ସତ୍ୟଂ ଜ୍ଞାନମନଂତଂ ନିତ୍ୟମନାକାଶଂ ପରମାକାଶଂ
ଗୋଷ୍ଠପ୍ରାଂଗଣରିଂଖଣଲୋଲମନାୟାସଂ ପରମାୟାସମ୍ ।
ମାୟାକଲ୍ପିତନାନାକାରମନାକାରଂ ଭୁଵନାକାରଂ
କ୍ଷ୍ମାମାନାଥମନାଥଂ ପ୍ରଣମତ ଗୋଵିଂଦଂ ପରମାନଂଦମ୍ ॥ 1 ॥
ମୃତ୍ସ୍ନାମତ୍ସୀହେତି ୟଶୋଦାତାଡନଶୈଶଵସଂତ୍ରାସଂ
ଵ୍ୟାଦିତଵକ୍ତ୍ରାଲୋକିତଲୋକାଲୋକଚତୁର୍ଦଶଲୋକାଲିମ୍ ।
ଲୋକତ୍ରୟପୁରମୂଲସ୍ତଂଭଂ ଲୋକାଲୋକମନାଲୋକଂ
ଲୋକେଶଂ ପରମେଶଂ ପ୍ରଣମତ ଗୋଵିଂଦଂ ପରମାନଂଦମ୍ ॥ 2 ॥
ତ୍ରୈଵିଷ୍ଟପରିପୁଵୀରଘ୍ନଂ କ୍ଷିତିଭାରଘ୍ନଂ ଭଵରୋଗଘ୍ନଂ
କୈଵଲ୍ୟଂ ନଵନୀତାହାରମନାହାରଂ ଭୁଵନାହାରମ୍ ।
ଵୈମଲ୍ୟସ୍ଫୁଟଚେତୋଵୃତ୍ତିଵିଶେଷାଭାସମନାଭାସଂ
ଶୈଵଂ କେଵଲଶାଂତଂ ପ୍ରଣମତ ଗୋଵିଂଦଂ ପରମାନଂଦମ୍ ॥ 3 ॥
ଗୋପାଲଂ ପ୍ରଭୁଲୀଲାଵିଗ୍ରହଗୋପାଲଂ କୁଲଗୋପାଲଂ
ଗୋପୀଖେଲନଗୋଵର୍ଧନଧୃତିଲୀଲାଲାଲିତଗୋପାଲମ୍ ।
ଗୋଭିର୍ନିଗଦିତଗୋଵିଂଦସ୍ଫୁଟନାମାନଂ ବହୁନାମାନଂ
ଗୋଧୀଗୋଚରଦୂରଂ ପ୍ରଣମତ ଗୋଵିଂଦଂ ପରମାନଂଦମ୍ ॥ 4 ॥
ଗୋପୀମଂଡଲଗୋଷ୍ଠୀଭେଦଂ ଭେଦାଵସ୍ଥମଭେଦାଭଂ
ଶଶ୍ଵଦ୍ଗୋଖୁରନିର୍ଧୂତୋଦ୍ଗତଧୂଳୀଧୂସରସୌଭାଗ୍ୟମ୍ ।
ଶ୍ରଦ୍ଧାଭକ୍ତିଗୃହୀତାନଂଦମଚିଂତ୍ୟଂ ଚିଂତିତସଦ୍ଭାଵଂ
ଚିଂତାମଣିମହିମାନଂ ପ୍ରଣମତ ଗୋଵିଂଦଂ ପରମାନଂଦମ୍ ॥ 5 ॥
ସ୍ନାନଵ୍ୟାକୁଲୟୋଷିଦ୍ଵସ୍ତ୍ରମୁପାଦାୟାଗମୁପାରୂଢଂ
ଵ୍ୟାଦିତ୍ସଂତୀରଥ ଦିଗ୍ଵସ୍ତ୍ରା ଦାତୁମୁପାକର୍ଷଂତଂ ତାଃ ।
ନିର୍ଧୂତଦ୍ଵୟଶୋକଵିମୋହଂ ବୁଦ୍ଧଂ ବୁଦ୍ଧେରଂତଃସ୍ଥଂ
ସତ୍ତାମାତ୍ରଶରୀରଂ ପ୍ରଣମତ ଗୋଵିଂଦଂ ପରମାନଂଦମ୍ ॥ 6 ॥
କାଂତଂ କାରଣକାରଣମାଦିମନାଦିଂ କାଲଘନାଭାସଂ
କାଳିଂଦୀଗତକାଳିୟଶିରସି ସୁନୃତ୍ୟଂତଂ ମୁହୁରତ୍ୟଂତମ୍ ।
କାଲଂ କାଲକଲାତୀତଂ କଲିତାଶେଷଂ କଲିଦୋଷଘ୍ନଂ
କାଲତ୍ରୟଗତିହେତୁଂ ପ୍ରଣମତ ଗୋଵିଂଦଂ ପରମାନଂଦମ୍ ॥ 7 ॥
ବୃଂଦାଵନଭୁଵି ବୃଂଦାରକଗଣବୃଂଦାରାଧିତଵଂଦ୍ୟାୟାଂ
କୁଂଦାଭାମଲମଂଦସ୍ମେରସୁଧାନଂଦଂ ସୁମହାନଂଦମ୍ ।
ଵଂଦ୍ୟାଶେଷମହାମୁନିମାନସଵଂଦ୍ୟାନଂଦପଦଦ୍ଵଂଦ୍ଵଂ
ନଂଦ୍ୟାଶେଷଗୁଣାବ୍ଧିଂ ପ୍ରଣମତ ଗୋଵିଂଦଂ ପରମାନଂଦମ୍ ॥ 8 ॥
ଗୋଵିଂଦାଷ୍ଟକମେତଦଧୀତେ ଗୋଵିଂଦାର୍ପିତଚେତା ୟୋ
ଗୋଵିଂଦାଚ୍ୟୁତ ମାଧଵ ଵିଷ୍ଣୋ ଗୋକୁଲନାୟକ କୃଷ୍ଣେତି ।
ଗୋଵିଂଦାଂଘ୍ରିସରୋଜଧ୍ୟାନସୁଧାଜଲଧୌତସମସ୍ତାଘୋ
ଗୋଵିଂଦଂ ପରମାନଂଦାମୃତମଂତଃସ୍ଥଂ ସ ତମଭ୍ୟେତି ॥ 9 ॥
ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ୟସ୍ୟ ଶ୍ରୀଗୋଵିଂଦଭଗଵତ୍ପୂଜ୍ୟପାଦଶିଷ୍ୟସ୍ୟ ଶ୍ରୀମଚ୍ଛଂକରଭଗଵତଃ କୃତୌ ଶ୍ରୀ ଗୋଵିଂଦାଷ୍ଟକମ୍ ।
