ଲକ୍ଷ୍ମୀଭର୍ତୁର୍ଭୁଜାଗ୍ରେ କୃତଵସତି ସିତଂ ୟସ୍ୟ ରୂପଂ ଵିଶାଲଂ
ନୀଲାଦ୍ରେସ୍ତୁଂଗଶୃଂଗସ୍ଥିତମିଵ ରଜନୀନାଥବିଂବଂ ଵିଭାତି ।
ପାୟାନ୍ନଃ ପାଂଚଜନ୍ୟଃ ସ ଦିତିସୁତକୁଲତ୍ରାସନୈଃ ପୂରୟନ୍ସ୍ଵୈ-
-ର୍ନିଧ୍ଵାନୈର୍ନୀରଦୌଘଧ୍ଵନିପରିଭଵଦୈରଂବରଂ କଂବୁରାଜଃ ॥ 1 ॥

ଆହୁର୍ୟସ୍ୟ ସ୍ଵରୂପଂ କ୍ଷଣମୁଖମଖିଲଂ ସୂରୟଃ କାଲମେତଂ
ଧ୍ଵାଂତସ୍ୟୈକାଂତମଂତଂ ୟଦପି ଚ ପରମଂ ସର୍ଵଧାମ୍ନାଂ ଚ ଧାମ ।
ଚକ୍ରଂ ତଚ୍ଚକ୍ରପାଣେର୍ଦିତିଜତନୁଗଲଦ୍ରକ୍ତଧାରାକ୍ତଧାରଂ
ଶଶ୍ଵନ୍ନୋ ଵିଶ୍ଵଵଂଦ୍ୟଂ ଵିତରତୁ ଵିପୁଲଂ ଶର୍ମ ଧର୍ମାଂଶୁଶୋଭମ୍ ॥ 2 ॥

ଅଵ୍ୟାନ୍ନିର୍ଘାତଘୋରୋ ହରିଭୁଜପଵନାମର୍ଶନାଧ୍ମାତମୂର୍ତେ-
-ରସ୍ମାନ୍ଵିସ୍ମେରନେତ୍ରତ୍ରିଦଶନୁତିଵଚଃସାଧୁକାରୈଃ ସୁତାରଃ ।
ସର୍ଵଂ ସଂହର୍ତୁମିଚ୍ଛୋରରିକୁଲଭୁଵନ ସ୍ଫାରଵିଷ୍ଫାରନାଦଃ
ସଂୟତ୍କଲ୍ପାଂତସିଂଧୌ ଶରସଲିଲଘଟାଵାର୍ମୁଚଃ କାର୍ମୁକସ୍ୟ ॥ 3 ॥

ଜୀମୂତଶ୍ୟାମଭାସା ମୁହୁରପି ଭଗଵଦ୍ବାହୁନା ମୋହୟଂତୀ
ୟୁଦ୍ଧେଷୂଦ୍ଧୂୟମାନା ଝଟିତି ତଟିଦିଵାଲକ୍ଷ୍ୟତେ ୟସ୍ୟ ମୂର୍ତିଃ ।
ସୋଽସିସ୍ତ୍ରାସାକୁଲାକ୍ଷତ୍ରିଦଶରିପୁଵପୁଃଶୋଣିତାସ୍ଵାଦତୃପ୍ତୋ
ନିତ୍ୟାନଂଦାୟ ଭୂୟାନ୍ମଧୁମଥନମନୋନଂଦନୋ ନଂଦକୋ ନଃ ॥ 4 ॥

କମ୍ରାକାରା ମୁରାରେଃ କରକମଲତଲେନାନୁରାଗାଦ୍ଗୃହୀତା
ସମ୍ୟଗ୍ଵୃତ୍ତା ସ୍ଥିତାଗ୍ରେ ସପଦି ନ ସହତେ ଦର୍ଶନଂ ୟା ପରେଷାମ୍ ।
ରାଜଂତୀ ଦୈତ୍ୟଜୀଵାସଵମଦମୁଦିତା ଲୋହିତାଲେପନାର୍ଦ୍ରା
କାମଂ ଦୀପ୍ତାଂଶୁକାଂତା ପ୍ରଦିଶତୁ ଦୟିତେଵାସ୍ୟ କୌମୋଦକୀ ନଃ ॥ 5 ॥

ୟୋ ଵିଶ୍ଵପ୍ରାଣଭୂତସ୍ତନୁରପି ଚ ହରେର୍ୟାନକେତୁସ୍ଵରୂପୋ
ୟଂ ସଂଚିଂତ୍ୟୈଵ ସଦ୍ୟଃ ସ୍ଵୟମୁରଗଵଧୂଵର୍ଗଗର୍ଭାଃ ପତଂତି ।
ଚଂଚଚ୍ଚଂଡୋରୁତୁଂଡତ୍ରୁଟିତଫଣିଵସାରକ୍ତପଂକାଂକିତସ୍ୟଂ
ଵଂଦେ ଛଂଦୋମୟଂ ତଂ ଖଗପତିମମଲସ୍ଵର୍ଣଵର୍ଣଂ ସୁପର୍ଣମ୍ ॥ 6 ॥

ଵିଷ୍ଣୋର୍ଵିଶ୍ଵେଶ୍ଵରସ୍ୟ ପ୍ରଵରଶୟନକୃତ୍ସର୍ଵଲୋକୈକଧର୍ତା
ସୋଽନଂତଃ ସର୍ଵଭୂତଃ ପୃଥୁଵିମଲୟଶାଃ ସର୍ଵଵେଦୈଶ୍ଚ ଵେଦ୍ୟଃ ।
ପାତା ଵିଶ୍ଵସ୍ୟ ଶଶ୍ଵତ୍ସକଲସୁରରିପୁଧ୍ଵଂସନଃ ପାପହଂତା
ସର୍ଵଜ୍ଞଃ ସର୍ଵସାକ୍ଷୀ ସକଲଵିଷଭୟାତ୍ପାତୁ ଭୋଗୀଶ୍ଵରୋ ନଃ ॥ 7 ॥

