(ତୈ. ଆ. 7-1-1)

ଓଂ ଶ୍ରୀ ଗୁରୁଭ୍ୟୋ ନମଃ । ହରିଃ ଓମ୍ ॥

ଓଂ ଶ-ନ୍ନୋ॑ ମି॒ତ୍ରଶ୍ଶଂ-ଵଁରୁ॑ଣଃ । ଶ-ନ୍ନୋ॑ ଭଵତ୍ଵର୍ୟ॒ମା । ଶ-ନ୍ନ॒ ଇନ୍ଦ୍ରୋ॒ ବୃହ॒ସ୍ପତିଃ॑ । ଶ-ନ୍ନୋ॒ ଵିଷ୍ଣୁ॑ରୁରୁକ୍ର॒ମଃ । ନମୋ॒ ବ୍ରହ୍ମ॑ଣେ । ନମ॑ସ୍ତେ ଵାୟୋ । ତ୍ଵମେ॒ଵ ପ୍ର॒ତ୍ୟକ୍ଷ॒-ମ୍ବ୍ରହ୍ମା॑ସି । ତ୍ଵମେ॒ଵ ପ୍ର॒ତ୍ୟକ୍ଷ॒-ମ୍ବ୍ରହ୍ମ॑ ଵଦିଷ୍ୟାମି । ଋ॒ତଂ-ଵଁ॑ଦିଷ୍ୟାମି । ସ॒ତ୍ୟଂ-ଵଁ॑ଦିଷ୍ୟାମି । ତନ୍ମାମ॑ଵତୁ । ତଦ୍ଵ॒କ୍ତାର॑ମଵତୁ । ଅଵ॑ତୁ॒ ମାମ୍ । ଅଵ॑ତୁ ଵ॒କ୍ତାରମ୍᳚ । ଓଂ ଶାନ୍ତି॒-ଶ୍ଶାନ୍ତି॒-ଶ୍ଶାନ୍ତିଃ॑ ॥ 1 ॥
ଇତି ପ୍ରଥମୋ-ଽନୁଵାକଃ ॥

ଶୀକ୍ଷାଂ-ଵ୍ୟାଁ᳚ଖ୍ୟାସ୍ୟା॒ମଃ । ଵର୍ଣ॒ସ୍ସ୍ଵରଃ । ମାତ୍ରା॒ ବଲମ୍ । ସାମ॑ ସନ୍ତା॒ନଃ । ଇତ୍ୟୁକ୍ତଶ୍ଶୀ᳚କ୍ଷାଧ୍ୟା॒ୟଃ ॥ 1 ॥
ଇତି ଦ୍ଵିତୀୟୋ-ଽନୁଵାକଃ ॥

ସ॒ହ ନୌ॒ ୟଶଃ । ସ॒ହ ନୌ ବ୍ର॑ହ୍ମଵ॒ର୍ଚସମ୍ । ଅଥାତସ୍ସଗ୍​ମ୍ହିତାୟା ଉପନିଷଦଂ-ଵ୍ୟାଁ᳚ଖ୍ୟାସ୍ୟା॒ମଃ । ପଞ୍ଚସ୍ଵଧିକ॑ରଣେ॒ଷୁ । ଅଧିଲୋକମଧିଜ୍ୟୌତିଷମଧିଵିଦ୍ୟମଧିପ୍ରଜ॑ମଧ୍ୟା॒ତ୍ମମ୍ । ତା ମହାସଗ୍​ମ୍ହିତା ଇ॑ତ୍ୟାଚ॒କ୍ଷତେ । ଅଥା॑ଧିଲୋ॒କମ୍ । ପୃଥିଵୀ ପୂ᳚ର୍ଵରୂ॒ପମ୍ । ଦ୍ୟୌରୁତ୍ତ॑ରରୂ॒ପମ୍ । ଆକା॑ଶସ୍ସ॒ନ୍ଧିଃ ॥ 1 ॥
