മുരാരികായകാലിമാലലാമവാരിധാരിണീ
തൃണീകൃതത്രിവിഷ്ടപാ ത്രിലോകശോകഹാരിണീ ।
മനോഽനുകൂലകൂലകുംജപുംജധൂതദുര്മദാ
ധുനോതു മേ മനോമലം കലിംദനംദിനീ സദാ ॥ 1 ॥

മലാപഹാരിവാരിപൂരഭൂരിമംഡിതാമൃതാ
ഭൃശം പ്രപാതകപ്രവംചനാതിപംഡിതാനിശമ് ।
സുനംദനംദനാംഗസംഗരാഗരംജിതാ ഹിതാ
ധുനോതു മേ മനോമലം കലിംദനംദിനീ സദാ ॥ 2 ॥

ലസത്തരംഗസംഗധൂതഭൂതജാതപാതകാ
നവീനമാധുരീധുരീണഭക്തിജാതചാതകാ ।
തടാംതവാസദാസഹംസസംസൃതാ ഹി കാമദാ
ധുനോതു മേ മനോമലം കലിംദനംദിനീ സദാ ॥ 3 ॥

വിഹാരരാസഖേദഭേദധീരതീരമാരുതാ
ഗതാ ഗിരാമഗോചരേ യദീയനീരചാരുതാ ।
പ്രവാഹസാഹചര്യപൂതമേദിനീനദീനദാ
ധുനോതു മേ മനോമലം കലിംദനംദിനീ സദാ ॥ 4 ॥

തരംഗസംഗസൈകതാംചിതാംതരാ സദാസിതാ
ശരന്നിശാകരാംശുമംജുമംജരീസഭാജിതാ ।
ഭവാര്ചനായ ചാരുണാംബുനാധുനാ വിശാരദാ
ധുനോതു മേ മനോമലം കലിംദനംദിനീ സദാ ॥ 5 ॥

ജലാംതകേലികാരിചാരുരാധികാംഗരാഗിണീ
സ്വഭര്തുരന്യദുര്ലഭാംഗസംഗതാംശഭാഗിനീ ।
സ്വദത്തസുപ്തസപ്തസിംധുഭേദനാതികോവിദാ
ധുനോതു മേ മനോമലം കലിംദനംദിനീ സദാ ॥ 6 ॥

ജലച്യുതാച്യുതാംഗരാഗലംപടാലിശാലിനീ
വിലോലരാധികാകചാംതചംപകാലിമാലിനീ ।
സദാവഗാഹനാവതീര്ണഭര്തൃഭൃത്യനാരദാ
ധുനോതു മേ മനോമലം കലിംദനംദിനീ സദാ ॥ 7 ॥

സദൈവ നംദനംദകേലിശാലികുംജമംജുലാ
തടോത്ഥഫുല്ലമല്ലികാകദംബരേണുസൂജ്ജ്വലാ ।
ജലാവഗാഹിനാം നൃണാം ഭവാബ്ധിസിംധുപാരദാ
ധുനോതു മേ മനോമലം കലിംദനംദിനീ സദാ ॥ 8 ॥