ଵାଗ୍ଭୂଗୈର୍ୟାଦିଭେଦୈର୍ଵିଦୁରିହ ମୁନୟୋ ୟାଂ ୟଦୀୟୈଶ୍ଚ ପୁଂସାଂ
କାରୁଣ୍ୟାର୍ଦ୍ରୈଃ କଟାକ୍ଷୈଃ ସକୃଦପି ପତିତୈଃ ସଂପଦଃ ସ୍ୟୁଃ ସମଗ୍ରାଃ ।
କୁଂଦେଂଦୁସ୍ଵଚ୍ଛମଂଦସ୍ମିତମଧୁରମୁଖାଂଭୋରୁହାଂ ସୁଂଦରାଂଗୀଂ
ଵଂଦେ ଵଂଦ୍ୟାମଶେଷୈରପି ମୁରଭିଦୁରୋମଂଦିରାମିଂଦିରାଂ ତାମ୍ ॥ 8 ॥

ୟା ସୂତେ ସତ୍ତ୍ଵଜାଲଂ ସକଲମପି ସଦା ସଂନିଧାନେନ ପୁଂସୋ
ଧତ୍ତେ ୟା ତତ୍ତ୍ଵୟୋଗାଚ୍ଚରମଚରମିଦଂ ଭୂତୟେ ଭୂତଜାତମ୍ ।
ଧାତ୍ରୀଂ ସ୍ଥାତ୍ରୀଂ ଜନିତ୍ରୀଂ ପ୍ରକୃତିମଵିକୃତିଂ ଵିଶ୍ଵଶକ୍ତିଂ ଵିଧାତ୍ରୀଂ
ଵିଷ୍ଣୋର୍ଵିଶ୍ଵାତ୍ମନସ୍ତାଂ ଵିପୁଲଗୁଣମୟୀଂ ପ୍ରାଣନାଥାଂ ପ୍ରଣୌମି ॥ 9 ॥

ୟେଭ୍ୟୋଽସୂୟଦ୍ଭିରୁଚ୍ଚୈଃ ସପଦି ପଦମୁରୁ ତ୍ୟଜ୍ୟତେ ଦୈତ୍ୟଵର୍ଗୈ-
-ର୍ୟେଭୋ ଧର୍ତୁଂ ଚ ମୂର୍ଧ୍ନା ସ୍ପୃହୟତି ସତତଂ ସର୍ଵଗୀର୍ଵାଣଵର୍ଗଃ ।
ନିତ୍ୟଂ ନିର୍ମୂଲୟେୟୁର୍ନିଚିତତରମମୀ ଭକ୍ତିନିଘ୍ନାତ୍ମନାଂ ନଃ
ପଦ୍ମାକ୍ଷସ୍ୟାଂଘ୍ରିପଦ୍ମଦ୍ଵୟତଲନିଲୟାଃ ପାଂସଵଃ ପାପପଂକମ୍ ॥ 10 ॥

ରେଖା ଲେଖାଦିଵଂଦ୍ୟାଶ୍ଚରଣତଲଗତାଶ୍ଚକ୍ରମତ୍ସ୍ୟାଦିରୂପାଃ
ସ୍ନିଗ୍ଧାଃ ସୂକ୍ଷ୍ମାଃ ସୁଜାତା ମୃଦୁଲଲିତତରକ୍ଷୌମସୂତ୍ରାୟମାଣାଃ ।
ଦଦ୍ୟୁର୍ନୋ ମଂଗଳାନି ଭ୍ରମରଭରଜୁଷା କୋମଲେନାବ୍ଧିଜାୟାଃ
କମ୍ରେଣାମ୍ରେଡ୍ୟମାନାଃ କିସଲୟମୃଦୁନା ପାଣିନା ଚକ୍ରପାଣେଃ ॥ 11 ॥

ୟସ୍ମାଦାକ୍ରାମତୋ ଦ୍ୟାଂ ଗରୁଡମଣିଶିଲାକେତୁଦଂଡାୟମାନା
ଦାଶ୍ଚ୍ୟୋତଂତୀ ବଭାସେ ସୁରସରିଦମଲା ଵୈଜୟଂତୀଵ କାଂତା ।
ଭୂମିଷ୍ଠୋ ୟସ୍ତଥାନ୍ୟୋ ଭୁଵନଗୃହବୃହତ୍‍ସ୍ତଂଭଶୋଭାଂ ଦଧୌ ନଃ
ପାତାମେତୌ ପାୟୋଜୋଦରଲଲିତତଲୌ ପଂକଜାକ୍ଷସ୍ୟ ପାଦୌ ॥ 12 ॥

ଆକ୍ରାମଦ୍ଭ୍ୟାଂ ତ୍ରିଲୋକୀମସୁରସୁରପତୀ ତତ୍କ୍ଷଣାଦେଵ ନୀତୌ
ୟାଭ୍ୟାଂ ଵୈରୋଚନୀଂଦ୍ରୌ ୟୁଗପଦପି ଵିପତ୍ସଂପଦୋରେକଧାମଃ ।
ତାଭ୍ୟାଂ ତାମ୍ରୋଦରାଭ୍ୟାଂ ମୁହୁରହମଜିତସ୍ୟାଂଚିତାଭ୍ୟାମୁଭାଭ୍ୟାଂ
ପ୍ରାଜ୍ୟୈଶ୍ଵର୍ୟପ୍ରଦାଭ୍ୟାଂ ପ୍ରଣତିମୁପଗତଃ ପାଦପଂକେରୁହାଭ୍ୟାମ୍ ॥ 13 ॥

ୟେଭ୍ୟୋ ଵର୍ଣଶ୍ଚତୁର୍ଥଶ୍ଚରମତ ଉଦଭୂଦାଦିସର୍ଗେ ପ୍ରଜାନାଂ
ସାହସ୍ରୀ ଚାପି ସଂଖ୍ୟା ପ୍ରକଟମଭିହିତା ସର୍ଵଵେଦେଷୁ ୟେଷାମ୍ ।
ପ୍ରାପ୍ତା ଵିଶ୍ଵଂଭରା ୟୈରତିଵିତତତନୋର୍ଵିଶ୍ଵମୂର୍ତେର୍ଵିରାଜୋ
ଵିଷ୍ଣୋସ୍ତେଭ୍ୟୋ ମହଦ୍ଭ୍ୟଃ ସତତମପି ନମୋଽସ୍ତ୍ଵଂଘ୍ରିପଂକେରୁହେଭ୍ୟଃ ॥ 14 ॥

ଵିଷ୍ଣୋଃ ପାଦଦ୍ଵୟାଗ୍ରେ ଵିମଲନଖମଣିଭ୍ରାଜିତା ରାଜତେ ୟା
ରାଜୀଵସ୍ୟେଵ ରମ୍ୟା ହିମଜଲକଣିକାଲଂକୃତାଗ୍ରା ଦଲାଲୀ ।
ଅସ୍ମାକଂ ଵିସ୍ମୟାର୍ହାଣ୍ୟଖିଲଜନମନ ପ୍ରାର୍ଥନୀୟା ହି ସେୟଂ
ଦଦ୍ୟାଦାଦ୍ୟାନଵଦ୍ୟା ତତିରତିରୁଚିରା ମଂଗଳାନ୍ୟଂଗୁଳୀନାମ୍ ॥ 15 ॥

ୟସ୍ୟାଂ ଦୃଷ୍ଟ୍ଵାମଲାୟାଂ ପ୍ରତିକୃତିମମରାଃ ସଂଭଵଂତ୍ୟାନମଂତଃ
ସେଂଦ୍ରାଃ ସାଂଦ୍ରୀକୃତେର୍ଷ୍ୟାସ୍ତ୍ଵପରସୁରକୁଲାଶଂକୟାତଂକଵଂତଃ ।
ସା ସଦ୍ୟଃ ସାତିରେକାଂ ସକଲସୁଖକରୀଂ ସଂପଦଂ ସାଧୟେନ୍ନ-
-ଶ୍ଚଂଚଚ୍ଚାର୍ଵଂଶୁଚକ୍ରା ଚରଣନଳିନୟୋଶ୍ଚକ୍ରପାଣେର୍ନଖାଲୀ ॥ 16 ॥

ପାଦାଂଭୋଜନ୍ମସେଵାସମଵନତସୁରଵ୍ରାତଭାସ୍ଵତ୍କିରୀଟ-
-ପ୍ରତ୍ୟୁପ୍ତୋଚ୍ଚାଵଚାଶ୍ମପ୍ରଵରକରଗଣୈଶ୍ଚିଂତିତଂ ୟଦ୍ଵିଭାତି ।
ନମ୍ରାଂଗାନାଂ ହରେର୍ନୋ ହରିଦୁପଲମହାକୂର୍ମସୌଂଦର୍ୟହାରି-
-ଚ୍ଛାୟଂ ଶ୍ରେୟଃପ୍ରଦାୟି ପ୍ରପଦୟୁଗମିଦଂ ପ୍ରାପୟେତ୍ପାପମଂତମ୍ ॥ 17 ॥

ଶ୍ରୀମତ୍ୟୌ ଚାରୁଵୃତ୍ତେ କରପରିମଲନାନଂଦହୃଷ୍ଟେ ରମାୟାଃ
ସୌଂଦର୍ୟାଢ୍ୟେଂଦ୍ରନୀଲୋପଲରଚିତମହାଦଂଡୟୋଃ କାଂତିଚୋରେ ।
ସୂରୀଂଦ୍ରୈଃ ସ୍ତୂୟମାନେ ସୁରକୁଲସୁଖଦେ ସୂଦିତାରାତିସଂଘେ
ଜଂଘେ ନାରାୟଣୀୟେ ମୁହୁରପି ଜୟତାମସ୍ମଦଂହୋ ହରଂତ୍ୟୌ ॥ 18 ॥

ସମ୍ୟକ୍ସାହ୍ୟଂ ଵିଧାତୁଂ ସମମିଵ ସତତଂ ଜଂଘୟୋଃ ଖିନ୍ନୟୋର୍ୟେ
ଭାରୀଭୂତୋରୁଦଂଡଦ୍ଵୟଭରଣକୃତୋତ୍ତଂଭଭାଵଂ ଭଜେତେ ।
ଚିତ୍ତାଦର୍ଶଂ ନିଧାତୁଂ ମହିତମିଵ ସତାଂ ତେ ସମୁଦ୍ରାୟମାନେ
ଵୃତ୍ତାକାରେ ଵିଧତ୍ତାଂ ହ୍ୟଦି ମୁଦମଜିତସ୍ୟାନିଶଂ ଜାନୁନୀ ନଃ ॥ 19 ॥