ଵାୟୁ॑ସ୍ସନ୍ଧା॒ନମ୍ । ଇତ୍ୟ॑ଧିଲୋ॒କମ୍ । ଅଥା॑ଧିଜ୍ୟୌ॒ତିଷମ୍ । ଅଗ୍ନିଃ ପୂ᳚ର୍ଵରୂ॒ପମ୍ । ଆଦିତ୍ୟ ଉତ୍ତ॑ରରୂ॒ପମ୍ । ଆ॑ପସ୍ସ॒ନ୍ଧିଃ । ଵୈଦ୍ୟୁତ॑ସ୍ସନ୍ଧା॒ନମ୍ । ଇତ୍ୟ॑ଧିଜ୍ୟୌ॒ତିଷମ୍ । ଅଥା॑ଧିଵି॒ଦ୍ୟମ୍ । ଆଚାର୍ୟଃ ପୂ᳚ର୍ଵରୂ॒ପମ୍ ॥ 2 ॥
ଅନ୍ତେଵାସ୍ୟୁତ୍ତ॑ରରୂ॒ପମ୍ । ଵି॑ଦ୍ୟା ସ॒ନ୍ଧିଃ । ପ୍ରଵଚନଗ୍​ମ୍॑ ସନ୍ଧା॒ନମ୍ । ଇତ୍ୟ॑ଧିଵି॒ଦ୍ୟମ୍ । ଅଥାଧି॒ପ୍ରଜମ୍ । ମାତା ପୂ᳚ର୍ଵରୂ॒ପମ୍ । ପିତୋତ୍ତ॑ରରୂ॒ପମ୍ । ପ୍ର॑ଜା ସ॒ନ୍ଧିଃ । ପ୍ରଜନନଗ୍​ମ୍॑ ସନ୍ଧା॒ନମ୍ । ଇତ୍ୟଧି॒ପ୍ରଜମ୍ ॥ 3 ॥
ଅଥାଧ୍ୟା॒ତ୍ମମ୍ । ଅଧରା ହନୁଃ ପୂ᳚ର୍ଵରୂ॒ପମ୍ । ଉତ୍ତରା ହନୁରୁତ୍ତ॑ରରୂ॒ପମ୍ । ଵାକ୍ସ॒ନ୍ଧିଃ । ଜିହ୍ଵା॑ ସନ୍ଧା॒ନମ୍ । ଇତ୍ୟଧ୍ୟା॒ତ୍ମମ୍ । ଇତୀମା ମ॑ହାସ॒ଗ୍​ମ୍॒ହିତାଃ । ୟ ଏଵମେତା ମହାସଗ୍​ମ୍ହିତା ଵ୍ୟାଖ୍ୟା॑ତା ଵେ॒ଦ । ସନ୍ଧୀୟତେ ପ୍ରଜ॑ୟା ପ॒ଶୁଭିଃ । ବ୍ରହ୍ମଵର୍ଚସେନାନ୍ନାଦ୍ୟେନ ସୁଵର୍ଗ୍ୟେଣ॑ ଲୋକେ॒ନ ॥ 4 ॥
ଇତି ତୃତୀୟୋ-ଽନୁଵାକଃ ॥

ୟଶ୍ଛନ୍ଦ॑ସାମୃଷ॒ଭୋ ଵି॒ଶ୍ଵରୂ॑ପଃ । ଛନ୍ଦୋ॒ଭ୍ୟୋ-ଽଧ୍ୟ॒ମୃତା᳚ଥ୍ସ-ମ୍ବ॒ଭୂଵ॑ । ସ ମେନ୍ଦ୍ରୋ॑ ମେ॒ଧୟା᳚ ସ୍ପୃଣୋତୁ । ଅ॒ମୃତ॑ସ୍ୟ ଦେଵ॒ ଧାର॑ଣୋ ଭୂୟାସମ୍ । ଶରୀ॑ର-ମ୍ମେ॒ ଵିଚ॑ର୍​ଷଣମ୍ । ଜି॒ହ୍ଵା ମେ॒ ମଧୁ॑ମତ୍ତମା । କର୍ଣା᳚ଭ୍ୟା-ମ୍ଭୂରି॒ ଵିଶ୍ରୁ॑ଵମ୍ । ବ୍ରହ୍ମ॑ଣଃ କୋ॒ଶୋ॑-ଽସି ମେ॒ଧୟା-ଽପି॑ହିତଃ । ଶ୍ରୁ॒ତ-ମ୍ମେ॑ ଗୋପାୟ । ଆ॒ଵହ॑ନ୍ତୀ ଵିତନ୍ଵା॒ନା ॥ 1 ॥
