𑌅𑌥 𑌤𑍃𑌤𑍀𑌯𑍋𑌽𑌧𑍍𑌯𑌾𑌯𑌃 ॥

𑌅𑌥 𑌕𑌾𑌮𑍍𑌯𑌜𑌪𑌸𑍍𑌥𑌾𑌨𑌂 𑌕𑌥𑌯𑌾𑌮𑌿 𑌵𑌰𑌾𑌨𑌨𑍇 ।
𑌸𑌾𑌗𑌰𑌾𑌂𑌤𑍇 𑌸𑌰𑌿𑌤𑍍𑌤𑍀𑌰𑍇 𑌤𑍀𑌰𑍍𑌥𑍇 𑌹𑌰𑌿𑌹𑌰𑌾𑌲𑌯𑍇 ॥ 236 ॥

𑌶𑌕𑍍𑌤𑌿𑌦𑍇𑌵𑌾𑌲𑌯𑍇 𑌗𑍋𑌷𑍍𑌠𑍇 𑌸𑌰𑍍𑌵𑌦𑍇𑌵𑌾𑌲𑌯𑍇 𑌶𑍁𑌭𑍇 ।
𑌵𑌟𑌸𑍍𑌯 𑌧𑌾𑌤𑍍𑌰𑍍𑌯𑌾 𑌮𑍂𑌲𑍇 𑌵𑌾 𑌮𑌠𑍇 𑌬𑍃𑌂𑌦𑌾𑌵𑌨𑍇 𑌤𑌥𑌾 ॥ 23𑍭 ॥

𑌪𑌵𑌿𑌤𑍍𑌰𑍇 𑌨𑌿𑌰𑍍𑌮𑌲𑍇 𑌦𑍇𑌶𑍇 𑌨𑌿𑌤𑍍𑌯𑌾𑌨𑍁𑌷𑍍𑌠𑌾𑌨𑌤𑍋𑌽𑌪𑌿 𑌵𑌾 ।
𑌨𑌿𑌰𑍍𑌵𑍇𑌦𑌨𑍇𑌨 𑌮𑍌𑌨𑍇𑌨 𑌜𑌪𑌮𑍇𑌤𑌤𑍍 𑌸𑌮𑌾𑌰𑌭𑍇𑌤𑍍 ॥ 23𑍮 ॥

𑌜𑌾𑌪𑍍𑌯𑍇𑌨 𑌜𑌯𑌮𑌾𑌪𑍍𑌨𑍋𑌤𑌿 𑌜𑌪𑌸𑌿𑌦𑍍𑌧𑌿𑌂 𑌫𑌲𑌂 𑌤𑌥𑌾 ।
𑌹𑍀𑌨𑌂 𑌕𑌰𑍍𑌮 𑌤𑍍𑌯𑌜𑍇𑌤𑍍𑌸𑌰𑍍𑌵𑌂 𑌗𑌰𑍍𑌹𑌿𑌤𑌸𑍍𑌥𑌾𑌨𑌮𑍇𑌵 𑌚 ॥ 23𑍯 ॥

𑌶𑍍𑌮𑌶𑌾𑌨𑍇 𑌬𑌿𑌲𑍍𑌵𑌮𑍂𑌲𑍇 𑌵𑌾 𑌵𑌟𑌮𑍂𑌲𑌾𑌂𑌤𑌿𑌕𑍇 𑌤𑌥𑌾 ।
𑌸𑌿𑌦𑍍𑌧𑍍𑌯𑌂𑌤𑌿 𑌕𑌾𑌨𑌕𑍇 𑌮𑍂𑌲𑍇 𑌚𑍂𑌤𑌵𑍃𑌕𑍍𑌷𑌸𑍍𑌯 𑌸𑌨𑍍𑌨𑌿𑌧𑍌 ॥ 240 ॥

𑌪𑍀𑌤𑌾𑌸𑌨𑌂 𑌮𑍋𑌹𑌨𑍇 𑌤𑍁 𑌹𑍍𑌯𑌸𑌿𑌤𑌂 𑌚𑌾𑌭𑌿𑌚𑌾𑌰𑌿𑌕𑍇 ।
𑌜𑍍𑌞𑍇𑌯𑌂 𑌶𑍁𑌕𑍍𑌲𑌂 𑌚 𑌶𑌾𑌂𑌤𑍍𑌯𑌰𑍍𑌥𑌂 𑌵𑌶𑍍𑌯𑍇 𑌰𑌕𑍍𑌤𑌂 𑌪𑍍𑌰𑌕𑍀𑌰𑍍𑌤𑌿𑌤𑌮𑍍 ॥ 241 ॥

𑌜𑌪𑌂 𑌹𑍀𑌨𑌾𑌸𑌨𑌂 𑌕𑍁𑌰𑍍𑌵𑌨𑍍 𑌹𑍀𑌨𑌕𑌰𑍍𑌮𑌫𑌲𑌪𑍍𑌰𑌦𑌮𑍍 ।
𑌗𑍁𑌰𑍁𑌗𑍀𑌤𑌾𑌂 𑌪𑍍𑌰𑌯𑌾𑌣𑍇 𑌵𑌾 𑌸𑌂𑌗𑍍𑌰𑌾𑌮𑍇 𑌰𑌿𑌪𑍁𑌸𑌂𑌕𑌟𑍇 ॥ 242 ॥

𑌜𑌪𑌨𑍍 𑌜𑌯𑌮𑌵𑌾𑌪𑍍𑌨𑍋𑌤𑌿 𑌮𑌰𑌣𑍇 𑌮𑍁𑌕𑍍𑌤𑌿𑌦𑌾𑌯𑌿𑌕𑌾 ।
𑌸𑌰𑍍𑌵𑌕𑌰𑍍𑌮𑌾𑌣𑌿 𑌸𑌿𑌦𑍍𑌧𑍍𑌯𑌂𑌤𑌿 𑌗𑍁𑌰𑍁𑌪𑍁𑌤𑍍𑌰𑍇 𑌨 𑌸𑌂𑌶𑌯𑌃 ॥ 243 ॥

𑌗𑍁𑌰𑍁𑌮𑌂𑌤𑍍𑌰𑍋 𑌮𑍁𑌖𑍇 𑌯𑌸𑍍𑌯 𑌤𑌸𑍍𑌯 𑌸𑌿𑌦𑍍𑌧𑍍𑌯𑌂𑌤𑌿 𑌨𑌾𑌽𑌨𑍍𑌯𑌥𑌾 ।
𑌦𑍀𑌕𑍍𑌷𑌯𑌾 𑌸𑌰𑍍𑌵𑌕𑌰𑍍𑌮𑌾𑌣𑌿 𑌸𑌿𑌦𑍍𑌧𑍍𑌯𑌂𑌤𑌿 𑌗𑍁𑌰𑍁𑌪𑍁𑌤𑍍𑌰𑌕𑍇 ॥ 244 ॥

𑌭𑌵𑌮𑍂𑌲𑌵𑌿𑌨𑌾𑌶𑌾𑌯 𑌚𑌾𑌷𑍍𑌟𑌪𑌾𑌶𑌨𑌿𑌵𑍃𑌤𑍍𑌤𑌯𑍇 ।
𑌗𑍁𑌰𑍁𑌗𑍀𑌤𑌾𑌂𑌭𑌸𑌿 𑌸𑍍𑌨𑌾𑌨𑌂 𑌤𑌤𑍍𑌤𑍍𑌵𑌜𑍍𑌞𑌃 𑌕𑍁𑌰𑍁𑌤𑍇 𑌸𑌦𑌾 ॥ 245 ॥

𑌸 𑌏𑌵𑌂 𑌸𑌦𑍍𑌗𑍁𑌰𑍁𑌃 𑌸𑌾𑌕𑍍𑌷𑌾𑌤𑍍 𑌸𑌦𑌸𑌦𑍍𑌬𑍍𑌰𑌹𑍍𑌮𑌵𑌿𑌤𑍍𑌤𑌮𑌃 ।
𑌤𑌸𑍍𑌯 𑌸𑍍𑌥𑌾𑌨𑌾𑌨𑌿 𑌸𑌰𑍍𑌵𑌾𑌣𑌿 𑌪𑌵𑌿𑌤𑍍𑌰𑌾𑌣𑌿 𑌨 𑌸𑌂𑌶𑌯𑌃 ॥ 246 ॥

𑌸𑌰𑍍𑌵𑌶𑍁𑌦𑍍𑌧𑌃 𑌪𑌵𑌿𑌤𑍍𑌰𑍋𑌽𑌸𑍌 𑌸𑍍𑌵𑌭𑌾𑌵𑌾𑌦𑍍𑌯𑌤𑍍𑌰 𑌤𑌿𑌷𑍍𑌠𑌤𑌿 ।
𑌤𑌤𑍍𑌰 𑌦𑍇𑌵𑌗𑌣𑌾𑌃 𑌸𑌰𑍍𑌵𑍇 𑌕𑍍𑌷𑍇𑌤𑍍𑌰𑌪𑍀𑌠𑍇 𑌚𑌰𑌂𑌤𑌿 𑌚 ॥ 24𑍭 ॥

𑌆𑌸𑌨𑌸𑍍𑌥𑌾𑌃 𑌶𑌯𑌾𑌨𑌾 𑌵𑌾 𑌗𑌚𑍍𑌛𑌂𑌤𑌸𑍍𑌤𑌿𑌷𑍍𑌠𑌤𑍋𑌽𑌪𑌿 𑌵𑌾 ।
𑌅𑌶𑍍𑌵𑌾𑌰𑍂𑌢𑌾 𑌗𑌜𑌾𑌰𑍂𑌢𑌾𑌃 𑌸𑍁𑌷𑍁𑌪𑍍𑌤𑌾 𑌜𑌾𑌗𑍍𑌰𑌤𑍋𑌽𑌪𑌿 𑌵𑌾 ॥ 24𑍮 ॥

𑌶𑍁𑌚𑌿𑌰𑍍𑌭𑍂𑌤𑌾 𑌜𑍍𑌞𑌾𑌨𑌵𑌂𑌤𑍋 𑌗𑍁𑌰𑍁𑌗𑍀𑌤𑌾𑌂 𑌜𑌪𑌂𑌤𑌿 𑌯𑍇 ।
𑌤𑍇𑌷𑌾𑌂 𑌦𑌰𑍍𑌶𑌨𑌸𑌂𑌸𑍍𑌪𑌰𑍍𑌶𑌾𑌤𑍍 𑌦𑌿𑌵𑍍𑌯𑌜𑍍𑌞𑌾𑌨𑌂 𑌪𑍍𑌰𑌜𑌾𑌯𑌤𑍇 ॥ 24𑍯 ॥

𑌸𑌮𑍁𑌦𑍍𑌰𑍇 𑌵𑍈 𑌯𑌥𑌾 𑌤𑍋𑌯𑌂 𑌕𑍍𑌷𑍀𑌰𑍇 𑌕𑍍𑌷𑍀𑌰𑌂 𑌜𑌲𑍇 𑌜𑌲𑌮𑍍 ।
𑌭𑌿𑌨𑍍𑌨𑍇 𑌕𑍁𑌂𑌭𑍇 𑌯𑌥𑌾𑌽𑌽𑌕𑌾𑌶𑌂 𑌤𑌥𑌾𑌽𑌽𑌤𑍍𑌮𑌾 𑌪𑌰𑌮𑌾𑌤𑍍𑌮𑌨𑌿 ॥ 250 ॥

