॥ ಮೂಲಮನ್ತ್ರಮ್ ॥
॥ ಓಂ ಹ್ರೀಂ ಶ್ರೀಂ ಕ್ಲೀಂ ಗ್ಲೌಂ ಗಂ ಗಣಪತಯೇ ವರವರದ
ಸರ್ವಜನಂ ಮೇ ವಶಮಾನಯ ಸ್ವಾಹಾ ॥

॥ ಅಥ ಸ್ತೋತ್ರಮ್॥
ಓಂ ಇತ್ಯೇತದಜಸ್ಯ ಕಣ್ಠವಿವರಂ ಭಿತ್ವಾ ಬಹಿರ್ನಿರ್ಗತಂ
ಹ್ಯೋಮಿತ್ಯೇವ ಸಮಸ್ತಕರ್ಮ ಋಷಿಭಿಃ ಪ್ರಾರಭ್ಯತೇ ಮಾನುಷೈಃ ।
ಓಮಿತ್ಯೇವ ಸದಾ ಜಪನ್ತಿ ಯತಯಃ ಸ್ವಾತಮೈಕನಿಷ್ಠಾಃ ಪರಂ
ಹ್ಯೋಙ್ಕಾರಾಕೃತಿವಕ್ತ್ರಮಿನ್ದುನಿಟಿಲಂ ವಿಘ್ನೇಶ್ವರಂ ಭವಾಯೇ ॥ 1॥

ಶ್ರೀಮ್ಬೀಜಂ ಶ್ರಮದುಃಖಜನ್ಮಮರಣವ್ಯಾಧ್ಯಾಧಿಭೀನಾಶಕಂ
ಮೃತ್ಯುಕ್ರೋಧನಶಾನ್ತಿಬಿನ್ದುವಿಲಸದ್ವರ್ಣಾಕೃತಿಶ್ರೀಪ್ರದಮ್ ।
ಸ್ವಾನ್ತಃಸ್ವಾತ್ಮಶರಸ್ಯ ಲಕ್ಷ್ಯಮಜರಸ್ವಾತ್ಮಾವಬೋಧಪ್ರದಂ
ಶ್ರೀಶ್ರೀನಾಯಕಸೇವಿತೇ ಭವದನಪ್ರೇಮಾಸ್ಪದಂ ಭಾವಯೇ ॥ 2॥

ಹ್ರೀಮ್ಬೀಜಂ ಹೃದಯತ್ರಿಕೋಣವಿಲಸನ್ಮಧ್ಯಾಸನಸ್ಥಂ ಸದಾ
ಚಾಕಾಶಾನಲವಾಮಲೋಚನನಿಶಾನಾಥಾರ್ಧವರ್ಣಾತ್ಮಕಮ್ ।
ಮಾಯಾಕಾರ್ಯಜಗತ್ಪ್ರಕಾಶಕಮುಮಾರೂಪಂ ಸ್ವಶಕ್ತಿಪ್ರದಂ
ಮಾಯಾತೀತಪದಪ್ರದಂ ಹೃದಿ ಭಜೇ ಲೋಕೇಶ್ವರಾರಾಧಿತಮ್ ॥ 3॥

ಕ್ಲೀಮ್ಬೀಜಂ ಕಲಿಧಾತುವತ್ಕಲಯತಾಂ ಸರ್ವೇಷ್ಟದಂ ದೇಹಿನಾಂ
ಧಾತೃಕ್ಷ್ಮಾಯುತಶಾನ್ತಿಬಿನ್ದುವಿಲಸದ್ವರ್ಣಾತ್ಮಕಂ ಕಾಮದಮ್ ।
ಶ್ರೀಕೃಷ್ಣಪ್ರಿಯಮಿನ್ದಿರಾಸುತಮನಃಪ್ರೀತ್ಯೇಕಹೇತುಂ ಪರಂ
ಹೃತ್ಪದ್ಮೇ ಕಲಯೇ ಸದಾ ಕಲಿಹರಂ ಕಾಲಾರಿಪುತ್ರಪ್ರಿಯಮ್ ॥ 4॥

ಗ್ಲೌಮ್ಬೀಜಂ ಗುಣರೂಪನಿರ್ಗುಣಪರಬ್ರಹ್ಮಾದಿಶಕ್ತೇರ್ಮಹಾ-
ಹಙ್ಕಾರಾಕೃತಿದಣ್ಡಿನೀಪ್ರಿಯಮಜಶ್ರೀನಾಥರುದ್ರೇಷ್ಟದಮ್ ।
ಸರ್ವಾಕರ್ಷಿಣಿದೇವರಾಜಭುವನಾರ್ಣೇನ್ದ್ವಾತ್ಮಕಂ ಶ್ರೀಕರಂ
ಚಿತ್ತೇ ವಿಘ್ನನಿವಾರಣಾಯ ಗಿರಿಜಜಾತಪ್ರಿಯಂ ಭಾವಯೇ ॥ 5॥

ಗಙ್ಗಾಸುತಂ ಗನ್ಧಮುಖೋಪಚಾರಪ್ರಿಯಂ ಖಗಾರೋಹಣಭಾಗಿನೇಯಮ್ ।
ಗಙ್ಗಾಸುತಾದ್ಯಂ ವರಗನ್ಧತತ್ತ್ವಮೂಲಾಮ್ಬುಜಸ್ಥಂ ಹೃದಿ ಭಾವಯೇಽಹಮ್ ॥ 6॥