କୁ॒ର୍ଵା॒ଣା ଚୀର॑ମା॒ତ୍ମନଃ॑ । ଵାସାଗ୍​ମ୍॑ସି॒ ମମ॒ ଗାଵ॑ଶ୍ଚ । ଅ॒ନ୍ନ॒ପା॒ନେ ଚ॑ ସର୍ଵ॒ଦା । ତତୋ॑ ମେ॒ ଶ୍ରିୟ॒ମାଵ॑ହ । ଲୋ॒ମ॒ଶା-ମ୍ପ॒ଶୁଭି॑ସ୍ସ॒ହ ସ୍ଵାହା᳚ । ଆମା॑ ୟନ୍ତୁ ବ୍ରହ୍ମଚା॒ରିଣ॒ସ୍ସ୍ଵାହା᳚ । ଵିମା॑-ଽଽୟନ୍ତୁ ବ୍ରହ୍ମଚା॒ରିଣ॒ସ୍ସ୍ଵାହା᳚ । ପ୍ରମା॑-ଽଽୟନ୍ତୁ ବ୍ରହ୍ମଚା॒ରିଣ॒ସ୍ସ୍ଵାହା᳚ । ଦମା॑ୟନ୍ତୁ ବ୍ରହ୍ମଚା॒ରିଣ॒ସ୍ସ୍ଵାହା᳚ । ଶମା॑ୟନ୍ତୁ ବ୍ରହ୍ମଚା॒ରିଣ॒ସ୍ସ୍ଵାହା᳚ ॥ 2 ॥
ୟଶୋ॒ ଜନେ॑-ଽସାନି॒ ସ୍ଵାହା᳚ । ଶ୍ରେୟା॒ନ୍ଵସ୍ୟ॑ସୋ-ଽସାନି॒ ସ୍ଵାହା᳚ । ତ-ନ୍ତ୍ଵା॑ ଭଗ॒ ପ୍ରଵି॑ଶାନି॒ ସ୍ଵାହା᳚ । ସ ମା॑ ଭଗ॒ ପ୍ରଵି॑ଶ॒ ସ୍ଵାହା᳚ । ତସ୍ମିନ୍᳚-ଥ୍ସ॒ହସ୍ର॑ଶାଖେ । ନିଭ॑ଗା॒ହ-ନ୍ତ୍ଵୟି॑ ମୃଜେ॒ ସ୍ଵାହା᳚ । ୟଥା-ଽଽପଃ॒ ପ୍ରଵ॑ତା॒-ଽଽୟନ୍ତି॑ । ୟଥା॒ ମାସା॑ ଅହର୍ଜ॒ରମ୍ । ଏ॒ଵ-ମ୍ମା-ମ୍ବ୍ର॑ହ୍ମଚା॒ରିଣଃ॑ । ଧାତ॒ରାୟ॑ନ୍ତୁ ସ॒ର୍ଵତ॒ସ୍ସ୍ଵାହା᳚ । ପ୍ର॒ତି॒ଵେ॒ଶୋ॑-ଽସି॒ ପ୍ରମା॑ଭାହି॒ ପ୍ରମା॑ପଦ୍ୟସ୍ଵ ॥ 3 ॥
ଇତି ଚତୁର୍ଥୋ-ଽନୁଵାକଃ ॥

ଭୂର୍ଭୁଵ॒ସ୍ସୁଵ॒ରିତି॒ ଵା ଏ॒ତାସ୍ତି॒ସ୍ରୋ ଵ୍ୟାହୃ॑ତୟଃ । ତାସା॑ମୁହସ୍ମୈ॒ ତା-ଞ୍ଚ॑ତୁ॒ର୍ଥୀମ୍ । ମାହା॑ଚମସ୍ୟଃ॒ ପ୍ରଵେ॑ଦୟତେ । ମହ॒ ଇତି॑ । ତଦ୍ବ୍ରହ୍ମ॑ । ସ ଆ॒ତ୍ମା । ଅଙ୍ଗା᳚ନ୍ୟ॒ନ୍ୟା ଦେ॒ଵତାଃ᳚ । ଭୂରିତି॒ ଵା ଅ॒ୟଂ-ଲୋଁ॒କଃ । ଭୁଵ॒ ଇତ୍ୟ॒ନ୍ତରି॑କ୍ଷମ୍ । ସୁଵ॒ରିତ୍ୟ॒ସୌ ଲୋ॒କଃ ॥ 1 ॥