𑌤𑌥𑍈𑌵 𑌜𑍍𑌞𑌾𑌨𑌵𑌾𑌨𑍍 𑌜𑍀𑌵𑌃 𑌪𑌰𑌮𑌾𑌤𑍍𑌮𑌨𑌿 𑌸𑌰𑍍𑌵𑌦𑌾 ।
𑌐𑌕𑍍𑌯𑍇𑌨 𑌰𑌮𑌤𑍇 𑌜𑍍𑌞𑌾𑌨𑍀 𑌯𑌤𑍍𑌰 𑌕𑍁𑌤𑍍𑌰 𑌦𑌿𑌵𑌾𑌨𑌿𑌶𑌮𑍍 ॥ 251 ॥

𑌏𑌵𑌂𑌵𑌿𑌧𑍋 𑌮𑌹𑌾𑌯𑍁𑌕𑍍𑌤𑌃 𑌸𑌰𑍍𑌵𑌤𑍍𑌰 𑌵𑌰𑍍𑌤𑌤𑍇 𑌸𑌦𑌾 ।
𑌤𑌸𑍍𑌮𑌾𑌤𑍍𑌸𑌰𑍍𑌵𑌪𑍍𑌰𑌕𑌾𑌰𑍇𑌣 𑌗𑍁𑌰𑍁𑌭𑌕𑍍𑌤𑌿𑌂 𑌸𑌮𑌾𑌚𑌰𑍇𑌤𑍍 ॥ 252 ॥

𑌗𑍁𑌰𑍁𑌸𑌂𑌤𑍋𑌷𑌣𑌾𑌦𑍇𑌵 𑌮𑍁𑌕𑍍𑌤𑍋 𑌭𑌵𑌤𑌿 𑌪𑌾𑌰𑍍𑌵𑌤𑌿 ।
𑌅𑌣𑌿𑌮𑌾𑌦𑌿𑌷𑍁 𑌭𑍋𑌕𑍍𑌤𑍃𑌤𑍍𑌵𑌂 𑌕𑍃𑌪𑌯𑌾 𑌦𑍇𑌵𑌿 𑌜𑌾𑌯𑌤𑍇 ॥ 253 ॥

𑌸𑌾𑌮𑍍𑌯𑍇𑌨 𑌰𑌮𑌤𑍇 𑌜𑍍𑌞𑌾𑌨𑍀 𑌦𑌿𑌵𑌾 𑌵𑌾 𑌯𑌦𑌿 𑌵𑌾 𑌨𑌿𑌶𑌿 ।
𑌏𑌵𑌂𑌵𑌿𑌧𑍋 𑌮𑌹𑌾𑌮𑍌𑌨𑍀 𑌤𑍍𑌰𑍈𑌲𑍋𑌕𑍍𑌯𑌸𑌮𑌤𑌾𑌂 𑌵𑍍𑌰𑌜𑍇𑌤𑍍 ॥ 254 ॥

𑌅𑌥 𑌸𑌂𑌸𑌾𑌰𑌿𑌣𑌃 𑌸𑌰𑍍𑌵𑍇 𑌗𑍁𑌰𑍁𑌗𑍀𑌤𑌾 𑌜𑌪𑍇𑌨 𑌤𑍁 ।
𑌸𑌰𑍍𑌵𑌾𑌨𑍍 𑌕𑌾𑌮𑌾𑌂𑌸𑍍𑌤𑍁 𑌭𑍁𑌂𑌜𑌂𑌤𑌿 𑌤𑍍𑌰𑌿𑌸𑌤𑍍𑌯𑌂 𑌮𑌮 𑌭𑌾𑌷𑌿𑌤𑌮𑍍 ॥ 255 ॥

𑌸𑌤𑍍𑌯𑌂 𑌸𑌤𑍍𑌯𑌂 𑌪𑍁𑌨𑌃 𑌸𑌤𑍍𑌯𑌂 𑌧𑌰𑍍𑌮𑌸𑌾𑌰𑌂 𑌮𑌯𑍋𑌦𑌿𑌤𑌮𑍍 ।
𑌗𑍁𑌰𑍁𑌗𑍀𑌤𑌾𑌸𑌮𑌂 𑌸𑍍𑌤𑍋𑌤𑍍𑌰𑌂 𑌨𑌾𑌸𑍍𑌤𑌿 𑌤𑌤𑍍𑌤𑍍𑌵𑌂 𑌗𑍁𑌰𑍋𑌃 𑌪𑌰𑌮𑍍 ॥ 256 ॥

𑌗𑍁𑌰𑍁𑌰𑍍𑌦𑍇𑌵𑍋 𑌗𑍁𑌰𑍁𑌰𑍍𑌧𑌰𑍍𑌮𑍋 𑌗𑍁𑌰𑍌 𑌨𑌿𑌷𑍍𑌠𑌾 𑌪𑌰𑌂 𑌤𑌪𑌃 ।
𑌗𑍁𑌰𑍋𑌃 𑌪𑌰𑌤𑌰𑌂 𑌨𑌾𑌸𑍍𑌤𑌿 𑌤𑍍𑌰𑌿𑌵𑌾𑌰𑌂 𑌕𑌥𑌯𑌾𑌮𑌿 𑌤𑍇 ॥ 25𑍭 ॥

𑌧𑌨𑍍𑌯𑌾 𑌮𑌾𑌤𑌾 𑌪𑌿𑌤𑌾 𑌧𑌨𑍍𑌯𑍋 𑌗𑍋𑌤𑍍𑌰𑌂 𑌧𑌨𑍍𑌯𑌂 𑌕𑍁𑌲𑍋𑌦𑍍𑌭𑌵𑌃 ।
𑌧𑌨𑍍𑌯𑌾 𑌚 𑌵𑌸𑍁𑌧𑌾 𑌦𑍇𑌵𑌿 𑌯𑌤𑍍𑌰 𑌸𑍍𑌯𑌾𑌦𑍍𑌗𑍁𑌰𑍁𑌭𑌕𑍍𑌤𑌤𑌾 ॥ 25𑍮 ॥

𑌆𑌕𑌲𑍍𑌪𑌜𑌨𑍍𑌮 𑌕𑍋𑌟𑍀𑌨𑌾𑌂 𑌯𑌜𑍍𑌞𑌵𑍍𑌰𑌤𑌤𑌪𑌃 𑌕𑍍𑌰𑌿𑌯𑌾𑌃 ।
𑌤𑌾𑌃 𑌸𑌰𑍍𑌵𑌾𑌃 𑌸𑌫𑌲𑌾 𑌦𑍇𑌵𑌿 𑌗𑍁𑌰𑍂𑌸𑌂𑌤𑍋𑌷𑌮𑌾𑌤𑍍𑌰𑌤𑌃 ॥ 25𑍯 ॥

𑌶𑌰𑍀𑌰𑌮𑌿𑌂𑌦𑍍𑌰𑌿𑌯𑌂 𑌪𑍍𑌰𑌾𑌣𑌮𑌰𑍍𑌥𑌂 𑌸𑍍𑌵𑌜𑌨𑌬𑌂𑌧𑍁𑌤𑌾 ।
𑌮𑌾𑌤𑍃𑌕𑍁𑌲𑌂 𑌪𑌿𑌤𑍃𑌕𑍁𑌲𑌂 𑌗𑍁𑌰𑍁𑌰𑍇𑌵 𑌨 𑌸𑌂𑌶𑌯𑌃 ॥ 260 ॥

𑌮𑌂𑌦𑌭𑌾𑌗𑍍𑌯𑌾 𑌹𑍍𑌯𑌶𑌕𑍍𑌤𑌾𑌶𑍍𑌚 𑌯𑍇 𑌜𑌨𑌾 𑌨𑌾𑌨𑍁𑌮𑌨𑍍𑌵𑌤𑍇 ।
𑌗𑍁𑌰𑍁𑌸𑍇𑌵𑌾𑌸𑍁 𑌵𑌿𑌮𑍁𑌖𑌾𑌃 𑌪𑌚𑍍𑌯𑌂𑌤𑍇 𑌨𑌰𑌕𑍇𑌽𑌶𑍁𑌚𑍌 ॥ 261 ॥

𑌵𑌿𑌦𑍍𑌯𑌾 𑌧𑌨𑌂 𑌬𑌲𑌂 𑌚𑍈𑌵 𑌤𑍇𑌷𑌾𑌂 𑌭𑌾𑌗𑍍𑌯𑌂 𑌨𑌿𑌰𑌰𑍍𑌥𑌕𑌮𑍍 ।
𑌯𑍇𑌷𑌾𑌂 𑌗𑍁𑌰𑍂𑌕𑍃𑌪𑌾 𑌨𑌾𑌸𑍍𑌤𑌿 𑌅𑌧𑍋 𑌗𑌚𑍍𑌛𑌂𑌤𑌿 𑌪𑌾𑌰𑍍𑌵𑌤𑌿 ॥ 262 ॥

𑌬𑍍𑌰𑌹𑍍𑌮𑌾 𑌵𑌿𑌷𑍍𑌣𑍁𑌶𑍍𑌚 𑌰𑍁𑌦𑍍𑌰𑌶𑍍𑌚 𑌦𑍇𑌵𑌾𑌶𑍍𑌚 𑌪𑌿𑌤𑍃𑌕𑌿𑌨𑍍𑌨𑌰𑌾𑌃 ।
𑌸𑌿𑌦𑍍𑌧𑌚𑌾𑌰𑌣𑌯𑌕𑍍𑌷𑌾𑌶𑍍𑌚 𑌅𑌨𑍍𑌯𑍇 𑌚 𑌮𑍁𑌨𑌯𑍋 𑌜𑌨𑌾𑌃 ॥ 263 ॥

𑌗𑍁𑌰𑍁𑌭𑌾𑌵𑌃 𑌪𑌰𑌂 𑌤𑍀𑌰𑍍𑌥𑌮𑌨𑍍𑌯𑌤𑍀𑌰𑍍𑌥𑌂 𑌨𑌿𑌰𑌰𑍍𑌥𑌕𑌮𑍍 ।
𑌸𑌰𑍍𑌵𑌤𑍀𑌰𑍍𑌥𑌮𑌯𑌂 𑌦𑍇𑌵𑌿 𑌶𑍍𑌰𑍀𑌗𑍁𑌰𑍋𑌶𑍍𑌚𑌰𑌣𑌾𑌂𑌬𑍁𑌜𑌮𑍍 ॥ 264 ॥

𑌕𑌨𑍍𑌯𑌾𑌭𑍋𑌗𑌰𑌤𑌾 𑌮𑌂𑌦𑌾𑌃 𑌸𑍍𑌵𑌕𑌾𑌂𑌤𑌾𑌯𑌾𑌃 𑌪𑌰𑌾𑌙𑍍𑌮𑍁𑌖𑌾𑌃 ।
𑌅𑌤𑌃 𑌪𑌰𑌂 𑌮𑌯𑌾 𑌦𑍇𑌵𑌿 𑌕𑌥𑌿𑌤𑌂 𑌨 𑌮𑌮 𑌪𑍍𑌰𑌿𑌯𑍇 ॥ 265 ॥

𑌇𑌦𑌂 𑌰𑌹𑌸𑍍𑌯𑌮𑌸𑍍𑌪𑌷𑍍𑌟𑌂 𑌵𑌕𑍍𑌤𑌵𑍍𑌯𑌂 𑌚 𑌵𑌰𑌾𑌨𑌨𑍇 ।
𑌸𑍁𑌗𑍋𑌪𑍍𑌯𑌂 𑌚 𑌤𑌵𑌾𑌗𑍍𑌰𑍇 𑌤𑍁 𑌮𑌮𑌾𑌤𑍍𑌮𑌪𑍍𑌰𑍀𑌤𑌯𑍇 𑌸𑌤𑌿 ॥ 266 ॥

