అనిర్వాచ్యం రూపం స్తవన నికరో యత్ర గళితః తథా వక్ష్యే స్తోత్రం ప్రథమ పురుషస్యాత్ర మహతః ।
యతో జాతం విశ్వస్థితిమపి సదా యత్ర విలయః సకీదృగ్గీర్వాణః సునిగమ నుతః శ్రీగణపతిః ॥ 1 ॥

గకారో హేరమ్బః సగుణ ఇతి పుం నిర్గుణమయో ద్విధాప్యేకోజాతః ప్రకృతి పురుషో బ్రహ్మ హి గణః ।
స చేశశ్చోత్పత్తి స్థితి లయ కరోయం ప్రమథకో యతోభూతం భవ్యం భవతి పతిరీశో గణపతిః ॥ 2 ॥

గకారః కణ్ఠోర్ధ్వం గజముఖసమో మర్త్యసదృశో ణకారః కణ్ఠాధో జఠర సదృశాకార ఇతి చ ।
అధోభావః కట్యాం చరణ ఇతి హీశోస్య చ తమః విభాతీత్థం నామ త్రిభువన సమం భూ ర్భువ స్సువః ॥ 3 ॥

గణాధ్యక్షో జ్యేష్ఠః కపిల అపరో మఙ్గళనిధిః దయాళుర్హేరమ్బో వరద ఇతి చిన్తామణి రజః ।
వరానీశో ఢుణ్ఢిర్గజవదన నామా శివసుతో మయూరేశో గౌరీతనయ ఇతి నామాని పఠతి ॥ 4 ॥

మహేశోయం విష్ణుః స కవి రవిరిన్దుః కమలజః క్షితి స్తోయం వహ్నిః శ్వసన ఇతి ఖం త్వద్రిరుదధిః ।
కుజస్తారః శుక్రో పురురుడు బుధోగుచ్చ ధనదో యమః పాశీ కావ్యః శనిరఖిల రూపో గణపతిః ॥5 ॥

ముఖం వహ్నిః పాదౌ హరిరసి విధాత ప్రజననం రవిర్నేత్రే చన్ద్రో హృదయ మపి కామోస్య మదన ।
కరౌ శుక్రః కట్యామవనిరుదరం భాతి దశనం గణేశస్యాసన్ వై క్రతుమయ వపు శ్చైవ సకలమ్ ॥ 6 ॥

సితే భాద్రే మాసే ప్రతిశరది మధ్యాహ్న సమయే మృదో మూర్తిం కృత్వా గణపతితిథౌ ఢుణ్ఢి సదృశీమ్ ।
సమర్చత్యుత్సాహః ప్రభవతి మహాన్ సర్వసదనే విలోక్యానన్దస్తాం ప్రభవతి నృణాం విస్మయ ఇతి ॥7 ॥

గణేశదేవస్య మాహాత్మ్యమేతద్యః శ్రావయేద్వాపి పఠేచ్చ తస్య ।
క్లేశా లయం యాన్తి లభేచ్చ శీఘ్రం శ్రీపుత్త్ర విద్యార్థి గృహం చ ముక్తిమ్ ॥ 8 ॥

॥ ఇతి శ్రీ గణేశ మహిమ్న స్తోత్రమ్ ॥