ଦେଵୋ ଭୀତିଂ ଵିଧାତୁଃ ସପଦି ଵିଦଧତୌ କୈଟଭାଖ୍ୟଂ ମଧୁଂ ଚା-
-ପ୍ୟାରୋପ୍ୟାରୂଢଗର୍ଵାଵଧିଜଲଧି ୟୟୋରାଦିଦୈତ୍ୟୌ ଜଘାନ ।
ଵୃତ୍ତାଵନ୍ୟୋନ୍ୟତୁଲ୍ୟୌ ଚତୁରମୁପଚୟଂ ବିଭ୍ରତାଵଭ୍ରନୀଲା-
-ଵୂରୂ ଚାରୂ ହରେସ୍ତୌ ମୁଦମତିଶୟିନୀଂ ମାନସେ ନୋ ଵିଧତ୍ତାମ୍ ॥ 20 ॥

ପୀତେନ ଦ୍ୟୋତତେ ୟଚ୍ଚତୁରପରିହିତେନାଂବରେଣାତ୍ୟୁଦାରଂ
ଜାତାଲଂକାରୟୋଗଂ ଜଲମିଵ ଜଲଧେର୍ବାଡବାଗ୍ନିପ୍ରଭାଭିଃ ।
ଏତତ୍ପାତିତ୍ୟଦାନ୍ନୋ ଜଘନମତିଘନାଦେନସୋ ମାନନୀୟଂ
ସାତତ୍ୟେନୈଵ ଚେତୋଵିଷୟମଵତରତ୍ପାତୁ ପୀତାଂବରସ୍ୟ ॥ 21 ॥

ୟସ୍ୟା ଦାମ୍ନା ତ୍ରିଧାମ୍ନୋ ଜଘନକଲିତୟା ଭ୍ରାଜତେଽଂଗଂ ୟଥାବ୍ଧେ-
-ର୍ମଧ୍ୟସ୍ଥୋ ମଂଦରାଦ୍ରିର୍ଭୁଜଗପତିମହାଭୋଗସଂନଦ୍ଧମଧ୍ୟଃ ।
କାଂଚୀ ସା କାଂଚନାଭା ମଣିଵରକିରଣୈରୁଲ୍ଲସଦ୍ଭିଃ ପ୍ରଦୀପ୍ତା
କଲ୍ୟାଂ କଳ୍ୟାଣଦାତ୍ରୀଂ ମମ ମତିମନିଶଂ କମ୍ରରୂପାଂ କରୋତୁ ॥ 22 ॥

ଉନ୍ନମ୍ରଂ କମ୍ରମୁଚ୍ଚୈରୁପଚିତମୁଦଭୂଦ୍ୟତ୍ର ପତ୍ରୈର୍ଵିଚିତ୍ରୈଃ
ପୂର୍ଵଂ ଗୀର୍ଵାଣପୂଜ୍ୟଂ କମଲଜମଧୁପସ୍ୟାସ୍ପଦଂ ତତ୍ପୟୋଜମ୍ ।
ୟସ୍ମିନ୍ନୀଲାଶ୍ମନୀଲୈସ୍ତରଲରୁଚିଜଲୈଃ ପୂରିତେ କେଲିବୁଦ୍ଧ୍ୟା
ନାଲୀକାକ୍ଷସ୍ୟ ନାଭୀସରସି ଵସତୁ ନଶ୍ଚିତ୍ତହଂସଶ୍ଚିରାୟ ॥ 23 ॥

ପାତାଲଂ ୟସ୍ୟ ନାଲଂ ଵଲୟମପି ଦିଶାଂ ପତ୍ରପଂକ୍ତୀର୍ନଗେଂଦ୍ରା-
-ନ୍ଵିଦ୍ଵାଂସଃ କେସରାଲୀର୍ଵିଦୁରିହ ଵିପୁଲାଂ କର୍ଣିକାଂ ସ୍ଵର୍ଣଶୈଲମ୍ ।
ଭୂୟାଦ୍ଗାୟତ୍ସ୍ଵୟଂଭୂମଧୁକରଭଵନଂ ଭୂମୟଂ କାମଦଂ ନୋ
ନାଲୀକଂ ନାଭିପଦ୍ମାକରଭଵମୁରୁ ତନ୍ନାଗଶୟ୍ୟସ୍ୟ ଶୌରେଃ ॥ 24 ॥

ଆଦୌ କଲ୍ପସ୍ୟ ୟସ୍ମାତ୍ପ୍ରଭଵତି ଵିତତଂ ଵିଶ୍ଵମେତଦ୍ଵିକଲ୍ପୈଃ
କଲ୍ପାଂତେ ୟସ୍ୟ ଚାଂତ ପ୍ରଵିଶତି ସକଲଂ ସ୍ଥାଵରଂ ଜଂଗମଂ ଚ ।
ଅତ୍ୟଂତାଚିଂତ୍ୟମୂର୍ତେଶ୍ଚିରତରମଜିତସ୍ୟାଂତରିକ୍ଷସ୍ଵରୂପେ
ତସ୍ମିନ୍ନସ୍ମାକମଂତଃକରଣମତିମୁଦା କ୍ରୀଡତାତ୍କ୍ରୋଡଭାଗେ ॥ 25 ॥

କାଂତ୍ୟଂଭଃପୂରପୂର୍ଣେ ଲସଦସିତଵଲୀଭଂଗଭାସ୍ଵତ୍ତରଂଗେ
ଗଂଭୀରାକାରନାଭୀଚତୁରତରମହାଵର୍ତଶୋଭିନ୍ୟୁଦାରେ ।
କ୍ରୀଡତ୍ଵାନଦ୍ଵହେମୋଦରନହନମହାବାଡବାଗ୍ନିପ୍ରଭାଢ୍ୟେ
କାମଂ ଦାମୋଦରୀୟୋଦରସଲିଲନିଧୌ ଚିତ୍ତମତ୍ସ୍ୟଶ୍ଚିରଂ ନଃ ॥ 26 ॥