𑌸𑍍𑌵𑌾𑌮𑌿𑌮𑍁𑌖𑍍𑌯𑌗𑌣𑍇𑌶𑌾𑌦𑍍𑌯𑌾𑌨𑍍 𑌵𑍈𑌷𑍍𑌣𑌵𑌾𑌦𑍀𑌂𑌶𑍍𑌚 𑌪𑌾𑌰𑍍𑌵𑌤𑌿 ।
𑌨 𑌵𑌕𑍍𑌤𑌵𑍍𑌯𑌂 𑌮𑌹𑌾𑌮𑌾𑌯𑍇 𑌪𑌾𑌦𑌸𑍍𑌪𑌰𑍍𑌶𑌂 𑌕𑍁𑌰𑍁𑌷𑍍𑌵 𑌮𑍇 ॥ 26𑍭 ॥

𑌅𑌭𑌕𑍍𑌤𑍇 𑌵𑌂𑌚𑌕𑍇 𑌧𑍂𑌰𑍍𑌤𑍇 𑌪𑌾𑌷𑌂𑌡𑍇 𑌨𑌾𑌸𑍍𑌤𑌿𑌕𑌾𑌦𑌿𑌷𑍁 ।
𑌮𑌨𑌸𑌾𑌽𑌪𑌿 𑌨 𑌵𑌕𑍍𑌤𑌵𑍍𑌯𑌾 𑌗𑍁𑌰𑍁𑌗𑍀𑌤𑌾 𑌕𑌦𑌾𑌚𑌨 ॥ 26𑍮 ॥

𑌗𑍁𑌰𑌵𑍋 𑌬𑌹𑌵𑌃 𑌸𑌂𑌤𑌿 𑌶𑌿𑌷𑍍𑌯𑌵𑌿𑌤𑍍𑌤𑌾𑌪𑌹𑌾𑌰𑌕𑌾𑌃 ।
𑌤𑌮𑍇𑌕𑌂 𑌦𑍁𑌰𑍍𑌲𑌭𑌂 𑌮𑌨𑍍𑌯𑍇 𑌶𑌿𑌷𑍍𑌯𑌹𑍃𑌤𑍍𑌤𑌾𑌪𑌹𑌾𑌰𑌕𑌮𑍍 ॥ 26𑍯 ॥

𑌚𑌾𑌤𑍁𑌰𑍍𑌯𑌵𑌾𑌨𑍍 𑌵𑌿𑌵𑍇𑌕𑍀 𑌚 𑌅𑌧𑍍𑌯𑌾𑌤𑍍𑌮𑌜𑍍𑌞𑌾𑌨𑌵𑌾𑌨𑍍 𑌶𑍁𑌚𑌿𑌃 ।
𑌮𑌾𑌨𑌸𑌂 𑌨𑌿𑌰𑍍𑌮𑌲𑌂 𑌯𑌸𑍍𑌯 𑌗𑍁𑌰𑍁𑌤𑍍𑌵𑌂 𑌤𑌸𑍍𑌯 𑌶𑍋𑌭𑌤𑍇 ॥ 2𑍭0 ॥

𑌗𑍁𑌰𑌵𑍋 𑌨𑌿𑌰𑍍𑌮𑌲𑌾𑌃 𑌶𑌾𑌂𑌤𑌾𑌃 𑌸𑌾𑌧𑌵𑍋 𑌮𑌿𑌤𑌭𑌾𑌷𑌿𑌣𑌃 ।
𑌕𑌾𑌮𑌕𑍍𑌰𑍋𑌧𑌵𑌿𑌨𑌿𑌰𑍍𑌮𑍁𑌕𑍍𑌤𑌾𑌃 𑌸𑌦𑌾𑌚𑌾𑌰𑌾𑌃 𑌜𑌿𑌤𑍇𑌂𑌦𑍍𑌰𑌿𑌯𑌾𑌃 ॥ 2𑍭1 ॥

𑌸𑍂𑌚𑌕𑌾𑌦𑌿𑌪𑍍𑌰𑌭𑍇𑌦𑍇𑌨 𑌗𑍁𑌰𑌵𑍋 𑌬𑌹𑍁𑌧𑌾 𑌸𑍍𑌮𑍃𑌤𑌾𑌃 ।
𑌸𑍍𑌵𑌯𑌂 𑌸𑌮𑍍𑌯𑌕𑍍 𑌪𑌰𑍀𑌕𑍍𑌷𑍍𑌯𑌾𑌥 𑌤𑌤𑍍𑌤𑍍𑌵𑌨𑌿𑌷𑍍𑌠𑌂 𑌭𑌜𑍇𑌤𑍍𑌸𑍁𑌧𑍀𑌃 ॥ 2𑍭2 ॥

𑌵𑌰𑍍𑌣𑌜𑌾𑌲𑌮𑌿𑌦𑌂 𑌤𑌦𑍍𑌵𑌦𑍍𑌬𑌾𑌹𑍍𑌯𑌶𑌾𑌸𑍍𑌤𑍍𑌰𑌂 𑌤𑍁 𑌲𑍌𑌕𑌿𑌕𑌮𑍍 ।
𑌯𑌸𑍍𑌮𑌿𑌨𑍍 𑌦𑍇𑌵𑌿 𑌸𑌮𑌭𑍍𑌯𑌸𑍍𑌤𑌂 𑌸 𑌗𑍁𑌰𑍁𑌃 𑌸𑍁𑌚𑌕𑌃 𑌸𑍍𑌮𑍃𑌤𑌃 ॥ 2𑍭3 ॥

𑌵𑌰𑍍𑌣𑌾𑌶𑍍𑌰𑌮𑍋𑌚𑌿𑌤𑌾𑌂 𑌵𑌿𑌦𑍍𑌯𑌾𑌂 𑌧𑌰𑍍𑌮𑌾𑌧𑌰𑍍𑌮𑌵𑌿𑌧𑌾𑌯𑌿𑌨𑍀𑌮𑍍 ।
𑌪𑍍𑌰𑌵𑌕𑍍𑌤𑌾𑌰𑌂 𑌗𑍁𑌰𑍁𑌂 𑌵𑌿𑌦𑍍𑌧𑌿 𑌵𑌾𑌚𑌕𑌂 𑌤𑍍𑌵𑌿𑌤𑌿 𑌪𑌾𑌰𑍍𑌵𑌤𑌿 ॥ 2𑍭4 ॥

𑌪𑌂𑌚𑌾𑌕𑍍𑌷𑌰𑍍𑌯𑌾𑌦𑌿𑌮𑌂𑌤𑍍𑌰𑌾𑌣𑌾𑌮𑍁𑌪𑌦𑍇𑌷𑍍𑌟𑌾 𑌤𑍁 𑌪𑌾𑌰𑍍𑌵𑌤𑌿 ।
𑌸 𑌗𑍁𑌰𑍁𑌰𑍍𑌬𑍋𑌧𑌕𑍋 𑌭𑍂𑌯𑌾𑌦𑍁𑌭𑌯𑍋𑌰𑌯𑌮𑍁𑌤𑍍𑌤𑌮𑌃 ॥ 2𑍭5 ॥

𑌮𑍋𑌹𑌮𑌾𑌰𑌣𑌵𑌶𑍍𑌯𑌾𑌦𑌿𑌤𑍁𑌚𑍍𑌛𑌮𑌂𑌤𑍍𑌰𑍋𑌪𑌦𑍇𑌶𑌿𑌨𑌮𑍍 ।
𑌨𑌿𑌷𑌿𑌦𑍍𑌧𑌗𑍁𑌰𑍁𑌰𑌿𑌤𑍍𑌯𑌾𑌹𑍁𑌃 𑌪𑌂𑌡𑌿𑌤𑌾𑌸𑍍𑌤𑌤𑍍𑌤𑍍𑌵𑌦𑌰𑍍𑌶𑌿𑌨𑌃 ॥ 2𑍭6 ॥

𑌅𑌨𑌿𑌤𑍍𑌯𑌮𑌿𑌤𑌿 𑌨𑌿𑌰𑍍𑌦𑌿𑌶𑍍𑌯 𑌸𑌂𑌸𑌾𑌰𑌂 𑌸𑌂𑌕𑌟𑌾𑌲𑌯𑌮𑍍 ।
𑌵𑍈𑌰𑌾𑌗𑍍𑌯𑌪𑌥𑌦𑌰𑍍𑌶𑍀 𑌯𑌃 𑌸 𑌗𑍁𑌰𑍁𑌰𑍍𑌵𑌿𑌹𑌿𑌤𑌃 𑌪𑍍𑌰𑌿𑌯𑍇 ॥ 2𑍭𑍭 ॥

𑌤𑌤𑍍𑌤𑍍𑌵𑌮𑌸𑍍𑌯𑌾𑌦𑌿𑌵𑌾𑌕𑍍𑌯𑌾𑌨𑌾𑌮𑍁𑌪𑌦𑍇𑌷𑍍𑌟𑌾 𑌤𑍁 𑌪𑌾𑌰𑍍𑌵𑌤𑌿 ।
𑌕𑌾𑌰𑌣𑌾𑌖𑍍𑌯𑍋 𑌗𑍁𑌰𑍁𑌃 𑌪𑍍𑌰𑍋𑌕𑍍𑌤𑍋 𑌭𑌵𑌰𑍋𑌗𑌨𑌿𑌵𑌾𑌰𑌕𑌃 ॥ 2𑍭𑍮 ॥

𑌸𑌰𑍍𑌵𑌸𑌂𑌦𑍇𑌹𑌸𑌂𑌦𑍋𑌹𑌨𑌿𑌰𑍍𑌮𑍂𑌲𑌨𑌵𑌿𑌚𑌕𑍍𑌷𑌣𑌃 ।
𑌜𑌨𑍍𑌮𑌮𑍃𑌤𑍍𑌯𑍁𑌭𑌯𑌘𑍍𑌨𑍋 𑌯𑌃 𑌸 𑌗𑍁𑌰𑍁𑌃 𑌪𑌰𑌮𑍋 𑌮𑌤𑌃 ॥ 2𑍭𑍯 ॥

𑌬𑌹𑍁𑌜𑌨𑍍𑌮𑌕𑍃𑌤𑌾𑌤𑍍 𑌪𑍁𑌣𑍍𑌯𑌾𑌲𑍍𑌲𑌭𑍍𑌯𑌤𑍇𑌽𑌸𑍌 𑌮𑌹𑌾𑌗𑍁𑌰𑍁𑌃 ।
𑌲𑌬𑍍𑌧𑍍𑌵𑌾𑌽𑌮𑍁𑌂 𑌨 𑌪𑍁𑌨𑌰𑍍𑌯𑌾𑌤𑌿 𑌶𑌿𑌷𑍍𑌯𑌃 𑌸𑌂𑌸𑌾𑌰𑌬𑌂𑌧𑌨𑌮𑍍 ॥ 2𑍮0 ॥

𑌏𑌵𑌂 𑌬𑌹𑍁𑌵𑌿𑌧𑌾 𑌲𑍋𑌕𑍇 𑌗𑍁𑌰𑌵𑌃 𑌸𑌂𑌤𑌿 𑌪𑌾𑌰𑍍𑌵𑌤𑌿 ।
𑌤𑍇𑌷𑍁 𑌸𑌰𑍍𑌵𑌪𑍍𑌰𑌯𑌤𑍍𑌨𑍇𑌨 𑌸𑍇𑌵𑍍𑌯𑍋 𑌹𑌿 𑌪𑌰𑌮𑍋 𑌗𑍁𑌰𑍁𑌃 ॥ 2𑍮1 ॥

