Murari Pancha Ratna Stotram - Shuddha Telugu

Collection of Spiritual and Devotional Literature in Various Indian Languages

View this in:

This document is in శుద్ధ తెలుగు with the right anusvaras marked. View this in సరళ తెలుగు, with simplified anusvaras for easier reading.

మురారి పఞ్చ రత్న స్తోత్రమ్

యత్సేవనేన పితృమాతృసహోదరాణాం
చిత్తం న మోహమహిమా మలినం కరోతి ।
ఇత్థం సమీక్ష్య తవ భక్తజనాన్మురారే
మూకోఽస్మి తేఽఙ్ఘ్రికమలం తదతీవ ధన్యమ్ ॥ 1 ॥

యే యే విలగ్నమనసః సుఖమాప్తుకామాః
తే తే భవన్తి జగదుద్భవమోహశూన్యాః ।
దృష్ట్వా వినష్టధనధాన్యగృహాన్మురారే
మూకోఽస్మి తేఽఙ్ఘ్రికమలం తదతీవ ధన్యమ్ ॥ 2 ॥

వస్త్రాణి దిగ్వలయమావసతిః శ్మశానే
పాత్రం కపాలమపి ముణ్డవిభూషణాని ।
రుద్రే ప్రసాదమచలం తవ వీక్ష్య శౌరే
మూకోఽస్మి తేఽఙ్ఘ్రికమలం తదతీవ ధన్యమ్ ॥ 3 ॥

యత్కీర్తిగాయనపరస్య విధాతృసూనోః
కౌపీనమైణమజినం విపులాం విభూతిమ్ ।
స్వస్యార్థ దిగ్భ్రమణమీక్ష్య తు సార్వకాలం
మూకోఽస్మి తేఽఙ్ఘ్రికమలం తదతీవ ధన్యమ్ ॥ 4 ॥

యద్వీక్షణే ధృతధియామశనం ఫలాది
వాసోఽపి నిర్జినవనే గిరికన్దరాసు ।
వాసాంసి వల్కలమయాని విలోక్య చైవం
మూకోఽస్మి తేఽఙ్ఘ్రికమలం తదతీవ ధన్యమ్ ॥ 5 ॥

స్తోత్రం పాదామ్బుజస్యైతచ్ఛ్రీశస్య విజితేన్ద్రియః ।
పఠిత్వా తత్పదం యాతి శ్లోకార్థజ్ఞస్తు యో నరః ॥ 6 ॥

ఇతి మురారి పఞ్చరత్నమ్ ।

Browse Related Categories: