லக்ஷ்மீப⁴ர்துர்பு⁴ஜாக்³ரே க்ருதவஸதி ஸிதம் யஸ்ய ரூபம் விஶாலம்
நீலாத்³ரேஸ்துங்க³ஶ்ருங்க³ஸ்தி²தமிவ ரஜனீனாத²பி³ம்ப³ம் விபா⁴தி ।
பாயான்ன: பாஞ்சஜன்ய: ஸ தி³திஸுதகுலத்ராஸனை: பூரயன்ஸ்வை-
-ர்னித்⁴வானைர்னீரதௌ³க⁴த்⁴வனிபரிப⁴வதை³ரம்ப³ரம் கம்பு³ராஜ: ॥ 1 ॥

ஆஹுர்யஸ்ய ஸ்வரூபம் க்ஷணமுக²மகி²லம் ஸூரய: காலமேதம்
த்⁴வாந்தஸ்யைகாந்தமந்தம் யத³பி ச பரமம் ஸர்வதா⁴ம்னாம் ச தா⁴ம ।
சக்ரம் தச்சக்ரபாணேர்தி³திஜதனுக³லத்³ரக்ததா⁴ராக்ததா⁴ரம்
ஶஶ்வன்னோ விஶ்வவந்த்³யம் விதரது விபுலம் ஶர்ம த⁴ர்மாம்ஶுஶோப⁴ம் ॥ 2 ॥

அவ்யான்னிர்கா⁴தகோ⁴ரோ ஹரிபு⁴ஜபவனாமர்ஶனாத்⁴மாதமூர்தே-
-ரஸ்மான்விஸ்மேரனேத்ரத்ரித³ஶனுதிவச:ஸாது⁴காரை: ஸுதார: ।
ஸர்வம் ஸம்ஹர்துமிச்சோ²ரரிகுலபு⁴வன ஸ்பா²ரவிஷ்பா²ரனாத:³
ஸம்யத்கல்பாந்தஸிந்தௌ⁴ ஶரஸலிலக⁴டாவார்முச: கார்முகஸ்ய ॥ 3 ॥

ஜீமூதஶ்யாமபா⁴ஸா முஹுரபி ப⁴க³வத்³பா³ஹுனா மோஹயந்தீ
யுத்³தே⁴ஷூத்³தூ⁴யமானா ஜ²டிதி தடிதி³வாலக்ஷ்யதே யஸ்ய மூர்தி: ।
ஸோஸிஸ்த்ராஸாகுலாக்ஷத்ரித³ஶரிபுவபு:ஶோணிதாஸ்வாத³த்ருப்தோ
நித்யானந்தா³ய பூ⁴யான்மது⁴மத²னமனோனந்த³னோ நந்த³கோ ந: ॥ 4 ॥

கம்ராகாரா முராரே: கரகமலதலேனானுராகா³த்³க்³ருஹீதா
ஸம்யக்³வ்ருத்தா ஸ்தி²தாக்³ரே ஸபதி³ ந ஸஹதே த³ர்ஶனம் யா பரேஷாம் ।
ராஜந்தீ தை³த்யஜீவாஸவமத³முதி³தா லோஹிதாலேபனார்த்³ரா
காமம் தீ³ப்தாம்ஶுகாந்தா ப்ரதி³ஶது த³யிதேவாஸ்ய கௌமோத³கீ ந: ॥ 5 ॥

யோ விஶ்வப்ராணபூ⁴தஸ்தனுரபி ச ஹரேர்யானகேதுஸ்வரூபோ
யம் ஸஞ்சிந்த்யைவ ஸத்³ய: ஸ்வயமுரக³வதூ⁴வர்க³க³ர்பா⁴: பதந்தி ।
சஞ்சச்சண்டோ³ருதுண்ட³த்ருடிதப²ணிவஸாரக்தபங்காங்கிதஸ்யம்
வந்தே³ ச²ந்தோ³மயம் தம் க²க³பதிமமலஸ்வர்ணவர்ணம் ஸுபர்ணம் ॥ 6 ॥

விஷ்ணோர்விஶ்வேஶ்வரஸ்ய ப்ரவரஶயனக்ருத்ஸர்வலோகைகத⁴ர்தா
ஸோனந்த: ஸர்வபூ⁴த: ப்ருது²விமலயஶா: ஸர்வவேதை³ஶ்ச வேத்³ய: ।
பாதா விஶ்வஸ்ய ஶஶ்வத்ஸகலஸுரரிபுத்⁴வம்ஸன: பாபஹந்தா
ஸர்வஜ்ஞ: ஸர்வஸாக்ஷீ ஸகலவிஷப⁴யாத்பாது போ⁴கீ³ஶ்வரோ ந: ॥ 7 ॥

வாக்³பூ⁴கை³ர்யாதி³பே⁴தை³ர்விது³ரிஹ முனயோ யாம் யதீ³யைஶ்ச பும்ஸாம்
காருண்யார்த்³ரை: கடாக்ஷை: ஸக்ருத³பி பதிதை: ஸம்பத:³ ஸ்யு: ஸமக்³ரா: ।
குந்தே³ந்து³ஸ்வச்ச²மந்த³ஸ்மிதமது⁴ரமுகா²ம்போ⁴ருஹாம் ஸுந்த³ராங்கீ³ம்
வந்தே³ வந்த்³யாமஶேஷைரபி முரபி⁴து³ரோமந்தி³ராமிந்தி³ராம் தாம் ॥ 8 ॥

யா ஸூதே ஸத்த்வஜாலம் ஸகலமபி ஸதா³ ஸம்னிதா⁴னேன பும்ஸோ
த⁴த்தே யா தத்த்வயோகா³ச்சரமசரமித³ம் பூ⁴தயே பூ⁴தஜாதம் ।
தா⁴த்ரீம் ஸ்தா²த்ரீம் ஜனித்ரீம் ப்ரக்ருதிமவிக்ருதிம் விஶ்வஶக்திம் விதா⁴த்ரீம்
விஷ்ணோர்விஶ்வாத்மனஸ்தாம் விபுலகு³ணமயீம் ப்ராணனாதா²ம் ப்ரணௌமி ॥ 9 ॥

யேப்⁴யோஸூயத்³பி⁴ருச்சை: ஸபதி³ பத³முரு த்யஜ்யதே தை³த்யவர்கை³-
-ர்யேபோ⁴ த⁴ர்தும் ச மூர்த்⁴னா ஸ்ப்ருஹயதி ஸததம் ஸர்வகீ³ர்வாணவர்க:³ ।
நித்யம் நிர்மூலயேயுர்னிசிததரமமீ ப⁴க்தினிக்⁴னாத்மனாம் ந:
பத்³மாக்ஷஸ்யாங்க்⁴ரிபத்³மத்³வயதலனிலயா: பாம்ஸவ: பாபபங்கம் ॥ 1௦ ॥

ரேகா² லேகா²தி³வந்த்³யாஶ்சரணதலக³தாஶ்சக்ரமத்ஸ்யாதி³ரூபா:
ஸ்னிக்³தா⁴: ஸூக்ஷ்மா: ஸுஜாதா ம்ருது³லலிததரக்ஷௌமஸூத்ராயமாணா: ।
த³த்³யுர்னோ மங்கள³ானி ப்⁴ரமரப⁴ரஜுஷா கோமலேனாப்³தி⁴ஜாயா:
கம்ரேணாம்ரேட்³யமானா: கிஸலயம்ருது³னா பாணினா சக்ரபாணே: ॥ 11 ॥

யஸ்மாதா³க்ராமதோ த்³யாம் க³ருட³மணிஶிலாகேதுத³ண்டா³யமானா
தா³ஶ்ச்யோதந்தீ ப³பா⁴ஸே ஸுரஸரித³மலா வைஜயந்தீவ காந்தா ।
பூ⁴மிஷ்டோ² யஸ்ததா²ன்யோ பு⁴வனக்³ருஹப்³ருஹத்‍ஸ்தம்ப⁴ஶோபா⁴ம் த³தௌ⁴ ந:
பாதாமேதௌ பாயோஜோத³ரலலிததலௌ பங்கஜாக்ஷஸ்ய பாதௌ³ ॥ 12 ॥

ஆக்ராமத்³ப்⁴யாம் த்ரிலோகீமஸுரஸுரபதீ தத்க்ஷணாதே³வ நீதௌ
யாப்⁴யாம் வைரோசனீந்த்³ரௌ யுக³பத³பி விபத்ஸம்பதோ³ரேகதா⁴ம: ।
தாப்⁴யாம் தாம்ரோத³ராப்⁴யாம் முஹுரஹமஜிதஸ்யாஞ்சிதாப்⁴யாமுபா⁴ப்⁴யாம்
ப்ராஜ்யைஶ்வர்யப்ரதா³ப்⁴யாம் ப்ரணதிமுபக³த: பாத³பங்கேருஹாப்⁴யாம் ॥ 13 ॥

யேப்⁴யோ வர்ணஶ்சதுர்த²ஶ்சரமத உத³பூ⁴தா³தி³ஸர்கே³ ப்ரஜானாம்
ஸாஹஸ்ரீ சாபி ஸங்க்³யா ப்ரகடமபி⁴ஹிதா ஸர்வவேதே³ஷு யேஷாம் ।
ப்ராப்தா விஶ்வம்ப⁴ரா யைரதிவிதததனோர்விஶ்வமூர்தேர்விராஜோ
விஷ்ணோஸ்தேப்⁴யோ மஹத்³ப்⁴ய: ஸததமபி நமோஸ்த்வங்க்⁴ரிபங்கேருஹேப்⁴ய: ॥ 14 ॥

விஷ்ணோ: பாத³த்³வயாக்³ரே விமலனக²மணிப்⁴ராஜிதா ராஜதே யா
ராஜீவஸ்யேவ ரம்யா ஹிமஜலகணிகாலங்க்ருதாக்³ரா த³லாலீ ।
அஸ்மாகம் விஸ்மயார்ஹாண்யகி²லஜனமன ப்ரார்த²னீயா ஹி ஸேயம்
த³த்³யாதா³த்³யானவத்³யா ததிரதிருசிரா மங்கள³ான்யங்கு³ளீனாம் ॥ 15 ॥

யஸ்யாம் த்³ருஷ்ட்வாமலாயாம் ப்ரதிக்ருதிமமரா: ஸம்ப⁴வந்த்யானமந்த:
ஸேந்த்³ரா: ஸாந்த்³ரீக்ருதேர்ஷ்யாஸ்த்வபரஸுரகுலாஶங்கயாதங்கவந்த: ।
ஸா ஸத்³ய: ஸாதிரேகாம் ஸகலஸுக²கரீம் ஸம்பத³ம் ஸாத⁴யேன்ன-
-ஶ்சஞ்சச்சார்வம்ஶுசக்ரா சரணனளினயோஶ்சக்ரபாணேர்னகா²லீ ॥ 16 ॥

பாதா³ம்போ⁴ஜன்மஸேவாஸமவனதஸுரவ்ராதபா⁴ஸ்வத்கிரீட-
-ப்ரத்யுப்தோச்சாவசாஶ்மப்ரவரகரக³ணைஶ்சிந்திதம் யத்³விபா⁴தி ।
நம்ராங்கா³னாம் ஹரேர்னோ ஹரிது³பலமஹாகூர்மஸௌந்த³ர்யஹாரி-
-ச்சா²யம் ஶ்ரேய:ப்ரதா³யி ப்ரபத³யுக³மித³ம் ப்ராபயேத்பாபமந்தம் ॥ 17 ॥

ஶ்ரீமத்யௌ சாருவ்ருத்தே கரபரிமலனானந்த³ஹ்ருஷ்டே ரமாயா:
ஸௌந்த³ர்யாட்⁴யேந்த்³ரனீலோபலரசிதமஹாத³ண்ட³யோ: காந்திசோரே ।
ஸூரீந்த்³ரை: ஸ்தூயமானே ஸுரகுலஸுக²தே³ ஸூதி³தாராதிஸங்கே⁴
ஜங்கே⁴ நாராயணீயே முஹுரபி ஜயதாமஸ்மத³ம்ஹோ ஹரந்த்யௌ ॥ 18 ॥

ஸம்யக்ஸாஹ்யம் விதா⁴தும் ஸமமிவ ஸததம் ஜங்க⁴யோ: கி²ன்னயோர்யே
பா⁴ரீபூ⁴தோருத³ண்ட³த்³வயப⁴ரணக்ருதோத்தம்ப⁴பா⁴வம் பஜ⁴ேதே ।
சித்தாத³ர்ஶம் நிதா⁴தும் மஹிதமிவ ஸதாம் தே ஸமுத்³ராயமானே
வ்ருத்தாகாரே வித⁴த்தாம் ஹ்யதி³ முத³மஜிதஸ்யானிஶம் ஜானுனீ ந: ॥ 19 ॥

தே³வோ பீ⁴திம் விதா⁴து: ஸபதி³ வித³த⁴தௌ கைடபா⁴க்²யம் மது⁴ம் சா-
-ப்யாரோப்யாரூட⁴க³ர்வாவதி⁴ஜலதி⁴ யயோராதி³தை³த்யௌ ஜகா⁴ன ।
வ்ருத்தாவன்யோன்யதுல்யௌ சதுரமுபசயம் பி³ப்⁴ரதாவப்⁴ரனீலா-
-வூரூ சாரூ ஹரேஸ்தௌ முத³மதிஶயினீம் மானஸே நோ வித⁴த்தாம் ॥ 2௦ ॥

பீதேன த்³யோததே யச்சதுரபரிஹிதேனாம்ப³ரேணாத்யுதா³ரம்
ஜாதாலங்காரயோக³ம் ஜலமிவ ஜலதே⁴ர்பா³ட³பா³க்³னிப்ரபா⁴பி⁴: ।
ஏதத்பாதித்யதா³ன்னோ ஜக⁴னமதிக⁴னாதே³னஸோ மானநீயம்
ஸாதத்யேனைவ சேதோவிஷயமவதரத்பாது பீதாம்ப³ரஸ்ய ॥ 21 ॥

யஸ்யா தா³ம்னா த்ரிதா⁴ம்னோ ஜக⁴னகலிதயா ப்⁴ராஜதேங்க³ம் யதா²ப்³தே⁴-
-ர்மத்⁴யஸ்தோ² மந்த³ராத்³ரிர்பு⁴ஜக³பதிமஹாபோ⁴க³ஸம்னத்³த⁴மத்⁴ய: ।
காஞ்சீ ஸா காஞ்சனாபா⁴ மணிவரகிரணைருல்லஸத்³பி⁴: ப்ரதீ³ப்தா
கல்யாம் கள்யாணதா³த்ரீம் மம மதிமனிஶம் கம்ரரூபாம் கரோது ॥ 22 ॥

உன்னம்ரம் கம்ரமுச்சைருபசிதமுத³பூ⁴த்³யத்ர பத்ரைர்விசித்ரை:
பூர்வம் கீ³ர்வாணபூஜ்யம் கமலஜமது⁴பஸ்யாஸ்பத³ம் தத்பயோஜம் ।
யஸ்மின்னீலாஶ்மனீலைஸ்தரலருசிஜலை: பூரிதே கேலிபு³த்³த்⁴யா
நாலீகாக்ஷஸ்ய நாபீ⁴ஸரஸி வஸது நஶ்சித்தஹம்ஸஶ்சிராய ॥ 23 ॥

பாதாலம் யஸ்ய நாலம் வலயமபி தி³ஶாம் பத்ரபங்க்தீர்னகே³ந்த்³ரா-
-ன்வித்³வாம்ஸ: கேஸராலீர்விது³ரிஹ விபுலாம் கர்ணிகாம் ஸ்வர்ணஶைலம் ।
பூ⁴யாத்³கா³யத்ஸ்வயம்பூ⁴மது⁴கரப⁴வனம் பூ⁴மயம் காமத³ம் நோ
நாலீகம் நாபி⁴பத்³மாகரப⁴வமுரு தன்னாக³ஶய்யஸ்ய ஶௌரே: ॥ 24 ॥

ஆதௌ³ கல்பஸ்ய யஸ்மாத்ப்ரப⁴வதி விததம் விஶ்வமேதத்³விகல்பை:
கல்பாந்தே யஸ்ய சாந்த ப்ரவிஶதி ஸகலம் ஸ்தா²வரம் ஜங்க³மம் ச ।
அத்யந்தாசிந்த்யமூர்தேஶ்சிரதரமஜிதஸ்யாந்தரிக்ஷஸ்வரூபே
தஸ்மின்னஸ்மாகமந்த:கரணமதிமுதா³ க்ரீட³தாத்க்ரோட³பா⁴கே³ ॥ 25 ॥

காந்த்யம்ப:⁴பூரபூர்ணே லஸத³ஸிதவலீப⁴ங்க³பா⁴ஸ்வத்தரங்கே³
க³ம்பீ⁴ராகாரனாபீ⁴சதுரதரமஹாவர்தஶோபி⁴ன்யுதா³ரே ।
க்ரீட³த்வானத்³வஹேமோத³ரனஹனமஹாபா³ட³பா³க்³னிப்ரபா⁴ட்⁴யே
காமம் தா³மோத³ரீயோத³ரஸலிலனிதௌ⁴ சித்தமத்ஸ்யஶ்சிரம் ந: ॥ 26 ॥

நாபீ⁴னாலீகமூலாத³தி⁴கபரிமளோன்மோஹிதானாமலீனாம்
மாலா நீலேவ யாந்தீ ஸ்பு²ரதி ருசிமதீ வக்த்ரபத்³மோன்முகீ² யா ।
ரம்யா ஸா ரோமராஜிர்மஹிதருசிகரீ மத்⁴யபா⁴க³ஸ்ய விஷ்ணோ-
-ஶ்சித்தஸ்தா² மா விரம்ஸீச்சிரதரமுசிதாம் ஸாத⁴யந்தீ ஶ்ரியம் ந: ॥ 27 ॥

ஸம்ஸ்தீர்ணம் கௌஸ்துபா⁴ம்ஶுப்ரஸரகிஸலயைர்முக்³த⁴முக்தாப²லாட்⁴யம்
ஶ்ரீவத்ஸோல்லாஸி பு²ல்லப்ரதினவவனமாலாங்கி ராஜத்³பு⁴ஜாந்தம் ।
வக்ஷ: ஶ்ரீவ்ருக்ஷகாந்தம் மது⁴கரனிகரஶ்யாமலம் ஶார்ங்க³பாணே:
ஸம்ஸாராத்⁴வஶ்ரமார்தைருபவனமிவ யத்ஸேவிதம் தத்ப்ரபத்³யே ॥ 28 ॥

காந்தம் வக்ஷோ நிதாந்தம் வித³த⁴தி³வ க³லம் காலிமா காலஶத்ரோ-
-ரிந்தோ³ர்பி³ம்ப³ம் யதா²ங்கோ மது⁴ப இவ தரோர்மஞ்ஜரீம் ராஜதே ய: ।
ஶ்ரீமான்னித்யம் விதே⁴யாத³விரலமிலித: கௌஸ்துப⁴ஶ்ரீப்ரதானை:
ஶ்ரீவத்ஸ: ஶ்ரீபதே: ஸ ஶ்ரிய இவ த³யிதோ வத்ஸ உச்சை:ஶ்ரியம் ந: ॥ 29 ॥

ஸம்பூ⁴யாம்போ⁴தி⁴மத்⁴யாத்ஸபதி³ ஸஹஜயா ய: ஶ்ரியா ஸம்னித⁴த்தே
நீலே நாராயணோர:ஸ்த²லக³க³னதலே ஹாரதாரோபஸேவ்யே ।
ஆஶா: ஸர்வா: ப்ரகாஶா வித³த⁴த³பித³த⁴ச்சாத்மபா⁴ஸான்யதேஜா-
-ஸ்யாஶ்சர்யஸ்யாகரோ நோ த்³யுமணிரிவ மணி: கௌஸ்துப:⁴ ஸோஸ்துபூ⁴த்யை ॥ 3௦ ॥

யா வாயாவானுகூல்யாத்ஸரதி மணிருசா பா⁴ஸமானா ஸமானா
ஸாகம் ஸாகம்பமம்ஸே வஸதி வித³த⁴தீ வாஸுப⁴த்³ரம் ஸுப⁴த்³ரம் ।
ஸாரம் ஸாரங்க³ஸங்கை⁴ர்முக²ரிதகுஸுமா மேசகாந்தா ச காந்தா
மாலா மாலாலிதாஸ்மான்ன விரமது ஸுகை²ர்யோஜயந்தீ ஜயந்தீ ॥ 31 ॥

ஹாரஸ்யோருப்ரபா⁴பி⁴: ப்ரதினவவனமாலாஶுபி⁴: ப்ராம்ஶுரூபை:
ஶ்ரீபி⁴ஶ்சாப்யங்க³தா³னாம் கப³லிதருசி யன்னிஷ்கபா⁴பி⁴ஶ்ச பா⁴தி ।
பா³ஹுல்யேனைவ ப³த்³தா⁴ஞ்ஜலிபுடமஜிதஸ்யாபி⁴யாசாமஹே த-
-த்³வந்தா⁴ர்திம் பா³த⁴தாம் நோ ப³ஹுவிஹதிகரீம் ப³ந்து⁴ரம் பா³ஹுமூலம் ॥ 32 ॥

விஶ்வத்ராணைகதீ³க்ஷாஸ்தத³னுகு³ணகு³ணக்ஷத்ரனிர்மாணத³க்ஷா:
கர்தாரோ து³ர்னிரூபஸ்பு²டகு³ணயஶஸா கர்மணாமத்³பு⁴தானாம் ।
ஶார்ங்க³ம் பா³ணம் க்ருபாணம் ப²லகமரிக³தே³ பத்³மஶங்கௌ³ ஸஹஸ்ரம்
பி³ப்⁴ராணா: ஶஸ்த்ரஜாலம் மம த³த⁴து ஹரேர்பா³ஹவோ மோஹஹானிம் ॥ 33 ॥

கண்டா²கல்போத்³க³தைர்ய: கனகமயலஸத்குண்ட³லோத்தை²ருதா³ரை-
-ருத்³யோதை: கௌஸ்துப⁴ஸ்யாப்யுருபி⁴ருபசிதஶ்சித்ரவர்ணோ விபா⁴தி ।
கண்டா²ஶ்லேஷே ரமாயா: கரவலயபதை³ர்முத்³ரிதே ப⁴த்³ரரூபே
வைகுண்டீ²யேத்ர கண்டே² வஸது மம மதி: குண்ட²பா⁴வம் விஹாய ॥ 34 ॥

பத்³மானந்த³ப்ரதா³தா பரிலஸத³ருணஶ்ரீபரீதாக்³ரபா⁴க:³
காலே காலே ச கம்பு³ப்ரவரஶஶத⁴ராபூரணே ய: ப்ரவீண: ।
வக்த்ராகாஶாந்தரஸ்த²ஸ்திரயதி நிதராம் த³ந்ததாரௌக⁴ஶோபா⁴ம்
ஶ்ரீப⁴ர்துர்த³ந்தவாஸோத்³யுமணிரக⁴தமோனாஶனாயாஸ்த்வஸௌ ந: ॥ 35 ॥

நித்யம் ஸ்னேஹாதிரேகான்னிஜகமிதுரலம் விப்ரயோகா³க்ஷமா யா
வக்த்ரேந்தோ³ரந்தராலே க்ருதவஸதிரிவாபா⁴தி நக்ஷத்ரராஜி: ।
லக்ஷ்மீகாந்தஸ்ய காந்தாக்ருதிரதிவிலஸன்முக்³த⁴முக்தாவலிஶ்ரீ-
-ர்த³ந்தாலீ ஸந்ததம் ஸா நதினுதினிரதானக்ஷதான்ரக்ஷதான்ன: ॥ 36 ॥

ப்³ரஹ்மன்ப்³ரஹ்மண்யஜிஹ்மாம் மதிமபி குருஷே தே³வ ஸம்பா⁴வயே த்வாம்
ஶம்போ⁴ ஶக்ர த்ரிலோகீமவஸி கிமமரைர்னாரதா³த்³யா: ஸுக²ம் வ: ।
இத்த²ம் ஸேவாவனம்ரம் ஸுரமுனினிகரம் வீக்ஷ்ய விஷ்ணோ: ப்ரஸன்ன-
-ஸ்யாஸ்யேந்தோ³ராஸ்ரவந்தீ வரவசனஸுதா⁴ஹ்லாத³யேன்மானஸம் ந: ॥ 37 ॥

கர்ணஸ்த²ஸ்வர்ணகம்ரோஜ்ஜ்வலமகரமஹாகுண்ட³லப்ரோததீ³ப்ய-
-ன்மாணிக்யஶ்ரீப்ரதானை: பரிமிலிதமலிஶ்யாமலம் கோமலம் யத் ।
ப்ரோத்³யத்ஸூர்யாம்ஶுராஜன்மரகதமுகுராகாரசோரம் முராரே-
-ர்கா³டா⁴மாகா³மினீம் ந: ஶமயது விபத³ம் க³ண்ட³யோர்மண்ட³லம் தத் ॥ 38 ॥

வக்த்ராம்போ⁴ஜே லஸந்தம் முஹுரத⁴ரமணிம் பக்வபி³ம்பா³பி⁴ராமம்
த்³ருஷ்ட்வா த்³ரஷ்டும் ஶுகஸ்ய ஸ்பு²டமவதரதஸ்துண்ட³த³ண்டா³யதே ய: ।
கோ⁴ண: ஶோணீக்ருதாத்மா ஶ்ரவணயுகள³ஸத்குண்ட³லோஸ்ரைர்முராரே:
ப்ராணாக்²யஸ்யானிலஸ்ய ப்ரஸரணஸரணி: ப்ராணதா³னாய ந: ஸ்யாத் ॥ 39 ॥