𑌨𑌿𑌷𑌿𑌦𑍍𑌧𑌗𑍁𑌰𑍁𑌶𑌿𑌷𑍍𑌯𑌸𑍍𑌤𑍁 𑌦𑍁𑌷𑍍𑌟𑌸𑌂𑌕𑌲𑍍𑌪𑌦𑍂𑌷𑌿𑌤𑌃 ।
𑌬𑍍𑌰𑌹𑍍𑌮𑌪𑍍𑌰𑌳𑌯𑌪𑌰𑍍𑌯𑌂𑌤𑌂 𑌨 𑌪𑍁𑌨𑌰𑍍𑌯𑌾𑌤𑌿 𑌮𑌰𑍍𑌤𑍍𑌯𑌤𑌾𑌮𑍍 ॥ 2𑍮2 ॥

𑌏𑌵𑌂 𑌶𑍍𑌰𑍁𑌤𑍍𑌵𑌾 𑌮𑌹𑌾𑌦𑍇𑌵𑍀 𑌮𑌹𑌾𑌦𑍇𑌵𑌵𑌚𑌸𑍍𑌤𑌥𑌾 ।
𑌅𑌤𑍍𑌯𑌂𑌤𑌵𑌿𑌹𑍍𑌵𑌲𑌮𑌨𑌾𑌃 𑌶𑌂𑌕𑌰𑌂 𑌪𑌰𑌿𑌪𑍃𑌚𑍍𑌛𑌤𑌿 ॥ 2𑍮3 ॥

𑌪𑌾𑌰𑍍𑌵𑌤𑍍𑌯𑍁𑌵𑌾𑌚 ।
𑌨𑌮𑌸𑍍𑌤𑍇 𑌦𑍇𑌵𑌦𑍇𑌵𑌾𑌤𑍍𑌰 𑌶𑍍𑌰𑍋𑌤𑌵𑍍𑌯𑌂 𑌕𑌿𑌂𑌚𑌿𑌦𑌸𑍍𑌤𑌿 𑌮𑍇 ।
𑌶𑍍𑌰𑍁𑌤𑍍𑌵𑌾 𑌤𑍍𑌵𑌦𑍍𑌵𑌾𑌕𑍍𑌯𑌮𑌧𑍁𑌨𑌾 𑌭𑍃𑌶𑌂 𑌸𑍍𑌯𑌾𑌦𑍍𑌵𑌿𑌹𑍍𑌵𑌲𑌂 𑌮𑌨𑌃 ॥ 2𑍮4 ॥

𑌸𑍍𑌵𑌯𑌂 𑌮𑍂𑌢𑌾 𑌮𑍃𑌤𑍍𑌯𑍁𑌭𑍀𑌤𑌾𑌃 𑌸𑍁𑌕𑍃𑌤𑌾𑌦𑍍𑌵𑌿𑌰𑌤𑌿𑌂 𑌗𑌤𑌾𑌃 ।
𑌦𑍈𑌵𑌾𑌨𑍍𑌨𑌿𑌷𑌿𑌦𑍍𑌧𑌗𑍁𑌰𑍁𑌗𑌾 𑌯𑌦𑌿 𑌤𑍇𑌷𑌾𑌂 𑌤𑍁 𑌕𑌾 𑌗𑌤𑌿𑌃 ॥ 2𑍮5 ॥

𑌶𑍍𑌰𑍀 𑌮𑌹𑌾𑌦𑍇𑌵 𑌉𑌵𑌾𑌚 ।
𑌶𑍃𑌣𑍁 𑌤𑌤𑍍𑌤𑍍𑌵𑌮𑌿𑌦𑌂 𑌦𑍇𑌵𑌿 𑌯𑌦𑌾 𑌸𑍍𑌯𑌾𑌦𑍍𑌵𑌿𑌰𑌤𑍋 𑌨𑌰𑌃 ।
𑌤𑌦𑌾𑌽𑌸𑌾𑌵𑌧𑌿𑌕𑌾𑌰𑍀𑌤𑌿 𑌪𑍍𑌰𑍋𑌚𑍍𑌯𑌤𑍇 𑌶𑍍𑌰𑍁𑌤𑌿𑌮𑌸𑍍𑌤𑌕𑍈𑌃 ॥ 2𑍮6 ॥

𑌅𑌖𑌂𑌡𑍈𑌕𑌰𑌸𑌂 𑌬𑍍𑌰𑌹𑍍𑌮 𑌨𑌿𑌤𑍍𑌯𑌮𑍁𑌕𑍍𑌤𑌂 𑌨𑌿𑌰𑌾𑌮𑌯𑌮𑍍 ।
𑌸𑍍𑌵𑌸𑍍𑌮𑌿𑌨𑍍 𑌸𑌂𑌦𑌰𑍍𑌶𑌿𑌤𑌂 𑌯𑍇𑌨 𑌸 𑌭𑌵𑍇𑌦𑌸𑍍𑌯𑌂 𑌦𑍇𑌶𑌿𑌕𑌃 ॥ 2𑍮𑍭 ॥

𑌜𑌲𑌾𑌨𑌾𑌂 𑌸𑌾𑌗𑌰𑍋 𑌰𑌾𑌜𑌾 𑌯𑌥𑌾 𑌭𑌵𑌤𑌿 𑌪𑌾𑌰𑍍𑌵𑌤𑌿 ।
𑌗𑍁𑌰𑍂𑌣𑌾𑌂 𑌤𑌤𑍍𑌰 𑌸𑌰𑍍𑌵𑍇𑌷𑌾𑌂 𑌰𑌾𑌜𑌾𑌽𑌯𑌂 𑌪𑌰𑌮𑍋 𑌗𑍁𑌰𑍁𑌃 ॥ 2𑍮𑍮 ॥

𑌮𑍋𑌹𑌾𑌦𑌿𑌰𑌹𑌿𑌤𑌃 𑌶𑌾𑌂𑌤𑍋 𑌨𑌿𑌤𑍍𑌯𑌤𑍃𑌪𑍍𑌤𑍋 𑌨𑌿𑌰𑌾𑌶𑍍𑌰𑌯𑌃 ।
𑌤𑍃𑌣𑍀𑌕𑍃𑌤𑌬𑍍𑌰𑌹𑍍𑌮𑌵𑌿𑌷𑍍𑌣𑍁𑌵𑍈𑌭𑌵𑌃 𑌪𑌰𑌮𑍋 𑌗𑍁𑌰𑍁𑌃 ॥ 2𑍮𑍯 ॥

𑌸𑌰𑍍𑌵𑌕𑌾𑌲𑌵𑌿𑌦𑍇𑌶𑍇𑌷𑍁 𑌸𑍍𑌵𑌤𑌂𑌤𑍍𑌰𑍋 𑌨𑌿𑌶𑍍𑌚𑌲𑌸𑍍𑌸𑍁𑌖𑍀 ।
𑌅𑌖𑌂𑌡𑍈𑌕𑌰𑌸𑌾𑌸𑍍𑌵𑌾𑌦𑌤𑍃𑌪𑍍𑌤𑍋 𑌹𑌿 𑌪𑌰𑌮𑍋 𑌗𑍁𑌰𑍁𑌃 ॥ 2𑍯0 ॥

𑌦𑍍𑌵𑍈𑌤𑌾𑌦𑍍𑌵𑍈𑌤𑌵𑌿𑌨𑌿𑌰𑍍𑌮𑍁𑌕𑍍𑌤𑌃 𑌸𑍍𑌵𑌾𑌨𑍁𑌭𑍂𑌤𑌿𑌪𑍍𑌰𑌕𑌾𑌶𑌵𑌾𑌨𑍍 ।
𑌅𑌜𑍍𑌞𑌾𑌨𑌾𑌂𑌧𑌤𑌮𑌶𑍍𑌛𑍇𑌤𑍍𑌤𑌾 𑌸𑌰𑍍𑌵𑌜𑍍𑌞𑌃 𑌪𑌰𑌮𑍋 𑌗𑍁𑌰𑍁𑌃 ॥ 2𑍯1 ॥

𑌯𑌸𑍍𑌯 𑌦𑌰𑍍𑌶𑌨𑌮𑌾𑌤𑍍𑌰𑍇𑌣 𑌮𑌨𑌸𑌃 𑌸𑍍𑌯𑌾𑌤𑍍 𑌪𑍍𑌰𑌸𑌨𑍍𑌨𑌤𑌾 ।
𑌸𑍍𑌵𑌯𑌂 𑌭𑍂𑌯𑌾𑌤𑍍 𑌧𑍃𑌤𑌿𑌶𑍍𑌶𑌾𑌂𑌤𑌿𑌃 𑌸 𑌭𑌵𑍇𑌤𑍍 𑌪𑌰𑌮𑍋 𑌗𑍁𑌰𑍁𑌃 ॥ 2𑍯2 ॥

𑌸𑌿𑌦𑍍𑌧𑌿𑌜𑌾𑌲𑌂 𑌸𑌮𑌾𑌲𑍋𑌕𑍍𑌯 𑌯𑍋𑌗𑌿𑌨𑌾𑌂 𑌮𑌂𑌤𑍍𑌰𑌵𑌾𑌦𑌿𑌨𑌾𑌮𑍍 ।
𑌤𑍁𑌚𑍍𑌛𑌾𑌕𑌾𑌰𑌮𑌨𑍋𑌵𑍃𑌤𑍍𑌤𑌿𑌃 𑌯𑌸𑍍𑌯𑌾𑌸𑍌 𑌪𑌰𑌮𑍋 𑌗𑍁𑌰𑍁𑌃 ॥ 2𑍯3 ॥

𑌸𑍍𑌵𑌶𑌰𑍀𑌰𑌂 𑌶𑌵𑌂 𑌪𑌶𑍍𑌯𑌨𑍍 𑌤𑌥𑌾 𑌸𑍍𑌵𑌾𑌤𑍍𑌮𑌾𑌨𑌮𑌦𑍍𑌵𑌯𑌮𑍍 ।
𑌯𑌃 𑌸𑍍𑌤𑍍𑌰𑍀𑌕𑌨𑌕𑌮𑍋𑌹𑌘𑍍𑌨𑌃 𑌸 𑌭𑌵𑍇𑌤𑍍 𑌪𑌰𑌮𑍋 𑌗𑍁𑌰𑍁𑌃 ॥ 2𑍯4 ॥

𑌮𑍌𑌨𑍀 𑌵𑌾𑌗𑍍𑌮𑍀𑌤𑌿 𑌤𑌤𑍍𑌤𑍍𑌵𑌜𑍍𑌞𑍋 𑌦𑍍𑌵𑌿𑌧𑌾𑌽𑌭𑍂𑌚𑍍𑌛𑍃𑌣𑍁 𑌪𑌾𑌰𑍍𑌵𑌤𑌿 ।
𑌨 𑌕𑌶𑍍𑌚𑌿𑌨𑍍𑌮𑍌𑌨𑌿𑌨𑌾𑌂 𑌲𑍋𑌭𑍋 𑌲𑍋𑌕𑍇𑌽𑌸𑍍𑌮𑌿𑌨𑍍𑌭𑌵𑌤𑌿 𑌪𑍍𑌰𑌿𑌯𑍇 ॥ 2𑍯5 ॥