ମହ॒ ଇତ୍ୟା॑ଦି॒ତ୍ୟଃ । ଆ॒ଦି॒ତ୍ୟେନ॒ ଵାଵ ସର୍ଵେ॑ ଲୋ॒କା ମହୀ॑ୟନ୍ତେ । ଭୂରିତି॒ ଵା ଅ॒ଗ୍ନିଃ । ଭୁଵ॒ ଇତି॑ ଵା॒ୟୁଃ । ସୁଵ॒ରିତ୍ୟା॑ଦି॒ତ୍ୟଃ । ମହ॒ ଇତି॑ ଚ॒ନ୍ଦ୍ରମାଃ᳚ । ଚ॒ନ୍ଦ୍ରମ॑ସା॒ ଵାଵ ସର୍ଵା॑ଣି॒ ଜ୍ୟୋତୀଗ୍​ମ୍॑ଷି॒ ମହୀ॑ୟନ୍ତେ । ଭୂରିତି॒ ଵା ଋଚଃ॑ । ଭୁଵ॒ ଇତି॒ ସାମା॑ନି । ସୁଵ॒ରିତି॒ ୟଜୂଗ୍​ମ୍॑ଷି ॥ 2 ॥
ମହ॒ ଇତି॒ ବ୍ରହ୍ମ॑ । ବ୍ରହ୍ମ॑ଣା॒ ଵାଵ ସର୍ଵେ॑ ଵେ॒ଦା ମହୀ॑ୟନ୍ତେ । ଭୂରିତି॒ ଵୈ ପ୍ରା॒ଣଃ । ଭୁଵ॒ ଇତ୍ୟ॑ପା॒ନଃ । ସୁଵ॒ରିତି॑ ଵ୍ୟା॒ନଃ । ମହ॒ ଇତ୍ୟନ୍ନମ୍᳚ । ଅନ୍ନେ॑ନ॒ ଵାଵ ସର୍ଵେ᳚ ପ୍ରା॒ଣା ମହୀ॑ୟନ୍ତେ । ତା ଵା ଏ॒ତାଶ୍ଚତ॑ସ୍ରଶ୍ଚତୁ॒ର୍ଧା । ଚତ॑ସ୍ରଶ୍ଚତସ୍ରୋ॒ ଵ୍ୟାହୃ॑ତୟଃ । ତା ୟୋ ଵେଦ॑ । ସ ଵେ॑ଦ॒ ବ୍ରହ୍ମ॑ । ସର୍ଵେ᳚-ଽସ୍ମୈ ଦେ॒ଵା ବ॒ଲିମାଵ॑ହନ୍ତି ॥ 3 ॥
ଇତି ପଞ୍ଚମୋ-ଽନୁଵାକଃ ॥

ସ ୟ ଏ॒ଷୋ᳚-ଽନ୍ତରହୃ॑ଦୟ ଆକା॒ଶଃ । ତସ୍ମି॑ନ୍ନ॒ୟ-ମ୍ପୁରୁ॑ଷୋ ମନୋ॒ମୟଃ॑ । ଅମୃ॑ତୋ ହିର॒ଣ୍ମୟଃ॑ । ଅନ୍ତ॑ରେଣ॒ ତାଲୁ॑କେ । ୟ ଏ॒ଷସ୍ତନ॑ ଇଵାଵ॒ଲମ୍ବ॑ତେ । ସେ᳚ନ୍ଦ୍ରୟୋ॒ନିଃ । ୟତ୍ରା॒ସୌ କେ॑ଶା॒ନ୍ତୋ ଵି॒ଵର୍ତ॑ତେ । ଵ୍ୟ॒ପୋହ୍ୟ॑ ଶୀର୍​ଷକପା॒ଲେ । ଭୂରିତ୍ୟ॒ଗ୍ନୌ ପ୍ରତି॑ତିଷ୍ଠତି । ଭୁଵ॒ ଇତି॑ ଵା॒ୟୌ ॥ 1 ॥
