ଶ୍ରୁତୀନାମୁତ୍ତରଂ ଭାଗଂ ଵେଗଵତ୍ୟାଶ୍ଚ ଦକ୍ଷିଣମ୍ ।
କାମାଦଧିଵସନ୍ ଜୀୟାତ୍ କଶ୍ଚିଦଦ୍ଭୁତ କେସରୀ ॥ 1 ॥

ତପନେଂଦ୍ଵଗ୍ନିନୟନଃ ତାପାନପଚିନୋତୁ ନଃ ।
ତାପନୀୟରହସ୍ୟାନାଂ ସାରଃ କାମାସିକା ହରିଃ ॥ 2 ॥

ଆକଂଠମାଦିପୁରୁଷଂ
କଂଠୀରଵମୁପରି କୁଂଠିତାରାତିମ୍ ।
ଵେଗୋପକଂଠସଂଗାତ୍
ଵିମୁକ୍ତଵୈକୁଂଠବହୁମତିମୁପାସେ ॥ 3 ॥

ବଂଧୁମଖିଲସ୍ୟ ଜଂତୋଃ
ବଂଧୁରପର୍ୟଂକବଂଧରମଣୀୟମ୍ ।
ଵିଷମଵିଲୋଚନମୀଡେ
ଵେଗଵତୀପୁଳିନକେଳିନରସିଂହମ୍ ॥ 4 ॥

ସ୍ଵସ୍ଥାନେଷୁ ମରୁଦ୍ଗଣାନ୍ ନିୟମୟନ୍ ସ୍ଵାଧୀନସର୍ଵେଂଦ୍ରିୟଃ
ପର୍ୟଂକସ୍ଥିରଧାରଣା ପ୍ରକଟିତପ୍ରତ୍ୟଙ୍ମୁଖାଵସ୍ଥିତିଃ ।
ପ୍ରାୟେଣ ପ୍ରଣିପେଦୁଷଃ ପ୍ରଭୁରସୌ ୟୋଗଂ ନିଜଂ ଶିକ୍ଷୟନ୍
କାମାନାତନୁତାଦଶେଷଜଗତାଂ କାମାସିକା କେସରୀ ॥ 5 ॥

ଵିକସ୍ଵରନଖସ୍ଵରୁକ୍ଷତହିରଣ୍ୟଵକ୍ଷଃସ୍ଥଲୀ-
-ନିରର୍ଗଲଵିନିର୍ଗଲଦ୍ରୁଧିରସିଂଧୁସଂଧ୍ୟାୟିତାଃ ।
ଅଵଂତୁ ମଦନାସିକାମନୁଜପଂଚଵକ୍ତ୍ରସ୍ୟ ମାଂ
ଅହଂପ୍ରଥମିକାମିଥଃ ପ୍ରକଟିତାହଵା ବାହଵଃ ॥ 6 ॥

ସଟାପଟଲଭୀଷଣେ ସରଭସାଟ୍ଟହାସୋଦ୍ଭଟେ
ସ୍ଫୁରତ୍ କ୍ରୁଧିପରିସ୍ଫୁଟ ଭ୍ରୁକୁଟିକେଽପି ଵକ୍ତ୍ରେ କୃତେ ।
କୃପାକପଟକେସରିନ୍ ଦନୁଜଡିଂଭଦତ୍ତସ୍ତନା
ସରୋଜସଦୃଶା ଦୃଶା ଵ୍ୟତିଵିଷଜ୍ୟ ତେ ଵ୍ୟଜ୍ୟତେ ॥ 7 ॥

ତ୍ଵୟି ରକ୍ଷତି ରକ୍ଷକୈଃ କିମନ୍ୟୈ-
-ସ୍ତ୍ଵୟି ଚାରକ୍ଷତି ରକ୍ଷକୈଃ କିମନ୍ୟୈଃ ।
ଇତି ନିଶ୍ଚିତଧୀଃ ଶ୍ରୟାମି ନିତ୍ୟଂ
ନୃହରେ ଵେଗଵତୀତଟାଶ୍ରୟଂ ତ୍ଵାମ୍ ॥ 8 ॥

ଇତ୍ଥଂ ସ୍ତୁତଃ ସକୃଦିହାଷ୍ଟଭିରେଷ ପଦ୍ୟୈଃ
ଶ୍ରୀଵେଂକଟେଶରଚିତୈସ୍ତ୍ରିଦଶେଂଦ୍ରଵଂଦ୍ୟଃ ।
ଦୁର୍ଦାଂତଘୋରଦୁରିତଦ୍ଵିରଦେଂଦ୍ରଭେଦୀ
କାମାସିକାନରହରିର୍ଵିତନୋତୁ କାମାନ୍ ॥ 9 ॥

ଇତି ଶ୍ରୀଵେଦାଂତଦେଶିକକୃତଂ କାମାସିକାଷ୍ଟକମ୍ ।