അഥ സപ്തമസ്തോത്രമ്
വിശ്വസ്ഥിതിപ്രളയസര്ഗമഹാവിഭൂതി വൃത്തിപ്രകാശനിയമാവൃതി ബംധമോക്ഷാഃ ।
യസ്യാ അപാംഗലവമാത്രത ഊര്ജിതാ സാ ശ്രീഃ യത്കടാക്ഷബലവത്യജിതം നമാമി ॥ 1॥
ബ്രഹ്മേശശക്രരവിധര്മശശാംകപൂർവ ഗീർവാണസംതതിരിയം യദപാംഗലേശമ് ।
ആശ്രിത്യ വിശ്വവിജയം വിസൃജത്യചിംത്യാ ശ്രീഃ യത്കടാക്ഷബലവത്യജിതം നമാമി ॥ 2॥
ധര്മാര്ഥകാമസുമതിപ്രചയാദ്യശേഷസന്മംഗലം വിദധതേ യദപാംഗലേശമ് ।
ആശ്രിത്യ തത്പ്രണതസത്പ്രണതാ അപീഡ്യാ ശ്രീഃ യത്കടാക്ഷബലവതി അജിതം നമാമി ॥ 3॥
ഷഡ്വര്ഗനിഗ്രഹനിരസ്തസമസ്തദോഷാ ധ്യായംതി വിഷ്ണുമൃഷയോ യദപാംഗലേശമ് ।
ആശ്രിത്യ യാനപി സമേത്യ ന യാതി ദുഃഖം ശ്രീഃ യത്കടാക്ഷബലവതി അജിതം നമാമി ॥ 4॥
ശേഷാഹിവൈരിശിവശക്രമനുപ്രധാന ചിത്രോരുകര്മരചനം യദപാംഗലേശമ് ।
ആശ്രിത്യ വിശ്വമഖിലം വിദധാതി ധാതാ ശ്രീഃ യത്കടാക്ഷബലവതി അജിതം നമാമി ॥ 5॥
ശക്രോഗ്രദീധിതിഹിമാകരസൂര്യസൂനു പൂർവം നിഹത്യ നിഖിലം യദപാംഗലേശമ് ।
ആശ്രിത്യ നൃത്യതി ശിവഃ പ്രകടോരുശക്തിഃ ശ്രീഃ യത്കടാക്ഷ ബലവതി അജിതം നമാമി ॥ 6॥
തത്പാദപംകജമഹാസനതാമവാപ ശർവാദിവംദ്യചരണോ യദപാംഗലേശമ് ।
ആശ്രിത്യ നാഗപതിഃ അന്യസുരൈര്ദുരാപാം ശ്രീഃ യത്കടാക്ഷബലവതി അജിതം നമാമി ॥ 7॥
നാഗാരിരുഗ്രബലപൌരുഷ ആപ വിഷ്ണുവാഹത്വമുത്തമജവോ യദപാംഗലേശമ് । വര്
വിഷ്ണോർവാഹ
ആശ്രിത്യ ശക്രമുഖദേവഗണൈഃ അചിംത്യം ശ്രീഃ യത്കടാക്ഷ ബലവതി അജിതം നമാമി ॥ 8॥
ആനംദതീര്ഥമുനിസന്മുഖപംകജോത്ഥം സാക്ഷാദ്രമാഹരിമനഃ പ്രിയം ഉത്തമാര്ഥമ് ।
ഭക്ത്യാ പഠതി അജിതമാത്മനി സന്നിധായ യഃ സ്തോത്രമേതഭിയാതി തയോരഭീഷ്ടമ് ॥ 9॥
ഇതി ശ്രീമദാനംദതീര്ഥഭഗവത്പാദാചാര്യ വിരചിതം
ദ്വാദശസ്തോത്രേഷു സപ്തമസ്തോത്രം സംപൂര്ണമ്
