ఓ-మ్భ॒ద్ర-ఙ్కర్ణే॑భి-శ్శృణు॒యామ॑ దేవాః ।
భ॒ద్ర-మ్ప॑శ్యేమా॒ఖ్షభి॒ర్యజ॑త్రాః ।
స్థి॒రైరఙ్గై᳚స్తుష్ఠు॒వాగ్ం స॑స్త॒నూభిః॑ ।
వ్యశే॑మ దే॒వహి॑తం॒-యఀదాయుః॑ ।
స్వ॒స్తి న॒ ఇన్ద్రో॑ వృ॒ద్ధశ్ర॑వాః ।
స్వ॒స్తి నః॑ పూ॒షా వి॒శ్వవే॑దాః ।
స్వ॒స్తి న॒స్తార్ఖ్ష్యో॒ అరి॑ష్టనేమిః ।
స్వ॒స్తి నో॒ బృహ॒స్పతి॑ర్దధాతు ॥
ఓం శాన్తి॒-శ్శాన్తి॒-శ్శాన్తిః॑ ॥
ఓ-న్నమ॑స్తే గ॒ణప॑తయే ।
త్వమే॒వ ప్ర॒త్యఖ్ష॒-న్తత్త్వ॑మసి ।
త్వమే॒వ కే॒వల॒-ఙ్కర్తా॑-ఽసి ।
త్వమే॒వ కే॒వలం॒ హర్తా॑-ఽసి ।
త్వమే॒వ కే॒వల॒-న్ధర్తా॑-ఽసి ।
త్వమేవ సర్వ-ఙ్ఖల్విద॑-మ్బ్రహ్మా॒సి ।
త్వం సాఖ్షాదాత్మా॑-ఽసి ని॒త్యమ్ ॥ 1 ॥
ఋ॑తం-వఀ॒చ్మి । స॑త్యం-వఀ॒చ్మి ॥ 2 ॥
అ॒వ త్వ॒-మ్మామ్ । అవ॑ వ॒క్తారమ్᳚ ।
అవ॑ శ్రో॒తారమ్᳚ । అవ॑ దా॒తారమ్᳚ । అవ॑ ధా॒తారమ్᳚ ।
అవానూచానమ॑వ శి॒ష్యమ్ । అవ॑ ప॒శ్చాత్తా᳚త్ ।
అవ॑ పు॒రస్తా᳚త్ । అవోత్త॒రాత్తా᳚త్ ।
అవ॑ ద॒ఖ్షిణాత్తా᳚త్ । అవ॑ చో॒ర్ధ్వాత్తా᳚త్ ।
అవాధ॒రాత్తా᳚త్ । సర్వతో మా-మ్పాహి పాహి॑ సమ॒న్తాత్ ॥ 3 ॥
త్వం-వాఀఙ్మయ॑స్త్వ-ఞ్చిన్మ॒యః ।
త్వమానన్దమయ॑స్త్వ-మ్బ్రహ్మ॒మయః ।
త్వం సచ్చిదానన్దా-ఽద్వి॑తీయో॒-ఽసి ।
త్వ-మ్ప్ర॒త్యఖ్ష॒-మ్బ్రహ్మా॑సి ।
త్వ-ఞ్జ్ఞానమయో విజ్ఞాన॑మయో॒-ఽసి ॥ 4 ॥
సర్వ-ఞ్జగదిద-న్త్వ॑త్తో జా॒యతే ।
సర్వ-ఞ్జగదిద-న్త్వ॑త్తస్తి॒ష్ఠతి ।
సర్వ-ఞ్జగదిద-న్త్వయి లయ॑మేష్య॒తి ।
సర్వ-ఞ్జగదిద-న్త్వయి॑ ప్రత్యే॒తి ।
త్వ-మ్భూమిరాపో-ఽనలో-ఽని॑లో న॒భః ।
త్వ-ఞ్చత్వారి వా᳚క్పదా॒ని ॥ 5 ॥
త్వ-ఙ్గు॒ణత్ర॑యాతీ॒తః । త్వం అవస్థాత్ర॑యాతీ॒తః ।
త్వ-న్దే॒హత్ర॑యాతీ॒తః । త్వ-ఙ్కా॒లత్ర॑యాతీ॒తః ।