ସୁଵ॒ରିତ୍ୟା॑ଦି॒ତ୍ୟେ । ମହ॒ ଇତି॒ ବ୍ରହ୍ମ॑ଣି । ଆ॒ପ୍ନୋତି॒ ସ୍ଵାରା᳚ଜ୍ୟମ୍ । ଆ॒ପ୍ନୋତି॒ ମନ॑ସ॒ସ୍ପତିମ୍᳚ । ଵାକ୍ପ॑ତି॒ଶ୍ଚକ୍ଷୁ॑ଷ୍ପତିଃ । ଶ୍ରୋତ୍ର॑ପତିର୍ଵି॒ଜ୍ଞାନ॑ପତିଃ । ଏ॒ତତ୍ତତୋ॑ ଭଵତି । ଆ॒କା॒ଶଶ॑ରୀର॒-ମ୍ବ୍ରହ୍ମ॑ । ସ॒ତ୍ୟାତ୍ମ॑ ପ୍ରା॒ଣାରା॑ମ॒-ମ୍ମନ॑ ଆନନ୍ଦମ୍ । ଶାନ୍ତି॑ସମୃଦ୍ଧମ॒ମୃତମ୍᳚ । ଇତି॑ ପ୍ରାଚୀନ ୟୋ॒ଗ୍ୟୋପା᳚ସ୍ସ୍ଵ ॥ 2 ॥
ଇତି ଷଷ୍ଠୋ-ଽନୁଵାକଃ ॥

ପୃ॒ଥି॒ଵ୍ୟ॑ନ୍ତରି॑କ୍ଷ॒-ନ୍ଦ୍ୟୌର୍ଦିଶୋ॑-ଽଵାନ୍ତରଦି॒ଶାଃ । ଅ॒ଗ୍ନିର୍ଵା॒ୟୁରା॑ଦି॒ତ୍ୟଶ୍ଚ॒ନ୍ଦ୍ରମା॒ ନକ୍ଷ॑ତ୍ରାଣି । ଆପ॒ ଓଷ॑ଧୟୋ॒ ଵନ॒ସ୍ପତ॑ୟ ଆକା॒ଶ ଆ॒ତ୍ମା । ଇତ୍ୟ॑ଧିଭୂ॒ତମ୍ । ଅଥାଧ୍ୟା॒ତ୍ମମ୍ । ପ୍ରା॒ଣୋ ଵ୍ୟା॒ନୋ॑-ଽପା॒ନ ଉ॑ଦା॒ନସ୍ସ॑ମା॒ନଃ । ଚକ୍ଷୁ॒ଶ୍ଶ୍ରୋତ୍ର॒-ମ୍ମନୋ॒ ଵାକ୍ତ୍ଵକ୍ । ଚର୍ମ॑ମା॒ଗ୍​ମ୍॒ସଗ୍ଗ୍ ସ୍ନାଵାସ୍ଥି॑ ମ॒ଜ୍ଜା । ଏ॒ତଦ॑ଧିଵି॒ଧାୟ॒ ଋଷି॒ରଵୋ॑ଚତ୍ । ପାଙ୍କ୍ତଂ॒-ଵାଁ ଇ॒ଦଗ୍​ମ୍ ସର୍ଵମ୍᳚ । ପାଙ୍କ୍ତେ॑ନୈ॒ଵ ପାଙ୍କ୍ତଗ୍ଗ୍॑ ସ୍ପୃଣୋ॒ତୀତି॑ ॥ 1 ॥
ଇତି ସପ୍ତମୋ-ଽନୁଵାକଃ ॥

ଓମିତି॒ ବ୍ରହ୍ମ॑ । ଓମିତୀ॒ଦଗ୍​ମ୍ ସର୍ଵମ୍᳚ । ଓମିତ୍ୟେ॒ତଦ॑ନୁକୃତି ହ ସ୍ମ॒ ଵା ଅ॒ପ୍ୟୋ ଶ୍ରା॑ଵ॒ୟେତ୍ୟାଶ୍ରା॑ଵୟନ୍ତି । ଓମିତି॒ ସାମା॑ନି ଗାୟନ୍ତି । ଓଗ୍​ମ୍ ଶୋମିତି॑ ଶ॒ସ୍ତ୍ରାଣି॑ ଶଗ୍​ମ୍ସନ୍ତି । ଓମିତ୍ୟ॑ଧ୍ଵ॒ର୍ୟୁଃ ପ୍ର॑ତିଗ॒ର-ମ୍ପ୍ରତି॑ଗୃଣାତି । ଓମିତି॒ ବ୍ରହ୍ମା॒ ପ୍ରସୌ॑ତି । ଓମିତ୍ୟ॑ଗ୍ନିହୋ॒ତ୍ରମନୁ॑ଜାନାତି । ଓମିତି॑ ବ୍ରାହ୍ମ॒ଣଃ ପ୍ର॑ଵ॒କ୍ଷ୍ୟନ୍ନା॑ହ॒ ବ୍ରହ୍ମୋପା᳚ପ୍ନଵା॒ନୀତି॑ । ବ୍ରହ୍ମୈ॒ଵୋପା᳚ପ୍ନୋତି ॥ 1 ॥