𑌵𑌾𑌗𑍍𑌮𑍀 𑌤𑍂𑌤𑍍𑌕𑌟𑌸𑌂𑌸𑌾𑌰𑌸𑌾𑌗𑌰𑍋𑌤𑍍𑌤𑌾𑌰𑌣𑌕𑍍𑌷𑌮𑌃 ।
𑌯𑌤𑍋𑌽𑌸𑍌 𑌸𑌂𑌶𑌯𑌚𑍍𑌛𑍇𑌤𑍍𑌤𑌾 𑌶𑌾𑌸𑍍𑌤𑍍𑌰𑌯𑍁𑌕𑍍𑌤𑍍𑌯𑌨𑍁𑌭𑍂𑌤𑌿𑌭𑌿𑌃 ॥ 2𑍯6 ॥

𑌗𑍁𑌰𑍁𑌨𑌾𑌮𑌜𑌪𑌾𑌦𑍍𑌦𑍇𑌵𑌿 𑌬𑌹𑍁𑌜𑌨𑍍𑌮𑌾𑌰𑍍𑌜𑌿𑌤𑌾𑌨𑍍𑌯𑌪𑌿 ।
𑌪𑌾𑌪𑌾𑌨𑌿 𑌵𑌿𑌲𑌯𑌂 𑌯𑌾𑌂𑌤𑌿 𑌨𑌾𑌸𑍍𑌤𑌿 𑌸𑌂𑌦𑍇𑌹𑌮𑌣𑍍𑌵𑌪𑌿 ॥ 2𑍯𑍭 ॥

𑌶𑍍𑌰𑍀𑌗𑍁𑌰𑍋𑌸𑍍𑌸𑌦𑍃𑌶𑌂 𑌦𑍈𑌵𑌂 𑌶𑍍𑌰𑍀𑌗𑍁𑌰𑍋𑌸𑌦𑍃𑌶𑌃 𑌪𑌿𑌤𑌾 ।
𑌗𑍁𑌰𑍁𑌧𑍍𑌯𑌾𑌨𑌸𑌮𑌂 𑌕𑌰𑍍𑌮 𑌨𑌾𑌸𑍍𑌤𑌿 𑌨𑌾𑌸𑍍𑌤𑌿 𑌮𑌹𑍀𑌤𑌲𑍇 ॥ 2𑍯𑍮 ॥

𑌕𑍁𑌲𑌂 𑌧𑌨𑌂 𑌬𑌲𑌂 𑌶𑌾𑌸𑍍𑌤𑍍𑌰𑌂 𑌬𑌾𑌂𑌧𑌵𑌾𑌸𑍍𑌸𑍋𑌦𑌰𑌾 𑌇𑌮𑍇 ।
𑌮𑌰𑌣𑍇 𑌨𑍋𑌪𑌯𑍁𑌜𑍍𑌯𑌂𑌤𑍇 𑌗𑍁𑌰𑍁𑌰𑍇𑌕𑍋 𑌹𑌿 𑌤𑌾𑌰𑌕𑌃 ॥ 2𑍯𑍯 ॥

𑌕𑍁𑌲𑌮𑍇𑌵 𑌪𑌵𑌿𑌤𑍍𑌰𑌂 𑌸𑍍𑌯𑌾𑌤𑍍 𑌸𑌤𑍍𑌯𑌂 𑌸𑍍𑌵𑌗𑍁𑌰𑍁𑌸𑍇𑌵𑌯𑌾 ।
𑌤𑍃𑌪𑍍𑌤𑌾𑌃 𑌸𑍍𑌯𑍁𑌸𑍍𑌸𑌕𑌲𑌾 𑌦𑍇𑌵𑌾 𑌬𑍍𑌰𑌹𑍍𑌮𑌾𑌦𑍍𑌯𑌾 𑌗𑍁𑌰𑍁𑌤𑌰𑍍𑌪𑌣𑌾𑌤𑍍 ॥ 300 ॥

𑌗𑍁𑌰𑍁𑌰𑍇𑌕𑍋 𑌹𑌿 𑌜𑌾𑌨𑌾𑌤𑌿 𑌸𑍍𑌵𑌰𑍂𑌪𑌂 𑌦𑍇𑌵𑌮𑌵𑍍𑌯𑌯𑌮𑍍 ।
𑌤𑌦𑍍​𑌜𑍍𑌞𑌾𑌨𑌂 𑌯𑌤𑍍𑌪𑍍𑌰𑌸𑌾𑌦𑍇𑌨 𑌨𑌾𑌨𑍍𑌯𑌥𑌾 𑌶𑌾𑌸𑍍𑌤𑍍𑌰𑌕𑍋𑌟𑌿𑌭𑌿𑌃 ॥ 301 ॥

𑌸𑍍𑌵𑌰𑍂𑌪𑌜𑍍𑌞𑌾𑌨𑌶𑍂𑌨𑍍𑌯𑍇𑌨 𑌕𑍃𑌤𑌮𑌪𑍍𑌯𑌕𑍃𑌤𑌂 𑌭𑌵𑍇𑌤𑍍 ।
𑌤𑌪𑍋𑌜𑌪𑌾𑌦𑌿𑌕𑌂 𑌦𑍇𑌵𑌿 𑌸𑌕𑌲𑌂 𑌬𑌾𑌲𑌜𑌲𑍍𑌪𑌵𑌤𑍍 ॥ 302 ॥

𑌶𑌿𑌵𑌂 𑌕𑍇𑌚𑌿𑌦𑍍𑌧𑌰𑌿𑌂 𑌕𑍇𑌚𑌿𑌦𑍍𑌵𑌿𑌧𑌿𑌂 𑌕𑍇𑌚𑌿𑌤𑍍𑌤𑍁 𑌕𑍇𑌚𑌨 ।
𑌶𑌕𑍍𑌤𑌿𑌂 𑌦𑍈𑌵𑌮𑌿𑌤𑌿 𑌜𑍍𑌞𑌾𑌤𑍍𑌵𑌾 𑌵𑌿𑌵𑌦𑌂𑌤𑌿 𑌵𑍃𑌥𑌾 𑌨𑌰𑌾𑌃 ॥ 303 ॥

𑌨 𑌜𑌾𑌨𑌂𑌤𑌿 𑌪𑌰𑌂 𑌤𑌤𑍍𑌤𑍍𑌵𑌂 𑌗𑍁𑌰𑍁𑌦𑍀𑌕𑍍𑌷𑌾𑌪𑌰𑌾𑌙𑍍𑌮𑍁𑌖𑌾𑌃 ।
𑌭𑍍𑌰𑌾𑌂𑌤𑌾𑌃 𑌪𑌶𑍁𑌸𑌮𑌾 𑌹𑍍𑌯𑍇𑌤𑍇 𑌸𑍍𑌵𑌪𑌰𑌿𑌜𑍍𑌞𑌾𑌨𑌵𑌰𑍍𑌜𑌿𑌤𑌾𑌃 ॥ 304 ॥

𑌤𑌸𑍍𑌮𑌾𑌤𑍍𑌕𑍈𑌵𑌲𑍍𑌯𑌸𑌿𑌦𑍍𑌧𑍍𑌯𑌰𑍍𑌥𑌂 𑌗𑍁𑌰𑍁𑌮𑍇𑌵 𑌭𑌜𑍇𑌤𑍍𑌪𑍍𑌰𑌿𑌯𑍇 ।
𑌗𑍁𑌰𑍁𑌂 𑌵𑌿𑌨𑌾 𑌨 𑌜𑌾𑌨𑌂𑌤𑌿 𑌮𑍂𑌢𑌾𑌸𑍍𑌤𑌤𑍍𑌪𑌰𑌮𑌂 𑌪𑌦𑌮𑍍 ॥ 305 ॥

𑌭𑌿𑌦𑍍𑌯𑌤𑍇 𑌹𑍃𑌦𑌯𑌗𑍍𑌰𑌂𑌥𑌿𑌶𑍍𑌛𑌿𑌦𑍍𑌯𑌂𑌤𑍇 𑌸𑌰𑍍𑌵𑌸𑌂𑌶𑌯𑌾𑌃 ।
𑌕𑍍𑌷𑍀𑌯𑌂𑌤𑍇 𑌸𑌰𑍍𑌵𑌕𑌰𑍍𑌮𑌾𑌣𑌿 𑌗𑍁𑌰𑍋𑌃 𑌕𑌰𑍁𑌣𑌯𑌾 𑌶𑌿𑌵𑍇 ॥ 306 ॥

𑌕𑍃𑌤𑌾𑌯𑌾 𑌗𑍁𑌰𑍁𑌭𑌕𑍍𑌤𑍇𑌸𑍍𑌤𑍁 𑌵𑍇𑌦𑌶𑌾𑌸𑍍𑌤𑍍𑌰𑌾𑌨𑍁𑌸𑌾𑌰𑌤𑌃 ।
𑌮𑍁𑌚𑍍𑌯𑌤𑍇 𑌪𑌾𑌤𑌕𑌾𑌦𑍍𑌘𑍋𑌰𑌾𑌤𑍍 𑌗𑍁𑌰𑍁𑌭𑌕𑍍𑌤𑍋 𑌵𑌿𑌶𑍇𑌷𑌤𑌃 ॥ 30𑍭 ॥

𑌦𑍁𑌸𑍍𑌸𑌂𑌗𑌂 𑌚 𑌪𑌰𑌿𑌤𑍍𑌯𑌜𑍍𑌯 𑌪𑌾𑌪𑌕𑌰𑍍𑌮 𑌪𑌰𑌿𑌤𑍍𑌯𑌜𑍇𑌤𑍍 ।
𑌚𑌿𑌤𑍍𑌤𑌚𑌿𑌹𑍍𑌨𑌮𑌿𑌦𑌂 𑌯𑌸𑍍𑌯 𑌤𑌸𑍍𑌯 𑌦𑍀𑌕𑍍𑌷𑌾 𑌵𑌿𑌧𑍀𑌯𑌤𑍇 ॥ 30𑍮 ॥

𑌚𑌿𑌤𑍍𑌤𑌤𑍍𑌯𑌾𑌗𑌨𑌿𑌯𑍁𑌕𑍍𑌤𑌶𑍍𑌚 𑌕𑍍𑌰𑍋𑌧𑌗𑌰𑍍𑌵𑌵𑌿𑌵𑌰𑍍𑌜𑌿𑌤𑌃 ।
𑌦𑍍𑌵𑍈𑌤𑌭𑌾𑌵𑌪𑌰𑌿𑌤𑍍𑌯𑌾𑌗𑍀 𑌤𑌸𑍍𑌯 𑌦𑍀𑌕𑍍𑌷𑌾 𑌵𑌿𑌧𑍀𑌯𑌤𑍇 ॥ 30𑍯 ॥

𑌏𑌤𑌲𑍍𑌲𑌕𑍍𑌷𑌣𑌯𑍁𑌕𑍍𑌤𑌤𑍍𑌵𑌂 𑌸𑌰𑍍𑌵𑌭𑍂𑌤𑌹𑌿𑌤𑍇 𑌰𑌤𑌮𑍍 ।
𑌨𑌿𑌰𑍍𑌮𑌲𑌂 𑌜𑍀𑌵𑌿𑌤𑌂 𑌯𑌸𑍍𑌯 𑌤𑌸𑍍𑌯 𑌦𑍀𑌕𑍍𑌷𑌾 𑌵𑌿𑌧𑍀𑌯𑌤𑍇 ॥ 310 ॥

