ആനംദരൂപേ നിജബോധരൂപേ
ബ്രഹ്മസ്വരൂപേ ശ്രുതിമൂര്തിരൂപേ ।
ശശാംകരൂപേ രമണീയരൂപേ
ശ്രീരംഗരൂപേ രമതാം മനോ മേ ॥ 1 ॥
കാവേരിതീരേ കരുണാവിലോലേ
മംദാരമൂലേ ധൃതചാരുകേലേ ।
ദൈത്യാംതകാലേഽഖിലലോകലീലേ
ശ്രീരംഗലീലേ രമതാം മനോ മേ ॥ 2 ॥
ലക്ഷ്മീനിവാസേ ജഗതാം നിവാസേ
ഹൃത്പദ്മവാസേ രവിബിംബവാസേ ।
കൃപാനിവാസേ ഗുണബൃംദവാസേ
ശ്രീരംഗവാസേ രമതാം മനോ മേ ॥ 3 ॥
ബ്രഹ്മാദിവംദ്യേ ജഗദേകവംദ്യേ
മുകുംദവംദ്യേ സുരനാഥവംദ്യേ ।
വ്യാസാദിവംദ്യേ സനകാദിവംദ്യേ
ശ്രീരംഗവംദ്യേ രമതാം മനോ മേ ॥ 4 ॥
ബ്രഹ്മാധിരാജേ ഗരുഡാധിരാജേ
വൈകുംഠരാജേ സുരരാജരാജേ ।
ത്രൈലോക്യരാജേഽഖിലലോകരാജേ
ശ്രീരംഗരാജേ രമതാം മനോ മേ ॥ 5 ॥
അമോഘമുദ്രേ പരിപൂര്ണനിദ്രേ
ശ്രീയോഗനിദ്രേ സസമുദ്രനിദ്രേ ।
ശ്രിതൈകഭദ്രേ ജഗദേകനിദ്രേ
ശ്രീരംഗഭദ്രേ രമതാം മനോ മേ ॥ 6 ॥
സചിത്രശായീ ഭുജഗേംദ്രശായീ
നംദാംകശായീ കമലാംകശായീ ।
ക്ഷീരാബ്ധിശായീ വടപത്രശായീ
ശ്രീരംഗശായീ രമതാം മനോ മേ ॥ 7 ॥
ഇദം ഹി രംഗം ത്യജതാമിഹാംഗം
പുനര്ന ചാംഗം യദി ചാംഗമേതി ।
പാണൌ രഥാംഗം ചരണേഽംബു ഗാംഗം
യാനേ വിഹംഗം ശയനേ ഭുജംഗമ് ॥ 8 ॥
രംഗനാഥാഷ്ടകം പുണ്യം പ്രാതരുത്ഥായ യഃ പഠേത് ।
സർവാന്കാമാനവാപ്നോതി രംഗിസായുജ്യമാപ്നുയാത് ॥ 9 ॥
ഇതി ശ്രീ രംഗനാഥാഷ്ടകമ് ।
