Meenakshi Pancha Ratna Stotram - Shuddha Telugu

ఉద్యద్భానుసహస్రకోటిసదృశాం కేయూరహారోజ్జ్వలాం
బిమ్బోష్ఠీం స్మితదన్తపఙ్క్తిరుచిరాం పీతామ్బరాలఙ్కృతామ్ ।
విష్ణుబ్రహ్మసురేన్ద్రసేవితపదాం తత్త్వస్వరూపాం శివాం
మీనాక్షీం ప్రణతోఽస్మి సన్తతమహం కారుణ్యవారాన్నిధిమ్ ॥ 1 ॥

ముక్తాహారలసత్కిరీటరుచిరాం పూర్ణేన్దువక్త్రప్రభాం
శిఞ్జన్నూపురకిఙ్కిణీమణిధరాం పద్మప్రభాభాసురామ్ ।
సర్వాభీష్టఫలప్రదాం గిరిసుతాం వాణీరమాసేవితాం
మీనాక్షీం ప్రణతోఽస్మి సన్తతమహం కారుణ్యవారాన్నిధిమ్ ॥ 2 ॥

శ్రీవిద్యాం శివవామభాగనిలయాం హ్రీఙ్కారమన్త్రోజ్జ్వలాం
శ్రీచక్రాఙ్కితబిన్దుమధ్యవసతిం శ్రీమత్సభానాయకీమ్ ।
శ్రీమత్షణ్ముఖవిఘ్నరాజజననీం శ్రీమజ్జగన్మోహినీం
మీనాక్షీం ప్రణతోఽస్మి సన్తతమహం కారుణ్యవారాన్నిధిమ్ ॥ 3 ॥

శ్రీమత్సున్దరనాయికాం భయహరాం జ్ఞానప్రదాం నిర్మలాం
శ్యామాభాం కమలాసనార్చితపదాం నారాయణస్యానుజామ్ ।
వీణావేణుమృదఙ్గవాద్యరసికాం నానావిధామమ్బికాం
మీనాక్షీం ప్రణతోఽస్మి సన్తతమహం కారుణ్యవారాన్నిధిమ్ ॥ 4 ॥

నానాయోగిమునీన్ద్రహృత్సువసతీం నానార్థసిద్ధిప్రదాం
నానాపుష్పవిరాజితాఙ్ఘ్రియుగళాం నారాయణేనార్చితామ్ ।
నాదబ్రహ్మమయీం పరాత్పరతరాం నానార్థతత్వాత్మికాం
మీనాక్షీం ప్రణతోఽస్మి సన్తతమహం కారుణ్యవారాన్నిధిమ్ ॥ 5 ॥

Browse Related Categories: