॥ మూలమన్త్రమ్ ॥
॥ ఓం హ్రీం శ్రీం క్లీం గ్లౌం గం గణపతయే వరవరద
సర్వజనం మే వశమానయ స్వాహా ॥

॥ అథ స్తోత్రమ్॥
ఓం ఇత్యేతదజస్య కణ్ఠవివరం భిత్వా బహిర్నిర్గతం
హ్యోమిత్యేవ సమస్తకర్మ ఋషిభిః ప్రారభ్యతే మానుషైః ।
ఓమిత్యేవ సదా జపన్తి యతయః స్వాతమైకనిష్ఠాః పరం
హ్యోఙ్కారాకృతివక్త్రమిన్దునిటిలం విఘ్నేశ్వరం భవాయే ॥ 1॥

శ్రీమ్బీజం శ్రమదుఃఖజన్మమరణవ్యాధ్యాధిభీనాశకం
మృత్యుక్రోధనశాన్తిబిన్దువిలసద్వర్ణాకృతిశ్రీప్రదమ్ ।
స్వాన్తఃస్వాత్మశరస్య లక్ష్యమజరస్వాత్మావబోధప్రదం
శ్రీశ్రీనాయకసేవితే భవదనప్రేమాస్పదం భావయే ॥ 2॥

హ్రీమ్బీజం హృదయత్రికోణవిలసన్మధ్యాసనస్థం సదా
చాకాశానలవామలోచననిశానాథార్ధవర్ణాత్మకమ్ ।
మాయాకార్యజగత్ప్రకాశకముమారూపం స్వశక్తిప్రదం
మాయాతీతపదప్రదం హృది భజే లోకేశ్వరారాధితమ్ ॥ 3॥

క్లీమ్బీజం కలిధాతువత్కలయతాం సర్వేష్టదం దేహినాం
ధాతృక్ష్మాయుతశాన్తిబిన్దువిలసద్వర్ణాత్మకం కామదమ్ ।
శ్రీకృష్ణప్రియమిన్దిరాసుతమనఃప్రీత్యేకహేతుం పరం
హృత్పద్మే కలయే సదా కలిహరం కాలారిపుత్రప్రియమ్ ॥ 4॥

గ్లౌమ్బీజం గుణరూపనిర్గుణపరబ్రహ్మాదిశక్తేర్మహా-
హఙ్కారాకృతిదణ్డినీప్రియమజశ్రీనాథరుద్రేష్టదమ్ ।
సర్వాకర్షిణిదేవరాజభువనార్ణేన్ద్వాత్మకం శ్రీకరం
చిత్తే విఘ్ననివారణాయ గిరిజజాతప్రియం భావయే ॥ 5॥

గఙ్గాసుతం గన్ధముఖోపచారప్రియం ఖగారోహణభాగినేయమ్ ।
గఙ్గాసుతాద్యం వరగన్ధతత్త్వమూలామ్బుజస్థం హృది భావయేఽహమ్ ॥ 6॥

గణపతయే వరగుణనిధయే సురగణపతయే నతజనతతయే ।
మణిగణభూషితచరణయుగాశ్రితమలహరణే చణ తే నమః ॥ 7॥

వరాభయే మోదకమేకదన్తం కరామ్బుజాతైః సతతం ధరన్తమ్ ।
వరాఙ్గచన్ద్రం పరభక్తిసాన్ద్రైర్జనైర్భజన్తం కలయే సదాఽన్తః ॥ 8॥

వరద నతజనానాం సన్తతం వక్రతుణ్డ
స్వరమయనిజగాత్ర స్వాత్మబోధైకహేతో ।
కరలసదమృతామ్భోపూర్ణపత్రాద్య మహ్యం
గరగలసుత శీఘ్రం దేహి మద్బోధమీడ్యమ్ ॥ 9॥

సర్వజనం పరిపాలయ శర్వజ
పర్వసుధాకరగర్వహర ।
పర్వతనాథసుతాసుత పాలయ
ఖర్వం మా కురు దీనమిమమ్ ॥ 10 ॥

మేదోఽస్థిమాంసరుధిరాన్త్రమయే శరీరే
మేదిన్యబగ్నిమరుదమ్బరలాస్యమానే ।
మే దారుణం మదముఖాఘముమాజ హృత్వా
మేధాహ్వయాసనవరే వస దన్తివక్త్ర ॥ 11॥

వశం కురు త్వం శివజాత మాం తే వశీకృతాశేషసమస్తలోక ।
వసార్ణసంశోభితమూలపద్మలసచ్ఛ్రియాఽలిఙ్తవారణాస్య ॥ 12॥

ఆనయాశుపదవారిజాన్తికం మాం నయాదిగుణవర్జితం తవ ।
హానిహీనపదజామృతస్య తే పానయోగ్యమిభవక్త్ర మాం కురు ॥ 13॥

స్వాహాస్వరూపేణ విరాజసే త్వం సుధాశనానాం ప్రియకర్మణీడ్యమ్ ।
స్వధాస్వరూపేణ తు పిత్ర్యకర్మణ్యుమాసుతేజ్యామయవిశ్వమూర్తే ॥ 14॥

అష్టావింశతివర్ణపత్రలసితం హారం గణేశప్రియం
కష్టాఽనిష్టహరం చతుర్దశపదైః పుష్పైర్మనోహారకమ్ ।
తుష్ట్యాదిప్రదసద్గురుత్తమపదామ్భోజే చిదానన్దదం
శిష్టేష్టోఽహమనన్తసూత్రహృదయాఽఽబద్ధం సుభక్త్యాఽర్పయే ॥ 15॥

॥ ఇతి శ్రీఅనన్తానన్దకృతం శ్రీగురుచిదానన్దనాథసమర్పితం
శ్రీమహాగణపతిమూలమన్త్రమాలాస్తోత్రమ్ ॥