𑌰𑌾𑌮𑌾𑌨𑍁𑌜𑌾𑌯 𑌮𑍁𑌨𑌯𑍇 𑌨𑌮 𑌉𑌕𑍍𑌤𑌿 𑌮𑌾𑌤𑍍𑌰𑌂
𑌕𑌾𑌮𑌾𑌤𑍁𑌰𑍋𑌽𑌪𑌿 𑌕𑍁𑌮𑌤𑌿𑌃 𑌕𑌲𑌯𑌨𑍍𑌨𑌭𑍀𑌕𑍍𑌷𑌮𑍍 ।
𑌯𑌾𑌮𑌾𑌮𑌨𑌂𑌤𑌿 𑌯𑌮𑌿𑌨𑌾𑌂 𑌭𑌗𑌵𑌜𑍍𑌜𑌨𑌾𑌨𑌾𑌂
𑌤𑌾𑌮𑍇𑌵 𑌵𑌿𑌂𑌦𑌤𑌿 𑌗𑌤𑌿𑌂 𑌤𑌮𑌸𑌃 𑌪𑌰𑌸𑍍𑌤𑌾𑌤𑍍 ॥ 1 ॥

𑌸𑍋𑌮𑌾𑌵𑌚𑍂𑌡𑌸𑍁𑌰𑌶𑍇𑌖𑌰𑌦𑍁𑌷𑍍𑌕𑌰𑍇𑌣
𑌕𑌾𑌮𑌾𑌤𑌿𑌗𑍋𑌽𑌪𑌿 𑌤𑌪𑌸𑌾 𑌕𑍍𑌷𑌪𑌯𑌨𑍍𑌨𑌘𑌾𑌨𑌿 ।
𑌰𑌾𑌮𑌾𑌨𑍁𑌜𑌾𑌯 𑌮𑍁𑌨𑌯𑍇 𑌨𑌮 𑌇𑌤𑍍𑌯𑌨𑍁𑌕𑍍𑌤𑍍𑌵𑌾
𑌕𑍋𑌵𑌾 𑌮𑌹𑍀𑌸𑌹𑌚𑌰𑍇 𑌕𑍁𑌰𑍁𑌤𑍇𑌽𑌨𑍁𑌰𑌾𑌗𑌮𑍍 ॥ 2 ॥

𑌰𑌾𑌮𑌾𑌨𑍁𑌜𑌾𑌯 𑌨𑌮 𑌇𑌤𑍍𑌯𑌸𑌕𑍃𑌦𑍍𑌗𑍃𑌣𑍀𑌤𑍇
𑌯𑍋 𑌮𑌾𑌨 𑌮𑌾𑌤𑍍𑌸𑌰 𑌮𑌦𑌸𑍍𑌮𑌰 𑌦𑍂𑌷𑌿𑌤𑍋𑌽𑌪𑌿 ।
𑌪𑍍𑌰𑍇𑌮𑌾𑌤𑍁𑌰𑌃 𑌪𑍍𑌰𑌿𑌯𑌤𑌮𑌾𑌮𑌪𑌹𑌾𑌯 𑌪𑌦𑍍𑌮𑌾𑌂
𑌭𑍂𑌮𑌾 𑌭𑍁𑌜𑌂𑌗𑌶𑌯𑌨𑌸𑍍𑌤𑌮𑌨𑍁𑌪𑍍𑌰𑌯𑌾𑌤𑌿 ॥ 3 ॥

𑌵𑌾𑌮𑌾𑌲𑌕𑌾𑌨𑌯𑌨𑌵𑌾𑌗𑍁𑌰𑌿𑌕𑌾𑌗𑍃𑌹𑍀𑌤𑌂
𑌕𑍍𑌷𑍇𑌮𑌾𑌯 𑌕𑌿𑌂𑌚𑌿𑌦𑌪𑌿 𑌕𑌰𑍍𑌤𑍁𑌮𑌨𑍀𑌹𑌮𑌾𑌨𑌮𑍍 ।
𑌰𑌾𑌮𑌾𑌨𑍁𑌜𑍋 𑌯𑌤𑌿𑌪𑌤𑌿𑌰𑍍𑌯𑌦𑌿 𑌨𑍇𑌕𑍍𑌷𑌤𑍇 𑌮𑌾𑌂
𑌮𑌾 𑌮𑌾𑌮𑌕𑍋𑌽𑌯𑌮𑌿𑌤𑌿 𑌮𑍁𑌂𑌚𑌤𑌿 𑌮𑌾𑌧𑌵𑍋𑌽𑌪𑌿 ॥ 4 ॥

