અથ નખસ્તુતિઃ
પાંત્વસ્માન્ પુરુહૂતવૈરિબલવન્માતંગમાદ્યદ્ઘટા-
-કુંભોચ્ચાદ્રિવિપાટનાધિકપટુ પ્રત્યેક વજ્રાયિતાઃ ।
શ્રીમત્કંઠીરવાસ્યપ્રતતસુનખરા દારિતારાતિદૂર-
-પ્રધ્વસ્તધ્વાંતશાંતપ્રવિતતમનસા ભાવિતા ભૂરિભાગૈઃ ॥ 1 ॥

લક્ષ્મીકાંત સમંતતોઽપિ કલયન્ નૈવેશિતુસ્તે સમં
પશ્યામ્યુત્તમવસ્તુ દૂરતરતોપાસ્તં રસો યોઽષ્ટમઃ ।
યદ્રોષોત્કર દક્ષ નેત્ર કુટિલ પ્રાંતોત્થિતાગ્નિ સ્ફુરત્
ખદ્યોતોપમ વિસ્ફુલિંગભસિતા બ્રહ્મેશશક્રોત્કરાઃ ॥ 2 ॥

અથ વાયુસ્તુતિઃ
શ્રીમદ્વિષ્ણ્વંઘ્રિનિષ્ઠાતિગુણગુરુતમશ્રીમદાનંદતીર્થ-
-ત્રૈલોક્યાચાર્યપાદોજ્જ્વલજલજલસત્પાંસવોઽસ્માન્ પુનંતુ ।
વાચાં યત્ર પ્રણેત્રી ત્રિભુવનમહિતા શારદા શારદેંદુ-
-જ્યોત્સ્નાભદ્રસ્મિતશ્રીધવળિતકકુભા પ્રેમભારં બભાર ॥ 1 ॥

ઉત્કંઠાકુંઠકોલાહલજવવિજિતાજસ્રસેવાનુવૃદ્ધ-
-પ્રાજ્ઞાત્મજ્ઞાનધૂતાંધતમસસુમનોમૌલિરત્નાવળીનામ્ ।
ભક્ત્યુદ્રેકાવગાઢપ્રઘટનસધટાત્કારસંઘૃષ્યમાણ-
પ્રાંતપ્રાગ્ર્યાંઘ્રિપીઠોત્થિતકનકરજઃપિંજરારંજિતાશાઃ ॥ 2 ॥

જન્માધિવ્યાધ્યુપાધિપ્રતિહતિવિરહપ્રાપકાણાં ગુણાનાં
અગ્ર્યાણામર્પકાણાં ચિરમુદિતચિદાનંદસંદોહદાનામ્ ।
એતેષામેષ દોષપ્રમુષિતમનસાં દ્વેષિણાં દૂષકાણાં
દૈત્યાનામાર્તિમંધે તમસિ વિદધતાં સંસ્તવે નાસ્મિ શક્તઃ ॥ 3 ॥

અસ્યાવિષ્કર્તુકામં કલિમલકલુષેઽસ્મિન્ જને જ્ઞાનમાર્ગં
વંદ્યં ચંદ્રેંદ્રરુદ્રદ્યુમણિફણિવયોનાયકાદ્યૈરિહાદ્ય ।
મધ્વાખ્યં મંત્રસિદ્ધં કિમુત કૃતવતો મારુતસ્યાવતારં
પાતારં પારમેષ્ટ્યં પદમપવિપદઃ પ્રાપ્તુરાપન્નપુંસામ્ ॥ 4 ॥

ઉદ્યદ્વિદ્યુત્પ્રચંડાં નિજરુચિનિકરવ્યાપ્તલોકાવકાશો
બિભ્રદ્ભીમો ભુજે યોઽભ્યુદિતદિનકરાભાંગદાઢ્ય પ્રકાંડે ।
વીર્યોદ્ધાર્યાં ગદાગ્ર્યામયમિહ સુમતિં વાયુદેવો વિદધ્યાત્
અધ્યાત્મજ્ઞાનનેતા યતિવરમહિતો ભૂમિભૂષામણિર્મે ॥ 5 ॥

