అవనితలం పునరవతీర్ణా స్యాత్
సంస్కృతగఙ్గాధారా ।
ధీరభగీరథవంశోఽస్మాకం
వయం తు కృతనిర్ధారాః ॥

నిపతతు పణ్డితహరశిరసి
ప్రవహతు నిత్యమిదం వచసి
ప్రవిశతు వైయాకరణముఖం
పునరపి వహతాజ్జనమనసి
పుత్రసహస్రం సముద్ధృతం స్యాత్
యాన్తు చ జన్మవికారాః ॥ 1 ॥

గ్రామం గ్రామం గచ్ఛామ
సంస్కృతశిక్షాం యచ్ఛామ
సర్వేషామపి తృప్తిహితార్థం
స్వక్లేశం న హి గణయేమ
కృతే ప్రయత్నే కిం న లభేత
ఏవం సన్తి విచారాః ॥ 2 ॥

యా మాతా సంస్కృతిమూలా
యస్యా వ్యాప్తిస్సువిశాలా
వాఙ్మయరూపా సా భవతు
లసతు చిరం సా వాఙ్మాలా
సురవాణీం జనవాణీం కర్తుం
యతామహే కృతిశూరాః ॥ 3 ॥

రచన: డా. నారాయణభట్టః