𑌰𑌾𑌮𑌾𑌨𑍁𑌜𑍇𑌤𑌿 𑌯𑌦𑌿𑌤𑌂 𑌵𑌿𑌦𑌿𑌤𑌂 𑌜𑌗𑌤𑍍𑌯𑌾𑌂
𑌨𑌾𑌮𑍀𑌪𑌿 𑌨 𑌶𑍍𑌰𑍁𑌤𑌿𑌸𑌮𑍀𑌪𑌮𑍁𑌪𑍈𑌤𑌿 𑌯𑍇𑌷𑌾𑌮𑍍 ।
𑌮𑌾 𑌮𑌾 𑌮𑌦𑍀𑌯 𑌇𑌤𑌿 𑌸𑌦𑍍𑌭𑌿𑌰𑍁𑌪𑍇𑌕𑍍𑌷𑌿𑌤𑌾𑌸𑍍𑌤𑍇
𑌕𑌾𑌮𑌾𑌨𑍁𑌵𑌿𑌦𑍍𑌧𑌮𑌨𑌸𑍋 𑌨𑌿𑌪𑌤𑌂𑌤𑍍𑌯𑌧𑍋𑌽𑌧𑌃 ॥ 5 ॥

𑌨𑌾𑌮𑌾𑌨𑍁𑌕𑍀𑌰𑍍𑌤𑍍𑌯 𑌨𑌰𑌕𑌾𑌰𑍍𑌤𑌿𑌹𑌰𑌂 𑌯𑌦𑍀𑌯𑌂
𑌵𑍍𑌯𑍋𑌮𑌾𑌧𑌿𑌰𑍋𑌹𑌤𑌿 𑌪𑌦𑌂 𑌸𑌕𑌲𑍋𑌽𑌪𑌿 𑌲𑍋𑌕𑌃 ।
𑌰𑌾𑌮𑌾𑌨𑍁𑌜𑍋 𑌯𑌤𑌿𑌪𑌤𑌿𑌰𑍍𑌯𑌦𑌿 𑌨𑌾𑌵𑌿𑌰𑌾𑌸𑍀𑌤𑍍
𑌕𑍋 𑌮𑌾𑌦𑍃𑌶𑌃 𑌪𑍍𑌰𑌭𑌵𑌿𑌤𑌾 𑌭𑌵𑌮𑍁𑌤𑍍𑌤𑌰𑍀𑌤𑍁𑌮𑍍 ॥ 6 ॥

𑌸𑍀𑌮𑌾𑌮𑌹𑍀𑌧𑍍𑌰𑌪𑌰𑌿𑌧𑌿𑌂 𑌪𑍃𑌥𑌿𑌵𑍀𑌮𑌵𑌾𑌪𑍍𑌤𑍁𑌂
𑌵𑍈𑌮𑌾𑌨𑌿𑌕𑍇𑌶𑍍𑌵𑌰𑌪𑍁𑌰𑍀𑌮𑌧𑌿𑌵𑌾𑌸𑌿𑌤𑍁𑌂 𑌵𑌾 ।
𑌵𑍍𑌯𑍋𑌮𑌾𑌧𑌿𑌰𑍋𑌢𑍁𑌮𑌪𑌿 𑌨 𑌸𑍍𑌪𑍃𑌹𑌯𑌂𑌤𑌿 𑌨𑌿𑌤𑍍𑌯𑌂
𑌰𑌾𑌮𑌾𑌨𑍁𑌜𑌾𑌂𑌘𑍍𑌰𑌿𑌯𑍁𑌗𑌳𑌂 𑌶𑌰𑌣𑌂 𑌪𑍍𑌰𑌪𑌨𑍍𑌨𑌾𑌃 ॥ 𑍭 ॥

𑌮𑌾 𑌮𑌾 𑌧𑍁𑌨𑍋𑌤𑌿 𑌮𑌨𑌸𑍋𑌽𑌪𑌿 𑌨 𑌗𑍋𑌚𑌰𑌂 𑌯𑌤𑍍
𑌭𑍂𑌮𑌾𑌸𑌖𑍇𑌨 𑌪𑍁𑌰𑍁𑌷𑍇𑌣 𑌸𑌹𑌾𑌨𑍁𑌭𑍂𑌯 ।
𑌪𑍍𑌰𑍇𑌮𑌾𑌨𑍁𑌵𑌿𑌦𑍍𑌧𑌹𑍃𑌦𑌯𑌪𑍍𑌰𑌿𑌯𑌭𑌕𑍍𑌤𑌲𑌭𑍍𑌯𑍇
𑌰𑌾𑌮𑌾𑌨𑍁𑌜𑌾𑌂𑌘𑍍𑌰𑌿𑌕𑌮𑌲𑍇 𑌰𑌮𑌤𑌾𑌂 𑌮𑌨𑍋 𑌮𑍇 ॥ 𑍮 ॥

𑌶𑍍𑌲𑍋𑌕𑌾𑌷𑍍𑌟𑌕𑌮𑌿𑌦𑌂 𑌪𑍁𑌣𑍍𑌯𑌂 𑌯𑍋 𑌭𑌕𑍍𑌤𑍍𑌯𑌾 𑌪𑍍𑌰𑌤𑍍𑌯𑌹𑌂 𑌪𑌠𑍇𑌤𑍍 ।
𑌆𑌕𑌾𑌰𑌤𑍍𑌰𑌯𑌸𑌂𑌪𑌨𑍍𑌨𑌃 𑌶𑍋𑌕𑌾𑌬𑍍𑌧𑌿𑌂 𑌤𑌰𑌤𑌿 𑌦𑍍𑌰𑍁𑌤𑌮𑍍 ॥