ಭಾಸ್ವಾನ್ ಕಾಶ್ಯಪಗೋತ್ರಜೋಽರುಣರುಚಿರ್ಯಃ ಸಿಂಹಪೋಽರ್ಕಃ ಸಮಿ-
-ತ್ಷಟ್ತ್ರಿಸ್ಥೋಽದಶಶೋಭನೋ ಗುರುಶಶೀ ಭೌಮಾಃ ಸುಮಿತ್ರಾಃ ಸದಾ ।
ಶುಕ್ರೋ ಮನ್ದರಿಪುಃ ಕಳಿಙ್ಗಜನಪಶ್ಚಾಗ್ನೀಶ್ವರೌ ದೇವತೇ
ಮಧ್ಯೇವರ್ತುಲಪೂರ್ವದಿಗ್ದಿನಕರಃ ಕುರ್ಯಾತ್ಸದಾ ಮಙ್ಗಳಮ್ ॥ 1 ॥

ಚನ್ದ್ರಃ ಕರ್ಕಟಕಪ್ರಭುಃ ಸಿತನಿಭಶ್ಚಾತ್ರೇಯಗೋತ್ರೋದ್ಭವ-
-ಶ್ಚಾತ್ರೇಯಶ್ಚತುರಶ್ರವಾರುಣಮುಖಶ್ಚಾಪೇ ಉಮಾಧೀಶ್ವರಃ ।
ಷಟ್ಸಪ್ತಾಗ್ನಿ ದಶೈಕಶೋಭನಫಲೋ ನೋರಿರ್ಬುಧಾರ್ಕೌಪ್ರಿಯೌ
ಸ್ವಾಮೀ ಯಾಮುನಜಶ್ಚ ಪರ್ಣಸಮಿಧಃ ಕುರ್ಯಾತ್ಸದಾ ಮಙ್ಗಳಮ್ ॥ 2 ॥

ಭೌಮೋ ದಕ್ಷಿಣದಿಕ್ತ್ರಿಕೋಣಯಮದಿಗ್ವಿನ್ಧ್ಯೇಶ್ವರಃ ಖಾದಿರಃ
ಸ್ವಾಮೀ ವೃಶ್ಚಿಕಮೇಷಯೋಸ್ತು ಸುಗುರುಶ್ಚಾರ್ಕಃ ಶಶೀ ಸೌಹೃದಃ ।
ಜ್ಞೋಽರಿಃ ಷಟ್ತ್ರಿಫಲಪ್ರದಶ್ಚ ವಸುಧಾಸ್ಕನ್ದೌ ಕ್ರಮಾದ್ದೇವತೇ
ಭಾರದ್ವಾಜಕುಲೋದ್ವಹೋಽರುಣರುಚಿಃ ಕುರ್ಯಾತ್ಸದಾ ಮಙ್ಗಳಮ್ ॥ 3 ॥

ಸೌಮ್ಯಃ ಪೀತ ಉದಙ್ಮುಖಃ ಸಮಿದಪಾಮಾರ್ಗೋಽತ್ರಿಗೋತ್ರೋದ್ಭವೋ
ಬಾಣೇಶಾನದಿಶಃ ಸುಹೃದ್ರವಿಸುತಃ ಶಾನ್ತಃ ಸುತಃ ಶೀತಗೋಃ ।
ಕನ್ಯಾಯುಗ್ಮಪತಿರ್ದಶಾಷ್ಟಚತುರಃ ಷಣ್ಣೇತ್ರಗಃ ಶೋಭನೋ
ವಿಷ್ಣುರ್ದೇವ್ಯಧಿದೇವತೇ ಮಗಧಪಃ ಕುರ್ಯಾತ್ಸದಾ ಮಙ್ಗಳಮ್ ॥ 4 ॥

ಜೀವಶ್ಚಾಙ್ಗಿರಗೋತ್ರಜೋತ್ತರಮುಖೋ ದೀರ್ಘೋತ್ತರಾಶಾಸ್ಥಿತಃ
ಪೀತೋಽಶ್ವತ್ಥಸಮಿಚ್ಚ ಸಿನ್ಧುಜನಿತಶ್ಚಾಪೋಽಥ ಮೀನಾಧಿಪಃ ।
ಸೂರ್ಯೇನ್ದುಕ್ಷಿತಿಜಾಃ ಪ್ರಿಯಾ ಬುಧಸಿತೌ ಶತ್ರೂ ಸಮಾಶ್ಚಾಪರೇ
ಸಪ್ತದ್ವೇ ನವಪಞ್ಚಮೇ ಶುಭಕರಃ ಕುರ್ಯಾತ್ಸದಾ ಮಙ್ಗಳಮ್ ॥ 5 ॥

