ରାମାନୁଜାୟ ମୁନୟେ ନମ ଉକ୍ତି ମାତ୍ରଂ
କାମାତୁରୋଽପି କୁମତିଃ କଲୟନ୍ନଭୀକ୍ଷମ୍ ।
ୟାମାମନଂତି ୟମିନାଂ ଭଗଵଜ୍ଜନାନାଂ
ତାମେଵ ଵିଂଦତି ଗତିଂ ତମସଃ ପରସ୍ତାତ୍ ॥ 1 ॥

ସୋମାଵଚୂଡସୁରଶେଖରଦୁଷ୍କରେଣ
କାମାତିଗୋଽପି ତପସା କ୍ଷପୟନ୍ନଘାନି ।
ରାମାନୁଜାୟ ମୁନୟେ ନମ ଇତ୍ୟନୁକ୍ତ୍ଵା
କୋଵା ମହୀସହଚରେ କୁରୁତେଽନୁରାଗମ୍ ॥ 2 ॥

ରାମାନୁଜାୟ ନମ ଇତ୍ୟସକୃଦ୍ଗୃଣୀତେ
ୟୋ ମାନ ମାତ୍ସର ମଦସ୍ମର ଦୂଷିତୋଽପି ।
ପ୍ରେମାତୁରଃ ପ୍ରିୟତମାମପହାୟ ପଦ୍ମାଂ
ଭୂମା ଭୁଜଂଗଶୟନସ୍ତମନୁପ୍ରୟାତି ॥ 3 ॥

ଵାମାଲକାନୟନଵାଗୁରିକାଗୃହୀତଂ
କ୍ଷେମାୟ କିଂଚିଦପି କର୍ତୁମନୀହମାନମ୍ ।
ରାମାନୁଜୋ ୟତିପତିର୍ୟଦି ନେକ୍ଷତେ ମାଂ
ମା ମାମକୋଽୟମିତି ମୁଂଚତି ମାଧଵୋଽପି ॥ 4 ॥

ରାମାନୁଜେତି ୟଦିତଂ ଵିଦିତଂ ଜଗତ୍ୟାଂ
ନାମୀପି ନ ଶ୍ରୁତିସମୀପମୁପୈତି ୟେଷାମ୍ ।
ମା ମା ମଦୀୟ ଇତି ସଦ୍ଭିରୁପେକ୍ଷିତାସ୍ତେ
କାମାନୁଵିଦ୍ଧମନସୋ ନିପତଂତ୍ୟଧୋଽଧଃ ॥ 5 ॥

ନାମାନୁକୀର୍ତ୍ୟ ନରକାର୍ତିହରଂ ୟଦୀୟଂ
ଵ୍ୟୋମାଧିରୋହତି ପଦଂ ସକଲୋଽପି ଲୋକଃ ।
ରାମାନୁଜୋ ୟତିପତିର୍ୟଦି ନାଵିରାସୀତ୍
କୋ ମାଦୃଶଃ ପ୍ରଭଵିତା ଭଵମୁତ୍ତରୀତୁମ୍ ॥ 6 ॥

ସୀମାମହୀଧ୍ରପରିଧିଂ ପୃଥିଵୀମଵାପ୍ତୁଂ
ଵୈମାନିକେଶ୍ଵରପୁରୀମଧିଵାସିତୁଂ ଵା ।
ଵ୍ୟୋମାଧିରୋଢୁମପି ନ ସ୍ପୃହୟଂତି ନିତ୍ୟଂ
ରାମାନୁଜାଂଘ୍ରିୟୁଗଳଂ ଶରଣଂ ପ୍ରପନ୍ନାଃ ॥ 7 ॥

ମା ମା ଧୁନୋତି ମନସୋଽପି ନ ଗୋଚରଂ ୟତ୍
ଭୂମାସଖେନ ପୁରୁଷେଣ ସହାନୁଭୂୟ ।
ପ୍ରେମାନୁଵିଦ୍ଧହୃଦୟପ୍ରିୟଭକ୍ତଲଭ୍ୟେ
ରାମାନୁଜାଂଘ୍ରିକମଲେ ରମତାଂ ମନୋ ମେ ॥ 8 ॥

ଶ୍ଲୋକାଷ୍ଟକମିଦଂ ପୁଣ୍ୟଂ ୟୋ ଭକ୍ତ୍ୟା ପ୍ରତ୍ୟହଂ ପଠେତ୍ ।
ଆକାରତ୍ରୟସଂପନ୍ନଃ ଶୋକାବ୍ଧିଂ ତରତି ଦ୍ରୁତମ୍ ॥