સંસારોત્તાપનિત્યોપશમદસદયસ્નેહહાસાંબુપૂર-
-પ્રોદ્યદ્વિદ્યાનવદ્યદ્યુતિમણિકિરણશ્રેણિસંપૂરિતાશઃ ।
શ્રીવત્સાંકાધિવાસોચિતતરસરળશ્રીમદાનંદતીર્થ-
-ક્ષીરાંભોધિર્વિભિંદ્યાદ્ભવદનભિમતં ભૂરિ મે ભૂતિહેતુઃ ॥ 6 ॥

મૂર્ધન્યેષોઽંજલિર્મે દૃઢતરમિહ તે બધ્યતે બંધપાશ-
-ચ્છેત્રે દાત્રે સુખાનાં ભજતિ ભુવિ ભવિષ્યદ્વિધાત્રે દ્યુભર્ત્રે ।
અત્યંતં સંતતં ત્વં પ્રદિશ પદયુગે હંત સંતાપભાજા-
-મસ્માકં ભક્તિમેકાં ભગવત ઉત તે માધવસ્યાથ વાયોઃ ॥ 7 ॥

સાભ્રોષ્ણાભીશુશુભ્રપ્રભમભય નભો ભૂરિભૂભૃદ્વિભૂતિ-
-ભ્રાજિષ્ણુર્ભૂરૃભૂણાં ભવનમપિ વિભોઽભેદિ બભ્રે બભૂવે ।
યેન ભ્રૂવિભ્રમસ્તે ભ્રમયતુ સુભૃશં બભ્રુવદ્દુર્ભૃતાશાન્
ભ્રાંતિર્ભેદાવભાસસ્ત્વિતિ ભયમભિભૂર્ભોક્ષ્યતો માયિભિક્ષૂન્ ॥ 8 ॥

યેઽમું ભાવં ભજંતે સુરમુખસુજનારાધિતં તે તૃતીયં
ભાસંતે ભાસુરૈસ્તે સહચરચલિતૈશ્ચામરૈશ્ચારુવેષાઃ ।
વૈકુંઠે કંઠલગ્નસ્થિરશુચિવિલસત્કાંતિતારુણ્યલીલા-
લાવણ્યાપૂર્ણકાંતાકુચભરસુલભાશ્લેષસમ્મોદસાંદ્રાઃ ॥ 9 ॥

આનંદાન્મંદમંદા દદતિ હિ મરુતઃ કુંદમંદારનંદ્યા-
-વર્તામોદાન્ દધાના મૃદુપદમુદિતોદ્ગીતકૈઃ સુંદરીણામ્ ।
વૃંદૈરાવંદ્યમુક્તેંદ્વહિમગુમદનાહીંદ્રદેવેંદ્રસેવ્યે
મૌકુંદે મંદિરેઽસ્મિન્નવિરતમુદયન્મોદિનાં દેવદેવ ॥ 10 ॥

ઉત્તપ્તાઽત્યુત્કટત્વિટ્ પ્રકટકટકટધ્વાનસંઘટ્ટનોદ્ય-
-દ્વિદ્યુદ્વ્યૂઢસ્ફુલિંગપ્રકરવિકિરણોત્ક્વાથિતે બાધિતાંગાન્ ।
ઉદ્ગાઢં પાત્યમાના તમસિ તત ઇતઃ કિંકરૈઃ પંકિલે તે
પંક્તિર્ગ્રાવ્ણાં ગરિમ્ણા ગ્લપયતિ હિ ભવદ્વેષિણો વિદ્વદાદ્ય ॥ 11 ॥

