ಉಮಾಙ್ಗೋದ್ಭವಂ ದನ್ತಿವಕ್ತ್ರಂ ಗಣೇಶಂ
ಭುಜಾಕಙ್ಕಣೈಃ ಶೋಭಿನಂ ಧೂಮ್ರಕೇತುಮ್ ।
ಗಲೇ ಹಾರಮುಕ್ತಾವಲೀಶೋಭಿತಂ ತಂ
ನಮೋ ಜ್ಞಾನರೂಪಂ ಗಣೇಶಂ ನಮಸ್ತೇ ॥ 1 ॥
ಗಣೇಶಂ ವದೇತ್ತಂ ಸ್ಮರೇತ್ ಸರ್ವಕಾರ್ಯೇ
ಸ್ಮರನ್ ಸನ್ಮುಖಂ ಜ್ಞಾನದಂ ಸರ್ವಸಿದ್ಧಿಮ್ ।
ಮನಶ್ಚಿನ್ತಿತಂ ಕಾರ್ಯಮೇವೇಷು ಸಿದ್ಧ್ಯೇ-
-ನ್ನಮೋ ಬುದ್ಧಿಕಾನ್ತಂ ಗಣೇಶಂ ನಮಸ್ತೇ ॥ 2 ॥
ಮಹಾಸುನ್ದರಂ ವಕ್ತ್ರಚಿಹ್ನಂ ವಿರಾಟಂ
ಚತುರ್ಧಾಭುಜಂ ಚೈಕದನ್ತೈಕವರ್ಣಮ್ ।
ಇದಂ ದೇವರೂಪಂ ಗಣಂ ಸಿದ್ಧಿನಾಥಂ
ನಮೋ ಭಾಲಚನ್ದ್ರಂ ಗಣೇಶಂ ನಮಸ್ತೇ ॥ 3 ॥
ಸಸಿನ್ದೂರಸತ್ಕುಙ್ಕುಮೈಸ್ತುಲ್ಯವರ್ಣಃ
ಸ್ತುತೈರ್ಮೋದಕೈಃ ಪ್ರೀಯತೇ ವಿಘ್ನರಾಜಃ ।
ಮಹಾಸಙ್ಕಟಚ್ಛೇದಕಂ ಧೂಮ್ರಕೇತುಂ
ನಮೋ ಗೌರಿಪುತ್ರಂ ಗಣೇಶಂ ನಮಸ್ತೇ ॥ 4 ॥
ಯಥಾ ಪಾತಕಚ್ಛೇದಕಂ ವಿಷ್ಣುನಾಮ
ತಥಾ ಧ್ಯಾಯತಾಂ ಶಙ್ಕರಂ ಪಾಪನಾಶಃ ।
ಯಥಾ ಪೂಜಿತೇ ಷಣ್ಮುಖೇ ಶೋಕನಾಶೋ
ನಮೋ ವಿಘ್ನನಾಶಂ ಗಣೇಶಂ ನಮಸ್ತೇ ॥ 5 ॥
ಸದಾ ಸರ್ವದಾ ಧ್ಯಾಯತಾಮೇಕದನ್ತಂ
ಸುಸಿನ್ದೂರಕಂ ಪೂಜಿತಂ ರಕ್ತಪುಷ್ಪೈಃ ।
ಸದಾ ಚರ್ಚಿತಂ ಚನ್ದನೈಃ ಕುಙ್ಕುಮಾಕ್ತಂ
ನಮೋ ಜ್ಞಾನರೂಪಂ ಗಣೇಶಂ ನಮಸ್ತೇ ॥ 6 ॥
ನಮೋ ಗೌರಿಕಾಗರ್ಭಜಾಪತ್ಯ ತುಭ್ಯಂ
ನಮೋ ಜ್ಞಾನರೂಪಿನ್ನಮಃ ಸಿದ್ಧಿಕಾನ್ತ ।
ನಮೋ ಧ್ಯೇಯಪೂಜ್ಯಾಯ ಹೇ ಬುದ್ಧಿನಾಥ
ಸುರಾಸ್ತ್ವಾಂ ಭಜನ್ತೇ ಗಣೇಶಂ ನಮಸ್ತೇ ॥ 7 ॥
ಭುಜಙ್ಗಪ್ರಯಾತಂ ಪಠೇದ್ಯಸ್ತು ಭಕ್ತ್ಯಾ
ಪ್ರಭಾತೇ ಜಪೇನ್ನಿತ್ಯಮೇಕಾಗ್ರಚಿತ್ತಃ ।
ಕ್ಷಯಂ ಯಾನ್ತಿ ವಿಘ್ನಾ ದಿಶಃ ಶೋಭಯನ್ತಂ
ನಮೋ ಜ್ಞಾನರೂಪಂ ಗಣೇಶಂ ನಮಸ್ತೇ ॥ 8 ॥
ಇತಿ ಶ್ರೀಢುಣ್ಢಿರಾಜ ಭುಜಙ್ಗ ಪ್ರಯಾತ ಸ್ತೋತ್ರಮ್ ।