𑌕𑍍𑌰𑌿𑌯𑌯𑌾 𑌚𑌾𑌨𑍍𑌵𑌿𑌤𑌂 𑌪𑍂𑌰𑍍𑌵𑌂 𑌦𑍀𑌕𑍍𑌷𑌾𑌜𑌾𑌲𑌂 𑌨𑌿𑌰𑍂𑌪𑌿𑌤𑌮𑍍 ।
𑌮𑌂𑌤𑍍𑌰𑌦𑍀𑌕𑍍𑌷𑌾𑌭𑌿𑌧𑌂 𑌸𑌾𑌂𑌗𑍋𑌪𑌾𑌂𑌗𑌂 𑌸𑌰𑍍𑌵𑌂 𑌶𑌿𑌵𑍋𑌦𑌿𑌤𑌮𑍍 ॥ 311 ॥

𑌕𑍍𑌰𑌿𑌯𑌯𑌾 𑌸𑍍𑌯𑌾𑌦𑍍𑌵𑌿𑌰𑌹𑌿𑌤𑌾𑌂 𑌗𑍁𑌰𑍁𑌸𑌾𑌯𑍁𑌜𑍍𑌯𑌦𑌾𑌯𑌿𑌨𑍀𑌮𑍍 ।
𑌗𑍁𑌰𑍁𑌦𑍀𑌕𑍍𑌷𑌾𑌂 𑌵𑌿𑌨𑌾 𑌕𑍋 𑌵𑌾 𑌗𑍁𑌰𑍁𑌤𑍍𑌵𑌾𑌚𑌾𑌰𑌪𑌾𑌲𑌕𑌃 ॥ 312 ॥

𑌶𑌕𑍍𑌤𑍋 𑌨 𑌚𑌾𑌪𑌿 𑌶𑌕𑍍𑌤𑍋 𑌵𑌾 𑌦𑍈𑌶𑌿𑌕𑌾𑌂𑌘𑍍𑌰𑌿 𑌸𑌮𑌾𑌶𑍍𑌰𑌯𑍇𑌤𑍍 ।
𑌤𑌸𑍍𑌯 𑌜𑌨𑍍𑌮𑌾𑌸𑍍𑌤𑌿 𑌸𑌫𑌲𑌂 𑌭𑍋𑌗𑌮𑍋𑌕𑍍𑌷𑌫𑌲𑌪𑍍𑌰𑌦𑌮𑍍 ॥ 313 ॥

𑌅𑌤𑍍𑌯𑌂𑌤𑌚𑌿𑌤𑍍𑌤𑌪𑌕𑍍𑌵𑌸𑍍𑌯 𑌶𑍍𑌰𑌦𑍍𑌧𑌾𑌭𑌕𑍍𑌤𑌿𑌯𑍁𑌤𑌸𑍍𑌯 𑌚 ।
𑌪𑍍𑌰𑌵𑌕𑍍𑌤𑌵𑍍𑌯𑌮𑌿𑌦𑌂 𑌦𑍇𑌵𑌿 𑌮𑌮𑌾𑌤𑍍𑌮𑌪𑍍𑌰𑍀𑌤𑌯𑍇 𑌸𑌦𑌾 ॥ 314 ॥

𑌰𑌹𑌸𑍍𑌯𑌂 𑌸𑌰𑍍𑌵𑌶𑌾𑌸𑍍𑌤𑍍𑌰𑍇𑌷𑍁 𑌗𑍀𑌤𑌾𑌶𑌾𑌸𑍍𑌤𑍍𑌰𑌮𑌿𑌦𑌂 𑌶𑌿𑌵𑍇 ।
𑌸𑌮𑍍𑌯𑌕𑍍𑌪𑌰𑍀𑌕𑍍𑌷𑍍𑌯 𑌵𑌕𑍍𑌤𑌵𑍍𑌯𑌂 𑌸𑌾𑌧𑌕𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 315 ॥

𑌸𑌤𑍍𑌕𑌰𑍍𑌮𑌪𑌰𑌿𑌪𑌾𑌕𑌾𑌚𑍍𑌚 𑌚𑌿𑌤𑍍𑌤𑌶𑍁𑌦𑍍𑌧𑌿𑌶𑍍𑌚 𑌧𑍀𑌮𑌤𑌃 ।
𑌸𑌾𑌧𑌕𑌸𑍍𑌯𑍈𑌵 𑌵𑌕𑍍𑌤𑌵𑍍𑌯𑌾 𑌗𑍁𑌰𑍁𑌗𑍀𑌤𑌾 𑌪𑍍𑌰𑌯𑌤𑍍𑌨𑌤𑌃 ॥ 316 ॥

𑌨𑌾𑌸𑍍𑌤𑌿𑌕𑌾𑌯 𑌕𑍃𑌤𑌘𑍍𑌨𑌾𑌯 𑌦𑌾𑌂𑌭𑌿𑌕𑌾𑌯 𑌶𑌠𑌾𑌯 𑌚 ।
𑌅𑌭𑌕𑍍𑌤𑌾𑌯 𑌵𑌿𑌭𑌕𑍍𑌤𑌾𑌯 𑌨 𑌵𑌾𑌚𑍍𑌯𑍇𑌯𑌂 𑌕𑌦𑌾𑌚𑌨 ॥ 31𑍭 ॥

𑌸𑍍𑌤𑍍𑌰𑍀𑌲𑍋𑌲𑍁𑌪𑌾𑌯 𑌮𑍂𑌰𑍍𑌖𑌾𑌯 𑌕𑌾𑌮𑍋𑌪𑌹𑌤𑌚𑍇𑌤𑌸𑍇 ।
𑌨𑌿𑌂𑌦𑌕𑌾𑌯 𑌨 𑌵𑌕𑍍𑌤𑌵𑍍𑌯𑌾 𑌗𑍁𑌰𑍁𑌗𑍀𑌤𑌾 𑌸𑍍𑌵𑌭𑌾𑌵𑌤𑌃 ॥ 31𑍮 ॥

𑌸𑌰𑍍𑌵𑌪𑌾𑌪𑌪𑍍𑌰𑌶𑌮𑌨𑌂 𑌸𑌰𑍍𑌵𑍋𑌪𑌦𑍍𑌰𑌵𑌵𑌾𑌰𑌕𑌮𑍍 ।
𑌜𑌨𑍍𑌮𑌮𑍃𑌤𑍍𑌯𑍁𑌹𑌰𑌂 𑌦𑍇𑌵𑌿 𑌗𑍀𑌤𑌾𑌶𑌾𑌸𑍍𑌤𑍍𑌰𑌮𑌿𑌦𑌂 𑌶𑌿𑌵𑍇 ॥ 31𑍯 ॥

𑌶𑍍𑌰𑍁𑌤𑌿𑌸𑌾𑌰𑌮𑌿𑌦𑌂 𑌦𑍇𑌵𑌿 𑌸𑌰𑍍𑌵𑌮𑍁𑌕𑍍𑌤𑌂 𑌸𑌮𑌾𑌸𑌤𑌃 ।
𑌨𑌾𑌨𑍍𑌯𑌥𑌾 𑌸𑌦𑍍𑌗𑌤𑌿𑌃 𑌪𑍁𑌂𑌸𑌾𑌂 𑌵𑌿𑌨𑌾 𑌗𑍁𑌰𑍁𑌪𑌦𑌂 𑌶𑌿𑌵𑍇 ॥ 320 ॥

𑌬𑌹𑍁𑌜𑌨𑍍𑌮𑌕𑍃𑌤𑌾𑌤𑍍𑌪𑌾𑌪𑌾𑌦𑌯𑌮𑌰𑍍𑌥𑍋 𑌨 𑌰𑍋𑌚𑌤𑍇 ।
𑌜𑌨𑍍𑌮𑌬𑌂𑌧𑌨𑌿𑌵𑍃𑌤𑍍𑌤𑍍𑌯𑌰𑍍𑌥𑌂 𑌗𑍁𑌰𑍁𑌮𑍇𑌵 𑌭𑌜𑍇𑌤𑍍𑌸𑌦𑌾 ॥ 321 ॥

𑌅𑌹𑌮𑍇𑌵 𑌜𑌗𑌤𑍍𑌸𑌰𑍍𑌵𑌮𑌹𑌮𑍇𑌵 𑌪𑌰𑌂 𑌪𑌦𑌮𑍍 ।
𑌏𑌤𑌦𑍍​𑌜𑍍𑌞𑌾𑌨𑌂 𑌯𑌤𑍋 𑌭𑍂𑌯𑌾𑌤𑍍𑌤𑌂 𑌗𑍁𑌰𑍁𑌂 𑌪𑍍𑌰𑌣𑌮𑌾𑌮𑍍𑌯𑌹𑌮𑍍 ॥ 322 ॥

𑌅𑌲𑌂 𑌵𑌿𑌕𑌲𑍍𑌪𑍈𑌰𑌹𑌮𑍇𑌵 𑌕𑍇𑌵𑌲𑌂
𑌮𑌯𑌿 𑌸𑍍𑌥𑌿𑌤𑌂 𑌵𑌿𑌶𑍍𑌵𑌮𑌿𑌦𑌂 𑌚𑌰𑌾𑌚𑌰𑌮𑍍 ।
𑌇𑌦𑌂 𑌰𑌹𑌸𑍍𑌯𑌂 𑌮𑌮 𑌯𑍇𑌨 𑌦𑌰𑍍𑌶𑌿𑌤𑌂
𑌸 𑌵𑌂𑌦𑌨𑍀𑌯𑍋 𑌗𑍁𑌰𑍁𑌰𑍇𑌵 𑌕𑍇𑌵𑌲𑌮𑍍 ॥ 323 ॥

𑌯𑌸𑍍𑌯𑌾𑌂𑌤𑌂 𑌨𑌾𑌦𑌿𑌮𑌧𑍍𑌯𑌂 𑌨 𑌹𑌿 𑌕𑌰𑌚𑌰𑌣𑌂 𑌨𑌾𑌮𑌗𑍋𑌤𑍍𑌰𑌂 𑌨 𑌸𑍂𑌤𑍍𑌰𑌮𑍍 ।
𑌨𑍋 𑌜𑌾𑌤𑌿𑌰𑍍𑌨𑍈𑌵 𑌵𑌰𑍍𑌣𑍋 𑌨 𑌭𑌵𑌤𑌿 𑌪𑍁𑌰𑍁𑌷𑍋 𑌨𑍋 𑌨𑌪𑍁𑌂𑌸𑍋 𑌨 𑌚 𑌸𑍍𑌤𑍍𑌰𑍀 ॥ 324 ॥

𑌨𑌾𑌕𑌾𑌰𑌂 𑌨𑍋 𑌵𑌿𑌕𑌾𑌰𑌂 𑌨 𑌹𑌿 𑌜𑌨𑌿𑌮𑌰𑌣𑌂 𑌨𑌾𑌸𑍍𑌤𑌿 𑌪𑍁𑌣𑍍𑌯𑌂 𑌨 𑌪𑌾𑌪𑌮𑍍 ।
𑌨𑍋𑌽𑌤𑌤𑍍𑌤𑍍𑌵𑌂 𑌤𑌤𑍍𑌤𑍍𑌵𑌮𑍇𑌕𑌂 𑌸𑌹𑌜𑌸𑌮𑌰𑌸𑌂 𑌸𑌦𑍍𑌗𑍁𑌰𑍁𑌂 𑌤𑌂 𑌨𑌮𑌾𑌮𑌿 ॥ 325 ॥