અસ્મિન્નસ્મદ્ગુરૂણાં હરિચરણચિરધ્યાનસન્મંગલાનાં
યુષ્માકં પાર્શ્વભૂમિં ધૃતરણરણિકસ્વર્ગિસેવ્યાં પ્રપન્નઃ ।
યસ્તૂદાસ્તે સ આસ્તેઽધિભવમસુલભક્લેશનિર્મૂકમસ્ત-
-પ્રાયાનંદં કથંચિન્ન વસતિ સતતં પંચકષ્ટેઽતિકષ્ટે ॥ 12 ॥

ક્ષુત્ ક્ષામાન્ રૂક્ષરક્ષોરદખરનખરક્ષુણ્ણવિક્ષોભિતાક્ષા-
-નામગ્નાનાંધકૂપે ક્ષુરમુખમુખરૈઃ પક્ષિભિર્વિક્ષતાંગાન્ ।
પૂયાસૃઙ્મૂત્રવિષ્ઠાકૃમિકુલકલિલે તત્ક્ષણક્ષિપ્તશક્ત્યા-
-દ્યસ્ત્રવ્રાતાર્દિતાંસ્ત્વદ્દ્વિષ ઉપજિહતે વજ્રકલ્પા જલૂકાઃ ॥ 13 ॥

માતર્મે માતરિશ્વન્ પિતરતુલગુરો ભ્રાતરિષ્ટાપ્તબંધો
સ્વામિન્ સર્વાંતરાત્મન્નજર જરયિતર્જન્મમૃત્યામયાનામ્ ।
ગોવિંદે દેહિ ભક્તિં ભવતિ ચ ભગવન્નૂર્જિતાં નિર્નિમિત્તાં
નિર્વ્યાજાં નિશ્ચલાં સદ્ગુણગણબૃહતીં શાશ્વતીમાશુ દેવ ॥ 14 ॥

વિષ્ણોરત્ત્યુત્તમત્વાદખિલગુણગણૈસ્તત્ર ભક્તિં ગરિષ્ઠાં
આશ્લિષ્ટે શ્રીધરાભ્યામમુમથ પરિવારાત્મના સેવકેષુ ।
યઃ સંધત્તે વિરિંચશ્વસનવિહગપાનંતરુદ્રેંદ્રપૂર્વે-
-ષ્વાધ્યાયંસ્તારતમ્યં સ્ફુટમવતિ સદા વાયુરસ્મદ્ગુરુસ્તમ્ ॥ 15 ॥

તત્ત્વજ્ઞાન્ મુક્તિભાજઃ સુખયિસિ હિ ગુરો યોગ્યતાતારતમ્યા-
-દાધત્સે મિશ્રબુદ્ધિંસ્ત્રિદિવનિરયભૂગોચરાન્ નિત્યબદ્ધાન્ ।
તામિસ્રાંધાદિકાખ્યે તમસિ સુબહુલં દુઃખયસ્યન્યથાજ્ઞાન્
વિષ્ણોરાજ્ઞાભિરિત્થં શૃતિશતમિતિહાસાદિ ચાકર્ણયામઃ ॥ 16 ॥

વંદેઽહં તં હનૂમાનિતિ મહિતમહાપૌરુષો બાહુશાલી
ખ્યાતસ્તેઽગ્ર્યોઽવતારઃ સહિત ઇહ બહુબ્રહ્મચર્યાદિધર્મૈઃ ।
સસ્નેહાનાં સહસ્વાનહરહરહિતં નિર્દહન્ દેહભાજાં
અંહોમોહાપહો યઃ સ્પૃહયતિ મહતીં ભક્તિમદ્યાપિ રામે ॥ 17 ॥

