ವಿನಾಯಕೋ ವಿಘ್ನರಾಜೋ ಗೌರೀಪುತ್ರೋ ಗಣೇಶ್ವರಃ ।
ಸ್ಕನ್ದಾಗ್ರಜೋಽವ್ಯಯಃ ಪೂತೋ ದಕ್ಷೋಽಧ್ಯಕ್ಷೋ ದ್ವಿಜಪ್ರಿಯಃ ॥ 1 ॥

ಅಗ್ನಿಗರ್ವಚ್ಛಿದಿನ್ದ್ರಶ್ರೀಪ್ರದೋ ವಾಣೀಪ್ರದೋಽವ್ಯಯಃ
ಸರ್ವಸಿದ್ಧಿಪ್ರದ-ಶ್ಶರ್ವತನಯಃ ಶರ್ವರೀಪ್ರಿಯಃ ॥ 2 ॥

ಸರ್ವಾತ್ಮಕಃ ಸೃಷ್ಟಿಕರ್ತಾ ದೇವೋಽನೇಕಾರ್ಚಿತಶ್ಶಿವಃ ।
ಶುದ್ಧೋ ಬುದ್ಧಿಪ್ರಿಯ-ಶ್ಶಾನ್ತೋ ಬ್ರಹ್ಮಚಾರೀ ಗಜಾನನಃ ॥ 3 ॥

ದ್ವೈಮಾತ್ರೇಯೋ ಮುನಿಸ್ತುತ್ಯೋ ಭಕ್ತವಿಘ್ನವಿನಾಶನಃ ।
ಏಕದನ್ತ-ಶ್ಚತುರ್ಬಾಹು-ಶ್ಚತುರ-ಶ್ಶಕ್ತಿಸಂಯುತಃ ॥ 4 ॥

ಲಮ್ಬೋದರ-ಶ್ಶೂರ್ಪಕರ್ಣೋ ಹರ-ರ್ಬ್ರಹ್ಮವಿದುತ್ತಮಃ ।
ಕಾಲೋ ಗ್ರಹಪತಿಃ ಕಾಮೀ ಸೋಮಸೂರ್ಯಾಗ್ನಿಲೋಚನಃ ॥ 5 ॥

ಪಾಶಾಙ್ಕುಶಧರ-ಶ್ಚಣ್ಡೋ ಗುಣಾತೀತೋ ನಿರಞ್ಜನಃ ।
ಅಕಲ್ಮಷ-ಸ್ಸ್ವಯಂಸಿದ್ಧ-ಸ್ಸಿದ್ಧಾರ್ಚಿತಪದಾಮ್ಬುಜಃ ॥ 6 ॥

ಬೀಜಪೂರಫಲಾಸಕ್ತೋ ವರದ-ಶ್ಶಾಶ್ವತಃ ಕೃತೀ ।
ವಿದ್ವತ್ ಪ್ರಿಯೋ ವೀತಭಯೋ ಗದೀ ಚಕ್ರೀಕ್ಷುಚಾಪಧೃತ್ ॥ 7 ॥

ಶ್ರೀದೋಽಜ ಉತ್ಪಲಕರಃ ಶ್ರೀಪತಿಃ ಸ್ತುತಿಹರ್ಷಿತಃ ।
ಕುಲಾದ್ರಿಭೇತ್ತಾ ಜಟಿಲಃ ಕಲಿಕಲ್ಮಷನಾಶನಃ ॥ 8 ॥

ಚನ್ದ್ರಚೂಡಾಮಣಿಃ ಕಾನ್ತಃ ಪಾಪಹಾರೀ ಸಮಾಹಿತಃ ।
ಅಶ್ರಿತ-ಶ್ರೀಕರ-ಸ್ಸೌಮ್ಯೋ ಭಕ್ತವಾಞ್ಛಿತದಾಯಕಃ ॥ 9 ॥

ಶಾನ್ತಃ ಕೈವಲ್ಯಸುಖದ-ಸ್ಸಚ್ಚಿದಾನನ್ದವಿಗ್ರಹಃ ।
ಜ್ಞಾನೀ ದಯಾಯುತೋ ದಾನ್ತೋ ಬ್ರಹ್ಮದ್ವೇಷವಿವರ್ಜಿತಃ ॥ 10 ॥

ಪ್ರಮತ್ತದೈತ್ಯಭಯದಃ ಶ್ರೀಕಣ್ಠೋ ವಿಬುಧೇಶ್ವರಃ ।
ರಮಾರ್ಚಿತೋ ನಿಧಿ-ರ್ನಾಗರಾಜಯಜ್ಞೋಪವೀತವಾನ್ ॥ 11 ॥

ಸ್ಥೂಲಕಣ್ಠಃ ಸ್ವಯಙ್ಕರ್ತಾ ಸಾಮಘೋಷಪ್ರಿಯಃ ಪರಃ ।
ಸ್ಥೂಲತುಣ್ಡೋಽಗ್ರಣೀ-ರ್ಧೀರೋ ವಾಗೀಶಃ-ಸಿದ್ಧಿದಾಯಕಃ ॥ 12 ॥

ದೂರ್ವಾಬಿಲ್ವಪ್ರಿಯೋಽವ್ಯಕ್ತಮೂರ್ತಿ-ರದ್ಭುತಮೂರ್ತಿಮಾನ್ ।
ಶೈಲೇನ್ದ್ರತನುಜೋತ್ಸಙ್ಗಖೇಲನೋತ್ಸುಕಮಾನಸಃ ॥ 13 ॥

ಸ್ವಲಾವಣ್ಯಸುಧಾಸಾರಜಿತಮನ್ಮಥವಿಗ್ರಹಃ ।
ಸಮಸ್ತಜಗದಾಧಾರೋ ಮಾಯೀ ಮೂಷಕವಾಹನಃ ॥ 14 ॥

ಹೃಷ್ಟ-ಸ್ತುಷ್ಟಃ ಪ್ರಸನ್ನಾತ್ಮಾ ಸರ್ವಸಿದ್ಧಿಪ್ರದಾಯಕಃ ।
ಅಷ್ಟೋತ್ತರಶತೇನೈವಂ ನಾಮ್ನಾಂ ವಿಘ್ನೇಶ್ವರಂ ವಿಭುಮ್ ॥ 15 ॥

ತುಷ್ಟಾವ ಶಙ್ಕರಃ ಪುತ್ರಂ ತ್ರಿಪುರಂ ಹನ್ತುಮುದ್ಯತಃ ।
ಯಃ ಪೂಜಯೇದನೇನೈವ ಭಕ್ತ್ಯಾ ಸಿದ್ಧಿವಿನಾಯಕಮ್ ॥ 16 ॥

ದೂರ್ವಾದಳೈ-ರ್ಬಿಲ್ವಪತ್ರೈಃ ಪುಷ್ಪೈರ್ವಾ ಚನ್ದನಾಕ್ಷತೈಃ ।
ಸರ್ವಾನ್ಕಾಮಾನವಾಪ್ನೋತಿ ಸರ್ವವಿಘ್ನೈಃ ಪ್ರಮುಚ್ಯತೇ ॥

ಇತಿ ವಿಘ್ನೇಶ್ವರಾಷ್ಟೋತ್ತರ ಶತನಾಮಸ್ತೋತ್ರಂ ಸಮ್ಪೂರ್ಣಮ್