ಗಣಪತಯೇ ವರಗುಣನಿಧಯೇ ಸುರಗಣಪತಯೇ ನತಜನತತಯೇ ।
ಮಣಿಗಣಭೂಷಿತಚರಣಯುಗಾಶ್ರಿತಮಲಹರಣೇ ಚಣ ತೇ ನಮಃ ॥ 7॥

ವರಾಭಯೇ ಮೋದಕಮೇಕದನ್ತಂ ಕರಾಮ್ಬುಜಾತೈಃ ಸತತಂ ಧರನ್ತಮ್ ।
ವರಾಙ್ಗಚನ್ದ್ರಂ ಪರಭಕ್ತಿಸಾನ್ದ್ರೈರ್ಜನೈರ್ಭಜನ್ತಂ ಕಲಯೇ ಸದಾಽನ್ತಃ ॥ 8॥

ವರದ ನತಜನಾನಾಂ ಸನ್ತತಂ ವಕ್ರತುಣ್ಡ
ಸ್ವರಮಯನಿಜಗಾತ್ರ ಸ್ವಾತ್ಮಬೋಧೈಕಹೇತೋ ।
ಕರಲಸದಮೃತಾಮ್ಭೋಪೂರ್ಣಪತ್ರಾದ್ಯ ಮಹ್ಯಂ
ಗರಗಲಸುತ ಶೀಘ್ರಂ ದೇಹಿ ಮದ್ಬೋಧಮೀಡ್ಯಮ್ ॥ 9॥

ಸರ್ವಜನಂ ಪರಿಪಾಲಯ ಶರ್ವಜ
ಪರ್ವಸುಧಾಕರಗರ್ವಹರ ।
ಪರ್ವತನಾಥಸುತಾಸುತ ಪಾಲಯ
ಖರ್ವಂ ಮಾ ಕುರು ದೀನಮಿಮಮ್ ॥ 10 ॥

ಮೇದೋಽಸ್ಥಿಮಾಂಸರುಧಿರಾನ್ತ್ರಮಯೇ ಶರೀರೇ
ಮೇದಿನ್ಯಬಗ್ನಿಮರುದಮ್ಬರಲಾಸ್ಯಮಾನೇ ।
ಮೇ ದಾರುಣಂ ಮದಮುಖಾಘಮುಮಾಜ ಹೃತ್ವಾ
ಮೇಧಾಹ್ವಯಾಸನವರೇ ವಸ ದನ್ತಿವಕ್ತ್ರ ॥ 11॥

ವಶಂ ಕುರು ತ್ವಂ ಶಿವಜಾತ ಮಾಂ ತೇ ವಶೀಕೃತಾಶೇಷಸಮಸ್ತಲೋಕ ।
ವಸಾರ್ಣಸಂಶೋಭಿತಮೂಲಪದ್ಮಲಸಚ್ಛ್ರಿಯಾಽಲಿಙ್ತವಾರಣಾಸ್ಯ ॥ 12॥

ಆನಯಾಶುಪದವಾರಿಜಾನ್ತಿಕಂ ಮಾಂ ನಯಾದಿಗುಣವರ್ಜಿತಂ ತವ ।
ಹಾನಿಹೀನಪದಜಾಮೃತಸ್ಯ ತೇ ಪಾನಯೋಗ್ಯಮಿಭವಕ್ತ್ರ ಮಾಂ ಕುರು ॥ 13॥

ಸ್ವಾಹಾಸ್ವರೂಪೇಣ ವಿರಾಜಸೇ ತ್ವಂ ಸುಧಾಶನಾನಾಂ ಪ್ರಿಯಕರ್ಮಣೀಡ್ಯಮ್ ।
ಸ್ವಧಾಸ್ವರೂಪೇಣ ತು ಪಿತ್ರ್ಯಕರ್ಮಣ್ಯುಮಾಸುತೇಜ್ಯಾಮಯವಿಶ್ವಮೂರ್ತೇ ॥ 14॥

ಅಷ್ಟಾವಿಂಶತಿವರ್ಣಪತ್ರಲಸಿತಂ ಹಾರಂ ಗಣೇಶಪ್ರಿಯಂ
ಕಷ್ಟಾಽನಿಷ್ಟಹರಂ ಚತುರ್ದಶಪದೈಃ ಪುಷ್ಪೈರ್ಮನೋಹಾರಕಮ್ ।
ತುಷ್ಟ್ಯಾದಿಪ್ರದಸದ್ಗುರುತ್ತಮಪದಾಮ್ಭೋಜೇ ಚಿದಾನನ್ದದಂ
ಶಿಷ್ಟೇಷ್ಟೋಽಹಮನನ್ತಸೂತ್ರಹೃದಯಾಽಽಬದ್ಧಂ ಸುಭಕ್ತ್ಯಾಽರ್ಪಯೇ ॥ 15॥

॥ ಇತಿ ಶ್ರೀಅನನ್ತಾನನ್ದಕೃತಂ ಶ್ರೀಗುರುಚಿದಾನನ್ದನಾಥಸಮರ್ಪಿತಂ
ಶ್ರೀಮಹಾಗಣಪತಿಮೂಲಮನ್ತ್ರಮಾಲಾಸ್ತೋತ್ರಮ್ ॥