தி³க்காலௌ வேத³யந்தௌ ஜக³தி முஹுரிமௌ ஸஞ்சரந்தௌ ரவீந்தூ³
த்ரைலோக்யாலோகதீ³பாவபி⁴த³த⁴தி யயோரேவ ரூபம் முனீந்த்³ரா: ।
அஸ்மானப்³ஜப்ரபே⁴ தே ப்ரசுரதரக்ருபானிர்ப⁴ரம் ப்ரேக்ஷமாணே
பாதாமாதாம்ரஶுக்லாஸிதருசிருசிரே பத்³மனேத்ரஸ்ய நேத்ரே ॥ 4௦ ॥

பாதாத்பாதாலபாதாத்பதக³பதிக³தேர்ப்⁴ரூயுக³ம் பு⁴க்³னமத்⁴யம்
யேனேஷச்சாலிதேன ஸ்வபத³னியமிதா: ஸாஸுரா தே³வஸங்கா⁴: ।
ந்ருத்யல்லாலாடரங்கே³ ரஜனிகரதனோரர்த⁴க²ண்டா³வதா³தே
காலவ்யாலத்³வயம் வா விலஸதி ஸமயா வாலிகாமாதரம் ந: ॥ 41 ॥

லக்ஷ்மாகாராலகாலிஸ்பு²ரத³லிகஶஶாங்கார்த⁴ஸந்த³ர்ஶமீல-
-ன்னேத்ராம்போ⁴ஜப்ரபோ³தோ⁴த்ஸுகனிப்⁴ருததராலீனப்⁴ருங்க³ச்ச²டாபே⁴ ।
லக்ஷ்மீனாத²ஸ்ய லக்ஷ்யீக்ருதவிபு³த⁴க³ணாபாங்க³பா³ணாஸனார்த-⁴
-ச்சா²யே நோ பூ⁴ரிபூ⁴திப்ரஸவகுஶலதே ப்⁴ரூலதே பாலயேதாம் ॥ 42 ॥

ரூக்ஷஸ்மாரேக்ஷுசாபச்யுதஶரனிகரக்ஷீணலக்ஷ்மீகடாக்ஷ-
-ப்ரோத்பு²ல்லத்பத்³மமாலாவிலஸிதமஹிதஸ்பா²டிகைஶானலிங்க³ம் ।
பூ⁴யாத்³பூ⁴யோ விபூ⁴த்யை மம பு⁴வனபதேர்ப்⁴ரூலதாத்³வந்த்³வமத்⁴யா-
-து³த்த²ம் தத்புண்ட்³ரமூர்த்⁴வம் ஜனிமரணதம:க²ண்ட³னம் மண்ட³னம் ச ॥ 43 ॥

பீடீ²பூ⁴தாலகாந்தே க்ருதமகுடமஹாதே³வலிங்க³ப்ரதிஷ்டே²
லாலாடே நாட்யரங்கே³ விகடதரதடே கைடபா⁴ரேஶ்சிராய ।
ப்ரோத்³தா⁴ட்யைவாத்மதந்த்³ரீப்ரகடபடகுடீம் ப்ரஸ்பு²ரந்தீம் ஸ்பு²டாங்க³ம்
பட்வீயம் பா⁴வனாக்²யாம் சடுலமதினடீ நாடிகாம் நாடயேன்ன: ॥ 44 ॥

மாலாலீவாலிதா⁴ம்ன: குவலயகலிதா ஶ்ரீபதே: குந்தலாலீ
காலிந்த்³யாருஹ்ய மூர்த்⁴னோ க³லதி ஹரஶிர:ஸ்வர்து⁴னீஸ்பர்த⁴யா நு ।
ராஹுர்வா யாதி வக்த்ரம் ஸகலஶஶிகலாப்⁴ராந்திலோலாந்தராத்மா
லோகைராலோக்யதே யா ப்ரதி³ஶது ஸததம் ஸாகி²லம் மங்கள³ம் ந: ॥ 45 ॥

ஸுப்தாகாரா: ப்ரஸுப்தே ப⁴க³வதி விபு³தை⁴ரப்யத்³ருஷ்டஸ்வரூபா
வ்யாப்தவ்யோமாந்தராலாஸ்தரலமணிருசா ரஞ்ஜிதா: ஸ்பஷ்டபா⁴ஸ: ।
தே³ஹச்சா²யோத்³க³மாபா⁴ ரிபுவபுரகு³ருப்லோஷரோஷாக்³னிதூ⁴ம்யா:
கேஶா: கேஶித்³விஷோ நோ வித³த⁴து விபுலக்லேஶபாஶப்ரணாஶம் ॥ 46 ॥

