સત્યં જ્ઞાનમનંતં નિત્યમનાકાશં પરમાકાશં
ગોષ્ઠપ્રાંગણરિંખણલોલમનાયાસં પરમાયાસમ્ ।
માયાકલ્પિતનાનાકારમનાકારં ભુવનાકારં
ક્ષ્મામાનાથમનાથં પ્રણમત ગોવિંદં પરમાનંદમ્ ॥ 1 ॥
મૃત્સ્નામત્સીહેતિ યશોદાતાડનશૈશવસંત્રાસં
વ્યાદિતવક્ત્રાલોકિતલોકાલોકચતુર્દશલોકાલિમ્ ।
લોકત્રયપુરમૂલસ્તંભં લોકાલોકમનાલોકં
લોકેશં પરમેશં પ્રણમત ગોવિંદં પરમાનંદમ્ ॥ 2 ॥
ત્રૈવિષ્ટપરિપુવીરઘ્નં ક્ષિતિભારઘ્નં ભવરોગઘ્નં
કૈવલ્યં નવનીતાહારમનાહારં ભુવનાહારમ્ ।
વૈમલ્યસ્ફુટચેતોવૃત્તિવિશેષાભાસમનાભાસં
શૈવં કેવલશાંતં પ્રણમત ગોવિંદં પરમાનંદમ્ ॥ 3 ॥
ગોપાલં પ્રભુલીલાવિગ્રહગોપાલં કુલગોપાલં
ગોપીખેલનગોવર્ધનધૃતિલીલાલાલિતગોપાલમ્ ।
ગોભિર્નિગદિતગોવિંદસ્ફુટનામાનં બહુનામાનં
ગોધીગોચરદૂરં પ્રણમત ગોવિંદં પરમાનંદમ્ ॥ 4 ॥
ગોપીમંડલગોષ્ઠીભેદં ભેદાવસ્થમભેદાભં
શશ્વદ્ગોખુરનિર્ધૂતોદ્ગતધૂળીધૂસરસૌભાગ્યમ્ ।
શ્રદ્ધાભક્તિગૃહીતાનંદમચિંત્યં ચિંતિતસદ્ભાવં
ચિંતામણિમહિમાનં પ્રણમત ગોવિંદં પરમાનંદમ્ ॥ 5 ॥
સ્નાનવ્યાકુલયોષિદ્વસ્ત્રમુપાદાયાગમુપારૂઢં
વ્યાદિત્સંતીરથ દિગ્વસ્ત્રા દાતુમુપાકર્ષંતં તાઃ ।
નિર્ધૂતદ્વયશોકવિમોહં બુદ્ધં બુદ્ધેરંતઃસ્થં
સત્તામાત્રશરીરં પ્રણમત ગોવિંદં પરમાનંદમ્ ॥ 6 ॥
કાંતં કારણકારણમાદિમનાદિં કાલઘનાભાસં
કાળિંદીગતકાળિયશિરસિ સુનૃત્યંતં મુહુરત્યંતમ્ ।
કાલં કાલકલાતીતં કલિતાશેષં કલિદોષઘ્નં
કાલત્રયગતિહેતું પ્રણમત ગોવિંદં પરમાનંદમ્ ॥ 7 ॥
બૃંદાવનભુવિ બૃંદારકગણબૃંદારાધિતવંદ્યાયાં
કુંદાભામલમંદસ્મેરસુધાનંદં સુમહાનંદમ્ ।
વંદ્યાશેષમહામુનિમાનસવંદ્યાનંદપદદ્વંદ્વં
નંદ્યાશેષગુણાબ્ધિં પ્રણમત ગોવિંદં પરમાનંદમ્ ॥ 8 ॥
ગોવિંદાષ્ટકમેતદધીતે ગોવિંદાર્પિતચેતા યો
ગોવિંદાચ્યુત માધવ વિષ્ણો ગોકુલનાયક કૃષ્ણેતિ ।
ગોવિંદાંઘ્રિસરોજધ્યાનસુધાજલધૌતસમસ્તાઘો
ગોવિંદં પરમાનંદામૃતમંતઃસ્થં સ તમભ્યેતિ ॥ 9 ॥
ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિંદભગવત્પૂજ્યપાદશિષ્યસ્ય શ્રીમચ્છંકરભગવતઃ કૃતૌ શ્રી ગોવિંદાષ્ટકમ્ ।