ନାଭୀନାଲୀକମୂଲାଦଧିକପରିମଳୋନ୍ମୋହିତାନାମଲୀନାଂ
ମାଲା ନୀଲେଵ ୟାଂତୀ ସ୍ଫୁରତି ରୁଚିମତୀ ଵକ୍ତ୍ରପଦ୍ମୋନ୍ମୁଖୀ ୟା ।
ରମ୍ୟା ସା ରୋମରାଜିର୍ମହିତରୁଚିକରୀ ମଧ୍ୟଭାଗସ୍ୟ ଵିଷ୍ଣୋ-
-ଶ୍ଚିତ୍ତସ୍ଥା ମା ଵିରଂସୀଚ୍ଚିରତରମୁଚିତାଂ ସାଧୟଂତୀ ଶ୍ରିୟଂ ନଃ ॥ 27 ॥

ସଂସ୍ତୀର୍ଣଂ କୌସ୍ତୁଭାଂଶୁପ୍ରସରକିସଲୟୈର୍ମୁଗ୍ଧମୁକ୍ତାଫଲାଢ୍ୟଂ
ଶ୍ରୀଵତ୍ସୋଲ୍ଲାସି ଫୁଲ୍ଲପ୍ରତିନଵଵନମାଲାଂକି ରାଜଦ୍ଭୁଜାଂତମ୍ ।
ଵକ୍ଷଃ ଶ୍ରୀଵୃକ୍ଷକାଂତଂ ମଧୁକରନିକରଶ୍ୟାମଲଂ ଶାର୍ଙ୍ଗପାଣେଃ
ସଂସାରାଧ୍ଵଶ୍ରମାର୍ତୈରୁପଵନମିଵ ୟତ୍ସେଵିତଂ ତତ୍ପ୍ରପଦ୍ୟେ ॥ 28 ॥

କାଂତଂ ଵକ୍ଷୋ ନିତାଂତଂ ଵିଦଧଦିଵ ଗଲଂ କାଲିମା କାଲଶତ୍ରୋ-
-ରିଂଦୋର୍ବିଂବଂ ୟଥାଂକୋ ମଧୁପ ଇଵ ତରୋର୍ମଂଜରୀଂ ରାଜତେ ୟଃ ।
ଶ୍ରୀମାନ୍ନିତ୍ୟଂ ଵିଧେୟାଦଵିରଲମିଲିତଃ କୌସ୍ତୁଭଶ୍ରୀପ୍ରତାନୈଃ
ଶ୍ରୀଵତ୍ସଃ ଶ୍ରୀପତେଃ ସ ଶ୍ରିୟ ଇଵ ଦୟିତୋ ଵତ୍ସ ଉଚ୍ଚୈଃଶ୍ରିୟଂ ନଃ ॥ 29 ॥

ସଂଭୂୟାଂଭୋଧିମଧ୍ୟାତ୍ସପଦି ସହଜୟା ୟଃ ଶ୍ରିୟା ସଂନିଧତ୍ତେ
ନୀଲେ ନାରାୟଣୋରଃସ୍ଥଲଗଗନତଲେ ହାରତାରୋପସେଵ୍ୟେ ।
ଆଶାଃ ସର୍ଵାଃ ପ୍ରକାଶା ଵିଦଧଦପିଦଧଚ୍ଚାତ୍ମଭାସାନ୍ୟତେଜା-
-ସ୍ୟାଶ୍ଚର୍ୟସ୍ୟାକରୋ ନୋ ଦ୍ୟୁମଣିରିଵ ମଣିଃ କୌସ୍ତୁଭଃ ସୋଽସ୍ତୁଭୂତ୍ୟୈ ॥ 30 ॥

ୟା ଵାୟାଵାନୁକୂଲ୍ୟାତ୍ସରତି ମଣିରୁଚା ଭାସମାନା ସମାନା
ସାକଂ ସାକଂପମଂସେ ଵସତି ଵିଦଧତୀ ଵାସୁଭଦ୍ରଂ ସୁଭଦ୍ରମ୍ ।
ସାରଂ ସାରଂଗସଂଘୈର୍ମୁଖରିତକୁସୁମା ମେଚକାଂତା ଚ କାଂତା
ମାଲା ମାଲାଲିତାସ୍ମାନ୍ନ ଵିରମତୁ ସୁଖୈର୍ୟୋଜୟଂତୀ ଜୟଂତୀ ॥ 31 ॥

ହାରସ୍ୟୋରୁପ୍ରଭାଭିଃ ପ୍ରତିନଵଵନମାଲାଶୁଭିଃ ପ୍ରାଂଶୁରୂପୈଃ
ଶ୍ରୀଭିଶ୍ଚାପ୍ୟଂଗଦାନାଂ କବଲିତରୁଚି ୟନ୍ନିଷ୍କଭାଭିଶ୍ଚ ଭାତି ।
ବାହୁଲ୍ୟେନୈଵ ବଦ୍ଧାଂଜଲିପୁଟମଜିତସ୍ୟାଭିୟାଚାମହେ ତ-
-ଦ୍ଵଂଧାର୍ତିଂ ବାଧତାଂ ନୋ ବହୁଵିହତିକରୀଂ ବଂଧୁରଂ ବାହୁମୂଲମ୍ ॥ 32 ॥

ଵିଶ୍ଵତ୍ରାଣୈକଦୀକ୍ଷାସ୍ତଦନୁଗୁଣଗୁଣକ୍ଷତ୍ରନିର୍ମାଣଦକ୍ଷାଃ
କର୍ତାରୋ ଦୁର୍ନିରୂପସ୍ଫୁଟଗୁଣୟଶସା କର୍ମଣାମଦ୍ଭୁତାନାମ୍ ।
ଶାର୍ଙ୍ଗଂ ବାଣଂ କୃପାଣଂ ଫଲକମରିଗଦେ ପଦ୍ମଶଂଖୌ ସହସ୍ରଂ
ବିଭ୍ରାଣାଃ ଶସ୍ତ୍ରଜାଲଂ ମମ ଦଧତୁ ହରେର୍ବାହଵୋ ମୋହହାନିମ୍ ॥ 33 ॥