𑌨𑌿𑌤𑍍𑌯𑌾𑌯 𑌸𑌤𑍍𑌯𑌾𑌯 𑌚𑌿𑌦𑌾𑌤𑍍𑌮𑌕𑌾𑌯
𑌨𑌵𑍍𑌯𑌾𑌯 𑌭𑌵𑍍𑌯𑌾𑌯 𑌪𑌰𑌾𑌤𑍍𑌪𑌰𑌾𑌯 ।
𑌶𑍁𑌦𑍍𑌧𑌾𑌯 𑌬𑍁𑌦𑍍𑌧𑌾𑌯 𑌨𑌿𑌰𑌂𑌜𑌨𑌾𑌯
𑌨𑌮𑍋𑌽𑌸𑍍𑌤𑍁 𑌨𑌿𑌤𑍍𑌯𑌂 𑌗𑍁𑌰𑍁𑌶𑍇𑌖𑌰𑌾𑌯 ॥ 326 ॥

𑌸𑌚𑍍𑌚𑌿𑌦𑌾𑌨𑌂𑌦𑌰𑍂𑌪𑌾𑌯 𑌵𑍍𑌯𑌾𑌪𑌿𑌨𑍇 𑌪𑌰𑌮𑌾𑌤𑍍𑌮𑌨𑍇 ।
𑌨𑌮𑌃 𑌶𑍍𑌰𑍀𑌗𑍁𑌰𑍁𑌨𑌾𑌥𑌾𑌯 𑌪𑍍𑌰𑌕𑌾𑌶𑌾𑌨𑌂𑌦𑌮𑍂𑌰𑍍𑌤𑌯𑍇 ॥ 32𑍭 ॥

𑌸𑌤𑍍𑌯𑌾𑌨𑌂𑌦𑌸𑍍𑌵𑌰𑍂𑌪𑌾𑌯 𑌬𑍋𑌧𑍈𑌕𑌸𑍁𑌖𑌕𑌾𑌰𑌿𑌣𑍇 ।
𑌨𑌮𑍋 𑌵𑍇𑌦𑌾𑌂𑌤𑌵𑍇𑌦𑍍𑌯𑌾𑌯 𑌗𑍁𑌰𑌵𑍇 𑌬𑍁𑌦𑍍𑌧𑌿𑌸𑌾𑌕𑍍𑌷𑌿𑌣𑍇 ॥ 32𑍮 ॥

𑌨𑌮𑌸𑍍𑌤𑍇 𑌨𑌾𑌥 𑌭𑌗𑌵𑌨𑍍 𑌶𑌿𑌵𑌾𑌯 𑌗𑍁𑌰𑍁𑌰𑍂𑌪𑌿𑌣𑍇 ।
𑌵𑌿𑌦𑍍𑌯𑌾𑌵𑌤𑌾𑌰𑌸𑌂𑌸𑌿𑌦𑍍𑌧𑍍𑌯𑍈 𑌸𑍍𑌵𑍀𑌕𑍃𑌤𑌾𑌨𑍇𑌕𑌵𑌿𑌗𑍍𑌰𑌹 ॥ 32𑍯 ॥

𑌨𑌵𑌾𑌯 𑌨𑌵𑌰𑍂𑌪𑌾𑌯 𑌪𑌰𑌮𑌾𑌰𑍍𑌥𑍈𑌕𑌰𑍂𑌪𑌿𑌣𑍇 ।
𑌸𑌰𑍍𑌵𑌾𑌜𑍍𑌞𑌾𑌨𑌤𑌮𑍋𑌭𑍇𑌦𑌭𑌾𑌨𑌵𑍇 𑌚𑌿𑌦𑍍𑌘𑌨𑌾𑌯 𑌤𑍇 ॥ 330 ॥

𑌸𑍍𑌵𑌤𑌂𑌤𑍍𑌰𑌾𑌯 𑌦𑌯𑌾𑌕𑍍𑌲𑍁𑌪𑍍𑌤𑌵𑌿𑌗𑍍𑌰𑌹𑌾𑌯 𑌶𑌿𑌵𑌾𑌤𑍍𑌮𑌨𑍇 ।
𑌪𑌰𑌤𑌂𑌤𑍍𑌰𑌾𑌯 𑌭𑌕𑍍𑌤𑌾𑌨𑌾𑌂 𑌭𑌵𑍍𑌯𑌾𑌨𑌾𑌂 𑌭𑌵𑍍𑌯𑌰𑍂𑌪𑌿𑌣𑍇 ॥ 331 ॥

𑌵𑌿𑌵𑍇𑌕𑌿𑌨𑌾𑌂 𑌵𑌿𑌵𑍇𑌕𑌾𑌯 𑌵𑌿𑌮𑌰𑍍𑌶𑌾𑌯 𑌵𑌿𑌮𑌰𑍍𑌶𑌿𑌨𑌾𑌮𑍍 ।
𑌪𑍍𑌰𑌕𑌾𑌶𑌿𑌨𑌾𑌂 𑌪𑍍𑌰𑌕𑌾𑌶𑌾𑌯 𑌜𑍍𑌞𑌾𑌨𑌿𑌨𑌾𑌂 𑌜𑍍𑌞𑌾𑌨𑌰𑍂𑌪𑌿𑌣𑍇 ॥ 332 ॥

𑌪𑍁𑌰𑌸𑍍𑌤𑌾𑌤𑍍𑌪𑌾𑌰𑍍𑌶𑍍𑌵𑌯𑍋𑌃 𑌪𑍃𑌷𑍍𑌠𑍇 𑌨𑌮𑌸𑍍𑌕𑍁𑌰𑍍𑌯𑌾𑌦𑍁𑌪𑌰𑍍𑌯𑌧𑌃 ।
𑌸𑌦𑌾 𑌮𑌚𑍍𑌚𑌿𑌤𑍍𑌤𑌰𑍂𑌪𑍇𑌣 𑌵𑌿𑌧𑍇𑌹𑌿 𑌭𑌵𑌦𑌾𑌸𑌨𑌮𑍍 ॥ 333 ॥

𑌶𑍍𑌰𑍀𑌗𑍁𑌰𑍁𑌂 𑌪𑌰𑌮𑌾𑌨𑌂𑌦𑌂 𑌵𑌂𑌦𑍇 𑌹𑍍𑌯𑌾𑌨𑌂𑌦𑌵𑌿𑌗𑍍𑌰𑌹𑌮𑍍 ।
𑌯𑌸𑍍𑌯 𑌸𑌨𑍍𑌨𑌿𑌧𑌿𑌮𑌾𑌤𑍍𑌰𑍇𑌣 𑌚𑌿𑌦𑌾𑌨𑌂𑌦𑌾𑌯 𑌤𑍇 𑌮𑌨𑌃 ॥ 334 ॥

𑌨𑌮𑍋𑌽𑌸𑍍𑌤𑍁 𑌗𑍁𑌰𑌵𑍇 𑌤𑍁𑌭𑍍𑌯𑌂 𑌸𑌹𑌜𑌾𑌨𑌂𑌦𑌰𑍂𑌪𑌿𑌣𑍇 ।
𑌯𑌸𑍍𑌯 𑌵𑌾𑌗𑌮𑍃𑌤𑌂 𑌹𑌂𑌤𑌿 𑌵𑌿𑌷𑌂 𑌸𑌂𑌸𑌾𑌰𑌸𑌂𑌜𑍍𑌞𑌕𑌮𑍍 ॥ 335 ॥

𑌨𑌾𑌨𑌾𑌯𑍁𑌕𑍍𑌤𑍋𑌪𑌦𑍇𑌶𑍇𑌨 𑌤𑌾𑌰𑌿𑌤𑌾 𑌶𑌿𑌷𑍍𑌯𑌸𑌂𑌤𑌤𑌿𑌃 ।
𑌤𑌤𑍍𑌕𑍃𑌪𑌾𑌸𑌾𑌰𑌵𑍇𑌦𑍇𑌨 𑌗𑍁𑌰𑍁𑌚𑌿𑌤𑍍𑌪𑌦𑌮𑌚𑍍𑌯𑍁𑌤𑌮𑍍 ॥ 336 ॥

[𑌪𑌾𑌠𑌭𑍇𑌦𑌃 -
𑌅𑌚𑍍𑌯𑍁𑌤𑌾𑌯 𑌨𑌮𑌸𑍍𑌤𑍁𑌭𑍍𑌯𑌂 𑌗𑍁𑌰𑌵𑍇 𑌪𑌰𑌮𑌾𑌤𑍍𑌮𑌨𑍇 ।
𑌸𑍍𑌵𑌾𑌰𑌾𑌮𑍋𑌕𑍍𑌤𑌪𑌦𑍇𑌚𑍍𑌛𑍂𑌨𑌾𑌂 𑌦𑌤𑍍𑌤𑌂 𑌯𑍇𑌨𑌾𑌚𑍍𑌯𑍁𑌤𑌂 𑌪𑌦𑌮𑍍 ॥
]
𑌅𑌚𑍍𑌯𑍁𑌤𑌾𑌯 𑌨𑌮𑌸𑍍𑌤𑍁𑌭𑍍𑌯𑌂 𑌗𑍁𑌰𑌵𑍇 𑌪𑌰𑌮𑌾𑌤𑍍𑌮𑌨𑍇 ।
𑌸𑌰𑍍𑌵𑌤𑌂𑌤𑍍𑌰𑌸𑍍𑌵𑌤𑌂𑌤𑍍𑌰𑌾𑌯 𑌚𑌿𑌦𑍍𑌘𑌨𑌾𑌨𑌂𑌦𑌮𑍂𑌰𑍍𑌤𑌯𑍇 ॥ 33𑍭 ॥

𑌨𑌮𑍋𑌽𑌚𑍍𑌯𑍁𑌤𑌾𑌯 𑌗𑍁𑌰𑌵𑍇𑌽𑌜𑍍𑌞𑌾𑌨𑌧𑍍𑌵𑌾𑌂𑌤𑍈𑌕𑌭𑌾𑌨𑌵𑍇 ।
𑌶𑌿𑌷𑍍𑌯𑌸𑌨𑍍𑌮𑌾𑌰𑍍𑌗𑌪𑌟𑌵𑍇 𑌕𑍃𑌪𑌾𑌪𑍀𑌯𑍂𑌷𑌸𑌿𑌂𑌧𑌵𑍇 ॥ 33𑍮 ॥

𑌓𑌮𑌚𑍍𑌯𑍁𑌤𑌾𑌯 𑌗𑍁𑌰𑌵𑍇 𑌶𑌿𑌷𑍍𑌯𑌸𑌂𑌸𑌾𑌰𑌸𑍇𑌤𑌵𑍇 ।
𑌭𑌕𑍍𑌤𑌕𑌾𑌰𑍍𑌯𑍈𑌕𑌸𑌿𑌂𑌹𑌾𑌯 𑌨𑌮𑌸𑍍𑌤𑍇 𑌚𑌿𑌤𑍍𑌸𑍁𑌖𑌾𑌤𑍍𑌮𑌨𑍇 ॥ 33𑍯 ॥

𑌗𑍁𑌰𑍁𑌨𑌾𑌮𑌸𑌮𑌂 𑌦𑍈𑌵𑌂 𑌨 𑌪𑌿𑌤𑌾 𑌨 𑌚 𑌬𑌾𑌂𑌧𑌵𑌾𑌃 ।
𑌗𑍁𑌰𑍁𑌨𑌾𑌮𑌸𑌮𑌃 𑌸𑍍𑌵𑌾𑌮𑍀 𑌨𑍇𑌦𑍃𑌶𑌂 𑌪𑌰𑌮𑌂 𑌪𑌦𑌮𑍍 ॥ 340 ॥

𑌏𑌕𑌾𑌕𑍍𑌷𑌰𑌪𑍍𑌰𑌦𑌾𑌤𑌾𑌰𑌂 𑌯𑍋 𑌗𑍁𑌰𑍁𑌂 𑌨𑍈𑌵 𑌮𑌨𑍍𑌯𑌤𑍇 ।
𑌶𑍍𑌵𑌾𑌨𑌯𑍋𑌨𑌿𑌶𑌤𑌂 𑌗𑌤𑍍𑌵𑌾 𑌚𑌾𑌂𑌡𑌾𑌲𑍇𑌷𑍍𑌵𑌪𑌿 𑌜𑌾𑌯𑌤𑍇 ॥ 341 ॥

