ઓં અસ્ય શ્રીવિષ્ણુપંજરસ્તોત્ર મહામંત્રસ્ય નારદ ઋષિઃ । અનુષ્ટુપ્ છંદઃ । શ્રીવિષ્ણુઃ પરમાત્મા દેવતા । અહં બીજમ્ । સોહં શક્તિઃ । ઓં હ્રીં કીલકમ્ । મમ સર્વદેહરક્ષણાર્થં જપે વિનિયોગઃ ।
નારદ ઋષયે નમઃ મુખે । શ્રીવિષ્ણુપરમાત્મદેવતાયૈ નમઃ હૃદયે । અહં બીજં ગુહ્યે । સોહં શક્તિઃ પાદયોઃ । ઓં હ્રીં કીલકં પાદાગ્રે । ઓં હ્રાં હ્રીં હ્રૂં હ્રૈં હ્રૌં હ્રઃ ઇતિ મંત્રઃ ।
ઓં હ્રાં અંગુષ્ઠાભ્યાં નમઃ ।
ઓં હ્રીં તર્જનીભ્યાં નમઃ ।
ઓં હ્રૂં મધ્યમાભ્યાં નમઃ ।
ઓં હ્રૈં અનામિકાભ્યાં નમઃ ।
ઓં હ્રૌં કનિષ્ઠિકાભ્યાં નમઃ ।
ઓં હ્રઃ કરતલકરપૃષ્ઠાભ્યાં નમઃ ।
ઇતિ કરન્યાસઃ ।
ઓં હ્રાં હૃદયાય નમઃ ।
ઓં હ્રીં શિરસે સ્વાહા ।
ઓં હ્રૂં શિખાયૈ વષટ્ ।
ઓં હ્રૈં કવચાય હુમ્ ।
ઓં હ્રૌં નેત્રત્રયાય વૌષટ્ ।
ઓં હ્રઃ અસ્ત્રાય ફટ્ ।
ઇતિ અંગન્યાસઃ ।
અહં બીજં પ્રાણાયામં મંત્રત્રયેણ કુર્યાત્ ।
ધ્યાનમ્ ।
પરં પરસ્માત્પ્રકૃતેરનાદિમેકં નિવિષ્ટં બહુધા ગુહાયામ્ ।
સર્વાલયં સર્વચરાચરસ્થં નમામિ વિષ્ણું જગદેકનાથમ્ ॥ 1 ॥
ઓં વિષ્ણુપંજરકં દિવ્યં સર્વદુષ્ટનિવારણમ્ ।
ઉગ્રતેજો મહાવીર્યં સર્વશત્રુનિકૃંતનમ્ ॥ 2 ॥
ત્રિપુરં દહમાનસ્ય હરસ્ય બ્રહ્મણો હિતમ્ ।
તદહં સંપ્રવક્ષ્યામિ આત્મરક્ષાકરં નૃણામ્ ॥ 3 ॥
પાદૌ રક્ષતુ ગોવિંદો જંઘે ચૈવ ત્રિવિક્રમઃ ।
ઊરૂ મે કેશવઃ પાતુ કટિં ચૈવ જનાર્દનઃ ॥ 4 ॥
નાભિં ચૈવાચ્યુતઃ પાતુ ગુહ્યં ચૈવ તુ વામનઃ ।
ઉદરં પદ્મનાભશ્ચ પૃષ્ઠં ચૈવ તુ માધવઃ ॥ 5 ॥
વામપાર્શ્વં તથા વિષ્ણુર્દક્ષિણં મધુસૂદનઃ ।
બાહૂ વૈ વાસુદેવશ્ચ હૃદિ દામોદરસ્તથા ॥ 6 ॥
કંઠં રક્ષતુ વારાહઃ કૃષ્ણશ્ચ મુખમંડલમ્ ।
માધવઃ કર્ણમૂલે તુ હૃષીકેશશ્ચ નાસિકે ॥ 7 ॥
નેત્રે નારાયણો રક્ષેલ્લલાટં ગરુડધ્વજઃ ।