କଂଠାକଲ୍ପୋଦ୍ଗତୈର୍ୟଃ କନକମୟଲସତ୍କୁଂଡଲୋତ୍ଥୈରୁଦାରୈ-
-ରୁଦ୍ୟୋତୈଃ କୌସ୍ତୁଭସ୍ୟାପ୍ୟୁରୁଭିରୁପଚିତଶ୍ଚିତ୍ରଵର୍ଣୋ ଵିଭାତି ।
କଂଠାଶ୍ଲେଷେ ରମାୟାଃ କରଵଲୟପଦୈର୍ମୁଦ୍ରିତେ ଭଦ୍ରରୂପେ
ଵୈକୁଂଠୀୟେଽତ୍ର କଂଠେ ଵସତୁ ମମ ମତିଃ କୁଂଠଭାଵଂ ଵିହାୟ ॥ 34 ॥

ପଦ୍ମାନଂଦପ୍ରଦାତା ପରିଲସଦରୁଣଶ୍ରୀପରୀତାଗ୍ରଭାଗଃ
କାଲେ କାଲେ ଚ କଂବୁପ୍ରଵରଶଶଧରାପୂରଣେ ୟଃ ପ୍ରଵୀଣଃ ।
ଵକ୍ତ୍ରାକାଶାଂତରସ୍ଥସ୍ତିରୟତି ନିତରାଂ ଦଂତତାରୌଘଶୋଭାଂ
ଶ୍ରୀଭର୍ତୁର୍ଦଂତଵାସୋଦ୍ୟୁମଣିରଘତମୋନାଶନାୟାସ୍ତ୍ଵସୌ ନଃ ॥ 35 ॥

ନିତ୍ୟଂ ସ୍ନେହାତିରେକାନ୍ନିଜକମିତୁରଲଂ ଵିପ୍ରୟୋଗାକ୍ଷମା ୟା
ଵକ୍ତ୍ରେଂଦୋରଂତରାଲେ କୃତଵସତିରିଵାଭାତି ନକ୍ଷତ୍ରରାଜିଃ ।
ଲକ୍ଷ୍ମୀକାଂତସ୍ୟ କାଂତାକୃତିରତିଵିଲସନ୍ମୁଗ୍ଧମୁକ୍ତାଵଲିଶ୍ରୀ-
-ର୍ଦଂତାଲୀ ସଂତତଂ ସା ନତିନୁତିନିରତାନକ୍ଷତାନ୍ରକ୍ଷତାନ୍ନଃ ॥ 36 ॥

ବ୍ରହ୍ମନ୍ବ୍ରହ୍ମଣ୍ୟଜିହ୍ମାଂ ମତିମପି କୁରୁଷେ ଦେଵ ସଂଭାଵୟେ ତ୍ଵାଂ
ଶଂଭୋ ଶକ୍ର ତ୍ରିଲୋକୀମଵସି କିମମରୈର୍ନାରଦାଦ୍ୟାଃ ସୁଖଂ ଵଃ ।
ଇତ୍ଥଂ ସେଵାଵନମ୍ରଂ ସୁରମୁନିନିକରଂ ଵୀକ୍ଷ୍ୟ ଵିଷ୍ଣୋଃ ପ୍ରସନ୍ନ-
-ସ୍ୟାସ୍ୟେଂଦୋରାସ୍ରଵଂତୀ ଵରଵଚନସୁଧାହ୍ଲାଦୟେନ୍ମାନସଂ ନଃ ॥ 37 ॥

କର୍ଣସ୍ଥସ୍ଵର୍ଣକମ୍ରୋଜ୍ଜ୍ଵଲମକରମହାକୁଂଡଲପ୍ରୋତଦୀପ୍ୟ-
-ନ୍ମାଣିକ୍ୟଶ୍ରୀପ୍ରତାନୈଃ ପରିମିଲିତମଲିଶ୍ୟାମଲଂ କୋମଲଂ ୟତ୍ ।
ପ୍ରୋଦ୍ୟତ୍ସୂର୍ୟାଂଶୁରାଜନ୍ମରକତମୁକୁରାକାରଚୋରଂ ମୁରାରେ-
-ର୍ଗାଢାମାଗାମିନୀଂ ନଃ ଶମୟତୁ ଵିପଦଂ ଗଂଡୟୋର୍ମଂଡଲଂ ତତ୍ ॥ 38 ॥

ଵକ୍ତ୍ରାଂଭୋଜେ ଲସଂତଂ ମୁହୁରଧରମଣିଂ ପକ୍ଵବିଂବାଭିରାମଂ
ଦୃଷ୍ଟ୍ଵା ଦ୍ରଷ୍ଟୁଂ ଶୁକସ୍ୟ ସ୍ଫୁଟମଵତରତସ୍ତୁଂଡଦଂଡାୟତେ ୟଃ ।
ଘୋଣଃ ଶୋଣୀକୃତାତ୍ମା ଶ୍ରଵଣୟୁଗଳସତ୍କୁଂଡଲୋସ୍ରୈର୍ମୁରାରେଃ
ପ୍ରାଣାଖ୍ୟସ୍ୟାନିଲସ୍ୟ ପ୍ରସରଣସରଣିଃ ପ୍ରାଣଦାନାୟ ନଃ ସ୍ୟାତ୍ ॥ 39 ॥