𑌗𑍁𑌰𑍁𑌤𑍍𑌯𑌾𑌗𑌾𑌦𑍍𑌭𑌵𑍇𑌨𑍍𑌮𑍃𑌤𑍍𑌯𑍁𑌃 𑌮𑌂𑌤𑍍𑌰𑌤𑍍𑌯𑌾𑌗𑌾𑌦𑍍𑌦𑌰𑌿𑌦𑍍𑌰𑌤𑌾 ।
𑌗𑍁𑌰𑍁𑌮𑌂𑌤𑍍𑌰𑌪𑌰𑌿𑌤𑍍𑌯𑌾𑌗𑍀 𑌰𑍌𑌰𑌵𑌂 𑌨𑌰𑌕𑌂 𑌵𑍍𑌰𑌜𑍇𑌤𑍍 ॥ 342 ॥

𑌶𑌿𑌵𑌕𑍍𑌰𑍋𑌧𑌾𑌦𑍍𑌗𑍁𑌰𑍁𑌸𑍍𑌤𑍍𑌰𑌾𑌤𑌾 𑌗𑍁𑌰𑍁𑌕𑍍𑌰𑍋𑌧𑌾𑌚𑍍𑌛𑌿𑌵𑍋 𑌨 𑌹𑌿 ।
𑌤𑌸𑍍𑌮𑌾𑌤𑍍𑌸𑌰𑍍𑌵𑌪𑍍𑌰𑌯𑌤𑍍𑌨𑍇𑌨 𑌗𑍁𑌰𑍋𑌰𑌾𑌜𑍍𑌞𑌾𑌂 𑌨 𑌲𑌂𑌘𑌯𑍇𑌤𑍍 ॥ 343 ॥

𑌸𑌂𑌸𑌾𑌰𑌸𑌾𑌗𑌰𑌸𑌮𑍁𑌦𑍍𑌧𑌰𑌣𑍈𑌕𑌮𑌂𑌤𑍍𑌰𑌂
𑌬𑍍𑌰𑌹𑍍𑌮𑌾𑌦𑌿𑌦𑍇𑌵𑌮𑍁𑌨𑌿𑌪𑍂𑌜𑌿𑌤𑌸𑌿𑌦𑍍𑌧𑌮𑌂𑌤𑍍𑌰𑌮𑍍 ।
𑌦𑌾𑌰𑌿𑌦𑍍𑌰𑍍𑌯𑌦𑍁𑌃𑌖𑌭𑌵𑌰𑍋𑌗𑌵𑌿𑌨𑌾𑌶𑌮𑌂𑌤𑍍𑌰𑌂
𑌵𑌂𑌦𑍇 𑌮𑌹𑌾𑌭𑌯𑌹𑌰𑌂 𑌗𑍁𑌰𑍁𑌰𑌾𑌜𑌮𑌂𑌤𑍍𑌰𑌮𑍍 ॥ 344 ॥

𑌸𑌪𑍍𑌤𑌕𑍋𑌟𑌿𑌮𑌹𑌾𑌮𑌂𑌤𑍍𑌰𑌾𑌶𑍍𑌚𑌿𑌤𑍍𑌤𑌵𑌿𑌭𑍍𑌰𑌮𑌕𑌾𑌰𑌕𑌾𑌃 ।
𑌏𑌕 𑌏𑌵 𑌮𑌹𑌾𑌮𑌂𑌤𑍍𑌰𑍋 𑌗𑍁𑌰𑍁𑌰𑌿𑌤𑍍𑌯𑌕𑍍𑌷𑌰𑌦𑍍𑌵𑌯𑌮𑍍 ॥ 345 ॥

𑌏𑌵𑌮𑍁𑌕𑍍𑌤𑍍𑌵𑌾 𑌮𑌹𑌾𑌦𑍇𑌵𑌃 𑌪𑌾𑌰𑍍𑌵𑌤𑍀𑌂 𑌪𑍁𑌨𑌰𑌬𑍍𑌰𑌵𑍀𑌤𑍍 ।
𑌇𑌦𑌮𑍇𑌵 𑌪𑌰𑌂 𑌤𑌤𑍍𑌤𑍍𑌵𑌂 𑌶𑍃𑌣𑍁 𑌦𑍇𑌵𑌿 𑌸𑍁𑌖𑌾𑌵𑌹𑌮𑍍 ॥ 346 ॥

𑌗𑍁𑌰𑍁𑌤𑌤𑍍𑌤𑍍𑌵𑌮𑌿𑌦𑌂 𑌦𑍇𑌵𑌿 𑌸𑌰𑍍𑌵𑌮𑍁𑌕𑍍𑌤𑌂 𑌸𑌮𑌾𑌸𑌤𑌃 ।
𑌰𑌹𑌸𑍍𑌯𑌮𑌿𑌦𑌮𑌵𑍍𑌯𑌕𑍍𑌤𑌂 𑌨 𑌵𑌦𑍇𑌦𑍍𑌯𑌸𑍍𑌯 𑌕𑌸𑍍𑌯𑌚𑌿𑌤𑍍 ॥ 34𑍭 ॥

𑌨 𑌮𑍃𑌷𑌾 𑌸𑍍𑌯𑌾𑌦𑌿𑌯𑌂 𑌦𑍇𑌵𑌿 𑌮𑌦𑍁𑌕𑍍𑌤𑌿𑌃 𑌸𑌤𑍍𑌯𑌰𑍂𑌪𑌿𑌣𑍀 ।
𑌗𑍁𑌰𑍁𑌗𑍀𑌤𑌾𑌸𑌮𑌂 𑌸𑍍𑌤𑍋𑌤𑍍𑌰𑌂 𑌨𑌾𑌸𑍍𑌤𑌿 𑌨𑌾𑌸𑍍𑌤𑌿 𑌮𑌹𑍀𑌤𑌲𑍇 ॥ 34𑍮 ॥

𑌗𑍁𑌰𑍁𑌗𑍀𑌤𑌾𑌮𑌿𑌮𑌾𑌂 𑌦𑍇𑌵𑌿 𑌭𑌵𑌦𑍁𑌃𑌖𑌵𑌿𑌨𑌾𑌶𑌿𑌨𑍀𑌮𑍍 ।
𑌗𑍁𑌰𑍁𑌦𑍀𑌕𑍍𑌷𑌾𑌵𑌿𑌹𑍀𑌨𑌸𑍍𑌯 𑌪𑍁𑌰𑌤𑍋 𑌨 𑌪𑌠𑍇𑌤𑍍 𑌕𑍍𑌵𑌚𑌿𑌤𑍍 ॥ 34𑍯 ॥

𑌰𑌹𑌸𑍍𑌯𑌮𑌤𑍍𑌯𑌂𑌤𑌰𑌹𑌸𑍍𑌯𑌮𑍇𑌤𑌨𑍍𑌨 𑌪𑌾𑌪𑌿𑌨𑌾 𑌲𑌭𑍍𑌯𑌮𑌿𑌦𑌂 𑌮𑌹𑍇𑌶𑍍𑌵𑌰𑌿 ।
𑌅𑌨𑍇𑌕𑌜𑌨𑍍𑌮𑌾𑌰𑍍𑌜𑌿𑌤𑌪𑍁𑌣𑍍𑌯𑌪𑌾𑌕𑌾𑌦𑍍𑌗𑍁𑌰𑍋𑌸𑍍𑌤𑍁 𑌤𑌤𑍍𑌤𑍍𑌵𑌂 𑌲𑌭𑌤𑍇 𑌮𑌨𑍁𑌷𑍍𑌯𑌃 ॥ 350 ॥

𑌯𑌸𑍍𑌯 𑌪𑍍𑌰𑌸𑌾𑌦𑌾𑌦𑌹𑌮𑍇𑌵 𑌸𑌰𑍍𑌵𑌂
𑌮𑌯𑍍𑌯𑍇𑌵 𑌸𑌰𑍍𑌵𑌂 𑌪𑌰𑌿𑌕𑌲𑍍𑌪𑌿𑌤𑌂 𑌚 ।
𑌇𑌤𑍍𑌥𑌂 𑌵𑌿𑌜𑌾𑌨𑌾𑌮𑌿 𑌸𑌦𑌾𑌤𑍍𑌮𑌰𑍂𑌪𑌂
𑌤𑌸𑍍𑌯𑌾𑌂𑌘𑍍𑌰𑌿𑌪𑌦𑍍𑌮𑌂 𑌪𑍍𑌰𑌣𑌤𑍋𑌽𑌸𑍍𑌮𑌿 𑌨𑌿𑌤𑍍𑌯𑌮𑍍 ॥ 351 ॥

𑌅𑌜𑍍𑌞𑌾𑌨𑌤𑌿𑌮𑌿𑌰𑌾𑌂𑌧𑌸𑍍𑌯 𑌵𑌿𑌷𑌯𑌾𑌕𑍍𑌰𑌾𑌂𑌤𑌚𑍇𑌤𑌸𑌃 ।
𑌜𑍍𑌞𑌾𑌨𑌪𑍍𑌰𑌭𑌾𑌪𑍍𑌰𑌦𑌾𑌨𑍇𑌨 𑌪𑍍𑌰𑌸𑌾𑌦𑌂 𑌕𑍁𑌰𑍁 𑌮𑍇 𑌪𑍍𑌰𑌭𑍋 ॥ 352 ॥

𑌇𑌤𑌿 𑌶𑍍𑌰𑍀𑌸𑍍𑌕𑌂𑌦𑌪𑍁𑌰𑌾𑌣𑍇 𑌉𑌤𑍍𑌤𑌰𑌖𑌂𑌡𑍇 𑌉𑌮𑌾𑌮𑌹𑍇𑌶𑍍𑌵𑌰 𑌸𑌂𑌵𑌾𑌦𑍇 𑌶𑍍𑌰𑍀 𑌗𑍁𑌰𑍁𑌗𑍀𑌤𑌾 𑌸𑌮𑌾𑌪𑍍𑌤 ॥

𑌮𑌂𑌗𑌳𑌂
𑌮𑌂𑌗𑌳𑌂 𑌗𑍁𑌰𑍁𑌦𑍇𑌵𑌾𑌯 𑌮𑌹𑌨𑍀𑌯𑌗𑍁𑌣𑌾𑌤𑍍𑌮𑌨𑍇 ।
𑌸𑌰𑍍𑌵𑌲𑍋𑌕𑌶𑌰𑌣𑍍𑌯𑌾𑌯 𑌸𑌾𑌧𑍁𑌰𑍂𑌪𑌾𑌯 𑌮𑌂𑌗𑌳𑌮𑍍 ॥