మృదపి చ చన్దనమస్మిన్ దేశే గ్రామో గ్రామః సిద్ధవనమ్ ।
యత్ర చ బాలా దేవీస్వరూపా బాలాః సర్వే శ్రీరామాః ॥

హరిమన్దిరమిదమఖిలశరీరం
ధనశక్తీ జనసేవాయై
యత్ర చ క్రీడాయై వనరాజః
ధేనుర్మాతా పరమశివా
నిత్యం ప్రాతః శివగుణగానం
దీపనుతిః ఖలు శత్రుపరా ॥ 1 ॥

భాగ్యవిధాయి నిజార్జితకర్మ
యత్ర శ్రమః శ్రియమర్జయతి
త్యాగధనానాం తపోనిధీనాం
గాథాం గాయతి కవివాణీ
గఙ్గాజలమివ నిత్యనిర్మలం
జ్ఞానం శంసతి యతివాణీ ॥ 2 ॥

యత్ర హి నైవ స్వదేహవిమోహః
యుద్ధరతానాం వీరాణాం
యత్ర హి కృషకః కార్యరతః సన్
పశ్యతి జీవనసాఫల్యం
జీవనలక్ష్యం న హి ధనపదవీ
యత్ర చ పరశివపదసేవా ॥ 3 ॥

రచన: శ్రీ జనార్దన హేగ్డే