ହରିର୍ହରତି ପାପାନି ଦୁଷ୍ଟଚିତ୍ତୈରପି ସ୍ମୃତଃ ।
ଅନିଚ୍ଛୟାଽପି ସଂସ୍ପୃଷ୍ଟୋ ଦହତ୍ୟେଵ ହି ପାଵକଃ ॥ 1 ॥

ସ ଗଂଗା ସ ଗୟା ସେତୁଃ ସ କାଶୀ ସ ଚ ପୁଷ୍କରମ୍ ।
ଜିହ୍ଵାଗ୍ରେ ଵର୍ତତେ ୟସ୍ୟ ହରିରିତ୍ୟକ୍ଷରଦ୍ଵୟମ୍ ॥ 2 ॥

ଵାରାଣସ୍ୟାଂ କୁରୁକ୍ଷେତ୍ରେ ନୈମିଶାରଣ୍ୟ ଏଵ ଚ ।
ୟତ୍କୃତଂ ତେନ ୟେନୋକ୍ତଂ ହରିରିତ୍ୟକ୍ଷରଦ୍ଵୟମ୍ ॥ 3 ॥

ପୃଥିଵ୍ୟାଂ ୟାନି ତୀର୍ଥାନି ପୁଣ୍ୟାନ୍ୟାୟତନାନି ଚ ।
ତାନି ସର୍ଵାଣ୍ୟଶେଷାଣି ହରିରିତ୍ୟକ୍ଷରଦ୍ଵୟମ୍ ॥ 4 ॥

ଗଵାଂ କୋଟିସହସ୍ରାଣି ହେମକନ୍ୟାସହସ୍ରକମ୍ ।
ଦତ୍ତଂ ସ୍ୟାତ୍ତେନ ୟେନୋକ୍ତଂ ହରିରିତ୍ୟକ୍ଷରଦ୍ଵୟମ୍ ॥ 5 ॥

ଋଗ୍ଵେଦୋଽଥ ୟଜୁର୍ଵେଦଃ ସାମଵେଦୋଽପ୍ୟଥର୍ଵଣଃ ।
ଅଧୀତସ୍ତେନ ୟେନୋକ୍ତଂ ହରିରିତ୍ୟକ୍ଷରଦ୍ଵୟମ୍ ॥ 6 ॥

ଅଶ୍ଵମେଧୈର୍ମହାୟଜ୍ଞୈର୍ନରମେଧୈସ୍ତଥୈଵ ଚ ।
ଇଷ୍ଟଂ ସ୍ୟାତ୍ତେନ ୟେନୋକ୍ତଂ ହରିରିତ୍ୟକ୍ଷରଦ୍ଵୟମ୍ ॥ 7 ॥

ପ୍ରାଣଃ ପ୍ରୟାଣ ପାଥେୟଂ ସଂସାରଵ୍ୟାଧିନାଶନମ୍ ।
ଦୁଃଖାତ୍ୟଂତ ପରିତ୍ରାଣଂ ହରିରିତ୍ୟକ୍ଷରଦ୍ଵୟମ୍ ॥ 8 ॥

ବଦ୍ଧଃ ପରିକରସ୍ତେନ ମୋକ୍ଷାୟ ଗମନଂ ପ୍ରତି ।
ସକୃଦୁଚ୍ଚାରିତଂ ୟେନ ହରିରିତ୍ୟକ୍ଷରଦ୍ଵୟମ୍ ॥ 9 ॥

ହର୍ୟଷ୍ଟକମିଦଂ ପୁଣ୍ୟଂ ପ୍ରାତରୁତ୍ଥାୟ ୟଃ ପଠେତ୍ ।
ଆୟୁଷ୍ୟଂ ବଲମାରୋଗ୍ୟଂ ୟଶୋ ଵୃଦ୍ଧିଃ ଶ୍ରିୟାଵହମ୍ ॥ 10 ॥

ପ୍ରହ୍ଲାଦେନ କୃତଂ ସ୍ତୋତ୍ରଂ ଦୁଃଖସାଗରଶୋଷଣମ୍ ।
ୟଃ ପଠେତ୍ସ ନରୋ ୟାତି ତଦ୍ଵିଷ୍ଣୋଃ ପରମଂ ପଦମ୍ ॥ 11 ॥

ଇତି ପ୍ରହ୍ଲାଦକୃତ ଶ୍ରୀ ହର୍ୟଷ୍ଟକମ୍ ।