ವೈಶಾಖೇ ಮಾಸಿ ಕೃಷ್ಣಾಯಾಂ ದಶಮ್ಯಾಂ ಮಂದವಾಸರೇ ।
ಪೂರ್ವಾಭಾದ್ರಾ ಪ್ರಭೂತಾಯ ಮಂಗಳಂ ಶ್ರೀಹನೂಮತೇ ॥ 1 ॥

ಕರುಣಾರಸಪೂರ್ಣಾಯ ಫಲಾಪೂಪಪ್ರಿಯಾಯ ಚ ।
ಮಾಣಿಕ್ಯಹಾರಕಂಠಾಯ ಮಂಗಳಂ ಶ್ರೀಹನೂಮತೇ ॥ 2 ॥

ಸುವರ್ಚಲಾಕಳತ್ರಾಯ ಚತುರ್ಭುಜಧರಾಯ ಚ ।
ಉಷ್ಟ್ರಾರೂಢಾಯ ವೀರಾಯ ಮಂಗಳಂ ಶ್ರೀಹನೂಮತೇ ॥ 3 ॥

ದಿವ್ಯಮಂಗಳದೇಹಾಯ ಪೀತಾಂಬರಧರಾಯ ಚ ।
ತಪ್ತಕಾಂಚನವರ್ಣಾಯ ಮಂಗಳಂ ಶ್ರೀಹನೂಮತೇ ॥ 4 ॥

ಭಕ್ತರಕ್ಷಣಶೀಲಾಯ ಜಾನಕೀಶೋಕಹಾರಿಣೇ ।
ಸೃಷ್ಟಿಕಾರಣಭೂತಾಯ ಮಂಗಳಂ ಶ್ರೀಹನೂಮತೇ ॥ 5 ॥

ರಂಭಾವನವಿಹಾರಾಯ ಗಂಧಮಾದನವಾಸಿನೇ ।
ಸರ್ವಲೋಕೈಕನಾಥಾಯ ಮಂಗಳಂ ಶ್ರೀಹನೂಮತೇ ॥ 6 ॥

ಪಂಚಾನನಾಯ ಭೀಮಾಯ ಕಾಲನೇಮಿಹರಾಯ ಚ ।
ಕೌಂಡಿನ್ಯಗೋತ್ರಜಾತಾಯ ಮಂಗಳಂ ಶ್ರೀಹನೂಮತೇ ॥ 7 ॥

ಕೇಸರೀಪುತ್ರ ದಿವ್ಯಾಯ ಸೀತಾನ್ವೇಷಪರಾಯ ಚ ।
ವಾನರಾಣಾಂ ವರಿಷ್ಠಾಯ ಮಂಗಳಂ ಶ್ರೀಹನೂಮತೇ ॥ 8 ॥

ಇತಿ ಶ್ರೀ ಹನುಮಾನ್ ಮಂಗಳಾಷ್ಟಕಮ್ ।