ભીષ્મ ઉવાચ ।
ઇતિ મતિરુપકલ્પિતા વિતૃષ્ણા
ભગવતિ સાત્વતપુંગવે વિભૂમ્નિ ।
સ્વસુખમુપગતે ક્વચિદ્વિહર્તું
પ્રકૃતિમુપેયુષિ યદ્ભવપ્રવાહઃ ॥ 1 ॥
ત્રિભુવનકમનં તમાલવર્ણં
રવિકરગૌરવરાંબરં દધાને ।
વપુરલકકુલાવૃતાનનાબ્જં
વિજયસખે રતિરસ્તુ મેઽનવદ્યા ॥ 2 ॥
યુધિ તુરગરજોવિધૂમ્રવિષ્વક્
કચલુલિતશ્રમવાર્યલંકૃતાસ્યે ।
મમ નિશિતશરૈર્વિભિદ્યમાન
ત્વચિ વિલસત્કવચેઽસ્તુ કૃષ્ણ આત્મા ॥ 3 ॥
સપદિ સખિવચો નિશમ્ય મધ્યે
નિજપરયોર્બલયો રથં નિવેશ્ય ।
સ્થિતવતિ પરસૈનિકાયુરક્ષ્ણા
હૃતવતિ પાર્થસખે રતિર્મમાસ્તુ ॥ 4 ॥
વ્યવહિત પૃથનામુખં નિરીક્ષ્ય
સ્વજનવધાદ્વિમુખસ્ય દોષબુદ્ધ્યા ।
કુમતિમહરદાત્મવિદ્યયા ય-
-શ્ચરણરતિઃ પરમસ્ય તસ્ય મેઽસ્તુ ॥ 5 ॥
સ્વનિગમમપહાય મત્પ્રતિજ્ઞાં
ઋતમધિકર્તુમવપ્લુતો રથસ્થઃ ।
ધૃતરથચરણોઽભ્યયાચ્ચલદ્ગુઃ
હરિરિવ હંતુમિભં ગતોત્તરીયઃ ॥ 6 ॥
શિતવિશિખહતો વિશીર્ણદંશઃ
ક્ષતજપરિપ્લુત આતતાયિનો મે ।
પ્રસભમભિસસાર મદ્વધાર્થં
સ ભવતુ મે ભગવાન્ ગતિર્મુકુંદઃ ॥ 7 ॥
વિજયરથકુટુંબ આત્તતોત્રે
ધૃતહયરશ્મિનિ તચ્છ્રિયેક્ષણીયે ।
ભગવતિ રતિરસ્તુ મે મુમૂર્ષોઃ
યમિહ નિરીક્ષ્ય હતાઃ ગતાઃ સરૂપમ્ ॥ 8 ॥
લલિત ગતિ વિલાસ વલ્ગુહાસ
પ્રણય નિરીક્ષણ કલ્પિતોરુમાનાઃ ।
કૃતમનુકૃતવત્ય ઉન્મદાંધાઃ
પ્રકૃતિમગન્ કિલ યસ્ય ગોપવધ્વઃ ॥ 9 ॥
મુનિગણનૃપવર્યસંકુલેઽંતઃ
સદસિ યુધિષ્ઠિરરાજસૂય એષામ્ ।
અર્હણમુપપેદ ઈક્ષણીયો
મમ દૃશિગોચર એષ આવિરાત્મા ॥ 10 ॥
તમિમમહમજં શરીરભાજાં
હૃદિ હૃદિ ધિષ્ટિતમાત્મકલ્પિતાનામ્ ।
પ્રતિદૃશમિવ નૈકધાઽર્કમેકં
સમધિગતોઽસ્મિ વિધૂતભેદમોહઃ ॥ 11 ॥
ઇતિ શ્રીમદ્ભાગવતે મહાપુરાણે પ્રથમસ્કંધે નવમોઽધ્યાયે ભીષ્મકૃત ભગવત્ સ્તુતિઃ ।