પ્રાક્પંચાશત્સહસ્રૈર્વ્યવહિતમહિતં યોજનૈઃ પર્વતં ત્વં
યાવત્સંજીવનાદ્યૌષધનિધિમધિકપ્રાણ લંકામનૈષિઃ ।
અદ્રાક્ષીદુત્પતંતં તત ઉત ગિરિમુત્પાટયંતં ગૃહીત્વા
યાંતં ખે રાઘવાંઘ્રૌ પ્રણતમપિ તદૈકક્ષણે ત્વાં હિ લોકઃ ॥ 18 ॥

ક્ષિપ્તઃ પશ્ચાત્સત્સલીલં શતમતુલમતે યોજનાનાં સ ઉચ્ચ-
-સ્તાવદ્વિસ્તારવંશ્ચાપ્યુપલલવ ઇવ વ્યગ્રબુદ્ધ્યા ત્વયાઽતઃ ।
સ્વસ્વસ્થાનસ્થિતાતિસ્થિરશકલશિલાજાલસંશ્લેષનષ્ટ-
-છ્છેદાંકઃ પ્રાગિવાભૂત્ કપિવરવપુષસ્તે નમઃ કૌશલાય ॥ 19 ॥

દૃષ્ટ્વા દુષ્ટાધિપોરઃ સ્ફુટિતકનકસદ્વર્મ ઘૃષ્ટાસ્થિકૂટં
નિષ્પિષ્ટં હાટકાદ્રિપ્રકટતટતટાકાતિશંકો જનોઽભૂત્ ।
યેનાઽજૌ રાવણારિપ્રિયનટનપટુર્મુષ્ટિરિષ્ટં પ્રદેષ્ટું
કિં નેષ્ટે મે સ તેઽષ્ટાપદકટકતટિત્કોટિભામૃષ્ટકાષ્ઠઃ ॥ 20 ॥

દેવ્યાદેશપ્રણીતિદૃહિણહરવરાવધ્યરક્ષોવિઘાતા-
-દ્યાસેવોદ્યદ્દયાર્દ્રઃ સહભુજમકરોદ્રામનામા મુકુંદઃ ।
દુષ્પ્રાપે પારમેષ્ઠ્યે કરતલમતુલં મૂર્ધિવિન્યસ્ય ધન્યં
તન્વન્ભૂયઃ પ્રભૂતપ્રણયવિકસિતાબ્જેક્ષણસ્ત્વેક્ષમાણઃ ॥ 21 ॥

જઘ્ને નિઘ્નેન વિઘ્નો બહુલબલબકધ્વંસનાદ્યેન શોચ-
-દ્વિપ્રાનુક્રોશપાશૈરસુવિધૃતિસુખસ્યૈકચક્રાજનાનામ્ ।
તસ્મૈ તે દેવ કુર્મઃ કુરુકુલપતયે કર્મણા ચ પ્રણામાન્
કિર્મીરં દુર્મતીનાં પ્રથમમથ ચ યો નર્મણા નિર્મમાથ ॥ 22 ॥

નિર્મૃદ્નન્નત્યયત્નં વિજરવર જરાસંધકાયાસ્થિસંધીન્
યુદ્ધે ત્વં સ્વધ્વરે વા પશુમિવ દમયન્ વિષ્ણુપક્ષદ્વિડીશમ્ ।
યાવત્પ્રત્યક્ષભૂતં નિખિલમખભુજં તર્પયામાસિથાસૌ
તાવત્યાઽયોજિ તૃપ્ત્યા કિમુ વદ ભગવન્ રાજસૂયાશ્વમેધે ॥ 23 ॥

ક્ષ્વેલાક્ષીણાટ્ટહાસં તવ રણમરિહન્નુદ્ગદોદ્દામબાહોઃ
બહ્વક્ષૌહિણ્યનીકક્ષપણસુનિપુણં યસ્ય સર્વોત્તમસ્ય ।
શુશ્રૂષાર્થં ચકર્થ સ્વયમયમથ સંવક્તુમાનંદતીર્થ-
-શ્રીમન્નામન્સમર્થસ્ત્વમપિ હિ યુવયોઃ પાદપદ્મં પ્રપદ્યે ॥ 24 ॥