త్వ-మ్మూలాధారస్థితో॑-ఽసి ని॒త్యమ్ । త్వం శక్తిత్ర॑యాత్మ॒కః ।
త్వాం-యోఀగినో ధ్యాయ॑న్తి ని॒త్యమ్ ।
త్వ-మ్బ్రహ్మా త్వం-విఀష్ణుస్త్వం రుద్రస్త్వమిన్ద్రస్త్వమగ్నిస్త్వం-వాఀయుస్త్వం సూర్యస్త్వ-ఞ్చన్ద్రమాస్త్వ-మ్బ్రహ్మ॒ భూర్భువ॒-స్స్వరోమ్ ॥ 6 ॥
గ॒ణాదిం᳚ పూర్వ॑ముచ్చా॒ర్య॒ వ॒ర్ణాదీం᳚ స్తదన॒న్తరమ్ ।
అనుస్వారః ప॑రత॒రః । అర్ధే᳚న్దుల॒సితమ్ ।
తారే॑ణ ఋ॒ద్ధమ్ । ఏతత్తవ మను॑స్వరూ॒పమ్ ।
గకారః పూ᳚ర్వరూ॒పమ్ । అకారో మధ్య॑మరూ॒పమ్ ।
అనుస్వారశ్చా᳚న్త్యరూ॒పమ్ । బిన్దురుత్త॑రరూ॒పమ్ ।
నాద॑-స్సన్ధా॒నమ్ । సగ్ంహి॑తా స॒న్ధిః ।
సైషా గణే॑శవి॒ద్యా । గణ॑క ఋ॒షిః ।
నిచృద్గాయ॑త్రీచ్ఛ॒న్దః । శ్రీ మహాగణపతి॑ర్దేవతా ।
ఓ-ఙ్గ-ఙ్గ॒ణప॑తయే నమః ॥ 7 ॥
ఏకద॒న్తాయ॑ వి॒ద్మహే॑ వక్రతు॒ణ్డాయ॑ ధీమహి ।
తన్నో॑ దన్తిః ప్రచో॒దయా᳚త్ ॥ 8 ॥
ఏకద॒న్త-ఞ్చ॑తుర్హ॒స్త॒-మ్పా॒శమ॑ఙ్కుశ॒ధారి॑ణమ్ ।
రద॑-ఞ్చ॒ వర॑దం హ॒స్తై॒ర్బి॒భ్రాణ॑-మ్మూష॒కధ్వ॑జమ్ ।
రక్తం॑-లఀ॒మ్బోద॑రం శూ॒ర్ప॒కర్ణకం॑ రక్త॒వాస॑సమ్ ।
రక్త॑గ॒న్ధాను॑లిప్తా॒ఙ్గం॒ ర॒క్తపు॑ష్పై-స్సు॒పూజి॑తమ్ ।
భక్తా॑ను॒కమ్పి॑న-న్దే॒వ॒-ఞ్జ॒గత్కా॑రణ॒మచ్యు॑తమ్ ।
ఆవి॑ర్భూ॒త-ఞ్చ॑ సృ॒ష్ట్యా॒దౌ॒ ప్ర॒కృతేః᳚ పురు॒షాత్ప॑రమ్ ।
ఏవ॑-న్ధ్యా॒యతి॑ యో ని॒త్యం॒ స॒ యోగీ॑ యోగి॒నాం-వఀ ॑రః ॥ 9 ॥
నమో వ్రాతపతయే నమో గణపతయే నమః ప్రమథపతయే నమస్తే-ఽస్తు లమ్బోదరాయైకదన్తాయ విఘ్నవినాశినే శివసుతాయ శ్రీవరదమూర్తయే॒ నమః ॥ 10 ॥
ఏతదథర్వశీర్షం-యోఀ-ఽధీ॒తే । స బ్రహ్మభూయా॑య క॒ల్పతే ।
స సర్వవిఘ్నై᳚ర్న బా॒ధ్యతే । స సర్వత-స్సుఖ॑మేధ॒తే ।
స పఞ్చమహాపాపా᳚-త్ప్రము॒చ్యతే । సా॒యమ॑ధీయా॒నో॒ దివసకృత-మ్పాప॑-న్నాశ॒యతి ।