કપોલૌ કેશવો રક્ષેદ્વૈકુંઠઃ સર્વતોદિશમ્ ॥ 8 ॥
શ્રીવત્સાંકશ્ચ સર્વેષામંગાનાં રક્ષકો ભવેત્ ।
પૂર્વસ્યાં પુંડરીકાક્ષ આગ્નેય્યાં શ્રીધરસ્તથા ॥ 9 ॥
દક્ષિણે નારસિંહશ્ચ નૈરૃત્યાં માધવોઽવતુ ।
પુરુષોત્તમો વારુણ્યાં વાયવ્યાં ચ જનાર્દનઃ ॥ 10 ॥
ગદાધરસ્તુ કૌબેર્યામીશાન્યાં પાતુ કેશવઃ ।
આકાશે ચ ગદા પાતુ પાતાળે ચ સુદર્શનમ્ ॥ 11 ॥
સન્નદ્ધઃ સર્વગાત્રેષુ પ્રવિષ્ટો વિષ્ણુપંજરઃ ।
વિષ્ણુપંજરવિષ્ટોઽહં વિચરામિ મહીતલે ॥ 12 ॥
રાજદ્વારેઽપથે ઘોરે સંગ્રામે શત્રુસંકટે ।
નદીષુ ચ રણે ચૈવ ચોરવ્યાઘ્રભયેષુ ચ ॥ 13 ॥
ડાકિનીપ્રેતભૂતેષુ ભયં તસ્ય ન જાયતે ।
રક્ષ રક્ષ મહાદેવ રક્ષ રક્ષ જનેશ્વર ॥ 14 ॥
રક્ષંતુ દેવતાઃ સર્વા બ્રહ્મવિષ્ણુમહેશ્વરાઃ ।
જલે રક્ષતુ વારાહઃ સ્થલે રક્ષતુ વામનઃ ॥ 15 ॥
અટવ્યાં નારસિંહશ્ચ સર્વતઃ પાતુ કેશવઃ ॥
દિવા રક્ષતુ માં સૂર્યો રાત્રૌ રક્ષતુ ચંદ્રમાઃ ॥ 16 ॥
પંથાનં દુર્ગમં રક્ષેત્સર્વમેવ જનાર્દનઃ ।
રોગવિઘ્નહતશ્ચૈવ બ્રહ્મહા ગુરુતલ્પગઃ ॥ 17 ॥
સ્ત્રીહંતા બાલઘાતી ચ સુરાપો વૃષલીપતિઃ ।
મુચ્યતે સર્વપાપેભ્યો યઃ પઠેન્નાત્ર સંશયઃ ॥ 18 ॥
અપુત્રો લભતે પુત્રં ધનાર્થી લભતે ધનમ્ ।
વિદ્યાર્થી લભતે વિદ્યાં મોક્ષાર્થી લભતે ગતિમ્ ॥ 19 ॥
આપદો હરતે નિત્યં વિષ્ણુસ્તોત્રાર્થસંપદા ।
યસ્ત્વિદં પઠતે સ્તોત્રં વિષ્ણુપંજરમુત્તમમ્ ॥ 20 ॥
મુચ્યતે સર્વપાપેભ્યો વિષ્ણુલોકં સ ગચ્છતિ ।
ગોસહસ્રફલં તસ્ય વાજપેયશતસ્ય ચ ॥ 21 ॥
અશ્વમેધસહસ્રસ્ય ફલં પ્રાપ્નોતિ માનવઃ ।
સર્વકામં લભેદસ્ય પઠનાન્નાત્ર સંશયઃ ॥ 22 ॥
જલે વિષ્ણુઃ સ્થલે વિષ્ણુર્વિષ્ણુઃ પર્વતમસ્તકે ।
જ્વાલામાલાકુલે વિષ્ણુઃ સર્વં વિષ્ણુમયં જગત્ ॥ 23 ॥
ઇતિ શ્રીબ્રહ્માંડપુરાણે ઇંદ્રનારદસંવાદે શ્રીવિષ્ણુપંજરસ્તોત્રમ્ ॥