દૃહ્યંતીં હૃદૃહં માં દૃતમનિલ બલાદ્દ્રાવયંતીમવિદ્યા-
-નિદ્રાં વિદ્રાવ્ય સદ્યોરચનપટુમથાઽપાદ્ય વિદ્યાસમુદ્ર ।
વાગ્દેવી સા સુવિદ્યાદ્રવિણદ વિદિતા દ્રૌપદી રુદ્રપત્ન્યા-
-દુદ્રિક્તા દ્રાગભદ્રાદ્રહયતુ દયિતા પૂર્વભીમાઽજ્ઞયા તે ॥ 25 ॥

યાભ્યાં શુશ્રૂષુરાસીઃ કુરુકુલજનને ક્ષત્રવિપ્રોદિતાભ્યાં
બ્રહ્મભ્યાં બૃંહિતાભ્યાં ચિતસુખવપુષા કૃષ્ણનામાસ્પદાભ્યામ્ ।
નિર્ભેદાભ્યાં વિશેષાદ્વિવચનવિષયાભ્યામમૂભ્યામુભાભ્યાં
તુભ્યં ચ ક્ષેમદેભ્યઃ સરિસિજવિલસલ્લોચનેભ્યો નમોઽસ્તુ ॥ 26 ॥

ગચ્છન્ સૌગંધિકાર્થં પથિ સ હનુમતઃ પુચ્છમચ્છસ્ય ભીમઃ
પ્રોદ્ધર્તું નાશકત્સ ત્વમુમુરુવપુષા ભીષયામાસ ચેતિ ।
પૂર્ણજ્ઞાનૌજસોસ્તે ગુરુતમ વપુષોઃ શ્રીમદાનંદતીર્થ
ક્રીડામાત્રં તદેતત્ પ્રમદદ સુધિયાં મોહક દ્વેષભાજામ્ ॥ 27 ॥

બહ્વીઃ કોટીરટીકઃ કુટલકટુમતીનુત્કટાટોપકોપાન્
દ્રાક્ચ ત્વં સત્વરત્વાચ્ચરણદ ગદયા પોથયામાસિથારીન્ ।
ઉન્મથ્યાતથ્યમિથ્યાત્વવચનવચનાનુત્પથસ્થાંસ્તથાઽન્યાન્
પ્રાયચ્છઃ સ્વપ્રિયાયૈ પ્રિયતમકુસુમં પ્રાણ તસ્મૈ નમસ્તે ॥ 28 ॥

દેહાદુત્ક્રામિતાનામધિપતિરસતામક્રમાદ્વક્રબુદ્ધિઃ
ક્રુદ્ધઃ ક્રોધૈકવશ્યઃ ક્રિમિરિવ મણિમાન્ દુષ્કૃતી નિષ્ક્રિયાર્થમ્ ।
ચક્રે ભૂચક્રમેત્ય ક્રકચમિવ સતાં ચેતસઃ કષ્ટશાસ્ત્રં
દુસ્તર્કં ચક્રપાણેર્ગુણગણવિરહં જીવતાં ચાધિકૃત્ય ॥ 29 ॥

તદ્દુષ્પ્રેક્ષાનુસારાત્કતિપયકુનરૈરાદૃતોઽન્યૈર્વિસૃષ્ટો
બ્રહ્માઽહં નિર્ગુણોઽહં વિતથમિદમિતિ હ્યેષ પાષંડવાદઃ ।
તદ્યુક્ત્યાભાસજાલપ્રસરવિષતરૂદ્દાહદક્ષપ્રમાણ-
-જ્વાલામાલાધરાગ્નિઃ પવન વિજયતે તેઽવતારસ્તૃતીયઃ ॥ 30 ॥