ప్రా॒తర॑ధీయా॒నో॒ రాత్రికృత-మ్పాప॑-న్నాశ॒యతి ।
సాయ-మ్ప్రాతః ప్ర॑యుఞ్జా॒నో॒ పాపో-ఽపా॑పో భ॒వతి ।
సర్వత్రాధీయానో-ఽపవి॑ఘ్నో భవతి । ధర్మార్థకామమోఖ్ష॑-ఞ్చ వి॒న్దతి ।
ఇదమథర్వశీర్షమశిష్యాయ॑ న దే॒యమ్ । యో యది మో॑హాద్ దా॒స్యతి స పాపీ॑యా-న్భ॒వతి ।
సహస్రావర్తనాద్యం-యఀ-ఙ్కామ॑మధీ॒తే । త-న్తమనే॑న సా॒ధయేత్ ॥ 11 ॥
అనేన గణపతిమ॑భిషి॒ఞ్చతి । స వా᳚గ్మీ భ॒వతి ।
చతుర్థ్యామన॑శ్నన్ జ॒పతి స విద్యా॑వా-న్భ॒వతి ।
ఇత్యథర్వ॑ణవా॒క్యమ్ । బ్రహ్మాద్యా॒చర॑ణం-విఀ॒ద్యాన్న బిభేతి కదా॑చనే॒తి ॥ 12 ॥
యో దూర్వాఙ్కు॑రైర్య॒జతి స వైశ్రవణోప॑మో భ॒వతి ।
యో లా॑జైర్య॒జతి స యశో॑వా-న్భ॒వతి । స మేధా॑వా-న్భ॒వతి ।
యో మోదకసహస్రే॑ణ య॒జతి స వాఞ్ఛితఫలమ॑వాప్నో॒తి ।
య-స్సాజ్య సమి॑ద్భిర్య॒జతి స సర్వం-లఀభతే స స॑ర్వం-లఀ॒భతే ॥ 13 ॥
అష్టౌ బ్రాహ్మణాన్ సమ్యగ్ గ్రా॑హయి॒త్వా సూర్యవర్చ॑స్వీ భ॒వతి ।
సూర్యగ్రహే మ॑హాన॒ద్యా-మ్ప్రతిమాసన్నిధౌ వా జ॒ప్త్వా సిద్ధమ॑న్త్రో భ॒వతి ।
మహావిఘ్నా᳚-త్ప్రము॒చ్యతే । మహాదోషా᳚-త్ప్రము॒చ్యతే ।
మహాపాపా᳚-త్ప్రము॒చ్యతే । [మహాప్రత్యవాయా᳚-త్ప్రము॒చ్యతే । ]
స సర్వ॑విద్భవతి స సర్వ॑విద్భ॒వతి ।
య ఏ॑వం-వేఀ॒ద । ఇత్యు॑ప॒నిష॑త్ ॥ 14 ॥
ఓ-మ్భ॒ద్ర-ఙ్కర్ణే॑భి-శ్శృణు॒యామ॑ దేవాః ।
భ॒ద్ర-మ్ప॑శ్యేమా॒ఖ్షభి॒ర్యజ॑త్రాః ।
స్థి॒రైరఙ్గై᳚స్తుష్ఠు॒వాగ్ం స॑స్త॒నూభిః॑ ।
వ్యశే॑మ దే॒వహి॑తం॒-యఀదాయుః॑ ।
స్వ॒స్తి న॒ ఇన్ద్రో॑ వృ॒ద్ధశ్ర॑వాః ।
స్వ॒స్తి నః॑ పూ॒షా వి॒శ్వవే॑దాః ।
స్వ॒స్తి న॒స్తార్ఖ్ష్యో॒ అరి॑ష్టనేమిః ।
స్వ॒స్తి నో॒ బృహ॒స్పతి॑ర్దధాతు ॥
ఓం శాన్తి॒-శ్శాన్తి॒-శ్శాన్తిః॑ ॥