ଇତ୍ୟଷ୍ଟମୋ-ଽନୁଵାକଃ ॥

ଋତ-ଞ୍ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ସତ୍ୟ-ଞ୍ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ତପଶ୍ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ଦମଶ୍ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ଶମଶ୍ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ଅଗ୍ନୟଶ୍ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ଅଗ୍ନିହୋତ୍ର-ଞ୍ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ଅତିଥୟଶ୍ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ମାନୁଷ-ଞ୍ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ପ୍ରଜା ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ପ୍ରଜନଶ୍ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ପ୍ରଜାତିଶ୍ଚ ସ୍ଵାଧ୍ୟାୟପ୍ରଵ॑ଚନେ॒ ଚ । ସତ୍ୟମିତି ସତ୍ୟଵଚା॑ ରାଥୀ॒ତରଃ । ତପ ଇତି ତପୋନିତ୍ୟଃ ପୌ॑ରୁଶି॒ଷ୍ଟିଃ । ସ୍ଵାଧ୍ୟାୟପ୍ରଵଚନେ ଏଵେତି ନାକୋ॑ ମୌଦ୍ଗ॒ଲ୍ୟଃ ।
ତଦ୍ଧି ତପ॑ସ୍ତଦ୍ଧି॒ ତପଃ ॥ 1 ॥
ଇତି ନଵମୋ-ଽନୁଵାକଃ ॥

ଅ॒ହଂ-ଵୃଁ॒କ୍ଷସ୍ୟ॒ ରେରି॑ଵା । କୀ॒ର୍ତିଃ ପୃ॒ଷ୍ଠ-ଙ୍ଗି॒ରେରି॑ଵ । ଊ॒ର୍ଧ୍ଵପ॑ଵିତ୍ରୋ ଵା॒ଜିନୀ॑ଵ ସ୍ଵ॒ମୃତ॑ମସ୍ମି । ଦ୍ରଵି॑ଣ॒ଗ୍​ମ୍॒ ସଵ॑ର୍ଚସମ୍ । ସୁମେଧା ଅ॑ମୃତୋ॒କ୍ଷିତଃ । ଇତି ତ୍ରିଶଙ୍କୋର୍ଵେଦା॑ନୁଵ॒ଚନମ୍ ॥ 1 ॥
ଇତି ଦଶମୋ-ଽନୁଵାକଃ ॥

ଵେଦମନୂଚ୍ୟାଚାର୍ୟୋ-ଽନ୍ତେଵାସିନମ॑ନୁଶା॒ସ୍ତି । ସତ୍ୟଂ॒-ଵଁଦ । ଧର୍ମ॒-ଞ୍ଚର । ସ୍ଵାଧ୍ୟାୟା᳚ନ୍ମା ପ୍ର॒ମଦଃ । ଆଚାର୍ୟାୟ ପ୍ରିୟ-ନ୍ଧନମାହୃତ୍ୟ ପ୍ରଜାତନ୍ତୁ-ମ୍ମା ଵ୍ୟ॑ଵଚ୍ଛେ॒ତ୍ସୀଃ । ସତ୍ୟାନ୍ନ ପ୍ରମ॑ଦିତ॒ଵ୍ୟମ୍ । ଧର୍ମାନ୍ନ ପ୍ରମ॑ଦିତ॒ଵ୍ୟମ୍ । କୁଶଲାନ୍ନ ପ୍ରମ॑ଦିତ॒ଵ୍ୟମ୍ । ଭୂତ୍ୟୈ ନ ପ୍ରମ॑ଦିତ॒ଵ୍ୟମ୍ । ସ୍ଵାଧ୍ୟାୟପ୍ରଵଚନାଭ୍ୟା-ନ୍ନ ପ୍ରମ॑ଦିତ॒ଵ୍ୟମ୍ ॥ 1 ॥
ଦେଵପିତୃକାର୍ୟାଭ୍ୟା-ନ୍ନ ପ୍ରମ॑ଦିତ॒ଵ୍ୟମ୍ । ମାତୃ॑ଦେଵୋ॒ ଭଵ । ପିତୃ॑ଦେଵୋ॒ ଭଵ । ଆଚାର୍ୟ॑ଦେଵୋ॒ ଭଵ । ଅତିଥି॑ଦେଵୋ॒ ଭଵ । ୟାନ୍ୟନଵଦ୍ୟାନି॑ କର୍ମା॒ଣି । ତାନି ସେଵି॑ତଵ୍ୟା॒ନି । ନୋ ଇ॑ତରା॒ଣି । ୟାନ୍ୟସ୍ମାକଗ୍​ମ୍ ସୁଚ॑ରିତା॒ନି । ତାନି ତ୍ଵୟୋ॑ପାସ୍ୟା॒ନି ॥ 2 ॥
ନୋ ଇ॑ତରା॒ଣି । ୟେ କେ ଚାରୁମଚ୍ଛ୍ରେୟାଗ୍​ମ୍॑ସୋ ବ୍ରା॒ହ୍ମଣାଃ । ତେଷା-ନ୍ତ୍ଵୟା-ଽଽସନେ ନ ପ୍ରଶ୍ଵ॑ସିତ॒ଵ୍ୟମ୍ । ଶ୍ରଦ୍ଧ॑ୟା ଦେ॒ୟମ୍ । ଅଶ୍ରଦ୍ଧ॑ୟା-ଽଦେ॒ୟମ୍ । ଶ୍ରି॑ୟା ଦେ॒ୟମ୍ । ହ୍ରି॑ୟା ଦେ॒ୟମ୍ । ଭି॑ୟା ଦେ॒ୟମ୍ । ସଂ​ଵିଁ॑ଦା ଦେ॒ୟମ୍ । ଅଥ ୟଦି ତେ କର୍ମଵିଚିକିଥ୍ସା ଵା ଵୃତ୍ତଵିଚିକି॑ଥ୍ସା ଵା॒ ସ୍ୟାତ୍ ॥ 3 ॥
