ധ്യാനം
മാധവോമാധവാവീശൌ സർവസിദ്ധിവിഹായിനൌ ।
വംദേ പരസ്പരാത്മാനൌ പരസ്പരനുതിപ്രിയൌ ॥
സ്തോത്രം
ഗോവിംദ മാധവ മുകുംദ ഹരേ മുരാരേ
ശംഭോ ശിവേശ ശശിശേഖര ശൂലപാണേ ।
ദാമോദരാഽച്യുത ജനാര്ദന വാസുദേവ
ത്യാജ്യാഭടായ ഇതി സംതതമാമനംതി ॥ 1
ഗംഗാധരാംധകരിപോ ഹര നീലകംഠ
വൈകുംഠകൈടഭരിപോ കമഠാബ്ജപാണേ ।
ഭൂതേശ ഖംഡപരശോ മൃഡ ചംഡികേശ
ത്യാജ്യാഭടായ ഇതി സംതതമാമനംതി ॥ 2
വിഷ്ണോ നൃസിംഹ മധുസൂദന ചക്രപാണേ
ഗൌരീപതേ ഗിരിശ ശംകര ചംദ്രചൂഡ ।
നാരായണാഽസുരനിബര്ഹണ ശാര്ങ്ഗപാണേ
ത്യാജ്യാഭടായ ഇതി സംതതമാമനംതി ॥ 3
മൃത്യുംജയോഗ്ര വിഷമേക്ഷണ കാമശത്രോ
ശ്രീകംഠ പീതവസനാംബുദനീലശൌരേ ।
ഈശാന കൃത്തിവസന ത്രിദശൈകനാഥ
ത്യാജ്യാഭടായ ഇതി സംതതമാമനംതി ॥ 4
ലക്ഷ്മീപതേ മധുരിപോ പുരുഷോത്തമാദ്യ
ശ്രീകംഠ ദിഗ്വസന ശാംത പിനാകപാണേ ।
ആനംദകംദ ധരണീധര പദ്മനാഭ
ത്യാജ്യാഭടായ ഇതി സംതതമാമനംതി ॥ 5
സർവേശ്വര ത്രിപുരസൂദന ദേവദേവ
ബ്രഹ്മണ്യദേവ ഗരുഡധ്വജ ശംഖപാണേ ।
ത്ര്യക്ഷോരഗാഭരണ ബാലമൃഗാംകമൌളേ
ത്യാജ്യാഭടായ ഇതി സംതതമാമനംതി ॥ 6
ശ്രീരാമ രാഘവ രമേശ്വര രാവണാരേ
ഭൂതേശ മന്മഥരിപോ പ്രമഥാധിനാഥ ।
ചാണൂരമര്ദന ഹൃഷീകപതേ മുരാരേ
ത്യാജ്യാഭടായ ഇതി സംതതമാമനംതി ॥ 7
ശൂലിന് ഗിരീശ രജനീശകളാവതംസ
കംസപ്രണാശന സനാതന കേശിനാശ ।
ഭര്ഗ ത്രിനേത്ര ഭവ ഭൂതപതേ പുരാരേ
ത്യാജ്യാഭടായ ഇതി സംതതമാമനംതി ॥ 8
ഗോപീപതേ യദുപതേ വസുദേവസൂനോ
കര്പൂരഗൌര വൃഷഭധ്വജ ഫാലനേത്ര ।
ഗോവര്ധനോദ്ധരണ ധര്മധുരീണ ഗോപ
ത്യാജ്യാഭടായ ഇതി സംതതമാമനംതി ॥ 9
സ്ഥാണോ ത്രിലോചന പിനാകധര സ്മരാരേ
കൃഷ്ണാഽനിരുദ്ധ കമലാകര കല്മഷാരേ ।
വിശ്വേശ്വര ത്രിപഥഗാര്ദ്രജടാകലാപ
ത്യാജ്യാഭടായ ഇതി സംതതമാമനംതി ॥ 10
അഷ്ടോത്തരാധികശതേന സുചാരുനാമ്നാം
സംധര്ഭിതാം ലലിതരത്നകദംബകേന ।
സന്നാമകാം ദൃഢഗുണാം ദ്വിജകംഠഗാം യഃ
കുര്യാദിമാം സ്രജമഹോ സ യമം ന പശ്യേത് ॥ 11
ഇതി യമകൃത ശ്രീ ശിവകേശവ സ്തുതിഃ ।
