ബ്രഹ്മവിഷ്ണുമഹേശാ ഊചുഃ ।
അജം നിർവികല്പം നിരാകാരമേകം
നിരാനംദമദ്വൈതമാനംദപൂര്ണമ് ।
പരം നിര്ഗുണം നിർവിശേഷം നിരീഹം
പരബ്രഹ്മരൂപം ഗണേശം ഭജേമ ॥ 1 ॥

ഗുണാതീതമാദ്യം ചിദാനംദരൂപം
ചിദാഭാസകം സർവഗം ജ്ഞാനഗമ്യമ് ।
മുനിധ്യേയമാകാശരൂപം പരേശം
പരബ്രഹ്മരൂപം ഗണേശം ഭജേമ ॥ 2 ॥

ജഗത്കാരണം കാരണജ്ഞാനരൂപം
സുരാദിം സുഖാദിം യുഗാദിം ഗണേശമ് ।
ജഗദ്വ്യാപിനം വിശ്വവംദ്യം സുരേശം
പരബ്രഹ്മരൂപം ഗണേശം ഭജേമ ॥ 3 ॥

രജോയോഗതോ ബ്രഹ്മരൂപം ശ്രുതിജ്ഞം
സദാ കാര്യസക്തം ഹൃദാചിംത്യരൂപമ് ।
ജഗത്കാരകം സർവവിദ്യാനിധാനം
പരബ്രഹ്മരൂപം ഗണേശം നതാസ്മഃ ॥ 4 ॥

സദാ സത്ത്വയോഗം മുദാ ക്രീഡമാനം
സുരാരീന്ഹരംതം ജഗത്പാലയംതമ് ।
അനേകാവതാരം നിജജ്ഞാനഹാരം
സദാ വിഷ്ണുരൂപം ഗണേശം നമാമഃ ॥ 5 ॥

തമോയോഗിനം രുദ്രരൂപം ത്രിനേത്രം
ജഗദ്ധാരകം താരകം ജ്ഞാനഹേതുമ് ।
അനേകാഗമൈഃ സ്വം ജനം ബോധയംതം
സദാ ശർവരൂപം ഗണേശം നമാമഃ ॥ 6 ॥

തമസ്തോമഹാരം ജനാജ്ഞാനഹാരം
ത്രയീവേദസാരം പരബ്രഹ്മപാരമ് ।
മുനിജ്ഞാനകാരം വിദൂരേവികാരം
സദാ ബ്രഹ്മരൂപം ഗണേശം നമാമഃ ॥ 7 ॥

നിജൈരോഷധീസ്തര്പയംതം കരോദ്യൈഃ
സരൌഘാന്കലാഭിഃ സുധാസ്രാവിണീഭിഃ ।
ദിനേശാംശു സംതാപഹാരം ദ്വിജേശം
ശശാംകസ്വരൂപം ഗണേശം നമാമഃ ॥ 8 ॥

പ്രകാശസ്വരൂപം നഭോവായുരൂപം
വികാരാദിഹേതും കലാകാലഭൂതമ് ।
അനേകക്രിയാനേകശക്തിസ്വരൂപം
സദാ ശക്തിരൂപം ഗണേശം നമാമഃ ॥ 9 ॥

പ്രധാനസ്വരൂപം മഹത്തത്ത്വരൂപം
ധരാവാരിരൂപം ദിഗീശാദിരൂപമ് ।
അസത്സത്സ്വരൂപം ജഗദ്ധേതുഭൂതം
സദാ വിശ്വരൂപം ഗണേശം നതാസ്മഃ ॥ 10 ॥

ത്വദീയേ മനഃ സ്ഥാപയേദംഘ്രിയുഗ്മേ
ജനോ വിഘ്നസംഘാന്ന പീഡാം ലഭേത ।
ലസത്സൂര്യബിംബേ വിശാലേ സ്ഥിതോഽയം
ജനോധ്വാംത പീഡാം കഥം വാ ലഭേത ॥ 11 ॥

വയം ഭ്രാമിതാഃ സർവഥാഽജ്ഞാനയോഗാ-
-ദലബ്ധാ തവാംഘ്രിം ബഹൂന്വര്ഷപൂഗാന് ।
ഇദാനീമവാപ്താസ്തവൈവ പ്രസാദാ-
-ത്പ്രപന്നാന്സദാ പാഹി വിശ്വംഭരാദ്യ ॥ 12 ॥

ഗണേശ ഉവാച ।
ഇദം യഃ പഠേത്പ്രാതരുത്ഥായ ധീമാന്
ത്രിസംധ്യം സദാ ഭക്തിയുക്തോ വിശുദ്ധഃ ।
സപുത്രാന് ശ്രിയം സർവകാമാന് ലഭേത
പരബ്രഹ്മരൂപോ ഭവേദംതകാലേ ॥ 13 ॥

ഇതി ഗണേശപുരാണേ ഉപാസനാഖംഡേ ത്രയോദശോഽധ്യായേ ശ്രീഗണപതിസ്തവഃ ।