ଦିକ୍କାଲୌ ଵେଦୟଂତୌ ଜଗତି ମୁହୁରିମୌ ସଂଚରଂତୌ ରଵୀଂଦୂ
ତ୍ରୈଲୋକ୍ୟାଲୋକଦୀପାଵଭିଦଧତି ୟୟୋରେଵ ରୂପଂ ମୁନୀଂଦ୍ରାଃ ।
ଅସ୍ମାନବ୍ଜପ୍ରଭେ ତେ ପ୍ରଚୁରତରକୃପାନିର୍ଭରଂ ପ୍ରେକ୍ଷମାଣେ
ପାତାମାତାମ୍ରଶୁକ୍ଲାସିତରୁଚିରୁଚିରେ ପଦ୍ମନେତ୍ରସ୍ୟ ନେତ୍ରେ ॥ 40 ॥

ପାତାତ୍ପାତାଲପାତାତ୍ପତଗପତିଗତେର୍ଭ୍ରୂୟୁଗଂ ଭୁଗ୍ନମଧ୍ୟଂ
ୟେନେଷଚ୍ଚାଲିତେନ ସ୍ଵପଦନିୟମିତାଃ ସାସୁରା ଦେଵସଂଘାଃ ।
ନୃତ୍ୟଲ୍ଲାଲାଟରଂଗେ ରଜନିକରତନୋରର୍ଧଖଂଡାଵଦାତେ
କାଲଵ୍ୟାଲଦ୍ଵୟଂ ଵା ଵିଲସତି ସମୟା ଵାଲିକାମାତରଂ ନଃ ॥ 41 ॥

ଲକ୍ଷ୍ମାକାରାଲକାଲିସ୍ଫୁରଦଲିକଶଶାଂକାର୍ଧସଂଦର୍ଶମୀଲ-
-ନ୍ନେତ୍ରାଂଭୋଜପ୍ରବୋଧୋତ୍ସୁକନିଭୃତତରାଲୀନଭୃଂଗଚ୍ଛଟାଭେ ।
ଲକ୍ଷ୍ମୀନାଥସ୍ୟ ଲକ୍ଷ୍ୟୀକୃତଵିବୁଧଗଣାପାଂଗବାଣାସନାର୍ଧ-
-ଚ୍ଛାୟେ ନୋ ଭୂରିଭୂତିପ୍ରସଵକୁଶଲତେ ଭ୍ରୂଲତେ ପାଲୟେତାମ୍ ॥ 42 ॥

ରୂକ୍ଷସ୍ମାରେକ୍ଷୁଚାପଚ୍ୟୁତଶରନିକରକ୍ଷୀଣଲକ୍ଷ୍ମୀକଟାକ୍ଷ-
-ପ୍ରୋତ୍ଫୁଲ୍ଲତ୍ପଦ୍ମମାଲାଵିଲସିତମହିତସ୍ଫାଟିକୈଶାନଲିଂଗମ୍ ।
ଭୂୟାଦ୍ଭୂୟୋ ଵିଭୂତ୍ୟୈ ମମ ଭୁଵନପତେର୍ଭ୍ରୂଲତାଦ୍ଵଂଦ୍ଵମଧ୍ୟା-
-ଦୁତ୍ଥଂ ତତ୍ପୁଂଡ୍ରମୂର୍ଧ୍ଵଂ ଜନିମରଣତମଃଖଂଡନଂ ମଂଡନଂ ଚ ॥ 43 ॥

ପୀଠୀଭୂତାଲକାଂତେ କୃତମକୁଟମହାଦେଵଲିଂଗପ୍ରତିଷ୍ଠେ
ଲାଲାଟେ ନାଟ୍ୟରଂଗେ ଵିକଟତରତଟେ କୈଟଭାରେଶ୍ଚିରାୟ ।
ପ୍ରୋଦ୍ଧାଟ୍ୟୈଵାତ୍ମତଂଦ୍ରୀପ୍ରକଟପଟକୁଟୀଂ ପ୍ରସ୍ଫୁରଂତୀଂ ସ୍ଫୁଟାଂଗଂ
ପଟ୍ଵୀୟଂ ଭାଵନାଖ୍ୟାଂ ଚଟୁଲମତିନଟୀ ନାଟିକାଂ ନାଟୟେନ୍ନଃ ॥ 44 ॥

ମାଲାଲୀଵାଲିଧାମ୍ନଃ କୁଵଲୟକଲିତା ଶ୍ରୀପତେଃ କୁଂତଲାଲୀ
କାଲିଂଦ୍ୟାରୁହ୍ୟ ମୂର୍ଧ୍ନୋ ଗଲତି ହରଶିରଃସ୍ଵର୍ଧୁନୀସ୍ପର୍ଧୟା ନୁ ।
ରାହୁର୍ଵା ୟାତି ଵକ୍ତ୍ରଂ ସକଲଶଶିକଲାଭ୍ରାଂତିଲୋଲାଂତରାତ୍ମା
ଲୋକୈରାଲୋକ୍ୟତେ ୟା ପ୍ରଦିଶତୁ ସତତଂ ସାଖିଲଂ ମଂଗଳଂ ନଃ ॥ 45 ॥

ସୁପ୍ତାକାରାଃ ପ୍ରସୁପ୍ତେ ଭଗଵତି ଵିବୁଧୈରପ୍ୟଦୃଷ୍ଟସ୍ଵରୂପା
ଵ୍ୟାପ୍ତଵ୍ୟୋମାଂତରାଲାସ୍ତରଲମଣିରୁଚା ରଂଜିତାଃ ସ୍ପଷ୍ଟଭାସଃ ।
ଦେହଚ୍ଛାୟୋଦ୍ଗମାଭା ରିପୁଵପୁରଗୁରୁପ୍ଲୋଷରୋଷାଗ୍ନିଧୂମ୍ୟାଃ
କେଶାଃ କେଶିଦ୍ଵିଷୋ ନୋ ଵିଦଧତୁ ଵିପୁଲକ୍ଲେଶପାଶପ୍ରଣାଶମ୍ ॥ 46 ॥