ಶುಕ್ರೋ ಭಾರ್ಗವಗೋತ್ರಜಃ ಸಿತರುಚಿಃ ಪೂರ್ವಾಮುಖಃ ಪೂರ್ವದಿಕ್
ಪಾಞ್ಚಾಲಸ್ಥ ವೃಷಸ್ತುಲಾಧಿಪಮಹಾರಾಷ್ಟ್ರಾಧಿಪೌದುಮ್ಬರಃ ।
ಇನ್ದ್ರಾಣೀಮಘವಾ ಬುಧಶ್ಚ ರವಿಜೋ ಮಿತ್ರೋರ್ಕ ಚನ್ದ್ರಾವರೀ
ಷಷ್ಠತ್ರಿರ್ದಶವರ್ಜಿತೇ ಭೃಗುಸುತಃ ಕುರ್ಯಾತ್ಸದಾ ಮಙ್ಗಳಮ್ ॥ 6 ॥

ಮನ್ದಃ ಕೃಷ್ಣನಿಭಃ ಸಪಶ್ಚಿಮಮುಖಃ ಸೌರಾಷ್ಟ್ರಪಃ ಕಾಶ್ಯಪಃ
ಸ್ವಾಮೀ ನಕ್ರಸುಕುಮ್ಭಯೋರ್ಬುಧಸಿತೌ ಮಿತ್ರೌ ಕುಜೇನ್ದೂ ದ್ವಿಷೌ ।
ಸ್ಥಾನಂ ಪಶ್ಚಿಮದಿಕ್ ಪ್ರಜಾಪತಿಯಮೌ ದೇವೌ ಧನುರ್ಧಾರಕಃ
ಷಟ್ತ್ರಿಸ್ಥಃ ಶುಭಕೃಚ್ಛನೀ ರವಿಸುತಃ ಕುರ್ಯಾತ್ಸದಾ ಮಙ್ಗಳಮ್ ॥ 7 ॥

ರಾಹುಃ ಸಿಂಹಳದೇಶಪೋಽಪಿ ಸತಮಃ ಕೃಷ್ಣಾಙ್ಗಶೂರ್ಪಾಸನೋ
ಯಃ ಪೈಠೀನಸಗೋತ್ರಸಮ್ಭವಸಮಿದ್ದೂರ್ವಾಮುಖೋ ದಕ್ಷಿಣಃ ।
ಯಃ ಸರ್ಪಃ ಪಶುದೈವತೋಽಖಿಲಗತಃ ಸೂರ್ಯಗ್ರಹೇ ಛಾದಕಃ
ಷಟ್ತ್ರಿಸ್ಥಃ ಶುಭಕೃಚ್ಚ ಸಿಂಹಕಸುತಃ ಕುರ್ಯಾತ್ಸದಾ ಮಙ್ಗಳಮ್ ॥ 8 ॥

ಕೇತುರ್ಜೈಮಿನಿಗೋತ್ರಜಃ ಕುಶಸಮಿದ್ವಾಯವ್ಯಕೋಣೇಸ್ಥಿತ-
-ಶ್ಚಿತ್ರಾಙ್ಕಧ್ವಜಲಾಞ್ಛನೋ ಹಿ ಭಗವಾನ್ ಯೋ ದಕ್ಷಿಣಾಶಾಮುಖಃ ।
ಬ್ರಹ್ಮಾ ಚೈವ ತು ಚಿತ್ರಗುಪ್ತಪತಿಮಾನ್ ಪ್ರೀತ್ಯಾಧಿದೇವಃ ಸದಾ
ಷಟ್ತ್ರಿಸ್ಥಃ ಶುಭಕೃಚ್ಚ ಬರ್ಬರಪತಿಃ ಕುರ್ಯಾತ್ಸದಾ ಮಙ್ಗಳಮ್ ॥ 9 ॥

ಇತಿ ನವಗ್ರಹ ಮಙ್ಗಳ ಸ್ತೋತ್ರಮ್ ।