આક્રોશંતો નિરાશા ભયભરવિવશસ્વાશયાશ્છિન્નદર્પા
વાશંતો દેશનાશસ્વિતિ બત કુધિયાં નાશમાશાદશાઽશુ ।
ધાવંતોઽશ્લીલશીલા વિતથશપથશાપાશિવાઃ શાંતશૌર્યા-
-સ્ત્વદ્વ્યાખ્યાસિંહનાદે સપદિ દદૃશિરે માયિગોમાયવસ્તે ॥ 31 ॥

ત્રિષ્વપ્યેવાવતારેષ્વરિભિરપઘૃણં હિંસિતો નિર્વિકારઃ
સર્વજ્ઞઃ સર્વશક્તિઃ સકલગુણગણાપૂર્ણરૂપપ્રગલ્ભઃ ।
સ્વચ્છઃ સ્વચ્છંદમૃત્યુઃ સુખયસિ સુજનં દેવ કિં ચિત્રમત્ર
ત્રાતા યસ્ય ત્રિધામા જગદુત વશગં કિંકરાઃ શંકરાદ્યાઃ ॥ 32 ॥

ઉદ્યન્મંદસ્મિતશ્રીમૃદુ મધુમધુરાલાપપીયૂષધારા-
-પૂરાસેકોપશાંતાસુખસુજનમનોલોચનાપીયમાનમ્ ।
સંદ્રક્ષ્યે સુંદરં સંદુહદિહ મહદાનંદમાનંદતીર્થ
શ્રીમદ્વક્ત્રેંદુબિંબં દુરતનુદુદિતં નિત્યદાઽહં કદા નુ ॥ 33 ॥

પ્રાચીનાચીર્ણપુણ્યોચ્ચયચતુરતરાચારતશ્ચારુચિત્તા-
-નત્યુચ્ચાં રોચયંતીં શ્રુતિચિતવચનાં શ્રાવકાંશ્ચોદ્યચુંચૂન્ ।
વ્યાખ્યામુત્ખાતદુઃખાં ચિરમુચિતમહાચાર્ય ચિંતારતાંસ્તે
ચિત્રાં સચ્છાસ્ત્રકર્તાશ્ચરણપરિચરાંછ્રાવયાસ્માંશ્ચ કિંચિત્ ॥ 34 ॥

પીઠે રત્નોકપક્લૃપ્તે રુચિરરુચિમણિજ્યોતિષા સન્નિષણ્ણં
બ્રહ્માણં ભાવિનં ત્વાં જ્વલતિ નિજપદે વૈદિકાદ્યા હિ વિદ્યાઃ ।
સેવંતે મૂર્તિમત્યઃ સુચરિત ચરિતં ભાતિ ગંધર્વ ગીતં
પ્રત્યેકં દેવસંસત્સ્વપિ તવ ભગવન્નર્તિતદ્યોવધૂષુ ॥ 35 ॥

સાનુક્રોશૈરજસ્રં જનિમૃતિનિરયાદ્યૂર્મિમાલાવિલેઽસ્મિન્
સંસારાબ્ધૌ નિમગ્નાન્ શરણમશરણાનિચ્છતો વીક્ષ્ય જંતૂન્ ।
યુષ્માભિઃ પ્રાર્થિતઃ સન્ જલનિધિશયનઃ સત્યવત્યાં મહર્ષે-
-ર્વ્યક્તશ્ચિન્માત્રમૂર્તિર્ન ખલુ ભગવતઃ પ્રાકૃતો જાતુ દેહઃ ॥ 36 ॥

અસ્તવ્યસ્તં સમસ્તશ્રુતિગતમધમૈ રત્નપૂગં યથાઽંધૈ-
-રર્થં લોકોપકૃત્યૈ ગુણગણનિલયઃ સૂત્રયામાસ કૃત્સ્નમ્ ।
યોઽસૌ વ્યાસાભિધાનસ્તમહમહરહર્ભક્તિતસ્ત્વત્પ્રસાદાત્
સદ્યો વિદ્યોપલબ્ધ્યૈ ગુરુતમમગુરું દેવદેવં નમામિ ॥ 37 ॥