ୟତ୍ର ପ୍ରତ୍ୟୁପ୍ତରତ୍ନପ୍ରଵରପରିଲସଦ୍ଭୂରିରୋଚିଷ୍ପ୍ରତାନ-
-ସ୍ଫୂର୍ତ୍ୟାଂ ମୂର୍ତିର୍ମୁରାରେର୍ଦ୍ୟୁମଣିଶତଚିତଵ୍ୟୋମଵଦ୍ଦୁର୍ନିରୀକ୍ଷ୍ୟା ।
କୁର୍ଵତ୍ପାରେପୟୋଧି ଜ୍ଵଲଦକୃଶଶିଖାଭାସ୍ଵଦୌର୍ଵାଗ୍ନିଶଂକାଂ
ଶଶ୍ଵନ୍ନଃ ଶର୍ମ ଦିଶ୍ୟାତ୍କଲିକଲୁଷତମଃପାଟନଂ ତତ୍କିରୀଟମ୍ ॥ 47 ॥

ଭ୍ରାଂତ୍ଵା ଭ୍ରାଂତ୍ଵା ୟଦଂତସ୍ତ୍ରିଭୁଵନଗୁରୁରପ୍ୟବ୍ଦକୋଟୀରନେକା
ଗଂତୁଂ ନାଂତଂ ସମର୍ଥୋ ଭ୍ରମର ଇଵ ପୁନର୍ନାଭିନାଲୀକନାଲାତ୍ ।
ଉନ୍ମଜ୍ଜନ୍ନୂର୍ଜିତଶ୍ରୀସ୍ତ୍ରିଭୁଵନମପରଂ ନିର୍ମମେ ତତ୍ସଦୃକ୍ଷଂ
ଦେହାଂଭୋଧିଃ ସ ଦେୟାନ୍ନିରଵଧିରମୃତଂ ଦୈତ୍ୟଵିଦ୍ଵେଷିଣୋ ନଃ ॥ 48 ॥

ମତ୍ସ୍ୟଃ କୂର୍ମୋ ଵରାହୋ ନରହରିଣପତିର୍ଵାମନୋ ଜାମଦଗ୍ନ୍ୟଃ
କାକୁତ୍ସ୍ଥଃ କଂସଘାତୀ ମନସିଜଵିଜୟୀ ୟଶ୍ଚ କଲ୍କିର୍ଭଵିଷ୍ୟନ୍ ।
ଵିଷ୍ଣୋରଂଶାଵତରା ଭୁଵନହିତକରା ଧର୍ମସଂସ୍ଥାପନାର୍ଥାଃ
ପାୟାସୁର୍ମାଂ ତ ଏତେ ଗୁରୁତରକରୁଣାଭାରଖିନ୍ନାଶୟା ୟେ ॥ 49 ॥

ୟସ୍ମାଦ୍ଵାଚୋ ନିଵୃତ୍ତାଃ ସମମପି ମନସା ଲକ୍ଷଣାମୀକ୍ଷମାଣାଃ
ସ୍ଵାର୍ଥାଲାଭାତ୍ପରାର୍ଥଵ୍ୟପଗମକଥନଶ୍ଲାଘିନୋ ଵେଦଵାଦାଃ ।
ନିତ୍ୟାନଂଦଂ ସ୍ଵସଂଵିନ୍ନିରଵଧିଵିମଲସ୍ଵାଂତସଂକ୍ରାଂତବିଂବ-
-ଚ୍ଛାୟାପତ୍ୟାପି ନିତ୍ୟଂ ସୁଖୟତି ୟମିନୋ ୟତ୍ତଦଵ୍ୟାନ୍ମହୋ ନଃ ॥ 50 ॥

ଆପାଦାଦା ଚ ଶୀର୍ଷାଦ୍ଵପୁରିଦମନଘଂ ଵୈଷ୍ଣଵଂ ୟଃ ସ୍ଵଚିତ୍ତେ
ଧତ୍ତେ ନିତ୍ୟଂ ନିରସ୍ତାଖିଲକଲିକଲୁଷ ସଂତତାଂତଃ ପ୍ରମୋଦମ୍ ।
ଜୁହ୍ଵଜ୍ଜିହ୍ଵାକୃଶାନୌ ହରିଚରିତହଵିଃ ସ୍ତୋତ୍ରମଂତ୍ରାନୁପାଠୈ-
-ସ୍ତତ୍ପାଦାଂଭୋରୁହାଭ୍ୟାଂ ସତତମପି ନମସ୍କୁର୍ମହେ ନିର୍ମଲାଭ୍ୟାମ୍ ॥ 51 ॥

ମୋଦାତ୍ପାଦାଦିକେଶସ୍ତୁତିମିତିରଚିତା କୀର୍ତୟିତ୍ଵା ତ୍ରିଧାମ୍ନ
ପାଦାବ୍ଜଦ୍ଵଂଦ୍ଵସେଵାସମୟନତମତିର୍ମସ୍ତକେନାନମେଦ୍ୟ ।
ଉନ୍ମୁଚ୍ୟୈଵାତ୍ମନୈନୋନିଚୟକଵଚକ ପଂଚତାମେତ୍ୟ ଭାନୋ-
-ର୍ବିଂବାଂତର୍ଗୋଚର ସ ପ୍ରଵିଶତି ପରମାନଂଦମାତ୍ମସ୍ଵରୂପମ୍ ॥ 52 ॥

ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ ଶ୍ରୀ ଵିଷ୍ଣୁ ପାଦାଦିକେଶାଂତଵର୍ଣଣ ସ୍ତୋତ୍ରଂ ସଂପୂର୍ଣମ୍ ।