బ్రహ్మవిష్ణుమహేశా ఊచుః ।
అజం నిర్వికల్పం నిరాకారమేకం
నిరానన్దమద్వైతమానన్దపూర్ణమ్ ।
పరం నిర్గుణం నిర్విశేషం నిరీహం
పరబ్రహ్మరూపం గణేశం భజేమ ॥ 1 ॥

గుణాతీతమాద్యం చిదానన్దరూపం
చిదాభాసకం సర్వగం జ్ఞానగమ్యమ్ ।
మునిధ్యేయమాకాశరూపం పరేశం
పరబ్రహ్మరూపం గణేశం భజేమ ॥ 2 ॥

జగత్కారణం కారణజ్ఞానరూపం
సురాదిం సుఖాదిం యుగాదిం గణేశమ్ ।
జగద్వ్యాపినం విశ్వవన్ద్యం సురేశం
పరబ్రహ్మరూపం గణేశం భజేమ ॥ 3 ॥

రజోయోగతో బ్రహ్మరూపం శ్రుతిజ్ఞం
సదా కార్యసక్తం హృదాచిన్త్యరూపమ్ ।
జగత్కారకం సర్వవిద్యానిధానం
పరబ్రహ్మరూపం గణేశం నతాస్మః ॥ 4 ॥

సదా సత్త్వయోగం ముదా క్రీడమానం
సురారీన్హరన్తం జగత్పాలయన్తమ్ ।
అనేకావతారం నిజజ్ఞానహారం
సదా విష్ణురూపం గణేశం నమామః ॥ 5 ॥

తమోయోగినం రుద్రరూపం త్రినేత్రం
జగద్ధారకం తారకం జ్ఞానహేతుమ్ ।
అనేకాగమైః స్వం జనం బోధయన్తం
సదా శర్వరూపం గణేశం నమామః ॥ 6 ॥

తమస్తోమహారం జనాజ్ఞానహారం
త్రయీవేదసారం పరబ్రహ్మపారమ్ ।
మునిజ్ఞానకారం విదూరేవికారం
సదా బ్రహ్మరూపం గణేశం నమామః ॥ 7 ॥

నిజైరోషధీస్తర్పయన్తం కరోద్యైః
సరౌఘాన్కలాభిః సుధాస్రావిణీభిః ।
దినేశాంశు సన్తాపహారం ద్విజేశం
శశాఙ్కస్వరూపం గణేశం నమామః ॥ 8 ॥

ప్రకాశస్వరూపం నభోవాయురూపం
వికారాదిహేతుం కలాకాలభూతమ్ ।
అనేకక్రియానేకశక్తిస్వరూపం
సదా శక్తిరూపం గణేశం నమామః ॥ 9 ॥

ప్రధానస్వరూపం మహత్తత్త్వరూపం
ధరావారిరూపం దిగీశాదిరూపమ్ ।
అసత్సత్స్వరూపం జగద్ధేతుభూతం
సదా విశ్వరూపం గణేశం నతాస్మః ॥ 10 ॥

త్వదీయే మనః స్థాపయేదఙ్ఘ్రియుగ్మే
జనో విఘ్నసఙ్ఘాన్న పీడాం లభేత ।
లసత్సూర్యబిమ్బే విశాలే స్థితోఽయం
జనోధ్వాన్త పీడాం కథం వా లభేత ॥ 11 ॥

వయం భ్రామితాః సర్వథాఽజ్ఞానయోగా-
-దలబ్ధా తవాఙ్ఘ్రిం బహూన్వర్షపూగాన్ ।
ఇదానీమవాప్తాస్తవైవ ప్రసాదా-
-త్ప్రపన్నాన్సదా పాహి విశ్వమ్భరాద్య ॥ 12 ॥

గణేశ ఉవాచ ।
ఇదం యః పఠేత్ప్రాతరుత్థాయ ధీమాన్
త్రిసన్ధ్యం సదా భక్తియుక్తో విశుద్ధః ।
సపుత్రాన్ శ్రియం సర్వకామాన్ లభేత
పరబ్రహ్మరూపో భవేదన్తకాలే ॥ 13 ॥

ఇతి గణేశపురాణే ఉపాసనాఖణ్డే త్రయోదశోఽధ్యాయే శ్రీగణపతిస్తవః ।