ವಿಘ್ನೇಶ ವಿಘ್ನಚಯಖಣ್ಡನನಾಮಧೇಯ
ಶ್ರೀಶಙ್ಕರಾತ್ಮಜ ಸುರಾಧಿಪವನ್ದ್ಯಪಾದ ।
ದುರ್ಗಾಮಹಾವ್ರತಫಲಾಖಿಲಮಙ್ಗಳಾತ್ಮನ್
ವಿಘ್ನಂ ಮಮಾಪಹರ ಸಿದ್ಧಿವಿನಾಯಕ ತ್ವಮ್ ॥ 1 ॥
ಸತ್ಪದ್ಮರಾಗಮಣಿವರ್ಣಶರೀರಕಾನ್ತಿಃ
ಶ್ರೀಸಿದ್ಧಿಬುದ್ಧಿಪರಿಚರ್ಚಿತಕುಙ್ಕುಮಶ್ರೀಃ ।
ವಕ್ಷಃಸ್ಥಲೇ ವಲಯಿತಾತಿಮನೋಜ್ಞಶುಣ್ಡೋ
ವಿಘ್ನಂ ಮಮಾಪಹರ ಸಿದ್ಧಿವಿನಾಯಕ ತ್ವಮ್ ॥ 2 ॥
ಪಾಶಾಙ್ಕುಶಾಬ್ಜಪರಶೂಂಶ್ಚ ದಧಚ್ಚತುರ್ಭಿ-
-ರ್ದೋರ್ಭಿಶ್ಚ ಶೋಣಕುಸುಮಸ್ರಗುಮಾಙ್ಗಜಾತಃ ।
ಸಿನ್ದೂರಶೋಭಿತಲಲಾಟವಿಧುಪ್ರಕಾಶೋ
ವಿಘ್ನಂ ಮಮಾಪಹರ ಸಿದ್ಧಿವಿನಾಯಕ ತ್ವಮ್ ॥ 3 ॥
ಕಾರ್ಯೇಷು ವಿಘ್ನಚಯಭೀತವಿರಿಞ್ಚಮುಖ್ಯೈಃ
ಸಮ್ಪೂಜಿತಃ ಸುರವರೈರಪಿ ಮೋದಕಾದ್ಯೈಃ ।
ಸರ್ವೇಷು ಚ ಪ್ರಥಮಮೇವ ಸುರೇಷು ಪೂಜ್ಯೋ
ವಿಘ್ನಂ ಮಮಾಪಹರ ಸಿದ್ಧಿವಿನಾಯಕ ತ್ವಮ್ ॥ 4 ॥
ಶೀಘ್ರಾಞ್ಚನಸ್ಖಲನತುಙ್ಗರವೋರ್ಧ್ವಕಣ್ಠ-
-ಸ್ಥೂಲೇನ್ದುರುದ್ರಗಣಹಾಸಿತದೇವಸಙ್ಘಃ ।
ಶೂರ್ಪಶ್ರುತಿಶ್ಚ ಪೃಥುವರ್ತುಲತುಙ್ಗತುನ್ದೋ
ವಿಘ್ನಂ ಮಮಾಪಹರ ಸಿದ್ಧಿವಿನಾಯಕ ತ್ವಮ್ ॥ 5 ॥
ಯಜ್ಞೋಪವೀತಪದಲಮ್ಭಿತನಾಗರಾಜ
ಮಾಸಾದಿಪುಣ್ಯದದೃಶೀಕೃತೃಕ್ಷರಾಜಃ ।
ಭಕ್ತಾಭಯಪ್ರದ ದಯಾಲಯ ವಿಘ್ನರಾಜ
ವಿಘ್ನಂ ಮಮಾಪಹರ ಸಿದ್ಧಿವಿನಾಯಕ ತ್ವಮ್ ॥ 6 ॥
ಸದ್ರತ್ನಸಾರತತಿರಾಜಿತಸತ್ಕಿರೀಟಃ
ಕೌಸುಮ್ಭಚಾರುವಸನದ್ವಯ ಊರ್ಜಿತಶ್ರೀಃ ।
ಸರ್ವತ್ರಮಙ್ಗಳಕರಸ್ಮರಣಪ್ರತಾಪೋ
ವಿಘ್ನಂ ಮಮಾಪಹರ ಸಿದ್ಧಿವಿನಾಯಕ ತ್ವಮ್ ॥ 7 ॥
ದೇವಾನ್ತಕಾದ್ಯಸುರಭೀತಸುರಾರ್ತಿಹರ್ತಾ
ವಿಜ್ಞಾನಬೋಧನವರೇಣ ತಮೋಽಪಹರ್ತಾ ।
ಆನನ್ದಿತತ್ರಿಭುವನೇಶ ಕುಮಾರಬನ್ಧೋ
ವಿಘ್ನಂ ಮಮಾಪಹರ ಸಿದ್ಧಿವಿನಾಯಕ ತ್ವಮ್ ॥ 8 ॥
ಇತಿ ಶ್ರೀಮುದ್ಗಲಪುರಾಣೇ ಶ್ರೀಸಿದ್ಧಿವಿನಾಯಕ ಸ್ತೋತ್ರಂ ಸಮ್ಪೂರ್ಣಮ್ ।