யத்ர ப்ரத்யுப்தரத்னப்ரவரபரிலஸத்³பூ⁴ரிரோசிஷ்ப்ரதான-
-ஸ்பூ²ர்த்யாம் மூர்திர்முராரேர்த்³யுமணிஶதசிதவ்யோமவத்³து³ர்னிரீக்ஷ்யா ।
குர்வத்பாரேபயோதி⁴ ஜ்வலத³க்ருஶஶிகா²பா⁴ஸ்வதௌ³ர்வாக்³னிஶங்காம்
ஶஶ்வன்ன: ஶர்ம தி³ஶ்யாத்கலிகலுஷதம:பாடனம் தத்கிரீடம் ॥ 47 ॥

ப்⁴ராந்த்வா ப்⁴ராந்த்வா யத³ந்தஸ்த்ரிபு⁴வனகு³ருரப்யப்³த³கோடீரனேகா
க³ந்தும் நாந்தம் ஸமர்தோ² ப்⁴ரமர இவ புனர்னாபி⁴னாலீகனாலாத் ।
உன்மஜ்ஜன்னூர்ஜிதஶ்ரீஸ்த்ரிபு⁴வனமபரம் நிர்மமே தத்ஸத்³ருக்ஷம்
தே³ஹாம்போ⁴தி⁴: ஸ தே³யான்னிரவதி⁴ரம்ருதம் தை³த்யவித்³வேஷிணோ ந: ॥ 48 ॥

மத்ஸ்ய: கூர்மோ வராஹோ நரஹரிணபதிர்வாமனோ ஜாமத³க்³ன்ய:
காகுத்ஸ்த:² கம்ஸகா⁴தீ மனஸிஜவிஜயீ யஶ்ச கல்கிர்ப⁴விஷ்யன் ।
விஷ்ணோரம்ஶாவதரா பு⁴வனஹிதகரா த⁴ர்மஸம்ஸ்தா²பனார்தா²:
பாயாஸுர்மாம் த ஏதே கு³ருதரகருணாபா⁴ரகி²ன்னாஶயா யே ॥ 49 ॥

யஸ்மாத்³வாசோ நிவ்ருத்தா: ஸமமபி மனஸா லக்ஷணாமீக்ஷமாணா:
ஸ்வார்தா²லாபா⁴த்பரார்த²வ்யபக³மகத²னஶ்லாகி⁴னோ வேத³வாதா³: ।
நித்யானந்த³ம் ஸ்வஸம்வின்னிரவதி⁴விமலஸ்வாந்தஸங்க்ராந்தபி³ம்ப-³
-ச்சா²யாபத்யாபி நித்யம் ஸுக²யதி யமினோ யத்தத³வ்யான்மஹோ ந: ॥ 5௦ ॥

ஆபாதா³தா³ ச ஶீர்ஷாத்³வபுரித³மனக⁴ம் வைஷ்ணவம் ய: ஸ்வசித்தே
த⁴த்தே நித்யம் நிரஸ்தாகி²லகலிகலுஷ ஸந்ததாந்த: ப்ரமோத³ம் ।
ஜுஹ்வஜ்ஜிஹ்வாக்ருஶானௌ ஹரிசரிதஹவி: ஸ்தோத்ரமந்த்ரானுபாடை²-
-ஸ்தத்பாதா³ம்போ⁴ருஹாப்⁴யாம் ஸததமபி நமஸ்குர்மஹே நிர்மலாப்⁴யாம் ॥ 51 ॥

மோதா³த்பாதா³தி³கேஶஸ்துதிமிதிரசிதா கீர்தயித்வா த்ரிதா⁴ம்ன
பாதா³ப்³ஜத்³வந்த்³வஸேவாஸமயனதமதிர்மஸ்தகேனானமேத்³ய ।
உன்முச்யைவாத்மனைனோனிசயகவசக பஞ்சதாமேத்ய பா⁴னோ-
-ர்பி³ம்பா³ந்தர்கோ³சர ஸ ப்ரவிஶதி பரமானந்த³மாத்மஸ்வரூபம் ॥ 52 ॥

இதி ஶ்ரீமத்பரமஹம்ஸபரிவ்ராஜகாசார்யஸ்ய ஶ்ரீகோ³விந்த³ப⁴க³வத்பூஜ்யபாத³ஶிஷ்யஸ்ய ஶ்ரீமச்ச²ங்கரப⁴க³வத: க்ருதௌ ஶ்ரீ விஷ்ணு பாதா³தி³கேஶாந்தவர்ணண ஸ்தோத்ரம் ஸம்பூர்ணம் ।