આજ્ઞામન્યૈરધાર્યાં શિરસિ પરિસરદ્રશ્મિકોટીરકોટૌ
કૃષ્ણસ્યાક્લિષ્ટકર્મા દધદનુસરાણાદર્થિતો દેવસંઘૈઃ ।
ભૂમાવાગત્ય ભૂમન્નસુકરમકરોર્બ્રહ્મસૂત્રસ્ય ભાષ્યં
દુર્ભાષ્યં વ્યસ્ય દસ્યોર્મણિમત ઉદિતં વેદસદ્યુક્તિભિસ્ત્વમ્ ॥ 38 ॥

ભૂત્વા ક્ષેત્રે વિશુદ્ધે દ્વિજગણનિલયે રૌપ્યપીઠાભિધાને
તત્રાપિ બ્રહ્મજાતિસ્ત્રિભુવનવિશદે મધ્યગેહાખ્યગેહે ।
પારિવ્રાજ્યાધિરાજઃ પુનરપિ બદરીં પ્રાપ્ય કૃષ્ણં ચ નત્વા
કૃત્વા ભાષ્યાણિ સમ્યગ્ વ્યતનુત ચ ભવાન્ ભારતાર્થપ્રકાશમ્ ॥ 39 ॥

વંદે તં ત્વાં સુપૂર્ણપ્રમતિમનુદિનાસેવિતં દેવવૃંદૈઃ
વંદે વંદારુમીશે શ્રિય ઉત નિયતં શ્રીમદાનંદતીર્થમ્ ।
વંદે મંદાકિનીસત્સરિદમલજલાસેકસાધિક્યસંગં
વંદેઽહં દેવ ભક્ત્યા ભવભયદહનં સજ્જનાન્મોદયંતમ્ ॥ 40 ॥

સુબ્રહ્મણ્યાખ્યસૂરેઃ સુત ઇતિ સુભૃશં કેશવાનંદતીર્થ-
શ્રીમત્પાદાબ્જભક્તઃ સ્તુતિમકૃત હરેર્વાયુદેવસ્ય ચાસ્ય ।
તત્પાદાર્ચાદરેણ ગ્રથિતપદલસન્માલયા ત્વેતયા યે
સંરાધ્યામૂ નમંતિ પ્રતતમતિગુણા મુક્તિમેતે વ્રજંતિ ॥ 41 ॥

અથ શ્રીનખસ્તુતિઃ
પાંત્વસ્માન્ પુરુહૂતવૈરિબલવન્માતંગમાદ્યદ્ઘટા
કુંભોચ્ચાદ્રિવિપાટનાધિકપટુપ્રત્યેકવજ્રાયિતાઃ ।
શ્રીમત્કંઠીરવાસ્ય પ્રતત સુનખરા દારિતારાતિદૂર-
પ્રધ્વસ્તધ્વાંતશાંતપ્રવિતતમનસા ભાવિતા નાકિવૃંદૈઃ ॥ 1 ॥

લક્ષ્મીકાંત સમંતતોઽવિકલયન્ નૈવેશિતુસ્તે સમં
પશ્યામ્યુત્તમવસ્તુ દૂરતરતોઽપાસ્તં રસો યોઽષ્ટમઃ ।
યદ્રોષોત્કરદક્ષનેત્રકુટિલપ્રાંતોત્થિતાગ્નિસ્ફુરત્
ખદ્યોતોપમવિસ્ફુલિંગભસિતા બ્રહ્મેશશક્રોત્કરાઃ ॥ 2 ॥

ઇતિ શ્રીત્રિવિક્રમપંડિતાચાર્ય વિરચિતા વાયુસ્તુતિઃ સમાપ્તા ॥