವಿವರ್ಧನಮ್ ।
ಯೋ ಧತ್ತೇ ಕವಚಂ ಶೈವಂ ಸ ದೇವೈರಪಿ ಪೂಜ್ಯತೇ ॥ 4 ॥

ಮಹಾಪಾತಕ-ಸಙ್ಘಾತೈರ್ಮುಚ್ಯತೇ ಚೋಪಪಾತಕೈಃ ।
ದೇಹಾನ್ತೇ ಶಿವಮಾಪ್ನೋತಿ ಶಿವ-ವರ್ಮಾನುಭಾವತಃ ॥ 5 ॥

ತ್ವಮಪಿ ಶ್ರದ್ಧಯಾ ವತ್ಸ ಶೈವಂ ಕವಚಮುತ್ತಮಮ್ ।
ಧಾರಯಸ್ವ ಮಯಾ ದತ್ತಂ ಸದ್ಯಃ ಶ್ರೇಯೋ ಹ್ಯವಾಪ್ಸ್ಯಸಿ ॥ 6 ॥

ಸೂತ ಉವಾಚ ।
ಇತ್ಯುಕ್ತ್ವಾ ಋಷಭೋ ಯೋಗೀ ತಸ್ಮೈ ಪಾರ್ಥಿವ-ಸೂನವೇ ।
ದದೌ ಶಙ್ಖಂ ಮಹಾರಾವಂ ಖಡ್ಗಂ ಚಾರಿನಿಷೂದನಮ್ ॥ 7 ॥

ಪುನಶ್ಚ ಭಸ್ಮ ಸಮ್ಮನ್ತ್ರ್ಯ ತದಙ್ಗಂ ಸರ್ವತೋಽಸ್ಪೃಶತ್ ।
ಗಜಾನಾಂ ಷಟ್ಸಹಸ್ರಸ್ಯ ದ್ವಿಗುಣಂ ಚ ಬಲಂ ದದೌ ॥ 8 ॥

ಭಸ್ಮಪ್ರಭಾವಾತ್ಸಮ್ಪ್ರಾಪ್ಯ ಬಲೈಶ್ವರ್ಯಧೃತಿಸ್ಮೃತಿಃ ।
ಸ ರಾಜಪುತ್ರಃ ಶುಶುಭೇ ಶರದರ್ಕ ಇವ ಶ್ರಿಯಾ ॥ 9 ॥

ತಮಾಹ ಪ್ರಾಞ್ಜಲಿಂ ಭೂಯಃ ಸ ಯೋಗೀ ರಾಜನನ್ದನಮ್ ।
ಏಷ ಖಡ್ಗೋ ಮಯಾ ದತ್ತಸ್ತಪೋಮನ್ತ್ರಾನುಭಾವತಃ ॥ 10 ॥

ಶಿತಧಾರಮಿಮಂ ಖಡ್ಗಂ ಯಸ್ಮೈ ದರ್ಶಯಸಿ ಸ್ಫುಟಮ್ ।
ಸ ಸದ್ಯೋ ಮ್ರಿಯತೇ ಶತ್ರುಃ ಸಾಕ್ಷಾನ್ಮೃತ್ಯುರಪಿ ಸ್ವಯಮ್ ॥ 11 ॥

ಅಸ್ಯ ಶಙ್ಖಸ್ಯ ನಿಹ್ರಾದಂ ಯೇ ಶೃಣ್ವನ್ತಿ ತವಾಹಿತಾಃ ।
ತೇ ಮೂರ್ಛಿತಾಃ ಪತಿಷ್ಯನ್ತಿ ನ್ಯಸ್ತಶಸ್ತ್ರಾ ವಿಚೇತನಾಃ ॥ 12 ॥

ಖಡ್ಗಶಙ್ಖಾವಿಮೌ ದಿವ್ಯೌ ಪರಸೈನ್ಯವಿನಾಶಿನೌ ।
ಆತ್ಮಸೈನ್ಯಸ್ವಪಕ್ಷಾಣಾಂ ಶೌರ್ಯತೇಜೋವಿವರ್ಧನೌ ॥ 13 ॥

ಏತಯೋಶ್ಚ ಪ್ರಭಾವೇನ ಶೈವೇನ ಕವಚೇನ ಚ ।
ದ್ವಿಷಟ್ಸಹಸ್ರನಾಗಾನಾಂ ಬಲೇನ ಮಹತಾಪಿ ಚ ॥ 14 ॥

ಭಸ್ಮಧಾರಣಸಾಮರ್ಥ್ಯಾಚ್ಛತ್ರುಸೈನ್ಯಂ ವಿಜೇಷ್ಯಸಿ ।
ಪ್ರಾಪ್ಯ ಸಿಂಹಾಸನಂ ಪೈತ್ರ್ಯಂ ಗೋಪ್ತಾಸಿ ಪೃಥಿವೀಮಿಮಾಮ್ ॥ 15 ॥

ಇತಿ ಭದ್ರಾಯುಷಂ ಸಮ್ಯಗನುಶಾಸ್ಯ ಸಮಾತೃಕಮ್ ।
ತಾಭ್ಯಾಂ ಸಮ್ಪೂಜಿತಃ ಸೋಽಥ ಯೋಗೀ ಸ್ವೈರಗತಿರ್ಯಯೌ ॥ 16 ॥

ಇತಿ ಶ್ರೀಸ್ಕಾನ್ದಮಹಾಪುರಾಣೇ ಬ್ರಹ್ಮೋತ್ತರಖಣ್ಡೇ ಶಿವಕವಚ ಪ್ರಭಾವ ವರ್ಣನಂ ನಾಮ ದ್ವಾದಶೋಽಧ್ಯಾಯಃ ಸಮ್ಪೂರ್ಣಃ ॥