ୟେ ତତ୍ର ବ୍ରାହ୍ମଣା᳚ସ୍ସମ୍ମ॒ର୍​ଶିନଃ । ୟୁକ୍ତା॑ ଆୟୁ॒କ୍ତାଃ । ଅଲୂକ୍ଷା॑ ଧର୍ମ॑କାମା॒ସ୍ସ୍ୟୁଃ । ୟଥା ତେ॑ ତତ୍ର॑ ଵର୍ତେ॒ରନ୍ନ୍ । ତଥା ତତ୍ର॑ ଵର୍ତେ॒ଥାଃ । ଅଥାଭ୍ୟା᳚ଖ୍ୟା॒ତେଷୁ । ୟେ ତତ୍ର ବ୍ରାହ୍ମଣା᳚ସ୍ସମ୍ମ॒ର୍​ଶିନଃ । ୟୁକ୍ତା॑ ଆୟୁ॒କ୍ତାଃ । ଅଲୂକ୍ଷା॑ ଧର୍ମକାମା॒ସ୍ସ୍ୟୁଃ । ୟଥା ତେ॑ ତେଷୁ॑ ଵର୍ତେ॒ରନ୍ନ୍ । ତଥା ତେଷୁ॑ ଵର୍ତେ॒ଥାଃ । ଏଷ॑ ଆଦେ॒ଶଃ । ଏଷ ଉ॑ପଦେ॒ଶଃ । ଏଷା ଵେ॑ଦୋପ॒ନିଷତ୍ । ଏତଦ॑ନୁଶା॒ସନମ୍ । ଏଵମୁପା॑ସିତ॒ଵ୍ୟମ୍ । ଏଵମୁ ଚୈତ॑ଦୁପା॒ସ୍ୟମ୍ ॥ 4 ॥
ଇତ୍ୟେକାଦଶ-ଽନୁଵାକଃ ॥

ଶ-ନ୍ନୋ॑ ମି॒ତ୍ରଶ୍ଶଂ-ଵଁରୁ॑ଣଃ । ଶ-ନ୍ନୋ॑ ଭଵତ୍ଵର୍ୟ॒ମା । ଶ-ନ୍ନ॒ ଇନ୍ଦ୍ରୋ॒ ବୃହ॒ସ୍ପତିଃ॑ । ଶ-ନ୍ନୋ॒ ଵିଷ୍ଣୁ॑ରୁରୁକ୍ର॒ମଃ । ନମୋ॒ ବ୍ରହ୍ମ॑ଣେ । ନମ॑ସ୍ତେ ଵାୟୋ । ତ୍ଵମେ॒ଵ ପ୍ର॒ତ୍ୟକ୍ଷ॒-ମ୍ବ୍ରହ୍ମା॑ସି । ତ୍ଵାମେ॒ଵ ପ୍ର॒ତ୍ୟକ୍ଷ॒-ମ୍ବ୍ରହ୍ମାଵା॑ଦିଷମ୍ । ଋ॒ତମ॑ଵାଦିଷମ୍ । ସ॒ତ୍ୟମ॑ଵାଦିଷମ୍ । ତନ୍ମାମା॑ଵୀତ୍ । ତଦ୍ଵ॒କ୍ତାର॑ମାଵୀତ୍ । ଆଵୀ॒ନ୍ମାମ୍ । ଆଵୀ᳚ଦ୍ଵ॒କ୍ତାରମ୍᳚ । ଓଂ ଶାନ୍ତି॒-ଶ୍ଶାନ୍ତି॒-ଶ୍ଶାନ୍ତିଃ॑ ॥ 1 ॥
ଇତି ଦ୍ଵାଦଶୋ-ଽନୁଵାକଃ ॥

॥ ହରିଃ॑ ଓମ୍ ॥
॥ ଶ୍ରୀ କୃଷ୍ଣାର୍ପଣମସ୍ତୁ ॥